今日係台灣女生牛一,晏晝出咗去行尖沙咀,順便買埋份生日禮物俾人家,再係LCX既PACIFFIC COFFEE度HEA咗陣,順便組裝吓其中一份生日禮物.我自己都有收穫,係AMERICAN EAGLE買咗特價T恤同短褲($300有找).
係玩具反斗城買埋幸男既生日禮物:THOMAS火車MEGA BLOCK+三輪車,再係隔離既書店買埋THOMAS發聲故事書,先至安心趕去留咗枱既香港老飯店開餐.
雖然都係食舊年既大閘蟹餐,但都無減大家既興緻,話晒蟹料既菜式都算多過其他酒樓既餐,好似呢個蟹粉海鮮羹,東海,美心同鴻星就無啦.
五両有多既大閘蟹,每人一隻,多膏之餘,連蟹腳都多肉~
我同人家都鍾意大閘蟹,之前都係夜上海食,但每人要成九百蚊.雖然係環境靚啲,菜色精緻啲,但論性價比都係香港老飯店OK(二人餐計埋加一$1029).
始終唔太明,點解蟹精小籠包唔可以多啲蟹粉份量呢?其他非大閘蟹類既菜色依舊好味.兩夫妻二人世界,可以專心用餐,再談天說地,點都係,開心事一樁.係幫襯多次既飯店開餐,很有老夫老妻既感覺.
其實今日都唔係全日二人時間,中午我同人家一齊去幼稚園接幸男放學,搭小巴去市中心元氣食晏.
等嘢食時幸男畫咗張抽張畫,真係點睇都唔明.食飽再一齊行玩具反斗城,再送幸男上外母屋企.有小朋友既家長,就算係自己生日都要顧咗小朋友先,不過有得同幸男一齊,人家當然唔會介意啦.
