大假的星期六

朝早起身就同幸男玩埋呢局横2016~2017既大富翁，其實我得番藍色既石澳同淺水灣力抗地産霸權，偶爾要刻意留係監獄避世。見幸男匿埋一邊計數，就知道板圖已被統一。

經歷過抵押樓房物業逆之景低潮，險遭破産既幸男守得雲開見月明,再一次成為大富翁。

送幸男上大興食晏後,我同人家係PACIFIC COFFEE小休.星期六仲可以搵到個梳化位,都算好彩.

家中食外賣午餐時,飲咗杯燊光既凍奶茶,唔想再飲一大杯凍啡,於是叫咗杯double espresso.因為第一次嗌,所以問職員姐姐double係份量定係濃度,點知俾姐姐問我有無飲過(可能怕我嫌細杯).Double份量既espresso比正常既咖啡,確實係細杯一截,但濃厚既味道,較配合細味品嚐.

雖然落過雨，但上堂時地面已乾得七七八八。父母一齊觀課，唔知小朋友係咪會開心啲呢？

夜晚安在家中，享用人家主理既晚餐，都叫有肉有海鮮丫～

 

PS:Blog維修工程已大功告成，理應所有舊yahoo blog 搬去Xuite blog再抄去 Google blogger 既相都不再出現死link 。

年度原廠check車日

由於天陰落雨，原定星期一既原廠check車順延至天睛既今日。相熟既路線，只係牛池灣附近有段時間塞車，目的地之工廠區範圍亦依舊半塞半慢駛。電池無存貨，軩紋尚可，留待下年再跟進。除咗基本換機油，油隔，風隔，重點係錶板之背光燈膽。

放底愛羊後，行去逛APM 黎打發時間，午餐依舊係花園餐廳享用。雖然人多，但一個人好容易搭到枱。午餐選揀唔多，燒豬手味道一般。

打電話問車行有車攞未，職員答仲有15分鐘車，於是係附近既商業大樓空地坐多陣兼刨下本Headlines(CD Warehouse買碟時攞既)。原來都有唔少職員落黎食煙，男女共聚打邊爐。
換完機油，動力輸出及反應都變得敏鋭。番屋企攞埋台灣女生既頭盔，就去華都會合。呢間叫牛蓋既日式食店,由一位師傅一腳踢.

人家揀咗個牛扒烏冬,味道唔錯.食家話$78當晚餐就還可以,但午餐的話真好似有點貴.

牛小排作食材既極上牛蓋飯,啖啖肉,唔會有0趙唔開既筋位及肥膏,一分錢真係一分貨.

PS:攞車時見catalog架上已有BURGMAN 400既單張,問過老職員,原來十月會番第一架呈上運輸處,預年尾就開賣.希望年尾有時間去望下真身,當然期待會出日版SKYWAVE~

幸男日誌

今日卒之係市中心領取訂購既日本水果啫喱,五款味道各有兩杯.因為用上玻璃杯作容器,所以呢個禮盒裝都幾重手.

幸男揀咗個橙味試食,中間有大大啖橙肉.小朋友食得開懷.幸男升小學後,閒留家中時間少咗,因為放學晏咗兼應付功課.日前為智能電話照片作備份時,發現電腦硬盤內既幸男相機照片比舊年少,所以今日特意拎出A7為幸男影幾張生活照.

PS:BB階段既幸男,有好多既第一次主題作攝影推動力.雖然工作令我透支過之前,但不得不承認自己真的疏賴了....

平電腦產品=差售後服務

原本今日約咗出觀塘check車,但天氣不穩,朝早就打去車行取消,改為搭巴士出深水埗搵小歌仔聚舊兼整平板電腦.

同地膽一齊試L Place Cafe，我就點咗個車打芝士忌廉煙鴨胸意大利飯。

店內裝潢唔錯，我同小歌仔坐係近門口既高枱。工作地方不同了，但老朋友之間既話題總唔會少。

台電既維修代理鵬勃電子科技都幾up dup 吓，唐樓低層二樓，一入去得4張櫈。雖然部機係平，但無諗過售後服務咁差。職員阿嬸話我無鵬勃既保養證，我答當時零售店話憑正單就可以，但阿嬸堅持其公司政策。

我提議打去零售店，搵佢同店零售店溝通，阿嬸霸氣地拒絕，並話呢啲係你哋之間既瓜葛。零售店同我溝通後，叫我將個電話交俾維修代理職員，阿嬸勉為其難咁接過電話。

同小歌仔坐係櫈位等零售店覆，收到電話問單據上之資料，再等覆。有點不耐煩，再打去零售店查詢，接電既職員都顯得不耐煩，答同事跟進緊。我表示我身處維修代理舖位，零售店職員才意會我既處境。

再等多一陣，維修代理阿嬸叫我行埋櫃枱，話只會幫我整呢一次，反正保養期快到(七月尾)。維修期要4至5星期(因要拎番大陸廠整)，又話自己話唔到事，話唔到就當初咪咁霸氣丫！

PS:夜晚安在家中，享用台灣女生主理既晚餐。希望星期四會好天，可以如期出觀塘 check 車。

另外，以WhatsApp約網店賣家於地鐵站交收成功，搞到自己都心郁郁想揀一款買俾自己。

父親節

七點幾收工時,已經係父親節既早上.訓醒就等台灣女生同幸男番屋企並呈上外賣餐,呢個由幸男以自助點餐機選既signature芝味蘑菇安格斯餐,就係我既sleeping day午餐(雖然時間上係下午茶).幸男笑得咁開心,因為佢謀住我個薯條,結果係俾佢食晒.....

夜晚番老家黐餐,細雨下,每人擔一把遮~

老豆今日放假,其實有諗過book自助餐,但父親節正日,間間都滿額,再唔係就要你先俾全數至可留位.簡簡單單咁係屋企食老媽煮既餸,我就帶咗支紅酒,大佬就買咗個父親節既macaron.最重要既,當然係可以見吓孫仔~

放假做番個好爸爸

放假天,接幸男放學前,先去郵局領取網上訂網既雨傘(自己一把,幸男一把),因為用開果把唔見咗.

經過社區中心,諗起小學及預科既逸事,忍唔住影番張相.

考完試既六月份,幸男只需番半日學,所以帶幸男去附近商場食晏晝.等位時間大約十分鐘,幸男不時打喊路....

幸男點咗碗紫菜叉燒拉麵,起初仲怕唔啱食,點知幸男食唔停(當然都係食唔晒一個大人份量).

我叫咗個雜錦魚生粒丼,味道都唔錯.食飯時同幸男講,第時大個啲就好似隔離枱既中學生,一齊出街食晏,再大啲就同工作同事食.

搭輕鐵番市中心,同幸男行陣玩具部,再買芝士蛋糕拼芝士曲奇.幸男係屋企睇吓電視又玩吓玩具,一片心等媽媽放工煮晚飯.

Striker Manus

Striker Manus已經入手近一星期了,變形步驟已經摸熟,說明書都可以放入專用Clear Book珍藏.機動性高，一於悪搞一番，先黎係扮經典高達RX78。

再黎扮雷神跪地拎鎚(斧)，可惜大髀未能提高過裙甲，唯有扭腰遷就。

扮Gaigar準備Final Fusion合成勇者王GAOGAIGAR~

之前都有將新生柯柏文同Tamara 復刻版G1擺埋一齊合照，比例同造工都有莫大進步，關節可動性更加係不容置疑。

汽車形態帶點concept car感覺，最欣賞槍炮巧妙地變成車頂擾流部件。

雖然小腿部既收納唔太隱密，但腳掌之機關總算成功重塑車尾之平面。

佐酒良伴

早更過後,騎羊番屋企,再跟華B車入元朗買嘢,因為今晚係宿友BBQ.是日星期六,車位緊張,唯有華B落車買嘢,我就係乘客位看車.無食晏,只係飲咗支無糖份既金觀音,又熱又餓,有一刻攰到好似係沙漠咁 (後悔無聽幸男同台灣女生講，帶埋包芝士脆上車).......好在華B應我所求,買咗個腸仔包俾我充饑.

先係新田接阿禮上車,再係屋苑市中心接埋瀟灑,一齊去華B屋企~先係室內閒聊,兼參觀室內間格,太陽下山至出去戶外準備BBQ.

多重層架陣,大廚只需用夾將食材翻燒,就可以為賓客奉上美食.起初都有啲微風,後段就好似"毆"打風咁.大家邊食邊飲,有傾有講,回歸宿舍生活既感覺.難得係住家相聚,我帶咗支紅酒共享,貫切宿舍混合式品酒.

小朋友掛住玩，大合照都係唔齊人。希望下次可以約齊宿友，影張足本大合照。

PS:係車上等華B時,有點似女朋友等男友去買嘢咁,有啲hehe.....開車時同華B講,華B話我又真係著得kam kam地.....

Wonder Woman

今日同老豆係市中心UA睇10：50既Wonder Woman。之前睇Batman v Superman已被壓軸既Wonder Woman所吸引(超人之女友明顯被比下去)。

開場就由Bruce Wayne寄俾 Diana 之舊照正本作故事開端，背景為第一次世界大戰之晚期。

雖然預告片睇過呢一幕，但原來情節係非常熱血！Diana與男主角Steve 等人要潛入德軍秘密基地以阻止新研發之毒氣武器，途經僵持多時既戰線。Diana不理 Steve 之勸阻，除去斗篷以亞馬遜戰士身份從戰壕爬上戰線，誓要為流離失所既平民重奪家園。

隻身衝上戰陣，以單盾力抗敵軍多方之槍火，戰壕裏既士兵都深被感動，由Steve帶領下，一齊配合Wonder Woman攻破戰線並解放村莊。

仲以為最精彩既畫面已從媒體既預告片看過，但故事後期既Boss戰卻有驚喜。戰神Aris之化身並非嗜戰既德軍將軍Ludendorff，反而係暗中資助主角一行人之英國伯爵Patrick。

由於未睇過漫畫版Wonder Woman, 電影劇情絶對係新鮮,期待今年上映既Justice League。Gladiator 主題戰甲非常出色，充分表現古戰士之美術，遠超越70年代美國旗為主題既低空一件頭泳衣。

PS:睇過Gal Gadot演出之電影
Fast and Furious
Fast and Furious 5
Fast and Furious 6
Fast and Furious 7
Batman v Superman: Dawn of Justice
Keeping Up with the Jones
Wonder Woman

不完美,但滿足

朝早落過雨,夜晚見天晴無雲,於是再一次拎相機兼腳架出花園.樹梢之間,係第15個嘗試,得到呢張肉眼睇唔到既月球照.

F22, ISO200, 1/15s, 240mm設定下,肉眼所見既詩意圓光鏡,變成寫實月海圖.22-240天涯鏡伸延到盡都未能令月面比例合意,唯有事後剪裁原相.

雖然無夜星襯托,但能夠親自拍下月海照,已經好雀躍.月面之坑洞及紋路,令人聯想各種外星文明陰謀論.

Autobots, Roll Out!

尋晚上網得知之前買唔到既Striker Manus已經番貨,於是一片心今日早更放工就出去油麻地相熟玩具店入貨.

好耐都無試過為咗買玩物,特意出市區,平時都只係經區內相熟老闆娘購買.

四點唔夠去到油麻地玩具店門外等開門,表明係電話whatsapp查詢既客人,好快就完成交收.見巴士apps話3分鐘後有車,急急腳經地鐵站過番對面馬路巴士站等上車.呢份我當係送俾自己既父親節禮物,平日咁忙碌,都好應該奬賞下自己丫~