年初一拜年

年初一放假,咁啱德輝又係屋企,於是一家三口係市中心食完晏,買埋拜年禮品就一齊去元朗探BB.

今次係第一次見BB,二公子已一歲大,真係有啲唔好意思)一係撞唔啱更期,一係就已約節目)......

幸男起初同RYAN及JESSE保持距離,影合照都係好勉強.....

RYAN問幸男識唔識玩黑白棋,幸男答識.點知一開始就用咗同RYAN一樣既白棋,仲要被揭發唔識玩時,幸男就話不如玩第二啲.最後一齊玩擲骰子既步行棋.

慢熱既幸男永遠都係玩到後期至同新朋友混熟,唔知幸男第時會否好似爸爸咁,有情同兄弟既既好朋友呢?

維園年宵

 

今日一家三口遠赴維園行年宵,計落好以無年都行唔到地方,前年行元朗,舊年行屯門.

一入到去就知人山人海,幸男一眼就搵到今年既心儀氣球,米奇老鼠坐住紅色跑車.

雖然幸男嚷住要買,但我都堅持要行埋個圈睇吓有無其他款至買.幸男心意好堅決,見到有鬆弛熊同THOMAS火車既公仔都無動於衷.

行到中段巳迫人到行唔到咁滯,台灣女生要抱住幸男黎迫,得個"攰"字.

幸男都迫都無晒心機,結果我哋係行咗一半就折番,回程時係其中一個檔位以$68買咗呢款氣球俾幸男.

臨走時幸男至開始笑番,話個氣球好靚.搭車番屯門前去埋SOGO行吓,一家都無收獲,只係幸男係玩具部玩咗一陣.不過帶住個氣球行街搭車真係幾唔方便,好在巴士上有位坐,唔係都唔知點可以邊攬住個氣球邊握住扶手.....

PS:晏晝出去千両食晏時,幸男呢張相可以攞去相睇或者係招聘童養媳~

沙田行商場

今日同台灣女生帶幸男出沙田行吓,一田有幸男最愛既喵喵做賀年招財貓作陳設,幸男當然係揀同喵喵影相,都唔同真人扮既財神合照.

行到咁上下,一齊係PACIFIC COFFEE小休,仲記得幸男一歲多啲個陣都有係度坐過.本來只係叫兩杯咖啡,但幸男又話肚餓,結果買咗個芝士火腿牛角包俾佢食.

幸男今日表現尚可,係MOTHER CARE買衫俾兄弟既小朋友,幸男都有幫手揀,只係影相時唔太合作啫.

呢張相已經係比較成功既一張,起碼無朦......

原本出黎諗住同幸男買番學皮鞋,點知賣晒,要初四後至番貨.我睇中既皮靴依舊無減多啲價.係SONY專門店睇中款肩帶,但紅色無貨,只係得黑同白,搵日出去旺角星際睇吓有無紅色現貨比較吓.見賣$260,問個店員係真皮都真膠,點知個店員答我唔到,亦無幫我去問其他同事.....好在人家見到包裝上一角打住"GENUINE LEATHER".

夜晚番老家黐餐,飯後幸男試cup油角皮.幸男仲有樣學樣,將cup好既圓型油角皮拎出黎等嫲嫲包餡同扭邊.

屯宿兄弟

今晚屯宿之男相約晩飯,地點係何褔堂既大排檔,貪有生啤店係隔離.

各有各忙,難得一聚,當然要影吓相.相中人仕己貴為親大人,好佩服大家能夠有心有力照顧兩位小朋友.

除咗以往係新墟打冷檔常叫既滷水鵝片,當然仲有黃金三寶,油鹽水花甲就比預期中細隻...

Brian點既炸大腸,其實我都好鍾意食,苦奈何台灣女生唔食內臟餸菜,我一個人點食得晒一碟,只有平時去熟食檔叫一串黎食.

黃金三寶食到唔夠喉,於是叫多個避風塘鮮魷.

穌炸生蠔就比較失色,但無減大家聚舊談天既雅興.小朋友升小學既部署,工作前景,攝影交流,部門發展方向...........人生既決定及取向,每個人都會因生活所需及思想性情而有所不同,最重要既有係一班好朋友,真誠地為你分享內心所需.

懷舊晚飯-深井裕記

以前細個老豆老媽會帶一家人同阿公(霍氏)阿婆(番鬼)一齊去深井食晚飯,最有印像既係燒鵝同炸白飯魚同鮮魷.因為大個咗都無再去過幫襯,所以特意約老豆放假黎食,可惜大佬同阿嫂未能出席.

老媽最早到,自己叫咗碟鴨掌鴨翼食住等,老豆就第二個到,我同台灣女生帶住幸男最遲到.原本老媽諗住叫餐(平啲),但我見唔係味味啱食,所以提議散叫,老媽一聽見就話叫個燒鵝特大半隻.

叫咗一枱都係餸,但係無咩海鮮類,因為餐牌真係無咩特別時令海鮮.

以前老豆老媽係三代同堂中排中間,而家就榮升高輩份.

幸男對燒鵝不感興趣,只係偏愛燒鵝脆皮.我本人就覺得燒鵝仲係我細個時食既味道,但其他餸就好似差啲.舊時黎食既都係香港人一家大細黎開餐,而家枱枱都係國內遊客.

老豆曾用菲林相機幫大家飯後於明渠橋上影相,而家就由我部數碼無反相機為大家留念.今晚最開心既,應該係兩老,可以懷勉下以前後生既感覺.

Angel Ring之奧義

好耐都無本地明星為啤酒賣電視廣告(對上一次係星爺做生力啤代言人?),今次仲要係吳彥袓以Angel Ring黎幫ASAHI賣廣告添.

我睇完個廣告後,除咗覺得吳彥袓好型外,就係覺得內容怪怪的.因為平時點飲都係得半個或四分一泡圈,唔通真係靚仔飲杯啤酒都會與別不同??

經過反覆思量,今晚卒之都俾我試到啦,奧義就係用飲管黎飲,仲要快飲至可以做到泡圈既分隔.有興趣既朋友,可以親自或叫伴侶試吓,但一定無廣告既感覺咁優美,因為代言人實在型到無得輸.

假日輕鬆午餐

 

台灣女生番早,我同幸男先去市中心搵位食晏,順便托幸男係兆康站俾份禮物過Ivan.可能幸男餓得滯,見到Ivan都無咩點笑.......

目的地係市中心既築地拉麵,搏佢唔會好似酒樓同其他餐廳咁多人排隊,好在無估計錯誤,一入去就有位.幸男見餐牌有款拉麵配大塊紫菜,就話"要食呢個".

半信半疑咁叫醬油豬軟骨拉麵,嘜我個仔食豬軟骨0架咩?鍾意醬油湯底嘛?好在order到咗,幸男都係啱食,我只係用餐剪刀將豬軟骨剪細.

點咗個100%果汁成份既蘋果汁俾幸男,幸男飲到停唔到,一口氣飲咗一半咁滯.我提醒幸男要食麵先,留番一半黎陣間飲.

人家放工到達麵店時,幸男已食飽,人家先食埋幸男剩底既拉麵,再叫一人一個拉麵黎食.屋企有小朋友,事事都要顧咗細既先,食都要填飽小朋友至有得自己食.

宅男爸爸帶幸男行置樂

星期六番上晝,一放工就騎羊番屋企,因為人家番晏,我就接手看顧幸男.換過套衫就同幸男搭小巴去置樂,求其搵間雲吞麵舖食晏,份量同味道都一般.食咗午餐既幸男要食我啲麵....

同幸男上咗去長頸鹿行吓,幸男係櫥窗見到有麥昆既玩具車,用手指住話想要呢架車車.

店內阿姐搵完一餐之後話得番櫥窗個架,幸男堅持要買.經我法眼驗過,都無話因陳列長期被射燈照到退色,車身又無花痕,於是成交.

中間走廊有間賣LEGO產品既店舖,幸男見到有火車就開心.

櫥窗外有一份啱晒Ivan既商品,我同幸男講不如買俾Ivan叔叔.入到店內見有各式造型既lego人仔鎖匙扣,仲要有一個係巴斯光年(但係最貴),幸男當然話好靚.老闆娘以為買俾小朋友,但我表示係送俾太太(人家之locker匙扣已爛).

舊式既商場,令我充滿好多童年回憶,老豆帶我黎買小學聖誕交換禮物及SD高達模型作生日禮物.中學自己用零用錢黎租漫畫租CD同買模型玩具.打工開始買GAME碟及超合金.雖然好多店舖已轉手,剩下初中時代既只有三間左右(長頸鹿,咭店X2),但好開心呢度可以提供一個平台俾我同幸男重叠,讓幸男感受到我童年時既心情.

PS:之後去咗老媽舖頭坐咗陣,搭小巴番屋企,晚飯番老家黐餐.

溫暖BBQ

今晚大家約埋一齊係元朗偉記bbq,當係歡送Anna同小弟.

閒日唔太多人,大家都可以舒舒服服咁邊燒邊傾.

一眾女子一齊合照,幸男跟唔到大隊做"V"手勢.

呢個組合既照片,對上一次應該係邦邦個餐飲.

大家為我哋預備咗蛋糕,真係太客氣了.我最初認識Anna係佢實習時,原本係一個唔太出聲既紅衫魚(我仲邀請佢同新晉同事們及一眾姐姐上我屋企打邊爐),而家己經係自信及有能力去照顧身邊同事及親人既"娜姐".

男男vs楠楠,我番工時對家講楠過"我好似同自己個仔一齊番工同傾嘢咁".

雖然幸男怕Ivan既鬚,但每次見面都係咁鍾意同Ivan玩.

Jacky真係好力氣,抱高幸男抱到好似摔角倒樹樁咁.

自從上次邦邦結婚,豹哥同家楠Ivan做兄弟個晚帶幸男四圍行,幸男就認得豹哥.

大合照搵咗隔離爐既哥哥仔幫手,佢仲話自己都係用呢款相機,當堂放心晒.多謝大家既厚愛,希望大家工作順利,笑口常開,我會係新崗位上繼續支援大家~

PS:幸男中段之後同大家玩得好埋,個個都鍚均晒,仲用手指掃大家黎問"仲有邊個未鍚"(好似愛夜浦咁)