土炮嘉年華攤位遊戲

二月既AIA嘉年華,幸男玩過抛圈攤位,見幸男無次抛中玻璃瓶,於是計劃自己搞個土炮攤位俾幸男玩.

花咗唔少時間黎儲啤酒樽,因為唔係晚晚都係飲同一款.另外唔係度度都可以買到啱既抛圈,結果俾我係明思搵到HELLO KITTY主題既抛圈玩具.

我教幸男水平式持膠圈於心口位置,手向前伸展到盡時放開膠圈.可惜幸男都係用番自己既方法,擲飛標式向前拋出.雖然整體命中率低,但有時都會抛5中4(80%).唔知幸男再大個啲,射籃可唔可以起手5中4呢?

PS:儲多啲啤酒樽兼買多SET抛圈先

愛羊打腊

今日的起心機,為愛羊清洗及打腊,睇番本愛羊記事簿,原來已半年無打腊,只係二月時份清洗過一次.

花咗兩個幾鐘,愛羊得到重生,包圍外殼變得滑手,金屬部位變得光亮,塑膠部件重現潤澤,忍唔住入屋攞部相機出黎留倩影.

與愛羊夥拍已九年,見證住我同台灣女生拍拖,結婚及幸男既出世.電單車除咗係代步之用,對我黎講係興趣兼生活既一部份,每一公里都包含著無言既支持.

電單車確實凝練了我既心、技、體,唔怪得老人家成日話有門興趣係件好事.

仲記得當年係駕駛學院,進度大落後既我,第一次恊調好極力子及油筒扭動,掌握平衡感後,雙腳抽上腳踏,電單車向前驅進並順應心意轉向.引擎之鼓動與排氣喉聲響,一直陪伴至今.

兩父子行市中心

是日放假,一家三口係市中心Berliner食晏,幸男揀番至愛既士多啤梨特飲.

雖然係星期六,但午餐時間唔太多人,可以直接入座點餐.台灣女生食完就自行搭輕鐵番晏,幸男就交俾我看管.

首先去行吉之島玩具部,跟住去隔離既運動部睇童裝鞋.睇埋華都既馬拉松,幸男揀咗我同人家係PUMA專門店睇過既黃色運動鞋.我問幸男去唔去市鎮公園睇烏龜,幸男話去,於是又去咗爬蟲館.

幸男見有蛇既石像唔願行埋去影,但叫我影低send俾媽媽(志在嚇人),頂多係同烏龜及鱷魚石像影相.影得最開心既,就係以花圃為背景既呢張.

呢個位置,係中學年代我同楝哥及主機一齊跑步既集合地及起點,幸男似乎對呢啲陳年舊事無咩興趣......

行番去市中心間貢茶買杯奶蓋奶茶,幸男就飲橙汁消暑.買埋件士多啤梨忌廉蛋糕,搭輕鐵送幸男上外母家接手晚餐.舊年因番工時間,好少同幸男去玩水.等天氣再熱啲,就可以帶幸男去泳池玩.

PS:夜晚同Andrew,世伯,楝哥及溫生一齊係景峰既青葉酒樓食飯,純男人既世界.

Cavalia

傍晚一家三口搭巴士出尖沙咀新港中心地庫美食廣場食台式鐵板燒,食完就上樓上pacific coffee坐多陣,我地就搭船去中環碼頭,趕睇8點開場既Cavalia.

落雨天,有啲狼狽,我地係入口處擔住遮一陣黎等入狹窄既室內區域,讓職員檢查入場票.

帳篷內有紀念品區,小食區及供觀眾影相留念既區域.我趁其他人拎住個紙框影相時,用相機影幾張試色同閃燈強度,再俾身穿馬術服既職員姐姐仔幫我地影家庭照,戰術成功!

我地要再出户外,至可以入表演場地之主帳篷,又一次狼狽開遮收遮(我仲要以外套保護住相機).幸男食住爆谷黎等開show,一副悠閒樣子.

馬戲雜技為主,馬匹只係某些環節穿插,增加美感及亙動.第一節為一個鐘,接著係半個鐘既休息時段,第二節為一個鐘.本人就較喜歡由兩位女空中飛人交織既表演,眾人於高速馬背上既雜技,及水簾馬匹投影.氣氛及舞台效果都唔錯,至少幸男唔會話好悶兼要離場.

完場後,數位表演者係等候帳篷內為觀眾簽名及拍照留念,可惜幸男掛住四住望,無面向鏡頭.

幸男係紀念品區揀咗呢隻毛公仔,價錢貴咗少少($20X),只望他日可以為幸男勾起今晚既夢幻及愉快印象.

PS:對上一次睇馬戲係08年3月既ZINGARO星躍馬術奇藝坊,由於香港唔係成日有得睇,所以今次我地都買中價飛入場.可惜係電視廣告得知時,門票已經開售一段時間,未能以同一價錢揀到更佳位置...

DELICIOUS熱狗店

之前係華都見有間熱狗店,一直都好想試.今晚一個人食飯,於是係呢間"DELICIOUS"買隻芥末醬煙燻辣肉腸熱狗同芝士肉醬薯條外賣番屋企食.熱狗長7吋,而且會"漢"燶少少個飽面,味道真係唔錯,非一般茶記下午茶既熱狗可以比美.芝士肉醬薯條夠晒香,芝士同肉醬既份量,絶對對得住$28呢個價.食晒兩樣嘢,加埋杯啤酒,飽晒(起初仲怕唔夠飽而猶豫買唔買好).

睇黎又多一個單身漢餐外賣既選擇,期望再會有多的小食款式,例如炸磨茹~

重啟飯煲

今日台灣女生番晏,幸男係外母家留宿.同人家食完晏兼送番工後,騎羊去市中心吉之島超市逛吓,見蒲燒鰻魚特價$50,於是決定今晚係屋企享用一人前蒲燒鰻魚飯.

以前係市中心一個人住時,不時係樓下吉之島超市買包蒲燒鰻魚番屋企做餸,用微波爐飯煲煮飯,再番叮鰻魚就當一餐,頂多加個飯後果.事隔十年,電飯煲煮既日本米(飯碗都係日本制),冰杯盛載日本啤酒,配剪片上碟既鰻魚.

PS:今晚唔洗特意騎羊出去買外賣番屋企一個人食lu~

青山灣

市中心飲過茶,搭小巴去青山灣,志在俾幸男玩沙,兼一家三口吹海風消暑.

幸男係近水既地方搵到幾個貝殼,之前係黃金海岸泳灘執既貝殼仲留係廁所裡.

玩泥沙看似簡單,但要同個桶模既紋理及外觀一樣,真係有難度.

走近水邊同幸男影相,由於不時有途人經過背景,所以都要切裁後至有呢一張幸男玩水照.

影完相就抱幸男落水玩大迴轉,水底多石,無係泳池咁容易原地轉.

最寫意既時刻,莫過住坐係石壆,飲住凍Hoegaarden望海發呆個大半個鐘...期望今個夏天可以帶幸男去清水灣玩,水清啲,垃圾又少啲.

ps:下次去沙灘都要落多啲冰種至得,畢竟戶外太熱嘛.

元朗一天遊

孜孜爸爸誠邀我地一家三口去元朗劇院睇俄羅斯表演團既"手手愛漫遊",表演者用手掌同手臂組合出各種有趣圖案及文字,以交織一個個短篇主題.幸男同孜孜一齊係座位上模仿表演者,我就最鐘意最後夜光效果部份既"龍"主題(以係特意為香港站表演而準備).

睇完表演,我地去咗隔離既元朗公園,俾兩位小朋友放吓電.

孜孜爸爸帶住兩位小朋友踼波,我就一片心為大家影相(靜態啱我啲).

雖然有爭波踼既情況,但休息時間大家都係有講有笑.(友誼第一,比賽第二?)

我帶咗冰袋出黎載飲品,所以兩位小朋友可以享用到冰凍既果汁.(我飲凍金觀音,台灣女生飲凍檸檬茶)

好滿意呢張相,感覺好似親身用肉眼望住逆光既兩母子.光暈及懸浮之微塵,豐富了陽光溫暖既感覺.

對上一次係元朗公園一家三口合照都已經係年幾前,幸男亦都高大咗.小學前,我都唔想幸男太大壓力,一家人出去公園玩同睇表演,總好過強迫性去上各種興趣班試堂.我相信輕鬆快樂既童年回憶,比任何證書重要.

坐孜孜爸爸順風車,我先係屋企落車,再騎羊去外母家接人家入元朗食"爺爺雞煲".第一次惠顧,原來係之前同家楠食過日式放題既舖位.今晚係崇真書友聚餐,所以叫到一枱都係配料.

兩位書友未能出席,唔係就齊晒腳.雞煲味道OK,但份量較少(配料都係),而且一加水就淡晒味.食完飯一齊去咗HOME SWEET食甜品,雖然等得耐,但味道同款式都可以.

幸男四歲半生日@兒童節

 台灣女生訓得三個鐘就起身,因為要去大興接幸男搭巴士出中環海濱長廊睇RED BULL X FIGHTER(幸男掛住望飛車同現場觀眾).基於免費入場,所以好多人排隊入場,我地用咗近15分鐘至入到會場.

 高速之下,以S mode來應對,手動自動對焦參半,只求有張係清啲既.

 相比其他攝影者既長炮,24-240天涯鏡較難摘下大特寫.

全場最堅既都係呢款凌空大鵬展翅,可惜支能拉近少少同有人頭遮住......(其實crop走咗右下方L角)

 睇咗陣幸男就無耐性睇落去,可能係戶外曬兼熱.無睇最後果幾轉飛車,走去同幸男影相(唔太望鏡頭).

係碼頭商戶坐低小休,人家同幸男食雪糕,我飲凍咖啡.一家三口排隊等上觀光巴士,因為幸男話想坐好耐.

我地當然係坐上層,同車好多乘客都只係以手機影相或短片,反而我拎住部無反,重似係遊客.
入隧道時,幸男開始好攰同洽眼訓,一出隧道就訓著咗....

 抱住幸男落車,無幾耐就醒咗.搭260入屯門,晚餐係訂好枱既金舌食放題.

 今日既行程全為咗四歲半生日既幸男而計劃,希望幸男開心.

近九點我先去聖安娜攞訂好既蛋糕,店舖已落半閘,好在都仲有得攞.行番金舌食多陣,就找數兼番屋企.

 幸男,兒童節兼四歲半生日快樂~雖然人家同我都好攰(人家訓得少,我就孭相機兼作紀錄),但都想為幸男留多點回憶及童真..