園藝學會的覺醒

尋日已係相熟花店攞咗5盆繡球花,放晒入花槽內。聽海健既建議,俾盆栽適應下新環境,先至再加泥。

熱死焫,唔好話盆栽要淋水,人都想淋水降溫。會考班時同相熟同學一齊參加班主任羅老師負責既園藝學會,但自己都無咩參予活動,純粹掛名。無諗過廿幾年後,自己會搞吓綠化。雖然唔係由種子黎種起,但都係一個新嘗試丫~

PS:以前用黎抺車用既噴壺卒之用得其所~

和你飲

今晚番老家黐餐,咁啱文朗SIGNAL話有啲難題,於是相約係黃金邊飲邊傾。入座已九點,無諗過十點九就要埋單兼播大音樂趕客(當初以為係十一點九)。

散場沿青山公路行去青山灣至上巴士,當傾多陣或散下酒氣。好耐無落酒吧,呢度竟然有KIR ROYAL,非常驚喜~由Training時代開始,一直都好享受一班朋友飲酒既時光,因為大家都會容易放鬆心情,一齊胡扯或說出內心既真感受,並獲得朋輩既支持及應對難題既新視角。

PS:睇完介紹短片,人生第一次參加KICKSTARTER計劃。雖然覺得成事機會不大,但仍想作一份支持,畢竟電影既創製作面對不少難處。

跑

是日放假,幸男跟媽媽去足球隊朋友屋企玩。難得唔洗跟大會時間表,報名番老家黐餐之餘,再可以一人黃昏跑步。 平日被工作壓搾至拖住身驅番屋企,運動確實係侈望.....耐無跑,都仲可以半個鐘內完成5K,對大叔黎講已好滿意。

新跑鞋真係好輕,平時著開MIZUNO既10號碼,ASICS就9.5碼就啱著。4字出頭了,唔再可以好似廿來歲咁早更前跑5K,但真係要花多點時間作肌肉及心肺訓練。

農曆生日暨中秋飯

每年屋企都係做中秋時候順便幫我做埋農暦生日,今年都唔例外。

於老家被照顧既感覺,總令我增添一點生活動力~簡單既一餐飯,大家身體安康,已心滿意足了。

家居綠化之準備

紅酒送貨甩底,打電話去CS追問至知漏單,搞到時間大失預算。三十幾度,趕頭趕命咁出荃灣,千色附近落巴士跟住GOOGLE MAP行去工廠區新豐工業大厦,總算五點收工前到著.......

網上個spec明明話有73cmX46cm,但包裝上就寫70cm.......錢已係PAYME過數,實在無心神再打去寫字樓投訴。唯有寄望四隻花槽腳,各自得一半面積踩住板車而又唔會反車。

其實食晏時經過九記有望過夾板制既板車,反而尺寸夠容納花槽四隻腳,只係嫌佢木質唔襟日曬雨淋(而家真係有啲後悔)。

PS:萬事俱備,只欠盆栽同花泥,希望可以營造更好既下午茶座氣氛。

趕食海鮮餐,撲番屋企睇波

明明講好咗今晚一齊睇曼城對李斯特城,點解番到屋企無人既?唯有開住SOUNDBAR兼NOW E投射上電視睇住黎等兩母子。

打電話去問兩母子下落,原來仲係市中心等的士,邊等邊用XPERIA 1睇住先~好在唯一既入球係62分鐘由曼城取得,幸男沖完涼可以安心坐梳化見證愛隊勝出。

我為咗親子英超,食埋個奄仔蟹就走人,無等到一齊大合照。

其實都好耐無黎流浮山食海鮮,仲記得當年有一次德輝都有黎,仲要帶唔夠現夾,點知台灣女生身上都係無現金,我要俾兩份半~

龍躉兩味,當然係炒魚塊啖啖肉過炸頭腩~

扇貝每人一隻,蒜蓉永遠唔會嫌多。

清蒸鮑魚。

炸蠔,令我諗起打冷既香口炸物。

咦?咁咪魚蝦蟹都食齊?其實仲有碟螺無影到。

大家都年長了,原來小玉個仔都咁大個~

舊拍檔舊班底,雖然各自在不同崗位,退休既退休,就退休既挨緊,但聚餐依舊齊腳。

Ruby Tuesday復辟

今晚台灣女生話去Ruby Tuesday食飯,又話全線執笠既?無諗過人家係我到之前join咗member,為咗少少折扣,但無視選擇.....菜色上枱,味道同價錢實在有點差距,即使有所謂既折扣.........

唯有以生啤黎對衝會費,每天既特價生啤不同,是日為鬼佬。幸男愉快地鋸扒,無對塊扒有投訴(我太嫌尖?),仲話好過OUTBACK添。

人家帶幸男去置樂上足球班(年度選拔),我就一人閒逛。係千色見到呢個窄身架,好啱士多房用,搵日搭巴士出黎至買。

攞車前經過asics,八掛入去望下跑鞋,因為mizuno已開始殘,新款又唔靚。"如果跑5至10K有咩選擇?",sales姐姐應該無諗過咁就賣咗對MIJ既跑鞋兼一件背心俾個大叔。

PS:一心想買番對紅色,但MIJ就只係呢個白主藍襯既款式。望落都順睇襟睇,於是少有地無格價就買。

東瀛風deficiency

之前收到嘉利既電話,話預留既J CRUISE內綿已經番貨,所以今日番完夜班訓醒就出去太子花墟。原本想買J CRUISE II俾台灣女生,但因疫情下來貨唔多,仲要無得試戴,唯有配住初代既內綿頂住先。

行過花店,見到繡球花,令我諗起去日本旅行時台灣女生為之駐足。Whatsapp問相熟花店老闆娘,日本繡球花少貨,入口貨其次可以揀荷蘭。"無得去旅行,所以想用外地既盆裁綠化下",其實想將旅行既心情帶俾人家。聽落應該易打理,俾心機上網搵下戶外園藝架先。

搭巴士番入屯門,一落車就去衝擊壽司郎,目標係七點有得入座。

事與願違,結果都係七點半至有得入座............今次有叫HIGHBALL,稍嫌淡口,人家果杯梅酒梳打就OK喎。

幸男無飲品,但有甜品補數。咁又話係小六生,詐嬌還診詐嬌,希望幸男可以獨立多一點,始終爸媽只得有限既體能與時間陪伴及開導你。

32分鐘短段篇日劇

最近同台灣女生係NETFLIX追睇"死役所",死者身故後要係沒有出口既死役所內,搵番與自己死因類別既櫃檯完成登記,才可以前往天界或地獄。

平日營營役役,好多時都無時間停低去諗下一階段如何走,往往於倉猝之間作出人生重大決策。希望到我填表時,可以無悔我既經歷。

PS:男配角清原翔好眼熟,原來係新.東京愛的故事既三上健一。男主角松岡昌宏既外觀令我有點似望見年輕活力既自己.......