1/3親子,1/3親父,1/3親妻

今日老豆放假,我問老豆想講星球大戰定葉問3,老豆揀咗睇甄子丹.原本話睇早場,但老豆話要做晒家務先,結果近四點至打電話俾我,好在仲有好位,急急以手機網上訂飛.

今集葉師傅變咗愛妻號,因為太太羅患癌症,四出陪太太睇醫生外,詠春正宗之挑戰亦置之不理.雖然有泰臣對戰及最後既同門詠春閉門對決,本人最喜歡既係葉問於電梯內,邊保護愛妻邊將泰仔壓出樓層,繼而邊打邊落樓梯.相比第二集,本人覺得今集更為緊湊,至少唔會係圓枱上打功夫.......

睇完戲,老豆自己行去市中心,我就騎羊,約定百老滙等.見OUTBACK要排隊,於是去咗隔離既HABITU ALL DAY.

唔包餐湯同餐飲既晚餐,我揀咗三文魚沙律,老豆揀咗意大利飯團作前菜.

既然唔包餐飲,唯有叫支裝啤酒,兩父子啤啤佢.酒精濃度4.5%,但我同老豆試完都話似高過4.5%.

老豆見我影相,自己都影埋一份,話晒係兩父子FINE DINNING嘛.

兩父子都係點咗肉眼扒作主菜,薯蓉夾雜住黑色既蘑菇,味道幾特別.

唔明點解會包甜品,我揀咗個金寶香蕉芝士蛋糕,味道都還可以.

老豆揀咗烤麵包布丁配雲呢拿醬,好滿意即制兼熱騰騰.埋單六百幾,老豆有啲嫌貴,但我話一次半次,當試吓新嘢(唔好餐餐都係茶記或酒樓嘛).

PS:晏晝同人家係市中心食過晏後就同幸男行玩具部,又係相熟甜品CAFE店坐低食Strawberry Heart蛋糕.送上外母家後,我就由幸男爸爸變咗人地個仔;夜晚騎羊接人家放工(一齊睇<特務型戰>)我就變咗人地老公.