今日係台灣女生既生日,應人家既心意,帶幸男去海洋公園玩.一向怕人多既外母竟然突然話想一齊去行海洋公園,好在方姑娘唔介意啫....
一朝早起身就去外母屋企接幸男出發,係金鐘落車就排長龍等上城巴去海洋公園.對上一次黎都係幾年前同人家陪小歌仔生日黎玩,感覺好似"遊客"比過往多,本地人屬小部份.買飛入場都要等,小歌仔同人家去排隊,我同外母就睇住幸男.
入場已十一點幾.見新海洋館外大排長龍,於是去咗睇熊貓館先.雖然係較老既安安,佳佳,但勝在少人兼就腳.幸男都睇得開心,唔知關唔關佢有件PANDA公仔既T恤呢?
熊貓始終係討人喜愛,即使係年齡較大,一反個肚就贏晒.
人家BOOK咗晏晝係海洋館內既海龍餐廳食晏,雖然係貴啲(炒反都要一舊水),但勝在可以對住個大魚缸食晏,慳番排海洋館既時間.我哋張枱係最近大魚缸,唔少小朋友都逼咗埋我哋枱邊望大魚缸.有時唔係話小家,小朋友係兩張枱既椅背窄位企,點都係危險嘛,都未話吵嚷會騷擾到人.....
係香港老大街見到有舊式雙層巴士,幸男指住話"巴士".其他陳設都只係懷舊主題,不過就加咗萬聖節既嘩鬼元素.
無諗過幸男唔會抗拒兼怕坐吊車,幸男仲可以開心笑住咁望風景添,應該無畏高~~~
落吊車無耐,幸男已眼訓,結果去水母館個陣都無醒過,唯有影下水母俾幸男望番.
離開水母館,幸男都未醒,繼續係BB車上訓,撞正平時既小睡時間嘛.
入咗企鵝館陣,幸男一醒就喊,抱住佢睇企鵝反而仲喊得再大聲啲.細問之下,原來幸男話唔鍾意企鵝.其實我同人家都好鍾意企鵝,唔明點解幸男唔鐘意.
諗住去睇海羊劇場,點知早到半個鐘到係無用,依舊係坐滿人兼山頂位企滿人.好在方姑娘搵到個單邊位,人家抱住幸男黎睇.雖然係望唔晒,但都總好過無或都係花兩三個鐘係度等坐位丫~
跟住人家帶幸男去排迴旋木馬,方姑娘都一齊去,可惜無咩位剩,結果無得騎,得坐位..........幸男全程都無喊,相信人家係開心過幸男.我同外母都好攰,外母坐埋一邊,我就企係欄杆位影相同拍短片.好在個位近,因為只係帶咗支定焦鏡,無得ZOOM,真係想買埋支好少少既變焦鏡......
今日行程可以咁順利,真係多得方姑娘幫忙,當然要影番張合照留念啦~
幸男咁鐘意熊貓,當然要去埋新既熊貓館探吓瑩瑩,樂樂.幸男望見熊貓就話"熊貓飲水水哦~",之前熊貓食竹葉時就話"熊貓食菜菜哦~".
幸男玩咗一日,一身汗,雖然換過一次衫,但幸男都有"R"格肋底,麻甩味重......
唔知點解會有個金魚館,一向有睇魚情義結既幸男當然睇得開心兼唔願走.
經歷過今日既主題公園一日遊,卒之都明白點解啲家長會買迪仕尼既年票.好多地方都要排隊,加上小朋友移動力低,兼且要休息時間,所以一日只可以去某幾個景點.唯有全年通入場劵至可以分幾次入場,而每次都只係用半日去目標地方玩,咁樣大人同小朋友至可以輕鬆啲.
夜晚去咗大角咀既酒店食自助餐,我哋食住黎等卓敏,多謝兩位大姑奶請我哋一家食飯(今次無好似過往咁食生蠔食到去厠所).幸男係後段時間已攰到失儀發脾氣同扭計喊,好艱難至影到張似樣啲既合照. 
