入廠

前幾日望錶時發現錶面近兩點位有白點,好似係塵咁.無諗過買隻靚少少既錶都會有咁既事發生,咁咪仲衰過買石英錶?令我對英納格有少少失望....

本來諗住考埋個試至入元朗間相熟錶舖交底,但都係忍唔住騎羊入元朗,希望考完試快啲有番隻錶攞番.錶舖師傅話交番行搞,會盡快交番隻錶俾我,但我估計都要兩個星期左右.最攞命係個師傅話佢隻眼唔夠利,望唔真........咁佢係點幫客人整錶架呢??

開花

由八月大假第二個星期落種到而家足足兩個月,傑傑送既向日葵卒之都開咗花啦.呢次係我咁大個仔懂事以黎第一次種花,雖然係細棵啲,但都總叫成功開花. 

十月頭個陣,已然停止長高,並係頂部谷咗個花蕾仔.其實八月開始發芽時,試過個苗軟得滯,近泥面位有折斷情況.同事朋友們話可能太多水,諗諗吓可能係自己每日都叫幸男澆水兼講"快高長大".....結果用多啲泥黎冚住個折位,兼用竹籤黎固定個苗,一度諗定"DNR".後黎花花可以繼續成長,仲生多啲葉,生命力真強.

其實我都有俾心機去同盆花曬太陽,朝早係房既南位,中午至太陽落山就係電閘頂既西位,追住個太陽0架,落雨就收番入簷下.可惜花開後就步入凋謝期, 諗起以前睇魔神英雄傳,劍部一郎話過"唔懂得賞花的話,就唔可以成為一流既劍客".

學習障礙

由細到大讀書都係麻麻地,尤其係強記背誦.TRAINING畢業後上既遙距PART TIME大學都只係交功課,唔洗考試,所以都還可以.今次上既PRCC就要功課加考試,缺一不可,所以幾吃力......

半年上廿個全日課堂,要兼顧上堂同家庭兼上班,實在困難.上星期LAST個堂溫書SESSION,"範圍"大到不得了,可以話係讀晒背晒,無心水"範圍"......平時兩個鐘既課堂,閒閒地都近一百張POWER POINT,都唔知點可以讀晒,唯有用電腦將各lecturer既power point撮取精要,print係B5size既ring book,研制成自家筆記.一本過好方便,可以去到邊溫到邊(書枱梳化..),唔洗左一叠,右一叠.

雖然咁做要花唔少時間,但要我係一叠叠既notes度搵high light既資料,我實在溫唔入腦.相比之下,顯得以前school老師既handout係用心制作.Adult learning係自發的,但講師們是否只站在自己既立場,大量資訊投射俾學生,以示身價,而無真正咁用精闢既手法,令學生明白及學會基本重要既概念呢?

講到尾,都只係因為我唔係一目十行兼過目不忘既人,所以至有咁多"魯蘇"同煩惱,可以背晒所有既嘢就好了..................

ps:對今次既考試,實在唔樂觀....自己真係好old fashioned,要睇紙上面既字同圖,唔可以好似啲後生咁係tablet同電腦芒度溫書....

適應

幸男番學,生活上有唔少改變.以今日番晏為例,台灣女生十點左右就要梳洗兼同幸男換衫,搭車去外母屋企,因為外母已準備好幸男晏晝既飯仔.我晏多少少起身梳洗,騎羊去外母樓下,接人家去食晏. 

晏晝係卓爾居既椰林閣食,而家咩都貴,兩個午餐要成一舊水咁滯....食完晏仲有時間兜去幼稚園睇吓幸男同啲同學玩,因為外母餵完幸男食晏,就帶幸男行去番學校.以往八點開支奶俾幸男做早餐,跟住十點幾外母上門睇住幸男,自己就可以訓多一兩個鐘至起身食晏.而家要管幸男既接送,休息時間好似仲少咗,反而外母坐正自己主場,無咁奔波辛苦.

幸男要適應午睡時間要押後到放學後,我同人家都要犠牲多啲時間,只係早更後可以,食埋個晏晝至去接放學或晚飯後至上外母家接走幸男.朋友們話全日會無咁困身,但我哋又唔想幸男太長時間係學校學壞同惹病番屋企嘛~

香港老飯店

今日上完PRCC,搭地鐵去尖沙咀會合台灣女生,一齊去美麗華既香港老飯店食大閘蟹餐.我地都係見電視有賣"鬼鼠"廣告(一分鐘左右,旁白超快)至知呢間食店有得食大閘蟹餐. 

開蟹既阿姐都話隻蟹好大好靚,望落又真係大隻過夜上海個啲既.

一"搣"開就知龍與鳳,啲蟹膏多都好似流沙奶王包咁流出黎.味道都真係好食過係夜上海食個次.

其他菜式都算大碟,味道唔錯,絶非重量不重質.

門外既餐牌寫係葱爆羊肉,但枱上既餐牌話係牛肉,結果送上枱面既都係牛肉.

套餐無飯同麵,我諗菜肉水餃就當係飯同麵用黎填肚.

壓軸既係蟹粉小籠包,可惜係每人一隻,可以的話我想用水餃黎換多一隻黎食. 

好多上海餐廳都係套餐包高力豆沙,其實豆沙窩餅係咪較低檔所以唔入流?定係豆沙窩飯好難做細份呢? 

結果我哋係食唔晒,要攞外賣盒打包走,豆苗同牛肉都食剩近一半份量.計埋茶位加一,埋單$1030,都算值回票價.

PS:係尖沙咀等人家時,係K11既MIRABELL買咗兩對特價鞋,$853就有皮靴同輕便鞋啦~

售貨員話公司唔再做SALEM呢個品牌,所以清貨大減價,全線得呢間分店做散貨.諗番起黎,屯門間Mirabell又真係唔見仲有salem既鞋賣.其實我都幾鍾意Salem既鞋款,遲啲都唔知去邊度搵黎買添......

幸男上幼兒班

今日幸男番幼兒班，適逄我同台灣女生都係放大假，當然係一齊去送番學啦。幸男係屋企食過午飯就出發，模擬搭輕鐵番學。由於係第一日，我同人家可以留係班房裡陪幸男上堂，但見幸男無喊住唔俾我哋走（其他同事喊到七彩，有個仲喊到嘔），於是我哋都係出番課室外既枱橷坐低，偶儞至係玻璃窗偷望幸男。基於私隱，校方唔俾家長係校內影相，唔知其他幼稚園係咪都一樣架呢？

話咁快就兩個鐘，幸男食埋個茶點就走得。老師讚幸男乖，兩個鐘都無喊，下一堂可以上足三個鐘，唔洗試多堂二個鐘黎適應，仲送咗個氣球俾幸男。睇黎幸男都好鍾意番學，唔知係咪因為屋企無小朋友陪佢玩既原故。幸男正式番學，一家上下都要更改模式，首先幸男無咗午飯後既小睡，而大人就要管接送，時間無咁好用。曾經諗過坐校巴，但一個月要成千蚊，而且幸男仲細，所以都係自己辛苦啲，等出年Ｋ１至考慮。

幸男兩歲生日

今日係幸男兩歲生日,但我都要去對面海上PRCC.由於尋日去咗海洋公園玩咗一日,所以是日幸男留守家中,夜晚享用台灣女生買既生日蛋糕.

幸男食得開心,連衫都污漕埋.之前買既THOMAS火車玩具已經當係生日禮物,所以無再買啲咩俾幸男.不知不覺間已照顧幸男兩年了,希望幸男快高長大,身體健康,做個幸福男孩.

台灣女生牛一

今日係台灣女生既生日,應人家既心意,帶幸男去海洋公園玩.一向怕人多既外母竟然突然話想一齊去行海洋公園,好在方姑娘唔介意啫.... 

一朝早起身就去外母屋企接幸男出發,係金鐘落車就排長龍等上城巴去海洋公園.對上一次黎都係幾年前同人家陪小歌仔生日黎玩,感覺好似"遊客"比過往多,本地人屬小部份.買飛入場都要等,小歌仔同人家去排隊,我同外母就睇住幸男.

入場已十一點幾.見新海洋館外大排長龍,於是去咗睇熊貓館先.雖然係較老既安安,佳佳,但勝在少人兼就腳.幸男都睇得開心,唔知關唔關佢有件PANDA公仔既T恤呢?

熊貓始終係討人喜愛,即使係年齡較大,一反個肚就贏晒.

人家BOOK咗晏晝係海洋館內既海龍餐廳食晏,雖然係貴啲(炒反都要一舊水),但勝在可以對住個大魚缸食晏,慳番排海洋館既時間.我哋張枱係最近大魚缸,唔少小朋友都逼咗埋我哋枱邊望大魚缸.有時唔係話小家,小朋友係兩張枱既椅背窄位企,點都係危險嘛,都未話吵嚷會騷擾到人.....

係香港老大街見到有舊式雙層巴士,幸男指住話"巴士".其他陳設都只係懷舊主題,不過就加咗萬聖節既嘩鬼元素.

無諗過幸男唔會抗拒兼怕坐吊車,幸男仲可以開心笑住咁望風景添,應該無畏高~~~

落吊車無耐,幸男已眼訓,結果去水母館個陣都無醒過,唯有影下水母俾幸男望番.

離開水母館,幸男都未醒,繼續係BB車上訓,撞正平時既小睡時間嘛.

入咗企鵝館陣,幸男一醒就喊,抱住佢睇企鵝反而仲喊得再大聲啲.細問之下,原來幸男話唔鍾意企鵝.其實我同人家都好鍾意企鵝,唔明點解幸男唔鐘意. 

諗住去睇海羊劇場,點知早到半個鐘到係無用,依舊係坐滿人兼山頂位企滿人.好在方姑娘搵到個單邊位,人家抱住幸男黎睇.雖然係望唔晒,但都總好過無或都係花兩三個鐘係度等坐位丫~ 

跟住人家帶幸男去排迴旋木馬,方姑娘都一齊去,可惜無咩位剩,結果無得騎,得坐位..........幸男全程都無喊,相信人家係開心過幸男.我同外母都好攰,外母坐埋一邊,我就企係欄杆位影相同拍短片.好在個位近,因為只係帶咗支定焦鏡,無得ZOOM,真係想買埋支好少少既變焦鏡......

今日行程可以咁順利,真係多得方姑娘幫忙,當然要影番張合照留念啦~

幸男咁鐘意熊貓,當然要去埋新既熊貓館探吓瑩瑩,樂樂.幸男望見熊貓就話"熊貓飲水水哦~",之前熊貓食竹葉時就話"熊貓食菜菜哦~".

幸男玩咗一日,一身汗,雖然換過一次衫,但幸男都有"R"格肋底,麻甩味重...... 

唔知點解會有個金魚館,一向有睇魚情義結既幸男當然睇得開心兼唔願走.

經歷過今日既主題公園一日遊,卒之都明白點解啲家長會買迪仕尼既年票.好多地方都要排隊,加上小朋友移動力低,兼且要休息時間,所以一日只可以去某幾個景點.唯有全年通入場劵至可以分幾次入場,而每次都只係用半日去目標地方玩,咁樣大人同小朋友至可以輕鬆啲.

夜晚去咗大角咀既酒店食自助餐,我哋食住黎等卓敏,多謝兩位大姑奶請我哋一家食飯(今次無好似過往咁食生蠔食到去厠所).幸男係後段時間已攰到失儀發脾氣同扭計喊,好艱難至影到張似樣啲既合照.            

三十三歲生日

今日生日特意放低幸男係外母屋企,同台灣女生出咗去尖沙咀行街.無平時咁趕時間,我哋可以行吓商場睇吓衫褲,我都有收穫(2條特價褲),而人家就有頂羊毛帽.夜晚去咗夜上海食飯,本來想搵過第二間食大閘蟹,但人家話話唔係間間有套餐叫.侍應見我哋一袋二袋, 以為我吔係遊客,係咁用英文同我地講嘢... 

套餐同之前一樣,只係蟹粉翅轉咗做蟹粉燕窩,可能係響應環保無翅文化.人家依舊食得開心,燕窩嘛~

其實往年都係人家生日至出去食大閘蟹,而我生日就係屋等人家煮住家飯我食,係屋企HEA吓.今年既變陣係因為聽日要帶幸男去海洋公園,無得二人世界.

兩個人可以出行街食飯已經好好,平時要番工兼一齊湊幸男,一日裡面真正既交談真係唔多.

窗邊二人枱,望街景,好似三年都係,只係前後枱.

人家讚呢個蟹粉蟹蓋,次之都係咁好食,我就都係懷念之前既蟹粉翅多啲.......

蟹粉小籠包可以每人兩隻就好了,每味都係細碟細碟咁上,次次黎食都驚食唔飽. 

但食到甜品高力豆沙,就會覺得啱啱好,唔會空住個肚又唔係頂住個肚咁走人

PS:買咗支新鏡,特意叫人家出商場外露台影相,效果比舊KIT鏡好,美中不足係個燈柱好似係叮噹法寶"竹蜻蜓"咁.........