今日幸男番幼兒班，適逄我同台灣女生都係放大假，當然係一齊去送番學啦。幸男係屋企食過午飯就出發，模擬搭輕鐵番學。由於係第一日，我同人家可以留係班房裡陪幸男上堂，但見幸男無喊住唔俾我哋走（其他同事喊到七彩，有個仲喊到嘔），於是我哋都係出番課室外既枱橷坐低，偶儞至係玻璃窗偷望幸男。基於私隱，校方唔俾家長係校內影相，唔知其他幼稚園係咪都一樣架呢？
話咁快就兩個鐘，幸男食埋個茶點就走得。老師讚幸男乖，兩個鐘都無喊，下一堂可以上足三個鐘，唔洗試多堂二個鐘黎適應，仲送咗個氣球俾幸男。睇黎幸男都好鍾意番學，唔知係咪因為屋企無小朋友陪佢玩既原故。幸男正式番學，一家上下都要更改模式，首先幸男無咗午飯後既小睡，而大人就要管接送，時間無咁好用。曾經諗過坐校巴，但一個月要成千蚊，而且幸男仲細，所以都係自己辛苦啲，等出年Ｋ１至考慮。
