Keyless的匙扣

夥拍新坐騎已一星期,除咗車重,車高及系統性能外,更要適要銳減既載貨量。平日安放係前方收納空間既御守,直接用作keyless既匙扣,因為袋係褲袋時好難掏出黎。御守表質細軟,唔怕會刮花keyless硬殼,而且效果非常日系~

生活亦重回舊軌,可以輕鬆落燊光食晏,及於藍地買簡單日用品。

夜晚番老家黐餐前,同台灣女生及幸男係市中心星巴克坐吓,見有新飲品ICY COLD推介。

杯蓋獨特既設計，方便客人直接呷入頂層豐厚既奶泡,以漸進式去中和突如其來既Espresso勁道。

密室開機事件之BRAVIA sync

搞咗成個幾星期，以多個HDMI線接駁模式及電視設定,卒之都搵到破解sound bar平夜自動啟動問題。平時以ARC經SOUND BAR出聲時(如打機及睇MY TV SUPER機頂盒),OLED智能電視要設定BRAVIA Sync。

其他HDMI器材都會被智能電視認知及聯系,理應會作出最佳既輸出。當熄電視及SOUND BAR時,可能會有電子脈衝流動,令SOUND BAR以為電視已著並需以ARC經SOUND BAR播放聲軌。

只要熄電視時,係設定上將BRAVIA sync關上,就可以避免說明書上無記載既常遇問題。

第三代坐騎:TMAX 530 DX

十二點前,趕得切去太子萬里達攞車。太耐無買車,兼且上次以上會形式買車,完全唔記得要準備現金俾尾數兼其他雜費(行車證及布冚),搞到要行去附近既櫃員機㩒錢。行番去車行時,已見到愛駒安放係店外,當然忍唔住用手機影吓相先。

其實呢次係我第一次見到實物,好有古時憑相揀老婆既感覺。由於TMAX存貨量少兼搶手,客人只可以訂購形式買車,無法係車行睇陳列(陳列車都會好快賣出)。消光藍既主色,帶一點紫藍調。粗獷外型之中,亦帶有精細既線條美,婉如著上修身剪裁恤衫既大塊頭。

由於要等安裝椅背,先去搵地方食飯,無意中搵到間新開既泰式食店,計埋凍飲成$69。

見仲有時間,去埋花墟既GIT攞訂購既幸男專用頭盔(細碼J.O系列)。

果然係啱啱運到香港,24/7至出廠咋~明知電單車收納格無法容納紙箱,所以只係孭住個頭盔走人。

原定跟住google map語音導航去加德仕大坑東站入油,點知一個前200米右轉既落差,令我迷路至楓樹街......得一格夠行30公里既油,情況令人著急,幸好見到南昌邨,安心走上相熟西九公路歸家,成功捱到老家油站。

闊座墊兼座高800mm(雙腳落地模式,只可以前掌觸地),加上近個半月既真空期,令我有P牌新手上路既緊張感。50:50既車重分佈,15吋鈴配上800mm之座高,530cc雙氣缸既推動力,調製出優越既操控感,重拾學棍波車時既感知。新搭擋無視汀九之夏日橫風,於公路上一直安穩疾走~

與二輪立下契約,直至體力不支的一天。上一代坐騎與我夥拍了12年,如TMAX 530 DX可以走12年的話,屆時我會係一個50歲既銀髮族~

後座椅背,除咗添加一分休閒風,亦給乘客一份安全感。本人好喜歡車尾燈之分離佈局,以及獠牙式白光頭燈。

KEYLESS系統之外,把手上仲有唔少制鈕,真係要花點時間去摸索及牢記。尤其係店員叮囑我,記得泊車後按"off"鈕,並確定TFT屏幕關閉,否則一至兩個鐘就搾乾電池......

以往可於座墊前方爭取落腳停車既空間,但新羊座墊最前端係硬身車殼,一唔醒起就"un"中.........

車冚唔係舤布料,所以輕身兼摺埋都無咁佔位置。起初仲擔心是否啱有椅背既車款,結果都係非常匹配。

頭盔專用既櫃間，卒之齊晒一家三口。

另外購買既行李袋(龍骨位之上)未能收納J Cruise，但順利容納幸男既細碼J.O。

SKYWAVE 250SS座位下既收納空間能吞下兩個全面型頭盔兼布冚,但TMAX 530 DX就少了一個全面型頭盔。平日外出補給日用品,唯有用埋放唔到大人頭盔既行李袋~

PS:晏晝入完油,兜咗去新墟睇幸男踼波,順便向幸男介紹新坐騎。

線人的晩上

Fidelio B8回歸，是日放假兼夜晚一人在家，一於試埋條Palic7000。

上次用Inception試碟，今次就用埋WONDER WOMAN。

電視插齊5000同7000,大特寫作照妖鏡,跳插黎比較兩線之間既分別。含99.99%純銀之7000的確可以係暗位呈現更多細節,但以$2000既差格黎講,特價$580既Palic 5000性價比係較高。

晚飯就以蒸焗爐黎番熱急凍PIZZA,由於搵唔到食譜,所以揀咗最近磅既"自制pizza"模式。

時間倒數,嘩~成半個 鐘?挨住肚餓黎等,出爐時都只係少少熱....唯有打電話問台灣女生,原來要用Steam Convection模式,校番急凍pizza包裝上既建議-200度10分鐘。

Pizza配啤酒,令我諗想幸男出世無耐時,我要係早更後買定個迷你pizza餐番屋企當係晚餐~蒸焗爐既pizza真係比微波爐脆口，呢款急凍pizza味道同餡料都唔錯。

PS: 晏晝出咗去YAMAHA落中期訂，暫定星期五攞車。從未見過實物，只係網上睇過照片及視頻介紹，對800mm既座高有點緊張…

重整個人裝置

Mouse壞咗，係市中心搵唔番buffalo,但係大眾見到微軟有減價貨，當然要一試人體工學設計。

開盒睇均指唔見usb reciever,原來收納係底蓋之下，mouse本體之内(真係大鄉里)。usb reciever與底蓋一樣，以磁力吸附,感覺好方便。

卒之的起心肝,動手為PALIC5000開箱兼接駁。

PHILIPS FIDELIO藍光碟機播放INCEPTION,與豐澤送既ATN(價值$100)相比,PALIC 5000絶對係優勝。期待回收番SOUNDBAR,再比試PALIC 7000~~~

代父從Arms

幾經艱苦，卒之以體感操控神靈勇士，戰勝level 4既大佬~幸男話:"恭喜你呀~可以上網同人打喇!",有點安慰幸男在意我講既說話.

第一次既網上對戰讓俾幸男試拳,幸男以眼鏡蛇小子打得有板有眼,初次出戰竟然贏咗~

網上對戰唔止單對單,仲有4人對戰,以及3人對電腦大佬.

幸男非常滿意自己房間既新傢俱,仲坐係床尾既樓梯位~床褥下既位置,足夠收納幸男既玩具,而且樓梯都係櫃桶(大中小各一).床尾既書架,可以安放幸男既番學及休閑書,但我偏偏就諗漏咗風扇位置,好在係price.com搵到酒店對面工廈電器代購店,KDK既創風機夠晒的骰~

另外,原本放係主人房既philips led燈,都改為安撫怕黑既幸男.玻璃窗都貼上反光貼兼加上雙軌窗簾,務求唔會被共用通道既感應燈騷擾到幸男就寢.

PS: 其實尋晚已一個人係屋企過夜，希望執好哂啲嘢，一家人住得舒舒服服～

準備回航

近中午，傢俬公司安裝好書房吊櫃，就同台灣女生行去球場附近既士多飯店食晏，再飛的去迷你倉。朝早九點番屋企，開門俾洗潔工司女工，無諗過裝修師傅會過黎執漏兼清花園。原來冼師傅約到鋁窗師傅上門睇位，所以順便執頭執尾。

5.5噸車，司機與助手合力將25平方呎既儲存物搬上車籠。雖然係填唔滿空間，但總比分3次用VAN仔車慳時間～

上落貨期間，我就負責看管。雖然朋友們請纓幫手搬倉，但基於日子難夾兼唔想麻煩兄弟，故係gogo van app搵車兼議價苦力。

人家係客廳忙於安頓家當，我就係落地玻璃作室外往室内之中間人。

首置計劃，當然係愛機超獸機神～

兩代雷神齊開升壓渦，呈現Double One裡，加賀與風見隼人試車缺少既一幕。

執嘢執到七點幾，一個人搭輕鐵去卓爾居食太興，再去日本城補購清潔用品。趕頭趕命咁上輕鐵，為咗同大腳八老闆娘交收完全變形Hi Spec Super Asurada。

番屋企放低新玩意，執拾多一陣就行出去搭車，夠晒頻撲的一日……

細個唔明大人點解揀酒品，都唔飲汽水，而家至明白短暫放鬆，慢活與細味才可以讓人有心力去迎接下一天～

PS: 兩個月就飲完支水楢木芝華仕，味道比普12年好，與18年各有千秋。

Cyber Formula GPX 2018香港站

今日帶幸男出LCX既Cyber Formula展覽朝聖。幸男好順手就摸住初代雷神，我影完張相先發覺並加以教育。

頒奬台上既人物，應該係TV版既時代，但今次既主題唔係2018年Zero 系列既香港站嘛？

由於已開幕一段時間，所以唔少精品已售罄。我個人就最鍾意“必勝祈願”既卸守，可惜只係陳列，不作售賣。

凰呀都有係是次展覽出現，報導話係日本都未公開展覽過。

主角頭盔之實體版，感覺似係現成電單車或F1頭盔加上原稿之拉花。

呢架超級雷神，相信係C3AFA HK果架。之前無時間去影相，今次當補番數～精品部已售罄同款既1:18 hi spec super asurada，好在大腳八老闆娘已留貨俾我，期待親手把玩3段變形。

LCX已改建成直出露天廣場，懒用閃燈配低EV ，未能人景共融(慚愧)。

金融業業煙囪？

雖然展覽唔係好大型，但見cyber formula再次成為話題，已經好開心～

買咗2個菅生車隊既襟章，包裝非常簡約,只係背後有張紙印上SUNRISE及CYBER FORMULA之logo及其他安全提示。無幸男size既SUGO衫,唯有同幸男一人一膠file,兼買一條共用冰巾。

晚餐係世界の山ちゃん食雞翼，幸男開始食辣味，結果無乜食鹽味。居酒屋，咩都散叫，3個人，每人2杯飲品，七百幾埋單。

PS:西鐵站行番酒店，忍唔住掏出相機作測試。5軸防震下，好滿意低光下既成像。