二人小休時刻

今日台灣女生番完夜更,直接去幼稚園會合我一齊去家長日.騎羊番到屋企,人家訓覺,我就出去同馬Sir去西北泳池游水.之後自己入元朗食晏兼行吓玩具店.傍晚我地出咗去尖沙咀食個早飯,再行陣街.

難得兩個人可以出黎輕鬆吓,當然有為人家係海傍影番張相.無溫定書點影人像夜景,所以顧得人又顧唔到個景.

回程上外母家接幸男,幸男見客廳擺放住CARS既玩具,非常開心,不枉我游完水騎羊入元朗去相熟玩具店搜羅.

幸男試著Ivan,豹哥及家楠送既日本隊波衫,140都啱著丫,多謝晒咁多位.

今日我係Hong Kong Record買咗隻K On 既live CD,話晒K-ON都係以少女夾band為主題,好似concert型式既live CD又幾貼題丫,起碼多歌先(但好似無咗首<<わたしの恋はホッチキス>>).

PS:隨手都可以影到唔錯既夜景,A7表現都唔錯丫,期望可以影多啲相,為自己既存在留點足跡.

Quintessence

戲院上映時都想睇<<發夢王大冒險>>,可惜番工湊仔,未能與台灣女生入場睇,今日卒之都租咗隻DVD番黎睇.男主角Walter係平平無奇既雜誌社底片主管,平日跟著社會既規犯,過著刻板既生活,唯有發白日夢時才可以沉醉於私人空間(時下泛指FF).

Walter參加網上社交會員時,被職員問到一些人生特別既事情,Walter答唔出.其實Walter細個時參加小鎮滑板比賽攞過奬,點解佢無講出黎呢?可能因為社會大氣候唔認同一啲與現實成就無關既事宜,扼殺了常人表達自己既機會.

投身社會多年,要堅持自己既想法或工作定位,確實係一件難事.好多事大家都為咗現實,放棄忠於自己,甚至迷失自己.Walter為尋回失去既25號底片番雜誌社交結刊號既封面,於是鼓起勇氣,孭上當年既背包,從其他底片既蛛絲馬跡,動身飛去Greenland,阿富汗再上喜馬拉雅山脈,誓要尋找與他一直以郵信型式合作多年之隱世名攝影師Sean.

25號底片為著名生活雜誌結刊號之封面作,大家都好期待大師既精萃(Quintessence).原來25號底片收藏於大師送俾Walter既皮包內,只係男主角不知皮包上既壓字有言外之意,隨手扔落垃圾桶,幸好其母親有收集愛兒物件既習慣,至可以令底片失而復得.

原來大師一直好感激Walter每次都可以忠實地將佢既照片重現係各讀者既眼簾,特意用最後既封面,向認真及用心工作既Walter至敬.

PS:我好認同電影中既信息-認真生活,率性而行,活在當下.曾經有一位朋友同我談及"敬畏"與"敬重"之分别,不容置疑電影裡男主角係受人"敬重"既角色,最後佢可以向受眾人"敬畏"既管理高層交出底片時講"you don't need to be such a dick".

鈞芬生日

今日晏收工,好趕咁上外母家接幸男,再飛的去市中心既金舌會合大隊,一齊入去食限時放題燒肉.食品水準依舊,無話愈做愈差,當然最開頭二百蚊包埋海鮮食材就當然係最抵啦.

工作間既夥伴-光仔同薇紅,平日真係幫我唔少忙.最開心係星期二,因為係最齊腳既一日.

蛋糕係由彩雲準備既,今晚以生日為主題既聚餐,我就第一次為同一日生日既兩位朋友慶祝.

幸男見到士多啤利蛋糕就開心,特意安排坐係壽星仔女中間影相.幸男一如既往,爭住吹洋燭,希望壽星仔女見諒,生日快樂~

雖然有閃燈,但初段時間試燈影幾張就俾職員話閃燈會影響其他客人....其實我地已過100分鐘既用餐時間,但職員見場內唔多人客至無趕我地走,只係不時咁走過黎望我地俾少少壓力.俾埋叉碟,都無話另收錢(除非代切蛋糕),算有良心!

幸男話要去行玩具反斗城,所以我地兩父子先行告辭.幸男比平時食得少,唔知係咪媽媽唔係度既關係呢?

PS:最後既大合照,唯有將光圈定為F8,焦點定為壽星仔女,再定住手同臉黎以多框消除雜訊黎影.未必係最好既辦法,但唯有頂住先,都要第二次至成功.唔知再推高啲曝光補償會否有幫助呢?

夜間巡邏

近來幸男可以一覺訓天光,雖然偶而會半夜醒咗叫媽媽,但平時人家都可以等幸男訓著咗就過番自己房,訓得好啲.

房間有LED candle night(初生時代沿用至今),方便半夜望吓幸男有無"富"被或心愛既熊仔脫離懷抱,而且幸男入睡時或半夜醒時唔會怕黑.溫暖既燈光,最適合映照純真既睡容.

兩父子出席婚宴自助餐

今日同幸男一齊去朗豪酒店星願亭參加志輝既婚宴,多得主人家見諒,我至可以帶埋幸男出席,因為今日無人湊幸男......

觀完禮,女賓客先出去揀選自助食品,輪到男賓客時,我就出去為幸男炮制碟頭雜錦炒烏冬.幸男表現尚好,我同邦邦一齊出去攞嘢食,幸男都可以坐定定自己開餐,可能係相熟既德輝坐係隔離既關係(食完嘢仲一齊玩車仔,玩到"卡卡聲笑").

一個人帶住幸男出黎都幾攰,背包要裝自己嘢同相機,兼幸男既餐具,玩具車仔,外套同糧水.

平日少聚餐,當然要把握合照機會,好在係無反機,減少唔帶出街既惰性.由於要睇住幸男,所以只係上台同一對新人影男同事大合照(冒失既我,要新郎哥提我外套褸領反咗出黎.....).

祝輝仔"百年好合,永結同心",係律師證婚時,我見一對新人都係開朗類型,相信日後生活定當延續快樂及浪漫回憶.

MJ

今日係市中心精美買咗Michael Jackson既大碟Xscape,明明人都走咗好幾年,點解仲有碟出既呢?

呢隻碟收錄咗8首未曾公開既歌,當中以Sony Xperia Z2廣告歌Slave To Rhythm最為搶耳,其次係Love Never Felt So Good.聽完成隻碟,就明白點解係以前無公開既作品,曲目與以往公佈既好幾分相似.可能當年公開既歌曲,係一堆作品裏揀出有個性既代表作,所以未公開既曲目可能係大熱作品既初型,或者係同類但較遜色之作品.

之前MJ開巡迴演唱會時,我都期望會追加香港站,可惜連第一站都未出發人就走咗.今次買呢張大碟,感覺好特別,好似係佢未離開呢個世界,再出大碟黎為巡迴演唱會作準備.

PS:我有既MJ碟-"History", "King Of Pop The Hong Kong Collection", "Xscape"

失而復得-SUGO SUPER ASURADA 01

今日收工騎羊去置樂,無意中搵到呢架Super ASURADA 01.其實之次有諗過買,但點知來貨唔多,好快就斷貨.見價錢無特別炒高($798),於是俾錢帶佢番屋企.

官網張相同網上實物照都有少少出入,但整體都好OK.TV系列,Double One, Zero, Saga, Sin全部都有睇晒,可想而知我有幾鍾意Cyber Formula.

鐵騎男

對上一次俾幸男帶住頭盔黎影相,已經係三年前既事,當時只係七個月大.頭盔款式唔同咗,住屋搬遷過,相機轉咗新型號,不變既係想留住幸男成長回憶既心.

影相時幸男身郁兼四圍望,好唔容易至揀到一兩張合心意啲既相出黎.希望幸男感受到父親大人對電單車既熱愛,及對幸男既重視.

唔知第時幸男夠歲數,會唔會坐我電單車後座番學呢?再大啲既時候,會否接收我無力駕御既電單車呢?