崇真七子聚首一堂

今日早更放工後,就騎羊番屋企吸塵收拾吓個客廳,因為今晚會考書友會黎家訪.

對上一次班兄弟黎我屋企玩都已經係年頭既事,好開心今日可以人齊.pizza hut加KFC外賣,sparkling wine加紅酒,打wii,打牌,笑聲,喧嘩聲,一班舊同學,好正~

每次既聚會我都會好珍惜,因為14年既友誼,真係好難得,人生又有幾多個14年呢?希望黎緊聖誕可以再聚一聚,兼且可以多啲女伴參加啦~

ps:今晚卒之都清咗上次條麻雀數.........

父子sms

中國人出名內憸含蓄,尤其係家人之間既感情表達,但今日我就用文字直接表達父子間既心意.

今日放假,騎羊出市中心補給日用品時收到老豆既電話,約食晏.騎羊番屋企放低啲嘢時至醒起台灣女生放一點,可以同老豆三條友係市中心一齊飲茶.由於要番至再出門,兼且無攞定張籌等枱,於是要等成個鐘至有位入座,失策.....

好難得老豆可以偷到時間出黎飲茶,平時俾老媽check住晒,好多時都係快餐店或茶餐廳食.可能等枱等得太耐,老豆食飽就話番屋企先,不過我同人家都好開心可以陪吓佢老人家,至起碼我地唔會俾面色同無理取鬧,而係真誠關心佢嘛~

家常便飯

台灣女生為咗提升我既胃口,以免日漸消瘦,今晚特意下厨,等我可以安在家中,舒舒服服咁攝取營養.咁啱係百佳買蟹時竊聽阿姐話白蝦減價,於是今晚以海鮮為主題.結果食咗好多, 兼開埋罐啤酒飲

食飽之後就打晏晝買番黎既disater-day of crisis,雖然畫面唔及xbox360同ps3,但集射擊,拯救,逃生,電影式冒險於一game,確實令我繼mario kart後再度投入Wii機既懷抱.獨特既體感玩法,令投入度大增~

可惜玩完個序章就load 唔到隻game,吊癮.......唯有聽日碰運氣騎羊兜去睇吓有無得換過隻啦....

ps:有位朋友擔心我女人唔會煮飯俾我食,睇黎呢位朋友可以少擔心呢~~~~~

EAGLE EYE

今晚同阿禮,阿潘一齊睇eagle eye,本來諗住幾好睇,但點知故仔同智能叛變差唔多.

電腦入侵各網絡黎進行改朝換代既計劃,但反駁位好多,例如:點解唔係日常生活細節上,逐個政府官員做低,而等一個各官員聚集既機會,兼選擇大費周章咁安排炸彈組裝及引爆呢?(交通意外殺男主角既哥哥都做得出咯)

另外,係野外電塔殺人一幕,點解電腦可以咁準繩令一條斷咗既電纜打落一個逃走既人呢??

如果諗住入場睇既朋友,真係要三思呀~遲啲租碟睇就好了...........

無名中毒

最近同台灣女生一齊腸胃不適,似係腸胃炎,大家胃口大降,以米粉同粥維生.今晚已經係好少少,試食烚菜同煎豬扒黎配粥.晏晝騎羊出到市中心行一陣買少少嘢,已經又暈又攰.小巴黎食完晏,大家都係個胃頂住頂住,兼且多胃口,作嘔........

飯後一齊分一個蘋果黎食,希望可以快啲好番啦........

ps產自日本既蘋果又真係好食啲喔~~

感動!細緻的英格倫~

今日係相熟網站見到英格倫既最新開發進度,實在令人雀躍,經典post100%重現~(跪低打開胸膛駕駛倉兼手掌攤開作跳板落地)

真係想佢快啲完成,推出市面~~

羊騎士之進化

今晚臨開飯前騎羊去油站等老豆,其間影咗呢張相.只係一個鐵栅之隔,人力既單車同電單車並列一齊.

諗番起2002年,我都係邊學電單車,邊學踩單車,因為電單車堂總係上唔到腳,係咁訓車,炒車........同一時間學兩樣嘢,對於無咩運動細胞既我真係好困難.個陣時都係阿潘陪我去宿舍附近既爛地停車練單車,至於架車就唔記得係唔係阿強借俾我.

我仲記得當練到可以雙腳離地時,好似飛機起飛既感覺,好興奮.場內試重考兼路試重考,卒之都攞到個車牌.直到而家騎羊已五年,雖然唔係好叻好快,但總算安安全全,平平安安.

ps:仲記得阿強個句:"真係好難相信一個人由唔識踩單車,到學識兼考埋個電單車牌,仲可以載埋我"

沙田飲食購物團

 今日同台灣女生出沙田,一落車就係pacific coffee食tea,分一件new york cheese cake黎食.

之後我地行商場,係家品部見到呢條咁特別既毛巾~我地繼續四圍行,人家執咗條特價長身裙,我就係ice fire執咗條六五折既短褲.

跟住再係mizuno檔口買咗件特價magic dry既跑步衫,同一條正價跑步褲(百三蚊).本來睇中既黑底藍邊既跑褲無碼,連第二志願既黃色邊都無碼,唯有買紅色邊.....

最後仲買咗對半價既clarks番工皮鞋,仲話有active air添,雖然要成六舊水,但番工企咁耐,就真係要著好少少既~

滿載而歸,同台灣女生係food court度買串燒雞翼,鹿兒島和牛,豬腩肉,燒墨魚丸,買埋mos burger期間限度既吉列蝦包,咁就係我地既大集會晚餐.

齋買個包都要廿二蚊,不過就真係幾好味,有係北海道既快餐店既新鮮口感.

我既餐飲係kirin既秋味期間限定啤酒,串燒加啤酒,十足日式居酒屋咁~~~

3D 地心探險記+台灣女生專用電單車褸+美心做節

今日同台灣女生出德福MCL睇地心探險記3D版,場內見到有啲著住校服既學生哥學生妹,真係捨得,話晒都成$90張飛......特技加上3D效果當然出色,不過故仔就真係無咩特別驚喜.

之後我地去大角咀安定睇電單車褸,咁啱半價大酬賓,五舊水就可以拎走件褸.雖然係斷碼,但咁橋有件女裝既啱人家SIZE.美中不足係背部有兩個通風位無拉鍊封住,番到屋企清洗時至發覺.

下次都係CHECK真啲個款至買,尤其係個阿姐好多嘢都係是但"0翕",LD碼又話係大碼,其實係LADY SIZE.......上次買手套時都係咁俾個阿姐嘈到我買錯對冬天手套.....做生意點可以咁架?唔熟啲產品,但又時但"up",求其說啲客買就算.....

雖然個款爭少少(黑rr5382,紅rr5383),但都總算係情侣裝嘛~~夜晚係市中心美心皇宫同外母做節食飯,好在人家留咗枱,星期三都座滿人,可能大家都提早做節.個餐都抵食,好食,兼夠食,三個人捧住個肚走~

Ocean Park

今日約咗小歌仔10:00係金鐘等,因為我同台灣女生以及小歌仔一齊去海洋公園散心.可能係閒日關係,場內都唔係太多人,我地睇完海獅,上埋海洋摩天塔,就去中華鱘館,睇吓佔據咗鯊魚館既活化石.

太陽猛烈,年紀又大,行咗無耐就要坐底食晏(高熱量餐),人家仲特意叫咗隻雞脾添~

 跟住我地就行海洋館,見到有條魔鬼魚游出水面,好似好八卦咁.

被逼遷既鯊魚,係水底近玻璃處"僕"係度唔郁,好似係唔開心要同其他海洋生物一齊迫咁~~

我同小歌仔都係第一次去水母館,人家之前同大學書友黎過.係燈光效果下,啲水母變得好靚,唔怪得個館叫"水母萬花筒".

全日既重頭戲,就係黎睇呢兩個百厭得黎又好得意既熊貓小朋友-盈盈,樂樂.

私家水池浸身降溫,佢地既天職好似係食,玩,訓.起初唔知點解佢地係咁"艾"係牆邊,原來佢地係等職員開門俾佢地入去睡房,真係好心水清,知道午睡時間.

海洋劇場仍舊座滿人,但而家既表演只係得海豚,共廿分鐘演出.人家都話無佢三年前咁好睇,但係我心目中,海豚同海獅點都係無當年殺人鯨海威咁殺食~~~行多陣,玩埋飛天鞦韆,同七彩昇空天地(熱氣球),我地已經好攰搭車走人.

夜晚係尖沙咀既有骨氣開餐,為咗等埋卓敏,我地由六點三坐咗一個鐘至oder湯底同配料.因為限時兩個鐘,而我地又唔想再搵地方坐住等,唯有好賴皮咁同哥仔講話可唔可以坐住黎等埋個朋友至計時,反正佢地有枱多嘛.

希望小歌仔唔會覺得今日太悶同太hea啦,生日快樂~

ps:仲記唔記得當年海洋公園既廣告歌點唱?

http://hk.youtube.com/watch?v=NyNfdRSrFxQ&feature=related

ER-6n

朝早騎羊去泳池游水,係大閘外見到呢部川崎ER-6n,銀色車身同紅色車架襯得幾靚.

部車打理得幾企理,其實好多時我行街見到觸動我內心既電單車,都會上前影低佢(呢個都可以話係我既小嗜好~~)

係忙碌既身活,可以停落黎欣賞自己喜歡既事物,都係一件唔錯既事.

唔送外賣,咁你又派傳單?!

今晚台灣女生既中學同學黎家訪,見之前pizza box派外賣宣單,於是一心叫外賣pizza唔駛煩(順便睇吓pizza hut好食啲定係佢好食啲).
點知夜晚打去落order時,姐仔竟然話地方太遠,唔會送外賣."慶"過辣雞既我話"唔送外賣咁你地又派宣單!?"
"唔好意思呀........"
"咁你最遠送到去邊呀?"
"ea.............你等陣............." "最遠送到去青x圍........."
"咁係油站度交收得唔得呀?"(竟然係送去我老家)
"ea..........唔好意思呀,我地通常係村口牌坊交收...."
"好呀,就晒你囉"(由於太嬲,語氣好差)
跟住就交個電話俾台灣女生落order,約一個鐘後,外賣速遞員話開始出車.我騎住羊仔,去到村口牌坊見無人,唯有等.
點知速遞員打電話黎話係油站隔離既牌坊,果個牌坊係寫住<麥x圍>,點會去咗果度架............
騎羊走多20米,以閃頭燈向速遞員示意.一副唔老黎既表情落車簽咭兼收貨,速遞員火速開綿羊仔走人,而我安頓好啲嘢食,就接力做外賣速遞員.......
ps:評價-味道一般,服務不週

師兄的戰羊

今日番完夜,訓醒就騎羊入元朗會合德輝同適巍,除咗食晏聯誼外,主題就係參觀吓適巍既新坐駕forza~

雖然係日本進口車,行咗千幾km,但又真係keep得幾靚仔,師兄既打理當然係功不可抺啦~

下星期二燒嘢食,希望天氣好,夜晚可以同師兄行番轉啦.

父子下午茶

今日番完早更就搭輕鐵番老家村口既茶餐廳同老豆食下午茶,收信兼陪吓老豆,等佢老人家可以吐吓苦水.

屋企唔開心,只能每次同佢出見面時支持吓同開解吓,希望佢會有番少少歡顏,平衡吓內心.

五十幾歲人至黎俾人蝦,實在不是味兒,好希望佢可以堅強一點,走出困局,等我可以好好咁照顧佢.