Cirque Adrenaline

今晚我地又幫襯機場既Grappa's食晩飯,幸男既蘋果汁,好似大人用rock杯飲威士忌咁.

我繼續飲Vedett啤,台灣女生飲Virgin Colada.套餐唔啱食,於是散叫牛扒,肉醬意粉同四重芝士薄餅.

食完就搭機鐵,去亞洲博覽館趕入場睇CIRQUE ADRENALINE飛天離地絶技團.

趁未開場,用相機加閃燈為幸男同人家合照.

雖然唔係最前既位區域,但都可以近望到表演台.

由於天涯鏡唔係恆定光圈,所以用唯一既定焦鏡35f1.4黎應對,幸好位置夠近,否則咩都縮細晒....

平時馬戲雜技團既小丑,頂多係扮倫盡搞吓氣氛,以及拋吓波仔.今次呢位小丑先生,可以揮舞及頭頂方體支架,由細架轉到大架.

半空轉動既8字形金屬架,兩位雜技團除咗各自係圈內跑動(好似倉鼠),更會於圈外框跑走,跳住繩黎跑走,以及最後既蒙頭跑走兼跳落下一個外框,真係一步一驚心.　

半場休息後,第一個表現係例牌既空中飛人,睇唔到有咩新意,反而單圈空中飛舞既女雜技員更顯美感.著晒大光燈,幸男可以望住杯雙倍價錢既HAAGEN-DAZS士多啤利味雪糕黎食(中場休息時間係7-11排長龍買).

小丑再出場,可以成個身縮咗入個大氣球內,再四處跳,最後連個頭都縮埋入去.離開氣球時,小丑已脫下長褲,剩下內褲.用家心得,幸男最喜歡既就係呢位小丑先生既環節.

火把舞動,第一次親眼睇到揮舞出黎既旋轉火舌(平時係電視睇).

尚有跳彈床,飛躍道,及平衡力表現.....感覺唔太新穎.最後既電單車雜技,無中環Red Bull X Fighter既飛得咁高,遠同多花式.整體而言,都算係值回票價,座位比Cavalia舒服,空氣亦流通得多,只係少了Cavalia既美感.一家人開開心心咁欣賞呢個熱鬧既表演,為2015年既生活增添多一個親子回憶.

SUPER ASURADA AKF-11

今日收到老闆娘既whatsapp話預訂既高智能方程式已有貨,約定夜晚收工係輕鐵站交收.

今次既紙盒內有賽道作裝飾,啱晒影相用,先以Circuit Mode入彎.

出彎,Aero Mode Change!

忍唔住拎埋上一架SUPER ASURADA 01出黎,一齊開升壓渦,"Boost On~"

SUPER ASURADA AKF-11得以忠實呈現,只係升壓渦無動畫設定既升得咁高,入風位只係僅僅高過前方之擾流部件.另外後輪既擾流護板,未能如動畫般纖薄.期望MEGAHOUSE會推出,終極雷神Spiral Boost Mode!

特務型戰

<特務型戰>上映時,有打算同老豆入場睇,由於夾唔到時間,所以尋日至係節拍租定黎今晚同台灣女生一齊睇.

60年代,對立性質既美國CIA與蘇聯KGB,為搗破納粹餘黨"THRUSH",聯手接觸核彈博士之女兒,並設法滲入組織,以消毁核彈,阻止第三次世界大戰.

新時代既電影節奏及畫質,呈現60年前既世界,比舊時代制作既特務電影(007),更加有趣.儀器科技比現今遜色,沒有奇特新穎既道具,結果巧妙的編劇及鮮明的人物設定,更加吸引觀眾.落後既道具,反而成為笑料之一.亦敵亦友既關係,令結局有發揮空間.

Hugh Grant演繹既U.N.C.L.E指揮,非常調皮,英式腔調切合英國MI6局長.

雖然無睇過以前The Man from U.N.C.L.E之電視劇,但看畢這套電影後,好期望有下一集既電影,可以再經歷輕鬆歡笑,鬥智驚險的晚上.

1/3親子,1/3親父,1/3親妻

今日老豆放假,我問老豆想講星球大戰定葉問3,老豆揀咗睇甄子丹.原本話睇早場,但老豆話要做晒家務先,結果近四點至打電話俾我,好在仲有好位,急急以手機網上訂飛.

今集葉師傅變咗愛妻號,因為太太羅患癌症,四出陪太太睇醫生外,詠春正宗之挑戰亦置之不理.雖然有泰臣對戰及最後既同門詠春閉門對決,本人最喜歡既係葉問於電梯內,邊保護愛妻邊將泰仔壓出樓層,繼而邊打邊落樓梯.相比第二集,本人覺得今集更為緊湊,至少唔會係圓枱上打功夫.......

睇完戲,老豆自己行去市中心,我就騎羊,約定百老滙等.見OUTBACK要排隊,於是去咗隔離既HABITU ALL DAY.

唔包餐湯同餐飲既晚餐,我揀咗三文魚沙律,老豆揀咗意大利飯團作前菜.

既然唔包餐飲,唯有叫支裝啤酒,兩父子啤啤佢.酒精濃度4.5%,但我同老豆試完都話似高過4.5%.

老豆見我影相,自己都影埋一份,話晒係兩父子FINE DINNING嘛.

兩父子都係點咗肉眼扒作主菜,薯蓉夾雜住黑色既蘑菇,味道幾特別.

唔明點解會包甜品,我揀咗個金寶香蕉芝士蛋糕,味道都還可以.

老豆揀咗烤麵包布丁配雲呢拿醬,好滿意即制兼熱騰騰.埋單六百幾,老豆有啲嫌貴,但我話一次半次,當試吓新嘢(唔好餐餐都係茶記或酒樓嘛).

PS:晏晝同人家係市中心食過晏後就同幸男行玩具部,又係相熟甜品CAFE店坐低食Strawberry Heart蛋糕.送上外母家後,我就由幸男爸爸變咗人地個仔;夜晚騎羊接人家放工(一齊睇<特務型戰>)我就變咗人地老公.

平安夜,麻甩晚餐

晏晝一家三口係市中心食過晏後,台灣女生番工,我同幸男行陣玩具部同超市,跟住就搭小巴番屋企.先同幸男玩伯伯送既SCRABBLE JUNIOR,以鼓勵怕英文課堂既幸男."A.E.I.O.U響音"入門,加上慢讀生字,讓幸男嘗試以讀音估串法.

砌滿SCRABBLE,幸男係客廳玩具,我就出花園鋸樹.清埋樹枝出垃圾房,再拖埋個花園,擺好籃球架,同幸男一齊射籃.

幸男至愛黑子籃球裡青峰大輝既「無定點射球」(即係亂射),成功率當然唔及奇蹟世代既青峰.........

雖然自己當年籃球不精,但都想幸男接觸父親曾經投入過既運動.如果他日幸男係籃球部,我一定會去捧場睇比賽或一齊練射球.

希望今次修剪後,樹葉同雀屎既降落機率有所改善......

夜晚係屋企煎人家早一日買定既特價和牛扒,兩父子一人一塊,白飯各一碗.

可惜係吉之島超市買唔到幸男至愛既三文魚子波波,令幸男未能有一個定食前菜.

除咗幸男細個時煮糊仔餐外,首次為幸男煮正餐.雖然只係煲個飯,煎塊扒,及搣碎紫菜,但都希望幸男可以開開心心咁係屋企玩,食,訓,好好享受懶洋洋的假期.

黑排仔村BBQ

以為士家三口坐德輝私家車入黑排仔,原來阿JACK一齊出車,結果坐咗JACK架車,帶住德輝架車入黑排仔村.好難得可以同德輝及子健一齊聚下,懷念當年一齊衝鋒陷陣既時光.

舊年幸男都有黎BBQ,今年幸男可以自己踩有輔助轆既單車,衝落一級壆位,已令幸男歡喜到笑出來.

除咗燒烤之外,大會設有麻雀耍樂,"勝者為王,敗者為寇"之場面不時出現.

Katy將要往外地生活一段短時間,A2小隊一齊合照.很佩服年青人既敢作敢為,以前剛畢業時有諗過去無國界做點有意義既事,但因為要籌錢讀Epidemiology兼外國生活費,故打消了念頭(兼且唔放心兩老).

BBQ爐上,仲有海鮮燒烤,感動~有勞主人家既準備,以及蛟龍既特選食材.

韻詩同阿釗都有到來,原本話十二月頭既聚餐,變咗係今日既賓客型式相會.

今日好多舊面孔都有出現,新一輩亦為大家增添生氣.近陣子,自己感覺已不可再走前多一步了,只可為新人作多一點協調,於工作間作緩衝角色.大家開開心心,邊食邊傾邊飲,尾段以圓櫈為踏台,為大家影張大合照.

我忙於為大家影相兼聚舊,辛苦人家一個人燒埋我同幸男果份.

晴晴成為是晚既寵兒,個個都爭住抱晴晴同合照.IVAN可以偷時間鬆一鬆,但晴晴都係至愛爸爸.

多謝大昌既邀請,多謝黃老太既款待,來年可以的話,我都想再帶支紅酒及相機來與大家聚一聚.

PS:Katy,努力呀,為自己所嚮往既生活而付出,唔好俾自己有遺憾.

預食二人聖誕節大餐

是日放假,台灣女生陪出尖沙咀新港中心food court預食聖誕大餐.相熟既台式鐵板燒,點了一個貴價餐,當提早食聖誕節餐,因為我同人家都要番住工黎過聖誕節.

海鮮小隊裡,最出色既就係八爪魚,少少辣,夠惹味.

一枱都係餸,食到好滿足,牛扒配蒜粒食,真係好正.原本諗住上PACIFIC COFFEE飲杯啡,但由於大家都太飽,所以閣置了.

去YMCA問吓興趣班既詳情，結果都係停一停，諗一諗先。搭巴士去土瓜灣阿林睇電單車手套，因為舊果對左手中指內裡已穿了一個窿,可以觸及中間保暖物料,故買定後繼冬天手套.無用開既型號CARBON WINTER GLOVE，結果揀咗ARMED WINTER GLOVE(白色),感覺好似無CARBON WINTER咁厚....目標係挨埋今個冬季,完成三年既服役,先至用新既冬天手套.

PS:搭巴士番市中心,人家趕搭的士住新墟工廠區出席公司聚餐,我就係MOS BURGER食單身漢餐.聖誕節二人時光,就只是這般平淡同短暫.