今日晏晝上大興接幸男落樓,坐家楠車入去粉嶺黑排仔村大昌老家bbq.除咗幸男,仲有兆全個女,及大昌既仔,三位小朋友.不過兩個大哥哥姐姐已係小學生,幸男相比下太細,玩唔埋咁~
早到既同事們,係昌嫂既帶領下一齊準備食物,我當然有為大家影吓相相念啦.
自小就教幸男同世叔伯招呼,除咗係禮貌外,話晒都係父親大人既好朋友嘛.表叔話見到我咁辛苦,無後悔無生小朋友,仲話無見過我咁溫柔既一面.
見thomas踩單車,幸男又跟住踩.三輪車都未攪得掂,有輔助轆既單車當然係唔成功,要靠大人幫手推住行(辛苦群姐).
唔好睇幸男咁好功架,其實係無吓打中個羽毛球,只係追住個波已經夠佢儍笑一餐.
慈父模式啟動,專用電風扇,兼愛心蜜糖燒麵包片.左邊大髀袋裝住支水,右邊大髀袋載住濕紙巾....幸男話肚餓,我就好似黑執事咁"yes, my lord",走去燒腸仔同雞翼.
海鮮食材係限量發行,好在我都有食到.其間我都係咁燒雞翼,同剪肉拆骨俾幸男食,仲要係截停玩緊既幸男黎呈上美點.
台灣女生番完夜班,中午訓醒就出去銅鑼灣剪髮,八點至到大昌家.
離開主線好幾個月,難得與一眾後生仔流合,當然要影張合照~
原本今日係兩位大姑拉同幸男食飯聚舊,但見大昌咁有心叫咁多人去佢老家BBQ,所以大家都一齊黎襯高興,遲啲再約過出黎聚吓兼吐苦水.
今日影既相唔多,比較特別既係呢張ivan踩住架小童單車黎載湘湘既合照,好有<<被偷走的那五年>>既海報feel.
多謝主人家既款待,打攪晒黃老太,有勞家楠既順風車~
