聚舊晚飯試閃燈

今晚去咗V CITY既八月食飯,因為褔娃發起聚舊晚餐,叫咗個六人台式餐,有六舊鳳梨酥送添.

因為係室內食飯影相,一人多合照就搞唔掂,於是買咗支閃光燈.試過係屋企玩過,但都唔太識用,特意帶出黎問吓Leo.經過一輪失敗,卒之都set好支燈,幫阿群同阿好影咗呢張合照.

食到尾聲,台灣女生帶幸男落去7-11換廸仕尼公仔,抽中隻夜光米奇.

尋日阿ming至話發燒,好在今日無事,大家至照原定日子食.酒樓嘈,褔娃同阿ming傾,我同leo傾相機,阿好阿群同人家傾幸男.

PS:自己影個張就唔中焦,反而酒樓職員揸機就中焦....

有嘢留番拜山講

儘管大家平日各有各忙,但每年既四月,一眾兄弟都會抽一日聚一聚.已經六年了,一切從簡-香煙,芝華仕,一班好友.逗留既時間唔多,但心意永遠不變.PERCY因為要陪屋企人,所以落咗山就搭車走先,大隊就上巴士去佐敦食飯.

上年都係黎呢度食晚飯,但就少咗瀟灑(因為更期唔夾).阿禮好少係香港,好似只係每年既四月至會番一番黎咁.

食完飯,我同華B及阿禮一齊行去尖沙咀亞士厘道既樓上酒吧,再坐多陣.

其實之前都有黎幫親過,陳設好似無咩大變動.舊式唐樓既格局,配上西洋酒吧,感覺令人感到放鬆及溫暖.

阿禮無華B咁識擺post,只有係眾多snap shot裡揀咗呢張.雖然有大光圈鏡,但昏暗既環境下都難對焦.仲要有特定主體至得,因為主題平面以外既境物會全部霧化.

星期六晚上,酒吧內好多客人,自己就好耐都無落酒吧,多數都係飲住家啤,或都係晚市餐廳裡飲.

第一round我叫咗kir royal,華B就以singapore sling向阿強致敬,阿禮就飲long island.華B誠邀隔離枱既女仕幫我地影相,可能唔慣手持真相機影相(而家個個都係用手機影嘛),所以得出呢張咁迷幻既合照."Gentlemen, all the best!"

夏日食雪糕

晏晝同幸男行市中心,經過元氣對開既雪糕店,見買二送一,於是走去買最細既MINI杯.職員姐"畢"第一杯荔枝味,幸男見唔係心儀既士多啤利味,就緊張地話"我要士多啤利0架".我同幸男講呢杯係爸爸既,無俾錯.跟住職員"畢"第二杯芒果味時,幸男就知道唔係自己既,好輕鬆咁話"呢個媽媽既".

最後係士多啤梨味,幸男好開心咁接黎食.為免幸男一路行一路食,一家三口上咗四樓UA對開既商場客戶櫈,一齊坐定定咁食.

黑排仔村

今日晏晝上大興接幸男落樓,坐家楠車入去粉嶺黑排仔村大昌老家bbq.除咗幸男,仲有兆全個女,及大昌既仔,三位小朋友.不過兩個大哥哥姐姐已係小學生,幸男相比下太細,玩唔埋咁~

早到既同事們,係昌嫂既帶領下一齊準備食物,我當然有為大家影吓相相念啦.

自小就教幸男同世叔伯招呼,除咗係禮貌外,話晒都係父親大人既好朋友嘛.表叔話見到我咁辛苦,無後悔無生小朋友,仲話無見過我咁溫柔既一面.

見thomas踩單車,幸男又跟住踩.三輪車都未攪得掂,有輔助轆既單車當然係唔成功,要靠大人幫手推住行(辛苦群姐).

唔好睇幸男咁好功架,其實係無吓打中個羽毛球,只係追住個波已經夠佢儍笑一餐.

慈父模式啟動,專用電風扇,兼愛心蜜糖燒麵包片.左邊大髀袋裝住支水,右邊大髀袋載住濕紙巾....幸男話肚餓,我就好似黑執事咁"yes, my lord",走去燒腸仔同雞翼.

海鮮食材係限量發行,好在我都有食到.其間我都係咁燒雞翼,同剪肉拆骨俾幸男食,仲要係截停玩緊既幸男黎呈上美點.

台灣女生番完夜班,中午訓醒就出去銅鑼灣剪髮,八點至到大昌家.

離開主線好幾個月,難得與一眾後生仔流合,當然要影張合照~

原本今日係兩位大姑拉同幸男食飯聚舊,但見大昌咁有心叫咁多人去佢老家BBQ,所以大家都一齊黎襯高興,遲啲再約過出黎聚吓兼吐苦水.

今日影既相唔多,比較特別既係呢張ivan踩住架小童單車黎載湘湘既合照,好有<<被偷走的那五年>>既海報feel. 

多謝主人家既款待,打攪晒黃老太,有勞家楠既順風車~

男男探孜孜

復活節假期開始,又係我同幸男既ONE ON ONE時間.晏晝係屋企幫CYBER FORMULA車仔上水貼,成大半個鐘至黐好一架車.....

四點左右同幸男搭輕鐵去新墟,跟師傅車去佢屋企.見仲未天黑,師傅話同幸男落花園玩波.呢張相望落去,幸男都幾有球星風範.

師傅親自教幸男踼波,好似盧比度叔叔咁,可惜幸男好多時都係慣咗用手去捉住個波,先至用腳踼(但點都好過我細個時既足球天份).

玩到身水身汗,同幸男沖個身,換過套乾淨衫(大勞師母安排).孜孜訓醒晏覺同幸男一齊玩玩具,可能未warm up,幸男好似無咩點笑,怕生譜??

今日台灣女生番晏,今次除聚舊外,當然係有黐餐成份啦~(工人姐姐煮既餸都唔差丫)食完飯, 幸男同孜孜好似玩得埋咗,孜孜仲邀請幸男一齊冚心愛既cars主題大被鋪.

師父開車,師母同孜孜一齊送我同幸男番屋企,真係客氣.今日真係打攪晒師傅,不過可以一齊聚吓都好開心.

新斗記

原本係大佬健既生日飯,但因兩兄弟同期病咗,所以順延至今晚至係新斗記食番餐.

套餐有招牌燒乳豬,今次係老豆老媽第一次黎食,應該好食過季季紅卦?

老豆提議買支紅酒同大佬飲,我問職員開瓶費幾錢,意想不到係唔洗收開瓶費.快速落樓下吉之島超市買支飲過既紅酒,三仔爺分黎飲.餸菜都唔差,可惜例湯沽清,轉咗茜湖牛肉羮.散叫既鵝腸真係幾好食.

見幸男咁好笑容就知啱佢胃口,無諗過連鵝掌都會試食.

同幸男影合照真係撞手神,呢張已經算係唔錯,起碼無拎歪面,或都用手遮擋面容.

幸男走去伯伯身邊咬耳仔,唔知講咩呢?平時番屋企黐餐多,今晚舉家出街食,老媽可以抖吓,老豆慳番洗碗~

緊急家居維修vs溫馨家庭玩樂

原本今日放工番屋企換過件衫,攞相機出荃灣愉景新城會合台灣女生同幸男,結果要等相熟師傅鹿仔黎緊急維修.早排已察覺屋內既燈有時會"斬""斬"吓, 今日人家話一開著燈,電箱就傳出吱吱聲.當我番到屋企時,發現一開著屋內既燈就會"斬斬"吓,電箱更傳出吱吱聲.

聽老豆講打俾鹿仔問下,鹿仔叫我試開冷氣時,電箱"啪啪"聲.鹿仔話一家要今晚搞,搶火好急險,建議我熄晒全屋既電等佢黎搞.

我係無電既屋企,用手機收到人家既相,先見到幸男開心既樣子. 

 聽人家講呢架電動電車可以由小朋友操控閘門既開關,幸男化身為電車男....

 玩開TOMICA既幸男,見到咁既主題點會唔雀躍呢?

 不時企唔定影相既幸男,竟然會主動叫媽媽幫佢同隻船影相.

呢部電動THOMAS令我諗起沖繩既Thomas路軌電動車. 

以八達通收費真係好邪惡,影埋貼紙箱,兩母子玩到八達通都負埋錢.

可惜未能為幸男影相,未能一家係OUTBACK食晚飯(兩母子轉食日本嘢,我就等維修完成至騎羊去友愛買大雞大番屋企食).鹿仔八點多至到,CHECK過係內部螺絲鬆咗(發展商團隊手工差),導至接觸不良.心情都幾差吓,新樓都咁多嘢煩(鋁窗,漏水,塞渠,電箱).

PS:多謝德輝同表叔特意上我屋企等到師傅搞掂至走.事後諗番起,德輝叫我試電箱制逐個撻時(即使發出"啪啪"聲),電話裡我掛住問德輝我會否電死,但無為意自己赤腳無著膠底鞋.........................

預祝3歲半生日&兒童節

每年既四月四日, 都會為幸男慶祝兒童節兼半歲生日,蛋糕當少不了(但蛋糕主題好似係復活節..).

晚飯時間有果汁餐飲,由於台灣女生要兼顧大人既晚餐,所以由我監督幸男晚餐既進度.

幸男聽日就三歲半,好似過咗好耐,但又覺得手抱既時間唔係太多,為幸男影既相唔夠多.....昔日只係會喊既BB,已經係就讀K1既小朋友.

唔記得自己都要上鏡,結果合照裡我著住未經整理既睡衣....蛋糕味道一般,但溫暖既感覺尤如燭光.

幸福男孩,3歲半生日快樂!

摩天輪停車場

幸男一直都話要買多個停車場黎擺玩具車,但我本人就唔想買.一黎爺爺嫲嫲已經買咗一個,兼且唔想多舊膠阻住個客廳.幸男三歲半生日在即,見婆婆買咗幾架CARS既玩具車,於是買咗呢款唔太大型既摩天輪停車場(賣點係摩天輪轉動可以係電動或手動).

新玩具啱幸男心意,都不枉我早三日係元朗相熟玩具店抽住上小巴拎番屋企.記得自己細個時都好鍾意停車場玩具,印像中屋企有過一個.

代幸男為停車場貼上貼紙後,幸男讚好靚,不過幸男唔太習慣操控摩天輪,我要從傍協助.兩父子一齊玩玩具,令我諗番以前老豆同我哋一齊玩路軌跑車,同打任天堂遊戲機既日子.