懷舊晚飯-深井裕記

以前細個老豆老媽會帶一家人同阿公(霍氏)阿婆(番鬼)一齊去深井食晚飯,最有印像既係燒鵝同炸白飯魚同鮮魷.因為大個咗都無再去過幫襯,所以特意約老豆放假黎食,可惜大佬同阿嫂未能出席.

老媽最早到,自己叫咗碟鴨掌鴨翼食住等,老豆就第二個到,我同台灣女生帶住幸男最遲到.原本老媽諗住叫餐(平啲),但我見唔係味味啱食,所以提議散叫,老媽一聽見就話叫個燒鵝特大半隻.

叫咗一枱都係餸,但係無咩海鮮類,因為餐牌真係無咩特別時令海鮮.

以前老豆老媽係三代同堂中排中間,而家就榮升高輩份.

幸男對燒鵝不感興趣,只係偏愛燒鵝脆皮.我本人就覺得燒鵝仲係我細個時食既味道,但其他餸就好似差啲.舊時黎食既都係香港人一家大細黎開餐,而家枱枱都係國內遊客.

老豆曾用菲林相機幫大家飯後於明渠橋上影相,而家就由我部數碼無反相機為大家留念.今晚最開心既,應該係兩老,可以懷勉下以前後生既感覺.