老媽生日@季季紅華都分店

今晚老媽係屯門華都既季季紅同一枱親友一齊食生日飯,最開心既當然係老媽,難得三位阿姨都有黎賀姊妹生日.未人齊開席時,老豆話係新都睇中咗對CLARKS皮鞋,叫我幫吓眼,於是一齊去睇.心水綁帶款無佢SIZE,結果買咗對啡色既懶佬鞋.

壓軸仲有壽包同生日蛋糕,今次輪到直系合照.之前十五十六買二買閃燈好,睇番啲合照,前後近距兩排人物已經係極限....

嫲嫲最開心既當然係孫仔幸男陪伴,除咗一齊切蛋糕影相,仲一齊吹蠟燭.今晚幸男食飯表現尚可,話晒都係比平日遲開餐嘛.

元朗公園

今日天朗氣清,一家三口一齊去元朗公園行吓,當俾幸男係草地走動吓嘛.

公園內見到一對老夫婦, 一齊躺係草地上閒聊, 唔知佢地後生時是否係公園草地談心呢?

談情既當然有後生仔女,男仕用相機為女仕留低最美既一刻.數碼相機既普及,令多啲人可以接觸攝影.雖然話手機相機方便,但相機既相片係比較有質素.

先係遊樂場玩陣sir滑梯,再去草地走動,當然唔少得有繽紛虛幻既肥皂泡.

時下家長們都會為小朋友安排各種興趣班,但小朋友可以訓係草地上,或者跑砲跳跳,享受童真,唔係更為重要嗎??

由於少家庭照,所以今日特意帶埋腳架黎幫手影合照."禁"得10秒自拍,再跑去草地坐低望鏡頭(跑得切,但就頭髮亂了).見幸男拎住樹枝咁俏咁望正鏡頭,所以揀呢張相黎放係Blog.

臨走時幸男話要同花花影相,記起兩歲時屋企花園種過傑傑送既向日葵,幸男每日都負責澆水及同花花講"快高長大".

PS:幸男成日係少少斜既草地上扮失平衡跌倒,跪或坐係草地上

大姐住家火煱

平時德輝講話去馬天尼食早餐,今晚搭小巴去大姐屋企打邊爐至知原來馬天尼係咁近小巴站.

由於小巴班次較疏,加上我預時間唔夠鬆動,所以大家食住等我,send張相俾我就開動(我叫大家留番隻螺俾我)~

大VICKY一早就到,適巍就係屋企食埋晚飯至黎坐吓,邊食邊傾.

慧賢同阿BEN可以話係飯局既鐵膽,BEN哥永遠都係咁風趣.

大姐同媽媽生(麥生)依舊恩愛,大姐仲好眼利,一眼就認得出我部相機係咩型號.

初出茅廬時既前輩們大合照,可惜表叔同德輝有約,未能出席.

主人家既款待,令大家賓至如歸.坐低邊飲邊食,傾傾吓好快就十一點幾.

師兄既戰羊絶對係是晚既焦點,師兄話啞黑色易打理,慳番打腊功夫.細佬有幸坐師兄車尾出去村口會合大家一齊上的士.諗諗吓舊年都有盆菜食,但今年又真係無係盆菜宴聚一聚.

相機帶

中午同台灣女生放低幸男係外母家後,去咗V CITY既羅麥記食晏.人家搭輕鐵番工,我就去搭車出荃灣睇吓有無相機肩帶賣.見無心水,搭地鐵出旺角星際睇.行均咁多層,卒之都搵到間有平嘢執,$150有條真皮相機帶,SONY個條都要$260啦.

原本見到既只係HAKUBA鱷魚皮紋既紫色相機帶,好在行多間就有紅色.番到屋企襯吓,紅配黑都唔錯,點都好過紫配黑.相幾袋就無買, 因為都唔知第時出個支天涯鏡有幾大嘛.

PS:本來A7係用番NEX-3個條HAKUBA白色肩帶,但因為機身大咗同重咗,舊帶用係上黎無咁舒服同好睇嘛.

斷絶煩惱,空乏我心-斷空我

今日係相熟既玩具網站見到千值練會出超獸機神-斷空我,心情非常雀躍,因為<超獸機神>係我童年最愛既機械人卡通,與<忍者戰士-飛影>地位不相伯仲.全新既比例傾向電影版既肌肉線條,唔再係BANDAI十年前以電視比例作優化.以合體後既外觀,本人就非常滿意,但因中不足既係雙腳掌竟然會露出坦克機械人之拳頭......而且試作版左腳掌既豹坦克應該係無前方既槍炮,懷疑左右坦克之肩膀部件調轉咗.

驟眼睇,新作手背既坦克履帶不能作轉動,比十年前BANDAI既作品少了一點玩味.

小隊各機個別既變型模式,只能係草圖中窺見,期望早日有修訂及上色版."

久休復出

對上一次參加公司既新春長跑已經係十年前,當時剛畢業無耐.之後分別成功跑過半馬及敗退於全馬,因膝痛而停止跑步.今年與後生同事們一齊襯高興,參加十一公里路程,志在參予.巧遇屯宿兄弟,當然要合照啦.

由於阿潘一家四口志在一齊行畢全程,所以未能一齊起步.D9小隊分別由我同碧權參加11km,Katy同小瑜參多6.5km.各隊員都完成賽事,並且係終點結集影大合照.今日細雨加上十幾度,幸好私家長袖跑步衫外加大會既公司分陀衫配搭啱啱好,夠暖得黎唔覺熱(同事們笑我條褲短).

坐公司廠車番去兆康西鐵站,再去victy買生蠔外賣番屋企同台灣女生一齊享用,以報答人家既牛扒午餐.訓晏覺時,雙腳痛到我醒咗,要走去廚房雪櫃攞支凍療鎮痛膏出黎搽吓.......(學姜大衛話齋"最鋒利既刀都有生锈既一日,何況係人呢")

PS:久違了大型跑步項目既熱鬧,再一次發揮久藏之毅力.

生活態度

今日騎羊入元朗,去相熟紅酒店揀選葡萄飲品,順便買把靚少少既紅酒開瓶器,可惜該店并無出售紅酒既週邊生產品.

走去隔離舖位既紅酒商店櫉窗,只係見到好似我屋企用開既贈品開瓶器款式.萬念俱灰之際,突然發現一款無論造工及設計都充滿時代感既開瓶器,於是入內查詢.兩舊水有找,見話係名牌兼有兩年保養,於是成交.

雖然買既紅酒唔係成千蚊既珍藏級別,但用別緻既器具去開酒,猶如將期待及好奇既心情注入自己挑選既紅酒之中.

"男"字車隊

今日番工前見幸男玩既車仔散佈客廳,突然心血來潮,用幸男既玩具車砌出"男"字.由於趕番工,有時間的話,一定會砌"男男"或"幸男".

心意係想幸男出廳時覺得心愛既玩具車同自己打招呼,但後來經台灣女生口中得知,幸男起身就出客廳玩車,人家訓多陣至出廳.幸男無同媽媽講地面有佢個名,人家見到既只係散落既玩具車......

大年初二

舊年新年捉幸男著住唐裝坐係水仙花隔離,錄咗段賀年短片,今年亦都唔例外.幸男無舊年咁主動講賀年對白,SET晒腳架同擺好位都唔肯埋位,好似大明星擺款咁(我忍唔住話成CREW人等緊佢埋位).結果要用幸男既同窗小情人作利誘,幸男至肯乖乖埋位,TAKE 2就可以收工,仲可以影埋張合照.

年初二無咩特別節目,只係晏晝帶幸男出村口公園玩.泡泡槍吸引住在場既小朋友,各人都爭住要玩泡泡槍.為免爭執,我當然無俾佢哋攞黎玩,只係叫佢哋追泡泡玩好過不停手動按掣.不善爭位既幸男,好幾次因未能追拍大泡泡而唔開心.

幸男係公園度擒上擒落,SIR滑梯始終係幸男既至愛.

第一次用S mode黎幫幸男影相,效果比平時用A mode好,成功率較高.愈黎愈滿意A7既表現,期望可以為一家人影多啲照片留念.

PS:新一年希望大家身體健康,心想事成.