苦學生

放大假,理應可以多點陪幸男,但實質只係多點幫手接幸男放學及送上功課班.花15分鐘送幸男上功課班姨姨家,自己就行番去置樂搵Mc Cafe坐下等時間,點知間老麥只得快餐賣,唯有去咗公園.好在有瓦遮頭既象棋枱空置,可以掏出平板電腦上網打住blog黎善用時間(努力追回旅行既日誌).天氣清涼,一副休閒寫意既心情,但長遠真係要搵個類似咖啡店既地方黎殺時間.　

差唔多時間就上番去姨姨屋企接番幸男,排咗唔係好耐隊就有接駁巴士,可以係市中心落車轉輕鐵,送上婆婆家.80年代,小學係半日制,我可以係家中食完午飯,慢慢做功課及溫習,有剩時間就可以睇電視,玩玩具,聽收音機,或發白日夢.資訊犯濫時代,幸男只可以享受親人接送既溫暖,邊走邊說既儍話或重溫自己學前階段既軼事.

"幸男,你記唔記得你陪爸爸出去買頭盔?"(正確答案:三歲唔夠)
"記唔記得我地之後去咗邊?"(正確答案:去隔離花店買花俾媽媽)
"你話要一個粉紅色既頭盔喎~"(幸男話而家想要藍色)

PS:仲有兩年,幸男就可以坐愛羊後座了~

是日家居湊仔

今日台灣女生番晏晝班,食過茶餐外賣午餐後(我騎羊去攞),開始督促幸男做功課,以及溫習英文默書,完成後就係幸男既卡通片時間.由於明日要番學,所以晚餐由我負責,好讓幸男多點時間休息.

原本人家吩咐落將包裝咖喱牛肉烏冬煮好兼扔埋啲菜落去煮就可以,但我覺炒菜會香口啲.8年無炒過菜,雖然色水唔錯,但幸男話好似無咩味(已爆蒜,兼落蒜鹽).....自己果份,只係翻叮既燒鰻魚配半嘜米既白飯,兼大半碟菜.

洗完碗同打點幸男沖涼,幸男於房中靜待媽媽放工哄睡.　

飲囍酒,Tai甜蜜

由於早到囍酒場地,於是去酒店既longue坐下,回想起年少時於李白吧既日子.

點咗杯sex on the beach,以前第一round既例牌.湊小朋友既階段,呢個例牌cocktail變得珍貴,一個人既時光沒有半點不安,當然有伴瞎聊是較開心的.

新郎哥Tai GG竟然可抽到時間與賓客寒暄,當然要影番張相為新郎哥打氣.

起菜後,新郎哥突然出沒,青年軍立即結集與Tai GG合照.

煩文縟節及婚禮籌備雖然費神,但呢個共同回憶絶對係人生新階段既交滙點.一張又一張既合照,滲透著大家對新郎及新娘既祝福.

祝一對新人"幸福美滿,細水長流".

綿羊仔點載棍?

花園既掃把棍係上次擊退入侵生物時損毀,雖然知道藍地雜貨店有得買,但一直諗唔到點用電單車運載,自己又唔想行落去買兼行番屋企.今日卒之的起心機,用另一支地刷棍度位,咦!呢個位得喎~於是去相熟茶餐廳食過晏後,就去買支新掃把棍.

驚中途飛脫,用膠袋綁住,原來冚實SEAT位時會啱啱好頂實.番屋企send俾家楠睇,原來咁啱佢見到我係廻旅處附近調頭~

仲記得2號果日一入屋時發現有啲嘢係落地玻璃附近,入屋後隔住玻璃見到係蛇仔!拎齊藍威寶,殺蟲水,電閘匙牌,一出去就用殺蟲水逼佢行出啲花園位,再以垃圾夾撥向近電閘位置,以未經稀釋既藍威寶淋佢,見蛇經電閘下方逃走時就開動電閘.雖然有傷及蛇體,但都俾佢走甩.無幾耐見佢再出現係電閘附近,於是用橙威寶淋多佢一次(怕藍威寶傷金屬),再以掃把棍將佢掃出閘外,再淋多次橙威寶,好似walking dead咁打要害,成功除害(緊張過打mon hun..).

肉餅飯小隊

尋日已約定今日番完早更,跟同事一齊去屏山食肉餅飯,除咗掛牆招牌款式外,餐牌仲有唔少選擇.

由於我唔知該食店係邊,於是騎羊跟住碧權既私家車行,結果都無斷鏈,順利到埗.

下午茶時段,店內客人唔算多,我地輕易地坐低點餐及自拍.

六重芝士真係唔嘢少,驟眼睇好似係太陽蛋係肉餅上.雖然好味,但食到中段已開始飽滯,今晚餐飯都要晏啲至食得落~

沒有主題的假期天

幸男對波鞋開始唔啱著，所以今日係市中心食完晏送幸男上婆婆家時，特意望下個size號碼。

番屋企晾完一機衫就騎羊出去市中心,係泊羊位置附近既運動店睇童裝足球鞋,款式好似比較沉實.

買埋個Paul Lafayet既Strawberry Heart外賣俾幸男,就上外母家.幸男剛好沖完涼,一面睇住卡通,一面享用足球班後既茶點.

再騎羊出市中心,睇咗幾間連鎖式運動服裝店,都係adidas既呢款比較可取.

運動家就有另一個顏色,仲要平啲添,搵日叫台灣女生帶幸男黎望吓實物兼試size.

行到近七點，一個人係MOS Burger食單身漢餐。番屋企坐陣，再騎羊去接人家放工。

幸男於婆婆家過夜，兩公婆可以一齊睇之前錄落Viu TV既大人女子。

Constructicons merge into Devastator!

尋日買埋最後果2隻變形金剛(俾埋腰部個架果$550,胸口個架上次已俾全費去訂貨),今日卒之都可以組成6合為1 既巨型機械人!忍唔住拎出去花園,以手機配合自然光源黎拍照留念.

除咗正面夠晒霸氣之外,背部既設計亦非常紮實,沒有太多空心位置,或不能被收納之累贅部件.

玩具既設定以G1為基礎,並加入新元素,例如車款現代化兼參考現實工程車,以及巧妙地將拖拉型發電機組化作前臂.細個時咁多個合體既變型金剛,最喜歡就係建造派,因為每架工程車都有獨特款式及功能,没有重覆.

由建築工程車,合組成機械人-破壞者,高度有三罐汽水或啤酒咁高.第一次買祖國自行研究既第三廠變型金剛玩具,與日本正廠相比,膠色無咁均勻(偶見色料波紋),邊位無咁滑手,說明書唔夠清晰.話雖如此,其變形及合體設計絶對有正廠MASTERPIECE既層次,遠超UNITE WARRIOR系列.

PS:唔怕貨比貨,至怕唔識貨,俾多一倍價錢就靚好多了(UNITE WARRIOR都要千八).

幸男小一開學日

朝早六點鬆啲就起身,食過早餐就動手為幸男熨校服,以前阿媽幫我熨,而家就自己熨俾阿仔.

  

見幸男卒手指就知係眼訓,比幼稚園早成個幾鐘起身,真係要啲時間去適應.我地上果班614都幾迫人吓,始終中小學生都係呢個時段搭車.

輕鐵站落車經商場行天橋,重新融入以前熟識既社區.是次既小朋友角色不再係我,而係幸男.

怕正門多家長及學生,兩母子一齊係學校門口附近影合照.

首兩星期都係半晝適應期,放學時間為12:30.家長須於雨天操場等候,並要從同班學生中認出自已兒女.

我騎羊護送書包,人家同幸男徒步行去市中心,大家係築地拉麵集合兼食晏.幸男對新環境無話特別抗拒,我勉勵幸男"爸爸細個都搞得掂,你無理由唔得既~"(前設係爸爸讀書都唔係好叻.....)