聖誕樹迎接十二月

晚飯後,台灣女生從士多房攞出聖誕樹及裝飾物,為聖誕月份作準備.幸男話要幫手,於是人家砌好棵聖誕樹就放手俾幸男掛裝飾.

兩母子合力下,聖誕樹大工告成!樹下放咗婆婆送俾幸男既火車玩具,以及群姐好姐送既聖誕老人鐵罐(已取出內裡之零食).人家已準備好聖誕禮物,只係未拎出黎,而我就仲係未有打算......

聖誕樹上既掛飾係我同人家拍拖時買落的,當年我帶住棵較細既聖誕樹兼掛飾上外母家,唔經唔覺掛飾已服務第十個聖誕節.趁兩母子入房訓覺,特意用腳架影低黑暗中閃著不同顏色的聖誕樹.以手動模式黎影,曝光時間長了,反而抓不住變幻既色光.或許本身以白光為主,五顏六色相對短暫,唯有下次試下以高ISO夾短快門呢個組合作titration.

Sheep Rider Blog @ mac cafe

是日放假,中午帶幸男去市中心食拉麵後,送幸男番學校上興趣班.由於要等兩個鐘,於是行去附近商場既mac cafe坐下.星期六人多,好彩搵到個搭枱位.見屏幕打出手中之號碼,走去攞埋杯凍啡埋位,正式開檔.

平日係屋住對住電腦打blog,好多時都唔太集中,想去睇電視,走去上無聊網,上you tube搵歌聽...反而今日係mac cafe,可以用一個鐘左右就完成一篇blog(紅色的跑車).諗到個腦實晒時,留意身邊食客們之亙動,或呷一口咖啡,腦袋比在家中快點回復過來.

PS:當初買平板電腦,除咗讓幸男可以係家中或婆婆家做學校既e-learning外,另一目的就係台灣女生可以於家中網上訂購,以及自己等接仔時打blog.

家長日的感觸

以前細個就係呢個景觀望住屋企等放學，尤其係落雨天，同學們都穿好雨衣，傾住計黎等或以傘代劍黎玩住等。

今日就以家長身份等見老師，於幸男所屬之課室見班主任，櫈都未坐暖就見完。幸男成績無問題，已適應小一生活，品德操行亦未見搗蛋。

由於開始落細雨，我同人家急腳騎羊歸家，没有於學校自拍留念。課室座位少了，以往放電視（方便播ETV）既角位變了有電腦既老師枱。童軍們向經過既家長認真地敬禮後,隨即回復閒置既模樣.我被呢份純真既童心,逗出笑面.

"文","行","忠","信"之薰陶下,希望幸男開心渡過未來既校園生活.

擺酒九週年

踼回側架,左手抓緊制動器,右姆指按下發動鈕,引擎聲及微風帶領下,將九年前同款式既花球送回屋企.

無咩特别安排，夜晚出街食飯前係花園set個腳架同閃燈黎影張生活紀念照。當年有份參予接新娘兼南生圍外影既愛羊，今天再一次出席極小型外影.

搭巴士出旺角,先係太子食臭豆腐,再去番近火車站既利苑食飯,點番上年食過既餐.

以前幫襯過德福及圓方既分店,覺得旺角呢間分店菜單選擇比較多.

雖然二噁英風波愈演愈烈,但我地都照食呢碗生拆蟹皇燴翅,太好味嘛~

呢味白酒煮象拔蚌仔真係好正,肉嫰汁滑,常規菜譜外既廚師推介絶對係亮點.

二人時光,輕鬆閒聊,以在職家長黎講絶對係忙裡偷閒.

今次既葱油脆皮開邊炸龍蝦比較大份,記得上年個次無咩肉食.

鑊氣夠真係好緊要,筷子夾起時,熱氣從下層冒起.　

食到中途已向職員留定甜品楊枝甘露,等正餐過後可以享用.食過甜品屋或酒家,都係呢度既最好食,不負"始創楊枝甘露"之名.

新婚不再,平淡中有夾雜著亙相關愛及體恤之回憶,足以令我倆繼續帶著幸男走更遠既路.

你的名字

雖然前作"追逐繁星的孩子"及"雲之彼端,約定的地方"有點令我失望,但憑在日本上映掀起熱潮,今日我同台灣女生一齊係The Grand Cinema睇新海城既“你的名字”.

男主角立花瀧係一位住係東京既高中生,並於西餐廳兼職侍應生.一天醒來時,發現自己係女兒身兼生活於飛驒區之一名女高中生,但是翌日醒來又回復番原有之身份,從朋輩得知之前一日的自己亦變得好奇怪.經過男主角細心分析後,原來他與身處飛驒糸守町的女主角會在約數日子交換身體去渡過對方的一天.

女主角宮水三葉係一位憧憬東京生活既巫女,她與男主角經歷過一樣奇怪既一天,之後發現對方既存在兼不定時靈魂交換.為免影響對方既生活,雙方於對方之智能電話之筆記及行事曆功能,記下交換靈魂當日經歷既事,以及定下體驗生活之約法.　

首段既搞笑劇情好快轉為奇幻及愛情主線,原來男主角與女主角並非處於相同之時間線,反而係相隔三年.有一天,三葉留下短訊告訴瀧約會餐廳女前輩後正好可以看到慧星,瀧覺得奇怪回撥卻打不通,自此就再也沒有無發生靈魂交換.

手機上的記錄變成亂碼並演化成空白,男主角憑著依稀既記憶,去到飛驒搵女主角,原來3年前糸守町已經被慧星碎裂成之隕石破壞,所有瀧以女主角身份認識既糸守町朋友已經罹難.

男主角返回東京後,始終無法接受女主角既離去,於是設法通知三年前之女主角以逃過災難.新海誠巧妙地將青春學園,日本傳統,天災離別,姻緣懈逅,串連成一豐富既故事.最感動既,莫過於瀧重返宮水神社位在鎮外山上的「御神體」,並於短暫的黃昏之時,相隔三年時空既同一個地方,立花瀧與宮水三葉卒之第一次實時望見對方.

結局前敍述隕石意外前(夏祭當日),女主角心血來潮搭火車趕去東京試圖搵男主角,但由於三葉與瀧時差三年,即使於同一個車箱,三葉於瀧眼中只是一個陌生女生.於落車人潮之分隔之下,三葉只能將頭繩送給瀧作寄情.原以為係充滿遺憾美既結局,無諗過結局係成功疏散糸守町住民後五年,男女主角於兩列並行之車卡中相見,說不出的激動及連結,令他們落車後都可以於街上重遇,亙相問出"你的名字?"

PS:睇戲前係戲院隔離食Fish & Chips及牛肉批(超多牛肉),雖然貴一點,但真係好好食.

係商場既HMV買埋隻soundtrack,因為本人真係好喜歡這部電影.希望以前唔太喜愛散文式短編動畫(星之聲,秒速五厘米)既朋友,可以主流式愛情電影黎體會新海誠既精緻畫功及細膩既情感描繪.

SUZUKI BURGMAN 400

 好開心係網站見到有關2017年新款BURGMAN 400既消息,因為SUZUKI綿羊部門好似沉寂了好一段時間新車外型硬朗,頭燈仲要係用上LED燈添,好有時代感.

但尾部就令我有不少失望,因為座腳踏位由平面變成可收納式棒條.

前方佈局繼承SKYWAVE或BURGMAN既傳統,但中央下方既收納格就好似被删去.

座住新設計非常搶眼,前座位靠可作前後調校,車主應感到貼心.

可惜seat位下方既收納倉變細了,不可容納2個全面型頭盔,只能放入1個全面型加1個開面型.

個人覺得BURGMAN 400既定位近似YAMAHA既T MAX,同樣係以跑格為主題,但多一點載貨量.希望2017年會有新款既SKYWAVE,但唔會只係將個車身名由BURGMAN改上SKYWAVE就算.SUZUKI繼續以最高檔次既綿羊來設計及定位SKYWAVE就好了,我其望下一代既SKYWAVE會有更多驚喜及進步.

紅色的跑車

幸男已經六歲,唔再可以坐落爺爺送既電動跑車.原本諗住係送俾同事既親戚,但叉電已不能正常運作,即使叉足成晚都只係車頭燈著,摩打及軚盤聲效無法啓動,唯有送往垃圾站....

每次出球場玩完都會抺乾淨再入膠袋,存放係士多房,所以即使3年有多都保存得好好.

臨別在即,以手機為跑車留下倩影,好讓一家人他日可以回憶(左上方既影係我隻手指,左下方既車軨因常鬆脫而黐blu tack).原身有個遙控制,可以將咁大架車當遙控車黎小朋友遊車河,但今日搵唔番.

幼稚園時期,晏晝一有時間就帶幸男出去球場玩電動車,順便係小遊樂場玩鞦韆.記得呢一張相係將生日既氣球綁係跑車上,幸男一邊行一邊望住啲氣球,好似驚佢地會爆同飛走咁.

PS:好懷念圓碌碌又嗲既幸男,總覺得為幸男影既相唔夠多同靚.

Dr. Strange

老豆放假,我同台灣女生番晏晝更前去市中心UA會合老豆一齊睇Doctor Strange.男主角Stephen Strange係一個自大狂傲既腦神經外科醫生,一次交通意外令雙手嚴重受損,失去原有既意氣風發及名利雙得既生活.

從康復治療師得知一位不良於行既病人奇蹟地回復活動能力,男主角懇求該病人告知良方,於是去到尼泊爾,遇見大師Ancient One,開拓新知識及世界觀念.

男主角入門前,Ancient One既門生Kaecilius盜取禁斷魔法章節,企圖召喚黑暗力量征服者Dormammu,以換取永生.Dr.Strang憑其過人記憶力及理解能力,剛滿師就肩負拯救地球既使命.

題材有別一般漫畫英雄,打通多元宇宙之門並借取力量作為己用,圖以邏輯理論以演繹魔法.最後於香港守衞聖域之戰理應係全片既重頭戲,但反而有點失色.第一:再一次出現不合實情既香港景物,例如簡體字既招牌及未曾見過既大排檔餐枱,相信係搭出黎既廠景.第二:無驚天地泣鬼神既絶招收拾Dormammu,反而係借用時間寶石Eye of Agamotto,以不停重覆戰死之時間線,製成時空監獄來逼使Dormammu放棄吞噬地球.

作為英雄電影既第一集,總算係不過不失(尤其係穿插戲中既笑位,例如懸浮斗蓬),冀望下一集會緊湊及豐富多一點.

PS:Ancient One既禪學令故事加添一份思想內涵

幻之羽手先-考試後慶功宴

幸男完成小學第一個考試,為表揚幸男既付出及台灣女生既辛勞,一家三口出去尖東食名古屋菜,重拾旅行既歡樂時光.
呢間食店係我係網上搜尋"羽手先"時搵到既日式食店之香港分部.店內有唔少日本人黎幫襯,貼滿日文既廣告及菜單,真係好似去咗日本旅行咁.

呢客西柚帶子沙律好好食,唔知食材是否全日本直送呢?

星期二至有既咖喱飯,無諗過磚紅色汁既配料係豬腸.幸男唔啱食,而我都覺得麻麻地,食過咖喱雞同飯就算.

店內有相熟啤酒牌子既生啤,當然要叫番一杯~

人家都叫咗杯梅酒梳打,拎住傳說中既"幻之羽手先"影相.

"幻之羽手先"比較惹味,鹽燒雞翼被比下去,但其實都味道唔差~

芝士蝦春卷,無想像中咁多芝士,下次可以唔叫.

幸男原本話可以食晒一碟五隻既鹽燒雞翼,但結果只係食得3隻,不過就真係食得好滋味.

朴葉味噌燒,我地當初係飛驒既溫泉旅館都只係見過隔離枱有得食,無諗過番香港仲有機會補試.由於我本身食拉麵都揀味噌,所以呢一款以味噌調味既牛肉好啱我口味,加上朴葉既獨特味道,下次都會再食.

我同一家叫多一客幻之羽手先就埋單,走去附近既日式雪糕店食甜品.幸男同人家一齊分一個士多啤梨甜品,食得好開心.

行去260X巴士站時,見商廈外牆已掛好聖誕燈飾,於是係天橋上砌好相機同閃燈,為兩母子影合照.

自從幸男就讀小學後,平時都好難可以一家三口一齊出街食晚,飯或者行吓,因為放學已近三點,上埋功課班已五點有多,翌日又要早起身番學.....感覺上,幼稚園真係小朋友最可愛既時間,兼且最童真既時光.無咩大壓力下既幸男,可以放學後輕鬆完成功課,兼訓個小睡,再玩喜愛既玩具.適逢爸媽番早更或放假,仲可以晏晝出街玩.

幸男並無抗拒小學既時間表,可能多咗與同學們既亙動及新學科既嘗試.我不時同幸男說教"學習係為咗生活所需",除了應付日常生活外,更為將來作準備.發掘自己既長處及興趣,他日回饋社會."爸爸曾經想做一個研究生,參與可以改善人類生活既計劃".