香港電腦特技科幻片

今晚約咗康楠，嘉耀同Jim係元朗MY CINEMA睇<明日戰記>，支持古生。雖然話係港產片，其實都係合拍片，用上国內既演員及電影單位，一開場就感受到陸味。

故事簡單明快，特技係不容置疑，只係主力演員年齡平均超過50歲，欠缺了一份活力。另外電影既美術設計稍為遜色，整體元素夾集攻殼機動隊，異形及寒戰。合拍片原故，演員既口型與對白不一致，有點8、90年代既感覺。與荷李活片一樣，香港既設定係陌生得黎，又會有與現代實景重叠既地方。

"唔完美，可接受，但亦都要改善"，難得有與hollywood一拼既決心，希望香港電影可以走得更遠~

番到屋企拆開康楠送既掌動，1/2機會下中咗灰色既RX嘰嘰

PS:今日騎羊出去太子Check車，常規換油之外，hand brake wire

亦被拉緊，不再怕斜路後溜。只可惜錶板既右指揮燈無法更換，要成個換!職員回應我既詢問，話錶板少壞兼怕唔理佢會惡化至中央液晶螢幕(咁咪連油量都睇唔到?)。訂飛機貨要一個半月左右(船貨至少三個月)，認命地落訂單......

Sortie

夜晚兩母子唔係屋企，卒之可以享用Me Time開PS4既ACE COMBAT 7。對上一次玩ACE COMBAT係第5集(PS2年代)，雖然操控上無大分別，但久疏戰陣既我，要第三次至可以係第一關由C級轉為A級。一如已往，任務後既debriefing可以睇吓自己嘥咗時間係咩位。

畫面幾可亂真，SOUNDBAR更加令我投入度大增，REPLAY不單只係自戀，直情係睇戲咁睇~仲記得ACE COMBAT 6時代，滔爺俾咗部舊X BOX360過我打。幸男趁我去廁所時㩒著個START制，當我出到客廳時，畫面已經俯衝海面中(結果當然救唔切機)......

由於有中文字幕，無為意原來故事同世界觀係承接ACE COMBAT 5，簡真食正我條水(當年操到每關都係S級至心息)。是次心血來潮，絶對係TOP GUN:MAVERICK電影以及其機體DLC所致~

其實隻2019年既GAME係我上個半星期前出旺角同屯宿兄弟食前買(行均得地庫果間大舖有$279)，但買咗無耐PS+就有跳樓價$97.8，咁就蝕咗近兩舊水.........

PS:雖然我都想留隻實體GAME作留念，但盒內既說明書已無當年既精美(只係得番張黑白色對摺既說明書)........

實物靚過CG

相熟日本YouTube玩具channel預告今日有GOODSMILE既斷空我介紹，我當然校定通知功能，為求一睹為快~實物既頭部比當初官方CG介紹短片精美(無咁方形闊面)，消光既配色好切合軍隊既主題。

睇完介紹片得知，是次作品係由當年BANDAI超合金魂既田中ヒロ擔當製作人，絶對可以話係當年GX-13既昇華版!!30CM之高度，配上1.4KG重量既迫力，實在令人期待~ 

環保號

原本見好天騎愛駒去屯門泳池隔離既綠在屯門交回收品，點知一泊好車就落細雨，分好哂類就落大雨。

平時屋企總會有玻璃樽，但自2019年起，村內既玻璃回收桶被消失，直至近來至重置係巴士站。行出去巴士站要5分鐘，倒不如騎羊一次過回收埋其他膠樽。

係遮蔭位避雨，日光下既陣雨等如濕焗，戶外等停雨既時間一啲都唔易過。

無遮蔭既庇佑，愛駒當然濕身。

Seat位內有毛巾同快乾布，所以可以實展快速抺車術。個零字後就可以坐上車去市中心，為主廚買是晚西餐既材料同下午茶咖啡。

送貨變遊車河

傍晚騎TMAX出尖沙咀，雖然成功跟位語音導航去到目的地，但同原定路線有所不同，始終真實路面情況未必與網路版本相符。

行過去面馬路，上樓梯就係光仔間舖，將信物交俾櫃枱，急急落去著車走人，話晒係鬧市路邊嘛。上公路前經過幾個路口，鬧市既人流風光確實唔錯，後生仔女，打扮外出，為凝滯既空氣帶來一點生氣。

回程cut唔切線，行咗去大璵山!錯有錯著，可以行青馬大橋黎望住紫霞天色，頓時諗起2007年MAJESTY 250 THE PREMIUM SPORT既CG廣告短片。當年揸SUZUKI SKYWAVE既我，點會諗到有一日我會係吊橋上騎住YAMAHA出品黎欣賞夢幻天色。

PS:經屯赤隧道番歸，兜去友愛買大雞大食，今次係裝修後第一次惠顧。

THE合体 HAGANE WORKS 超獣機神ダンクーガ

GOODSMILE於尋日公佈超獸機神最新宣傳短片及圖像，鷹戰機既設計非常出色，可以完美呈現正常比例既人形模式。前臂不再堅持原作設定收係機底正下方，反而巧妙地收納係機底面譜既後方，令戰機更流線形(細體積下既折衷方案)。

另一個驚喜既賣點，就係透明藍膠殼，以重現鷹戰機野性化既無敵衝刺裝態~呢個CP值咁高既玩法,連BANDAI及千值練都無諗過。

象戰機集BANDAI戰車既紮實同千值練人形既精練，野獸模式則有ZOID機械獸風，整體好在TV版既原味。

豹戰機睇唔出變形系統有咩大改動，只係比例做得好平衡，唔會有過往手短腳短，身肥無腰及拳頭穿崩既情況。

獅戰機亦與豹戰機既變形系統一樣，只係配色與頭部有所分別。雖然變形系統與過往相若，但細節上增添唔少機械幾何線條。

合體後可以完美展出"断空砲フォーメーション"，仲可以夾埋飛行背包果兩支炮，腰間支炮唔會好似千值練短到唔過腹前。另外，相裡面支ダイガン好似未變好(伸到最長)。

斷空我頭部細節精美，只可惜臉譜兩側既直板有啲過厚。

斷空我既比例非常完美，今次仲要有埋個架作收納背包及武器，但唔知點解會有多對拳頭係架上?

大腳八老闆娘話未必攞到貨，所以今日特意搭巴士出油麻地PANDA STORE落訂(志在必得嘛)，順便去埋隔離既ACTION ROBO將舊MAKETOYS(疑似執冧)既Guardia訂改為Iron Factory既SAMURAI GRIMLOCK。

官方派貨期為出年五月下旬，仲有大半年要等........

KENVOR T3:代理保養,有等於無

3月份買入既KENVOR T3乾濕吸拖機，唔夠半年就手柄位散開。話晒係行貨包半年保養，於是尋日打去店舖問代理電話查詢，職員答我轉頭覆，轉頭就店舖職員叫我影幾張相SEND俾佢，轉交俾代埋跟進。

今日代理託店舖職員經whatsapp答話要成千蚊(機價至1799)!我打俾店舖職員話咁行貨收貴啲既保養係呃人，結果店員whatsapp覆代理提出補$1160當維修費，換部全新既另一型號T6(原價$1999)　。代理仲要經店舖職員講呢啲係人為因素引致，大佬呀，擺明係質量既問題喇，唔通買番黎一個月至用一次?固定既螺絲釘根本無法作固定，懷疑膠料渣，不勝負荷而滑牙，導致鬆脫。

其實連接主機同手柄棍位都有固定部件鬆脫，手拉同推時都會有虛位，更莫講打側轉動..........

消費者俾多少少錢買行貨都只係保養安心，如果無既話憑咩收貴啲?倒不如只賣水貨，只包頭7日保用就算!!!而家叫我補錢出過第二款，到時有壞又叫我再補錢去買另一型號?代理唔直接同個客講，只係經分銷店職員代話，我覺得擺明夾死分銷商，兼陷分銷店於不義!!(好似佢哋係呃客買假行貨)

PS:奉勸準KENVOR產品消費者自求多褔見,到唔好當行貨保養係真。

等ing

今日係網上見GOOD SMILE既斷空我有新消息，後日5號就開始接受預訂，好期待全上色既完成品係咩樣!

久違了的太陽計劃

10點半係燊光會合大隊食早餐同買多少少糧水，就上GOGOVAN去深水灣。

34度下既星期一，無gogovan司機所講既"噚日好多後生女"既蹤影，泳客亦唔多，以長者及一家大細為主。

台灣女生之前買咗個沙灘篷，今次俾我帶埋黎作行裝遮蔭。

耐無游水，所以先負責看管物資，並為第一梯隊影相(可惜只係得SHARP R6)。

以前放假或早更之後都會約同事去沙灘，昔日既後輩已係中一學生之父，慶幸尚有機會去沙灘HEA吓兼消暑。

對上一次游出浮台已係幾年前，前日至新都既屯門校服(初中幫襯至今)買泳鏡同泳褲，好開心仲可以游到出去(如果多啲女生係沙灘就更好)。其實我係淺水位置沿岸邊試游，有信心至搵康楠同占兄陪我游出去，多謝康楠為我影低達陣一刻。

五點就收檔沖身兼call車番入屯門食台式火鍋，港島區收工時間例塞下，我同嘉耀急到一落車就衝去廁所。

 PS:多謝占少既動漫電玩節既手信，毒T既size啱啱好~

34度外影

今日台灣女生約咗其他家長，一齊係學校附近影相留念。下午三點幾，唔好話著住袍，貼近地面影相既我都覺得好熱!! 原本諗住早少少去度吓位，結果都係邊試邊影......家長們亦以智能電話為小朋友影SNAP SHOT，不時提點造型外觀。

卒之明白點解人地會有2支燈，因為過熱就可以即換!無考慮反光版，因為無人幫手操作，所以帶支閃燈作背光補償。臨尾至校啱個食糊位，再一次叫家長同小朋友作最後補影，好在有影晒單反既師弟幫我哋一家三口代影家庭照。

影小朋友直係一個難課題，尤其係幾個小朋友掛住玩，走黎走去~

最後係門口合照，平時放學人來人往，好難隱佔有利位置。

“邊個著X色衫就係光之美少女戰士”，已經變咗"邊個鍾意XXX?"，話題已由小學雞變成豆芽夢。

一個鐘既外影完結後，騎愛駒去市中心吉之島買定夜晚既輕食，因為兩母子約咗同學家庭外出食飯。