認真就輸了?

今日同台灣女生於市中心食完築地拉麵,我就抱住幸男行去貢茶買嘢飲.經過一個救助兒童會既臨時推廣,我地俾一位女職員截停,幸男被邀請為第三世界小朋友畫一個哈哈笑公仔作鼓勵,但我無諗過會令我咁認真地打一封投訴信. 

 我明白該職員唔係義工,慈善機構都需要部份捐款作機構之日常營運.明明係一件慈善籌款,唔知點解會變成咁商業化,好似俾人sell緊信用咭或保險咁.或者我太舊派,以現代既主流文化來講,"認真就輸了","唔捐咪算囉".

豹哥擺酒

今日一家三口搭西鐵出尖東去豹哥既囍宴,繼上一次夏天註冊見證,再一次恭喜豹哥豹嫂.再一次A7配閃燈應付室內柔和燈光,由於偏好慢速同步(想保留當時環境氣氛之色調),所以不少相片模糊(手震太勁?),幸好Wifi至手機既像數唔太覺.

我好讚成朋友們擺酒,所謂"大有大搞,細有細搞".一生人可以同一時間見晒所有關心自己既親友既機會,除咗結婚擺酒,應該無咩其他機會.雖然籌備上會遇到唔少麻煩及拗撬,但可與眾親友同堂食飯及影相,實在難得.

豹哥除咗有99支玫瑰花送俾豹嫂外,仲有不少精心安排,包括送曼聯球衣以示豹嫂加盟男家,日間接新娘既精華片段以及情深既對白.由於怕幸男體力不繼,所以未到送客環節,就向主人家交待一聲,再係酒店樓下截的士番屋企.

PS:好高興能夠參予豹哥既婚禮,祝一對新人白頭到老,與曼聯永結同心!

想睇既愛情片

今晚同台灣女生一齊安在家中睇"生命中的美好缺憾",之前電視賣廣告時已好想入戲院睇,可能係廣告歌Boom Clap (Charli XCX)好搶耳,可惜一直都無時間同人家一齊入場. 

女主角(Haze)因甲狀腺癌擴散至肺部,以至要用氧氣治療來應付不健全既肺功能.男主角(Augustus)因其中一條小腿長有骨肉瘤,需要截肢保命.二人相識於癌症亙助小組,瞭解,傾慕,相愛,初戀亦都係人生最後一次談戀愛.雖然離唔開生離死別既愛情,但舖排上有樂觀及輕鬆既情節穿插,而且有令人反思既地方. 

男主角用咗自己既願望成真基金來實現女主角既夢,去荷蘭阿姆斯特丹搵心愛既小說家詢問小說結局未公開之故事.浪漫背後之實情係男主癌症復發並擴散全身,只想與女主角經歷一次追夢.

女主角係男主角既葬禮讀完悼文後,當初接待過男女主角既小說家特意呈上男主角托他潤飾既悼文,一篇為Haze寫既悼文,彷彿二人籍著悼文來表達自己既愛.

PS:平日各人都營營役役,為生活忙碌,但大家又有無想過事物既本義,有無珍惜過現有既人與事以及自己呢?負面思考既我(尤其係阿強既離去),總覺得人生時間可以好短,所以行事都係以開心,過得人過得自己為依歸(好來好去嘛,雖然而家大多數人都係X來X去).

快煮粒半鐘VS快洗大半粒鐘

平日少煮飯既台灣女生,今日為一家三口準備晚飯,所有煲罉傾巢而出.

幸男既兒童餐係鹿兒島和牛意粉.

現成急凍副食品,我問人家呢家都應該係齋焗不用調味吧,人家認真地回答我"我落咗芝士粉".....

本人常於茶餐廳點既魚香茄子飯,由於鹹魚唔太健康,所以人家只會以肉碎茄子作家常餸,份量好似多過頭...

急凍帶子粉絲煲,唔夠多汁俾粉絲索,底個層豆卜更加未受惠澤.

日本菇蒸蛋,好懷念以前人家用吉之島一杯杯拆好肉既蟹肉做餡料.

清炒油麥菜,大人同小朋友一齊分既蔬菜類.

開飯時已係八點半,經過個半鐘既辛勞,成枱都係餸.

由於大家都好肚餓,用咗半個鐘唔夠就食飽,但結果剩咗個二人份量既飯盒.

人家煮咗粒半鐘,我就洗咗大半粒鐘,除咗枱面既餐廚具,其實灶頭仲有好幾個煲.平日番工同湊幸男,好多時都係番奶奶家黐餐,兩個人就出街食,直係好耐都無係自己屋企一家三口開餐.

崇真bbq

雖然今日台灣女生番晏,我同人家中午係新墟食完晏晝就一齊去買嘢.人家番工,我就一個人拎住晒啲嘢食同炭搭的士番屋企,為今晚既崇真書友聚餐作準備(多得鄰居STEVEN借櫈).

今次自行研發燒烤叉架(廢物利用),方便大家將用完既叉放低,唔怕"辣"親人及膠枱布.

忙咗成個下晝,卒之都人齊,Oscar仲買埋金蚌黎加料.今次都好似係我地出黎做嘢後第一次BBQ(11年個次重慶燒唔計),平時都係出街食飯聚吓.

其實我地圍內個個都係戴眼鏡,如果wing fung黎到就真係七子結集.

相中有相,除咗David今年再做老豆,教練都榮升老豆.啲鮑魚係我好俾心機咁刷,仲唔少心界到手添.....幸好大家都盛讚好食,不枉我食到中途入廚房努力.

大家都開開心心,邊食邊傾,女仕們亦交流母親心得,我就好耐都無同教練一齊飲酒了,好懷念李白吧既時光.臨尾當然要黎張大合照啦,崇真書友兩代同堂,出年就會多兩位小朋友一齊合照.崇真書院既兩年會考班,除咗老師既教誨令我印象深刻,一班投緣既朋友亦係我喜愛崇真既原因.

PS:希望大家生活愉快,馬Sir早日康復!

相機背囊

一直都想買一個啱心水既相機保護內胆,卒之搵到manfrotto有個casual款既背囊,裡面包埋個可拆式內胆.

款式可以襯斯文出街衫,可拆式內胆放入平日開電單車番工既背囊,靈活度大增.之前買過manfrotto既小袋黎保護相機入出街袋,設計同質料都唔錯,所以都繼續追呢個品牌.

上次去旅行發現背囊唔夠大,載得相機同閃燈就無咩位剩,頂多放件薄身外套,所以想買個相機背囊.呢個bravo50仲可以係側邊插埋個腳架,下次去旅行一定會方便好多.

Forestry

相機入廠多日,卒之都可以係旺角SHOWROOM接番走.除咗係showroom裡試影幾張,當然要係維港影戶外黎試真啲.呢個兩個星期無相機用,真係好唔慣,我至知原來自己不自覺地將攝影培養成一種興趣.

市區路痴既我,要自己去新開既page one搵台灣女生同幸男,結果我都係開口問enquiry哥哥仔.憑職員一句"直行到尾,見到puma就上層",我結果都成功會合家人,晚飯就係page one裡既Forestry享用.

餐廳燈光好暗,唔方便開閃燈下,高ISO結果係多粗粒.

三百蚊一個set dinner,除咗前菜夠晒精緻,主菜牛柳既份量都較少,但勝在重質不重量.

人家既魚柳,亦都係細細份,可惜幸男都唔係太啱食,結果幸男食剩個份,由我同人家瓜分.

場內之燈光又暗又黃,好以無錢交電費咁,枱頭既candle light作點綴,我同人家都係愈坐愈眼訓....

我同人家都係食埋甜品至有飽肚既意識,今餐真係好有fine dinning既感覺................尖沙咀西餐三百蚊一個晚餐,又唔係話過份貴,食材又唔差,只係坐位燈光唔太舒服,兼且餐牌太少選擇.

食完飯去咗海邊,上埋支flash為人家同幸男影維港夜景合照.幸男唔多合作,最似樣既都係呢一張.最愛為人家及幸男留下一點一滴回憶,儘管自己常隱藏於EVF下,你們的笑容才是最重要.

PS:搞咗兩個禮拜,SONY師傅都係話A7配APSC鏡既死穴係室內出現失焦,要用中央對焦至可以提升中焦機率(平時用多點).FULL FRAME吸光較多,所以同係E MOUNT都唔會出現APSC鏡之問題.今日佔中無咩人上惠豐既SHOWROOM,我可以試下支FULL FRAME 24-70,真係無話會失焦,唯有希望SONY快啲出FULL FRAME 既E MOUNT天涯鏡啦.

幸男四歲生日

今日係幸男四歲生日,A7相機連APSC天涯鏡仲係SONY度check緊,所以只能以手機相機作紀錄.

中午搭輕鐵去石排站,入新墟工廠區上23樓攞預訂既派對氣球,如果可以騎羊黎攞就好了....上到去等咗唔夠廿分鐘就可以攞走氣球(原來老闆娘個小朋友同幸男係同校師妹),抽住一大袋氣球行番去大興的士站等車番屋企.

幸男見到咁多氣球,當然開心,由於只有英文字母及數字之貼字隨MICKY氣球奉上,所以我以英文及數字砌出幸男之名字.

生日禮物當然唔少得,婆婆送既白色火車玩具,加上媽媽送既黃色火車玩具,而我送既係紅色兼附有車長米克風之發聲火車玩具(全部都係takaratomy之產品).

晏晝出市中心一齊睇台灣女生想睇既<<麥兜.我和我媽媽>>,其實就唔太啱小朋友睇,幸男肯睇足全場已好乖.....

晚飯番咗爺爺嫲嫲屋企黐餐,帶埋市中心聖安娜訂既生日蛋糕.

今年無咩特別既節目俾幸男,因為番day唔太多時間準備(同台灣女生之生日一樣)有時唔想太溺愛幸男,偶爾過啲簡單啲既模式,例如安在家中及與爺爺嫲嫲晚飯.總有掙扎既時候,因為社會上普遍走向"贏在起跑線"及"為孩子作最好既準備"等方針.

希望幸男,健康快樂,快高長大,唔知我仲可以抱起幸男多幾多年呢?

綜合生日飯餐

每年既生日我都係想安在家中睇電影或劇集,享用台灣女生煮既住家飯.今年就變咗係提早同人家食大閘蟹慶祝生日,因為人家聽日約咗大學書友食飯.

今年已經係第四個年頭到香港老飯店食大閘蟹餐,不過今年店舖由美麗華轉咗去寶勒巷.

個餐貴咗,蟹粉海鮮羮升級至蟹粉翅,好耐都無食過了...

主角大閘蟹出場,賣相唔錯呀,望落去夠晒多膏.

蟹膏多到可以用匙羮勺出黎,好在我哋兩個都鍾意食大閘蟹,至可以年年都食二人餐.

蛋白蝦仁好大碟,其實冷盆既肴肉都未食晒,食到呢道菜,我已經差唔多飽.

豆苗紅繞肉,好似將兩舊以上既東坡肉切開黎炒豆苗,真係好鬼膩....

最後仲要一人一麵担担麵,我食咗兩三口就投降, 但人家可以完成一碗.

舊年我地都試過帶埋幸男黎食平啲果款大閘蟹餐,相信呢一款餐都可以填飽我地一家三口.

卒之終點在望,上埋飯後果盆,今晚番到屋企真係薯片都食唔落.

今年無咩生日禮物送俾台灣女生,因為日日番Day無咩時間出去市區行吓.自己既生日願望都係身體健康,一家人開開心心.