崇真書友火鍋

補鐘早走入元朗食飯，見仲有時間，係千色附近既尚品坊買臭豆腐食。手機search“元朗臭豆腐”，見新假期網頁介紹過，自又係附近，造就第一次惠顧(無諗過咁多女生會黎幫襯)。

“可以再臭啲”，外皮炸得夠爽脆，分量足够，$13都唔算過份。一開二既方法，方便食客不少。

市區回防既同窗，未能依時到埗，唯有行去英國佬，飲住生啤黎等，好在Oscar陪飲下半杯。

星期五晚上，竟然唔滿座。數碼網絡年代，不論男女老幼，都係相機食先。

再黎張自拍,教練係有一手。原本今晚係出市區食涮涮鍋,但食店既酒牌續唔到,所以至轉番區內火鍋。純男人既約會係一種釋放,暫緩家中既一切鎖務及配合,俾自己表達思想機會。

名人火鍋,味道唔錯,每人夾3舊水多啲,仲要有時令海鮮(每人一隻)。

食完火鍋,再去泛后甜品,我飽到碗楊枝金露都食唔晒。咁啱Andrew一家四口都係甜品店,結果我同Oscar有順風車坐~

玩具迷爸爸

元朗榮興都無Titans Return系列，今日特意出油麻地現時點碰運氣兼自己行玩具舖。搵到一間有日版賣，再行均全商場都唔見有美版，於是乖乖課金。日版造工較精細，車頭之火紋係透明膠，顔色亦以磚紅色黎呈現原著設定。

其實我已係訂過變形金剛既Action Robo問過有無美版火棒，並留咗一隻。近四點都未開門，唯有落去買嘢飲。

樓下OK見到呢款咖啡賣$16,平過隔離既天仁茗茶買奶茶,味道又唔錯喎~係便利店邊涼冷氣邊飲咖啡邊滑手機,等到夠鐘至上番去Action Robo.

滿載而歸,日版美版各一盒,呢個老豆都算合格有餘丫~

考試過後,送多架第三廠迷你變形金剛俾幸男作暑假玩意~

搭巴士番市中心時,咁啱幸男同婆婆係附近等台灣女生,幸男再一次接過愛機.

人家帶住幸男與同事食飯,我自己買埋KFC番貝爾特食.第三廠變形金剛雖然細小,但上色及變形細節都好出色.

幸男番到貝爾特至拆開愛機之包裝，應該係怕食飯時俾其他小朋友見到。耳熟既聲效，邊玩邊搖頭既畫面，令爸爸感到安慰。

PS: 幸男不得不承認舊玩具機械人係俾佢玩到鬆哂～

哭成淚男之愛機殞落

幸男玩機械人玩具時，不時自制聲效以配合幻想劇情。幸男突然間静落黎，再放聲豪哭…同係Transformers 同好既爸爸，影完短片都有出手安撫。

原來右脚大髀關節波頭斷咗，塑膠疲勞，返魂乏術……唯有變番做跑車模式先( 靠定風翼及兩小腿之接合點固定斷肢)。

幸男好喜歡呢架火棒，除咗玩具時間，每朝番學前都會短聚一下。趁番老家食晚飯前，去吉之島及玩具反斗城碰下運氣，但只有Power of the Primes 系列之火棒。幸男話唔靚，活動性不足，同車卡合體都未能挽回分數…

PS: 唯有聽日中午前去元朗榮興睇吓有無呢款1年前既産物，並委托幸男之伯伯順道係油麻地現時點望下…

市中心鋸扒兼睇戲

今晚一家三口去Outback食飯，雖然食來食去都係兒童餐＋牛扒龍蝦餐＋炸蘑菇，但總叫做近近地鋸下扒。

大估唔到幸男今次唔食炸雞柳，而係揀漢堡包。

室内燈光昏暗，以前邊可以影到咁清晰丫。專業模式(手動)無得校白平衡K數，只可以儍瓜機咁揀“日光”，“陰天”，“陰影”，“螢光燈”及“鎢絲燈”。

市中心食飯，就係為咗方便去Stage睇戲。初試Zeiss 自拍鏡頭，校埋白平衡，驚喜位係屏幕自動以裸色作補光(雖然其他機早已應用)。

第一集超能特工隊上映時，幸男都未出世，今次就有家三口入戲院睇。戲情依舊惹笑，最開心係衣夫人繼續由葛文輝擔當配音～

PS: 奸角Screenslaver概念非常絕妙，現今社會到處都係螢幕，至少每人手上都有一個～

第十八代手機-NOKIA 7 PLUS

經過一晚既網上爬文,今日中午去市中心領域訂購國內版既NOKIA 7 PLUS,放工就趕十點收舖前去攞機。特意揀咗部6GB既國內版,因為國際版得4GB RAM,同我部BlackBerry DTEK60樣.之前一心等TCL代工既BlackBerry DTEK系列新機(搏佢繼續有Waves Maxx兼雙前置喇叭),可惜得KEYTONE 2.適逢中階機種NOKIA 7 PLUS既出現,64GB ROM,6吋18:9IPS芒,$2700真係性價比高,飲恨無藍芽APTX。

相隔5部智能手機,卒之可以再次投向NOKIA。十年前,IOS同Android系統對壘,NOKIA無介入ANDROID陣營既大混戰。NOKIA以藍海戰略加入Windows Phone陣營,力圖打出一片天,可惜要合約完結至可以離開死海.......

另一心動賣點,莫過於蔡司認證既1300及1200MP主鏡頭以及1600MP自拍鏡頭.當年SYMBIAN系統盛行時,NOKIA與ZEISS既合作,絶對係信心既保證。

同樣以AUTO mode取景,BlackBerry DTEK60既2100MP鏡頭表現較差。是次換機,電池,記憶體,儲存容量都得以升級,只係缺失雙喇叭兼Waves Maxx聲效,以及2K屏幕。

手機Profile更新:
1st   Ericsson PF768                >黃色 sunday
2nd  Boch 909 Dual                 >灰色 people
3rd  Siemens A40                     >藍色 orange
4th   Ericsson T29                    >銀灰色外殼,紫色panel one 2 free
5th   Ericsson T39                    >灰藍色 one 2 free
6th   Sonyericsson T300          >紅色(紅豆) smartone 
7th   Sonyericsson T630          >黑色 smartone
8th   Nokia 6260                       >銀色 smartone
9th   Nokia 6270                       >黑色(深啡色,鋁金屬外殼) smartone
10th Nokia 6500 Slide             >銀色(鋁金屬外殼) smartone
11th Nokia N86 MP                 >白色 smartone
12th Nokia N8                          >橙色(鋁金屬外殼) smartone
13th Sony Xperia P                  >紅色 nwmobile
14th Sharp SH930                   >白色 nwmobile
15th Alcatel One Touch Idol X >黃色 nwmobile
16th Alcatel One Touch Idol 3 >灰色 Sun Mobile
17th BlackBerry DTEK 60       >鈦灰色(玻璃背面) Sun Mobile
18th Nokia 7 Plus                    >黑色(玫瑰金色金屬邊框) Sun Mobile

PS:一月為DETK換過新電池,但近月再出現不尋常電量流失,以及背蓋隆起,故不得不趕住換機.........

P更前的早上

朝早送幸男去社區中心，搭番輕鐵去市中心。見未夠鐘開場，係星巴克飲杯espresso黎上網打發時間～

同老豆一齊係Stage (UA 舊扯)睇戲，座位好舒服，銀幕夠大，内飾亦新潮，只可惜燈光昏暗，手機未能紀錄實況。

高凶浩劫Skycraper,感覺有啲似Die Hard第一集，男主角一夫當關對付恐怖份子。裝載單腳義肢既男主角Will Sawyer，因為前軍人背景以及舊隊友之引見而擔任世界第一商住高樓THE PEARL之保安總監。

恐怖份子為逼使樓主交出組織之犯罪紀錄而放火。男主角要趕返火場營救家人，更要揪出主腦。動作場面多，無咩悶場。故事背景係高樓林立既香港，非常之貼題。香港人講番廣東話，唔會不合情理地全部識講英文～

散場同老豆食埋飯就行番去V city 買芒果味泡芙俾幸男，因為尋晚賣晒，幸男流住眼淚離開，差啲大聲喊出。

趕去社區中心接幸男，並呈上貢品。幸男道謝後，就忙住食飯前甜品。

婆婆帶幸男番屋企，我就直接搭車番晏。

再次為法國隊高呼

中午時份,大昌打電話黎問會否一齊睇世界杯決賽,於是打電話去BOOK枱,無諗過坐唔到望大銀幕既位。

從未見過咁多客人,職員忙於擺放椅櫈，好讓吧枱客人可以望到掛牆電視。

石表哥話半場就要走，當然要先影合照。

大昌帶埋阿仔黎睇波，但世侄不時望手機，典型青春期男生～

全場滿座，但客人之間都有合理距離，視野不被遮擋。另一邊廂既晚飯區亦坐滿人，可惜唔方便舉機snap shot。
18分鐘,基斯文罰球開出曲墜球,克羅地亞球員欲頂出作解圍,但變成烏龍球。
28分鐘,克羅地亞球員開出罰球,門前混傳下,射入龍門追平。
38分鐘,克羅地亞防守時於禁區犯手球,基斯文射入12碼,法國隊再次領先。

趁中場休息,托附近客人幫我哋影合照.雖然唔係最好既設定,但總叫做清楚,可惜阿Jim郁咗.....
59分鐘,法國隊普巴於禁區頂,補射自己第一腳擊中後衞而反彈之回球，比數3：1。
64分鐘,麥巴比射入彈地波,奠定勝局。
69分鐘,法國龍門洛里斯接應隊友回傳時,被向前施壓既文迪蘇傑偷波射入,為克羅地亞追成4:2。

相隔20年,再次見證法國隊於世界盃奪冠,真係好雀躍及振奮。法國隊經過後施丹年代,走過內訌陰霾,新力軍成功吐氣揚眉~

相信最感觸既一定係教練迪甘斯,1998年以隊長身份與施丹等戰友為法國贏取大力神盃,如今以教練身份與一眾新力軍再一次捧盃~~

俄羅斯總統普京及法國總統馬克龍於大雨下,為是屆世界杯冠軍隊送上祝賀。

PS:自98年起,每一屆都寄望法國隊有好表現,期待既畫面卒之都出現~

黑色星期五之勇闖暴雨

朝早七點半出門，冒雨騎羊出深水埗交車過户。雖然有著雨褸，但中途下半身最後防線已失守…大雨令把手難以捉緊，幸好安全到埗。狼背地落布冚，擔住遮去茶餐廳會合接手人，食早餐兼填定表格，再冒雨去泊車位置確認車輛狀態。

先去運輸處附近既保險公司搞保險，再上運輸處排隊交表，再得叫名俾錢攞文件。下雨天，一個鐘唔夠就完成。拆埋車牌就搭巴士番歸趕番工。由於頭盔袋及頭盔都濕咗，上巴士就開行冷氣風位吹走濕氣。

市中心落車，去MOS Burger 食晏，趁有時間就番貝爾特沖涼兼換過套衫。

PS:當初擔心放車需時，怕趕唔切8月以舊車牌號碼套落新車。師兄問我“個冧巴都唔係好特别啫？”，我答佢係結婚花車，兼呢12年都揸得平安嘛～

法國對比利時@02:00

半夜兩點上演世界杯4強戲碼，十二點就打烊既貝爾特竟然照做生意。原本諗住得自己睇就係房用平板電腦上網睇NOW(怕房間電視光害影响兩母子睡眠)，但偏偏有睇波腳(嘉耀 ，康楠，Jim)詢問，當然要落去睇大銀幕～

話晒要捱到近四點至散場，當然要叫啲小食黎墊肚。今屆世界杯，比利時龍門表現神勇，我都好擔心法國隊既晉級之路。上半場比利時攻勢較多，下半場51分鐘，烏迪迪接應基斯文既角球，以頭鎚頂入全場唯一既入球。

唔駛打加時，可以準時番上房訓，話晒仲要番早更。其實今晚得3枱客，一枱後生既男生係半場休息時就離開，得番我哋同另一枱較成熟既男仕。Jim就係中途訓貓仔覺，而我就全場都好肉緊～

PS: 可以見證法國隊擠身決賽，捱眼訓都係值得既！！

Wolfenstein II The New Colossus

經過2小時既更新，卒之可以試玩呢款誇平台移植到SWITCH既Wolfenstein II THE NEW COLOSSUS.

用手提模式有點難玩，畫面細之餘，第一身視點之操控亦較難上手。網上評論話switch 既gyro control 活現FPS既精髓，期待以TV  mode及雙Joy Con 既體驗～