年初一:開年,會友,天倫

一家三口中午番老家食過開年飯,搭42小巴出市中心,去HABITU搵定位,點下午茶等阿禮.

之前We Chat過阿禮,問新年會否留港一兩天,結果約咗今日下午茶小聚.有別以往晚間小聚,今次以啡代酒,幸男第一次見禮叔叔.交代兄弟們近況,生活話題總是談不完.

台灣女生準備晚餐時,我同幸男開動之前買既迷你1000pcs"花咲く幸福駅"砌圖(買果陣諗住砌好可以掛係幸男間房).原來迷你既一千塊難砌過正常版,因為每塊之間既隙縫太少,難以確認是否正真配對.另外每塊表面提供既資料太少,要係花海裡搵出大概位置都係令人汗顏...

好在每塊既背部都有密鋪圖案,配合提示紙就可以分出每一塊屬於左上,左下,右上右下,四個區域,多過一款密鋪圖案既就係十字交滙位置."梅花,波點,横間,横間,階磚,波點.........",開飯前都未能同幸男一齊分齊5兜.

幸男最鍾意安在家中食飯,唔洗搭車或行到腳軟,食飽就可以玩心愛玩具.

砌到眼都矇,先搵左下方(梅花背)既邊位,搞好耐都唔肯定啱唔啱,結果以背後既密鋪圖案排列作確定.幾經辛苦至完成邊位,火車位置較易作定位,睇黎仲有慢慢長路......

雖然今日無咩特別地方去,但簡單輕鬆既一天,未嘗唔係一年既好開始.今年以州長阿諾舒華辛力加當打既健美相,黎賀大家"身壯力健,新春大吉"~