歷練-體會-內修

大前晚幸男講錯說話,話媽媽係普通屋企人後,我同台灣女生即時訓話,幸男內疚得喊出黎,話知道自己唔啱.

舊同事飯局後,心結煩擾.今晚上You Tube意外聽過呢首改編歌,內心一片共鳴,雙眼有點酸澀.原來人生既歷練,讓人從體會啟發出內修.老生常談:你未去到果個年紀,你唔會明....

"幸男,乖唔係單純為咗俾人讚,而係一種美德,對自己既交代".

作詞：鄭國江
作曲：Freddy Aguilar

孩兒出生一聲哭叫
曾替你兩老慰寂寥
曾是願望夢幻的化身
時時刻刻關心相指引
教你養你已成人
獻出一生多少苦與辛
知否兩老對你那片愛
你無法報答這似海深恩
關心你嘅對與錯
對你嘅愛惡都關心
年華一天一天的過
見你轉眼已成人
可知雙親多開心
孩兒可知雙親多苦惱
你每每放縱與放任

嚷著自立想高飛遠奔
輕輕碰上了困惱
你永遠抱怨你雙親
可知兩老對你愛顧
你那有說過感恩
前途險阻怎麼走過
你抱怨世界捉弄人
你寂寞孤單沒良朋
回頭雙親彷彿多麼遠
你懊悔慨嘆永沒完
此刻想起雙親多痛心
不必困惱與痛悔
切記跌了你要快快起番身
雙親對你永照顧
你縱有錯不必擔心

振興新村盆菜宴

黃昏時份就到達元朗振興新村,因為大姐過年前已約定我地呢日食盤菜兼聚舊.　

傳統項目之一,醒獅賀歲,其他地方未必會爬到咁高黎採青及掛賀詞.鑼鼓聲加上舞獅,中式新年必備,熱鬧及活力兩大元素,以表達祝願.

是晚盆菜供應商係"大歡喜",相比年初四訂既盆菜,幸男較喜歡呢一個.

係大家用膳期間,醒獅會穿插各枱號,讓大家摸獅頭(好意頭?)及影相留念.

幸運大抽獎,幸男憑我地枱號張飛去鄉公所領取禮物.BEN哥幫忙拆開花紙,原來係一大箱九州濃湯豬骨湯味出前一丁(唔知點解幸男好雀躍)~

多謝大姐既邀請及款待,每次我都覺得有初出茅廬時,被前輩關照既感覺.新一年既大合照,祝大家新春大吉,身壯力健~

東華嘉年華

情人節無二人世界,反而係帶埋愛情結晶品去啟德郵輪碼頭既東華慈善嘉年華.門外已排長龍,唔洗半個鐘都可以拎到入場咭,總算無咁掃興.

第一個項目,就係玩電動房車.雖然幸男都有部爺爺送既電動車,但今次好似Mario Kart咁,六七部車同場開動,但要等成半個鐘有多.

熟悉操控既幸男收放自如,橙色既車停係路邊,幸男都能及時收停,無好似三一小隊咁連環追撞.

見第一個項目已排咁耐,台灣女生係我地排隊時,去咗隔離既充氣遊樂場排定隊.有滑梯,障礙物,好似明珠台既"橫衝直撞"咁.

幸男不停走動,撞見其他小朋友同佢應面相遇時,幸男擒過隔離通道,繼續疾走.

飛氈滑梯,原本想幸男自己一個人玩,但結果要我陪同作壯膽.

邊轉邊衝落黎,邊傍既圍欄遮住外邊景色,只能望到天空,小朋友自己玩都應該唔太驚.

場內另一賣點,雙層迴轉木馬.人家先安頓好幸男於上層之木馬上,自己再落番下層附近位置既木馬.木馬停止,人家到上層時,幸男已自己落咗地面,等媽媽接.

呢款流水木筏速度真係好慢,連小朋友都會想行快一點.

小型海盜船,偉大之處係不需大人陪同,有安全圍欄,跌蕩幅度無大人玩既咁大.

雖然幸男話想玩,但無大人陪兼第一次玩,難掩緊張心情.

迷你海盜船開動後,小朋友們既笑聲及叫喊聲此起彼落,.好在幸男係開心大笑,而唔係喊住等遊戲完結.

攤位遊戲,大人都玩唔掂,但小朋友總愛參與其中,結果當然係損手離場(X 2)....

最後一個項目-過山車,負責影相既我,可以免去陪玩一職.與兩母子夾定影相位置,天黑加無腳架,自軸防震加閃燈之作(見笑)~

七點幾動身撤走,無入場時咁多人於門外排隊,原本想玩既高台滑板滑梯因幸男未夠高度而擱置.陀飛輪真係見到都驚,都係等後生仔女去玩就好了.

無的士搭,唯有搭大會既免費穿梭巴士去油塘地站落車,去隔離既大本型food court食pepper lunch,飲品係果汁店點選購.無為太座準備禮物或驚喜,希望親子日係對太座愛情期盼既溫暖回應~

林村

元朗廣場元気午餐後,於巴士總站等64K,因為想去林村感受新年氣氛(一家三口都係第一次去林村).排係我地後面既老外著住黑色華服上衣,咁啱坐上層座位時,與我只隔走廊位,仲主動問我是否去林村影相(可能見我影完巴士後,拎住部相機排隊).

巴士行得慢,尤其係上大斜路時,成個鐘至到埗.幸男之前病咗無去行花市買風車,今日可以補番數.

黎林村當要拋寶碟,但而家拋既係塑膠假橙綁住願望咭.幸男寫完第一個願望,再跟媽媽既提示寫第二個願望.

第一二代既許願樹已退役,取而代之既係仿真塑膠樹,遠睇都唔察覺端倪.今日年初四,比我預期中無咁迫同多人.

準備拋寶碟前,為幸男影番張相先.唔好睇幸男咁開心,之後人家同幸男一齊拋,試咗幾次至成功勾中樹梢,但又其他人拋既寶碟擊落,當場唔開心都喊.

我抱住幸男去最近既樹梢去掛寶碟,但幸男好怕我抱高過肩膀位置,仲喊咗出黎.走番出外圍,將幸男放落地,安慰過後,再抱起幸男去掛,卒之都掛得穩妥.當我入番去仿真許願樹影相留念時(有當年打war game時既感覺,但bb彈變大了同減速了),被膠橙擲中兩次,如果係真橙的話,相機受損兼肉身紅腫都有份.....

　

任務完成,笑逐顏開,一啲都唔似喊過同扭計~

係村內既美食檔買咗個雞蛋仔($20),同橙汁($10),幸男坐係石壆位,慢慢嘆茶點(人家檢視點解風車唔係個個都一齊轉).

臨走前見到有幸運轉盤,幸男排隊自己轉,結果係"財源廣進".幸男話"呢個咪對我個願望有幫助",中文理解能力突然提升!

回程等巴士大排長龍,見有小巴$20位(唔知係假日價)有得坐,急急帶開始有睡意既幸男上車.半個鐘就到元朗,見未夠鐘番爺爺嫲嫲屋企食飯,於是行玩具舖,結果買咗上次聚會wing fung愛兒帶出黎玩既tomica.

黐貼紙黐到我眼澀,但幸男就好滿意呢盒兩車合體(組合車同機械人)既玩具,開心體驗"好多車車"既願望~

年初三中學書友盆菜

晏晝開始擺好個陣,準備今晚招呼中學書友黎食盆菜.一家三口的士來回去新墟攞訂好既盆菜,飲品早就準備好.　

同學們陸續到達,我就同溫生係戶外邊傾邊睇火.

Oscar同Thomas兩兄弟,阿哥抱住ella,細佬攬住David愛女.

飯煲都放埋係戶外,方便大家隨時隨意添飯,準備開餐~~

"至尊鮑參金盤":古法扣南非干鮑魚,炆自法靚花膠, 炆自法大婆參, 原條家鄉釀鯪魚, 懷舊干煎海中蝦,蠔皇原隻金蠔, 發財瑤柱圃,家鄉芋頭扣肉, 柱候炆大鴨掌, 油泡大吊片,秘制釀大豆付卜, 鮮味炆支竹,南乳炆蓮藕醬鴨, 鮮甜大蘿蔔.

送馳名南乳吊燒雞一隻,生炒粫米飯2磅,支香檳就係我自己準備既~盤菜味道唔錯,唔會咩都係一種味,人家傳述師傅既說話"個盤用五種汁去煮".

份量足12~15人用,我地今晚12個大人,2小朋友都夠食, 只係最後有少少意外,糟蹋了一部份溫生買既生菜.大家食得開心,女仕們傾育嬰,男仕們飲酒,小朋友玩車仔玩具.

今晚自己都掛住食同傾,為大家影既相都唔太多(溫生同Thomas傾咗好耐)~

Oscar話平日少機會飲紅酒,因一個人飲唔晒.今晚咁多男仕,當然可以邊飲邊傾,輕鬆一下~

人家自恃有bb緣,抱住ella黎影合照,又真係無喊喎.

十點左右散席,送客過後,我同人家忙於分頭清理室外室內.幸男等沖涼期間,己攰到係梳化上訓著咗.

多謝大家賞面到臨,一齊開開心心,熱熱鬧鬧咁食餐飯.

年初一:開年,會友,天倫

一家三口中午番老家食過開年飯,搭42小巴出市中心,去HABITU搵定位,點下午茶等阿禮.

之前We Chat過阿禮,問新年會否留港一兩天,結果約咗今日下午茶小聚.有別以往晚間小聚,今次以啡代酒,幸男第一次見禮叔叔.交代兄弟們近況,生活話題總是談不完.

台灣女生準備晚餐時,我同幸男開動之前買既迷你1000pcs"花咲く幸福駅"砌圖(買果陣諗住砌好可以掛係幸男間房).原來迷你既一千塊難砌過正常版,因為每塊之間既隙縫太少,難以確認是否正真配對.另外每塊表面提供既資料太少,要係花海裡搵出大概位置都係令人汗顏...

好在每塊既背部都有密鋪圖案,配合提示紙就可以分出每一塊屬於左上,左下,右上右下,四個區域,多過一款密鋪圖案既就係十字交滙位置."梅花,波點,横間,横間,階磚,波點.........",開飯前都未能同幸男一齊分齊5兜.

幸男最鍾意安在家中食飯,唔洗搭車或行到腳軟,食飽就可以玩心愛玩具.

砌到眼都矇,先搵左下方(梅花背)既邊位,搞好耐都唔肯定啱唔啱,結果以背後既密鋪圖案排列作確定.幾經辛苦至完成邊位,火車位置較易作定位,睇黎仲有慢慢長路......

雖然今日無咩特別地方去,但簡單輕鬆既一天,未嘗唔係一年既好開始.今年以州長阿諾舒華辛力加當打既健美相,黎賀大家"身壯力健,新春大吉"~