村內親子活動

是日放假,接幸男放學,一齊搭小巴去市中心.台灣女生番晏,所以買埋MOS BURGER外賣就搭的士趕番屋企.幸男食過人家準備既午餐,晏晝覺都唔訓就出去球場玩.  

見近排少咗幫幸男影相,於是斜孭住部相機,一手抽住部電動跑車,另一手拖住幸男出球場.幸男見到我部相機,不時停低話"影相丫","呢度影丫".幸男無差別既駕駛,我不時要用盡F1.8至可以影得清幸男既樣子.

幸男每次都會玩齊遊樂場內既設備,尤其係呢架大吉普車.

韆鞦亦係幸男喜愛既項目,但由於無小童專用既坐兜,所以幸男要坐係大人大髀上.每次蕩個陣,幸男都會問"你驚唔驚呀?",我答"爸爸驚",幸男話"我唔驚". 

呢張相好似一TAKE過就收工,其實幸男背靠住紅柱,轉咗兩個圈,要係好幾張相中搵到個可以收貨既樣本.....

玩咗成個鐘有多,番屋企沖涼後,因太攰而好快訓著.訓醒幸男享用茶點(午餐外賣有剩既MOS BURGER 薯條),晚飯就同幸男一齊番老家黐餐.

自問係一個較懶既父親,無話帶小朋友去學興趣班,或要去較遠既地方玩同體驗,希望幸男大個咗唔會怪我啦.我個人認為,緊密既親子聯繫,應該係成長既首要元素.

一家三口之平日

騎羊送台灣女生去接幸男放學,晏晝係V City既牛角食.第一次食,菜單上既選擇雖然係比金舌多,但好多組合都係唔太啱心水(例如跟沙律)

醬汁比金舌重味,肉類份量比金舌大少少,坐位無金舌咁舒服闊落.較等別既係個牛角飯(白飯上加上醬汁同紫菜),起初幸男唔願食,試過之後就話好食.

夜晚安在家中享用人家準備既住家飯,好耐都係屋企食,所以特意影咗張相.

近來幸男常將筷子放係口內,貪玩咬筷子,睇黎要多加管教....

學校旅行@挪阿方舟

  今日係幸男間幼稚園旅行日,地點係挪阿方舟.
唔係好明點解挪阿方舟好似係天橋底?夾係兩條天橋之間,壓迫感重,香港地真係寸金尺土....

館內其實好似納納雜雜咁,介紹世界文化歷史.幸男最鐘意既係呢間以未來建築師為主題既房,因為多積木玩.

午餐時間係出戶外沙灘享用自備既食品,臨落沙灘前,以青馬大橋作背景影親子照.

沙灘上有老外一家大細曬太陽,仲有懂得享受寫意生活既本地人.

有得玩就食都唔顧,每個小朋友都唔太注心家長們準備既午餐.幸男就掛住同坐隔離既女同學一齊玩泥沙,兩小無猜.

小朋友見到沙灘同水都係情不自禁四圍走.人家要捉住幸男,至可以影到張合照.

玩埋集體堆沙比賽,坐旅遊巴番學校解散.我哋就去咗V City既羅麥記食下午茶.

幸男今日好似好開心咁,扭住媽媽係咁錫面,人家當然受落啦.

原來幸男係謀住人家隻炸雞脾,人家索性俾幸男自己拎住黎食.雖然今次旅行比上次去錦田鄉村俱樂部好,但對大人黎講都有啲悶,志在陪太子出遊.

好友生日飯局@金舌

雖然聽日至係馬SIR生日,但因為我要番晏,所以提議早一日食飯慶祝,地點為市中心金舌.

其實十一月之星仲有Andrew,所以今晚可以話係提早同兩位壽星仔食飯.

食燒肉啱晒幸男口味,其實預科時代午飯時間,我哋三個會去市中心既椰林閣食韓燒套餐.當時因為時間緊迫,食得好趕,臨尾既材料都係由Andrew扮Yan Can Cook既甄文達,咩都放晒入爐度快炒(邊講"very easy"),再大家分番黎食.

除咗肉類,我哋仲叫咗海鮮黎燒,三文魚仲可以俾幸男食添~

晚市食滿三百即減一百,變相係六六折,非常相宜丫.好多同事都只係食牛角,又話金舌唔好食,我就覺得呢度無咁迫,唔洗大排長龍.食物都唔係差丫,雖然菜單選擇比牛角少,但燒肉店黎講有海鮮同肉類都ok丫,唔係一定要賣埋甜品既.

食完飯,Andrew帶隊去樓下既Italian Tomato Cafe食蛋糕,當係壽星仔食生日蛋糕.希望兩位十一月之星食得開心,身體健康,生日快樂.其實今晚最開心個位係幸男,因為有燒肉同蛋糕嘛.

昂平360

今日上午去完幼稚園出席家長日,一家三口搭的士去市中心會合老豆老媽,因為要趕搭E33去東涌,坐纜車上大佛.

係東涌纜車站排隊買飛都要成個鐘至去到售票處,幸男當然扭住要大人抱啦.

上到纜車已經近三點,大家都肚餓,一心諗住一落車就搵地方食嘢.今日既三代同堂活動,都係尋晚番老家黐餐時約既,難得兩老夾到我同人家放假嘛.

有台灣女生拎相機,我同幸男可以有番張父子照.人大咗,怕走樣同走身型,想影多啲相,但奈何多數係渣機個位....

幸男第一次係海洋公園搭纜車都無驚,所以今次搭昂平360都無問題,仲會企高望玻璃外既景色. 

我地買咗來回票,上大佛個程係水晶車廂,賣點係可以望到車廂底下既景物,大家好似雙腳凌空咁...

落車就係市集搵咗間酒樓開餐(4人餐5百蚊有找),其實食肆選擇唔多,最好係東涌食飽至上黎.

一齊係大佛下影番張合照,老媽話要拎住罐啤酒黎影添.山上好大風,同東涌纜車站時差好遠.

幸男話要上到頂見大佛,但爺爺嫲嫲話無力上,於是係樓梯底影張相以"到此一遊"!

堅持見大佛既幸男,聽媽媽既說話自己行上去以示誠意.雖然有幾段路因人多而被抱住上,但總叫做無扭計.

見有香油箱,於是叫幸男將心意放入箱內.好在幸男夠高,可以完成任務.

卒之都上到頂部,雖然大風,幸男不但無好似平時咁驚,仲起手扮大佛既手勢.

近六點去排隊等纜車落山,指示牌話要等一個鐘,老媽怕孫仔會挨餓,所以去咗買雞蛋仔俾幸男.老媽對住幸男,的確化咗唔少戾氣.話說尋晚番老家黐餐,老豆老媽因小事嘈交,但當我同人家提出去大佛,兩老就好緊張咁商量幾點集合.

 上得纜車黎都天黑,仲要中途因強風信號,半天吊停滯咗10分鐘.車箱無燈,風涼水冷,風聲又大.

著陸後,急忙搭巴士入元朗,因為愛羊已有得攞.其實三點幾個陣至愛老闆已話可以攞車,我覆佢要七點,點知等纜車遲咗,要吞到八點多啲至去到.騎羊去番市中心明星會合大隊食晚飯,好在老媽識人,星期六人多到無位俾你排.

PS:雖然今日好攰,但見兩老同個孫開心,都有啲安慰.如果一齊去旅行,真係難以決定行程同地點,反而港內短線團就啱啱好.

斯文背囊

近來想買個斯文背囊黎裝相機以方便同台灣女生及幸男出街影相,因為用緊既單膊出街袋唔可以裝太多嘢(外套,糧水,銀包,電話....),而且太重亦都唔方便.雖然有個LAFUMA背囊,但較鮮色及SPORTY,未能襯斯文裝束(去飲宴場合).

今晚卒之都約人家係市中心LOG ON幫眼買呢個幾日前已睇中既三用袋.背囊模式格數夠多,而且大細啱啱好,襯西裝都得.簡單將兩個扣解開,背囊模式就可以變作手挽模式.我個人就真係唔太慣側孭太重既袋.

比起之前係FRED PERRY同PORTER INTERNATIONAL既背囊款平,只需八百幾蚊就有交易.雖然市面上有相機專用既背囊,但款式始終都係麻麻.將裝住相機既POUCH袋收納係呢個多格數既背囊,就啱晒我既要求.

TAICHI手套

今日番完早更騎羊去市中心係小巴黎食過晏,行番去巴士總站等61X出土瓜灣去阿林買電單車手套.店員聽完我既要求,介紹呢款保暖手套,另一款手背以軟膠墊代替炭纖既款式只係擋風,並不保暖(而且無大碼....). 

 一向用開SPIDI手套,因為舊個對爛咗,所以想買過對.之前係嘉利買,但今年無咩冬天手套款.十月親自去睇過,哥仔話十一二月會番新貨.早幾日打去問,另一位店員實牙實齒話有新款,我出到去太子舖頭睇,得個一對,仲要係黑色為主紅色線為襯(明明問有無新款兼非黑色選擇)

阿林既職員可以明白客人既需要:"我想要對十六七度左右,朝早上公路夠暖既手套","呢對可以".因為職員都係開電單車,可以用佢既親身經驗話你知邊款較合適,而唔係一味叫你摸吓邊款厚啲同靚啲.另外該店亦會為客人訂購代理既品牌,即使店內無現貨,顧客係CATALOG睇中既,都可以幫你訂.唔知係咪代埋既係日本品牌既關係,定係該店服務比較周到.

舊手套於去年已殘破至撻皮兼穿窿,相比之下新手套比較貼手及短身,期待係凍啲既時間可以試吓新手套既表現.

PS:4年前係阿林買TAICHI電單車褸時已覺得該品牌及商店好啱心水~

SONY A7

一直期待既NEX 7後繼機,點知SONY出既係FULL SIZE既A7.像數同樣係2千4百萬,但感光件SIZE加大,處理器亦都升級.起初對其外型有啲唔太接受(因似OLYMPUS既OMD),但念在比NEX 7大既電子觀景器,及進取既定價($11,990-比NEX 7多$3000),整體令人容易接受.

機頂既取向似NEX 6,可以直接調校設定當然比而家我用NEX 3下下要入MENU揀方便.用緊NEX 3既我,有諗過換NEX 7,但由於無WIFI同NFC,所以諗住等吓有無改良版,點知殺出部NEX 6(像數得1千6百萬,只比NEX 3多2百),等等吓就A7同A7R發表.A7R雖然有3千6百萬像數,兼不設低通過濾,但要成$16,990,所以不作考慮.

網上好多人將A7同其他單反既FULL FRAME比,但我覺得SIZE比傳統大機纖巧,方便我行街同小朋友影相好重要.即使連拍及回拍速度不及DSRL機,但總比現役NEX 3好,起碼快門快咗一倍.

顧慮係白平衡會否同NEX 3一樣差(網上有人話NEX系第二代開始已大有改善),吓吓要手動SET白平衡.室外受天氣陽光改變,時時要set會好煩.室內燈內光源多(如酒樓食肆),都要一轉位就set一次.另一麻煩係要買過晒啲鏡,雖然係E mount,但舊有既apsc鏡安裝後會降低相片像數至一千......心水蔡頭F1.8定焦要2014年初至有,即係話十一中買咗機都無鏡用,更唔好話天涯鏡未有發行時間.

PS:期待發售後多啲客觀評論及相片樣本,一切安好就等出年連蔡司F1.8定焦鏡出機.

香港美酒佳餚巡禮

朝早起身湊幸男去置天悅飲茶食晏,跟住就搭車番公司會合一聚後生,CALL的士去香港美酒佳餚巡禮.舊年JASON同豹哥都有各自同朋友去,今年就變咗六人團.

空肚飲酒易醉,更何況係早更後未食晏,所以先買個PIZZA分黎食打底.

大家都有訂購套卷有玻璃杯用,只係臨時買飛加入既釗用膠杯..話晒都係飲食團,點都要張合照作為開始.

慳到出汁,六個人分一塊和牛,不過味道又唔覺特別好,所以都無蝕底.

叫咗燒羊架同辣酒翡翠螺,點知其中一個螺係寄居蟹.....拎去舖位理論,換番兩隻螺番黎,賺咗!

無諗過JASON咁鐘意食火腿,仲要怕醜影相,好在豹哥出面壯膽.

雖然大家唔係專家,但都分得出一張代卷同三張代卷既分別.其間仲分一杯西班牙甜酒分黎試飲,SALE話好過BAILEYS,但大家都覺得BAILEYS好飲啲同濃味啲.咁多個人分一杯仔真係唔係好夠,尤其係試紅酒,所以後段我地都係各自試一杯.

最後諗住試香檳,但結果係以白酒作結尾.見JASON用手機影低日落天色下既酒杯,於是同JASON影張大少少既(希望唔好話我侵犯版權).

雖然無咸蛋黃,但紫藍既天色亦夠迷人.豹哥準備去飲宴,我哋大隊就搭巴士入屯門食西川風味餐廳既雞煲.唔洗湊仔,可以出黎輕鬆吓,已經係好大既娛樂.雖然呢幾日作感冒,好在尋日幸男都鍚住我,俾我訓覺休息,自己玩車仔玩具,無扭計~