Wii U

今日卒之的起心機去咗市中心間KK買Wii U番屋企.其實一真都想買,但因為想玩既GAME唔多,無理由為咗隻忍者龍劍傳同鉄拳就出機嘛.難得有新款既32GB白色機,當然捨棄原先既黑色(因店員話黑色鋼琴面仲易污糟,花痕都較覺眼)



令我有咁大動力去出遊戲機既GAME,就係呢隻WONDERFUL 101.英雄們為對付巨大既外星敵人,巧妙地運用團隊力量及施展合作技UNITE SKILL去對付壞人.好多人話不如買X BOX 或者PS3,但我覺得論創意始終都係任天堂既GAME較特別.話就話GAME少,但好玩既一隻點都好過換湯不換藥既一打.

寄望Wii U會多啲跨平台既GAME,可以同SONY及MICROSOFT爭佔有率.另一方面,足份利用GAME PAD TOUCH 芒既優點而研發具創意既獨家遊戲.

PS:雖然日版機要玩番日版GAME,但好在呢款GAME既語言設定可以揀日文同英文~

激戰

番完個早更,急急腳行去新墟,因為趕去凱都睇兩點十既激戰.自己都想入戲院睇,但尋晚馬SIR打電話俾我話想約我今日一齊睇,佢仲有心到今日朝早十點就去凱都買定飛,但人多到只剩最前同尾個幾行.

過氣拳手程輝因避賭債而投靠昔日師兄弟,於澳門之拳館打工,並巧遇一心為父遇債兼重建信心而參加MMA比賽既思齊.故事集親情,師徒恩澤,輕鬆笑料,熱血動作元素於一身.身為人父,對程輝與同屋主之女既父女情特別感觸.

另一感動既情節,莫過於程輝決定參加MMA比賽"我無嘢可以再輸",中年男子為以住違背良心既過去作反思及哭訴.現實與底線既取捨確係人生既大課題,有幾多個可以完全埋没自己既本性而為生活作妥協?

雖然片長2個鐘,但節奏明快,唔會令人有煩悶既感覺.張家輝一身既肌肉新線條,絶對係辛勞既印證.搞笑戲份方面,以往未紅時既笑片經驗令佢駕輕就熟.

好耐都無同馬SIR入戲院睇戲,以住聖誕會考班崇真書友都會出黎睇戲食飯,但出黎番工之後就無咗呢個慣性.

行蹤未明

今晚去西川餐廳食雞煲,因為菠蘿離職後,一直未同佢食番餐飯,趁佢未正式決定出國生活體驗前,大家一齊聚一聚.

無諗過食雞煲呢啲咁麻甩既食市,原來美莎同孫姐都有黎過食.平時怕辣既大昌都照食小辣既煲,不過就不停抺汗同鼻水.

大合照好似好多人,其實IVAN係番完晏晝更過黎,而頌欣係同屋企人食完飯至過黎當食宵夜.時代進步,唔少人都只用手機相機黎相.即興既就話貪方便,如果係一早約好既,始終都係帶番部相機會好啲,起碼室內大合照都唔會影唔清大家個樣.

食完飯,一眾後生仔女去咗隔離既"糖圓圓"食糖水.我就因為要番屋企幫手湊仔,只係叫咗個外賣就先走.

PS:為咗照顧幸男,往往都要留力.晏晝出去食完飯行一陣,傍晚帶幸男番屋企小睡,自己都唔可以話打機或者係做家務.出去食晚飯都唔會好似前咁飲得咁盡興,因為番到屋企都要支援辛苦既人家照顧幸男.

容龍

雖然之前係明星酒家食過生日飯,但話晒都係老豆60大壽,當然想食餐好少少,於是我提議到三聖容龍食海鮮餐.老媽介紹去忠仔記買海鮮,今日係星期日,有好多人都黎買海鮮,馬路擠滿的士同私家車.

雖然老媽訛稱"朋友"紹,但唔見有咩著數....買咗龍蝦4隻,蟶子,斑仔,送咗一包蜆,盛惠$12XX.一直以為呢度好以街市咁只收現金,但呢間海鮮店又會收信用卡兼唔收CHARGE.

買完海鮮,搭的士上容龍等位,因為人家尋日打去留今日八點枱,職員話已FULL BOOKING,要等八點半後既枱.上到去同職員報到,再好似其他食客咁坐定定等WAITING LIST枱,自來海鮮一樣隨地放埋一邊......

對上一次黎容龍都係剛畢業時,前工作坊某位上司升遷請食飯.結緍時有諗過請兄弟姊妹黎食番餐,但結果都係就唔到時間而告吹.

一心諗住要近九點至入得,點知八點四個字就有位.幸男只係等位時食咗件蛋糕頂肚,為咗奬勵幸男無扭計,以鮮橙汁作回饋.幸男飲橙汁個樣,好似大人飲紅酒咁,聞吓香唔香先.

芝士焗開邊龍蝦,事隔多年都係咁好味,雖然每人分得一半隻,但因為多肉,所以都未至於好似無食過咁,壽星爺爺當然有食足一隻啦~

自來海鮮加工,但都要幫襯吓店內食品,於是叫咗個蒜香骨,無諗過幸男咁鍾意食.

細個屋企開飯,見到老媽炒蜆就最開心,人大咗都不時係大排檔叫黎食,同乳鴨一樣-情義結.

睇番呢張相時諗起啱啱結緍時,係屋企用易潔鑊炒蟶子,結果隻鑊花晒....

清蒸鮑魚仔,比平時酒樓既好食,除咗來料新鮮外,廚房既手藝都有功勞.

穌炸生蠔,酒家菜色都有番咁上下大隻,見碟上既炸槳碎片就知有幾香脆.

    

好在意老豆六十歲生日,可能工作性質令我意識到有質數既生活係好難得.另一個原因,係自小老豆都算係鍚我,結緍時未能令老頭子正正式式做老爺飲新抱茶,始終係一個遺憾,儘管老豆並不介意.

好在有帶相機,如果唔係都影唔到大合照,但可惜閃燈唔夠力,令相片偏黃.......

老豆經過噴水池時話要同幸男影張相,番到屋企至醒起細個時老豆好多時同我哋係噴水池影相,睇黎係老豆既偏好.希望老豆生日快樂,身體健康!   





LONE RANGER

今日番完早更,趕去新墟巴倫紐米會合老豆,睇西部牛仔主題電影-獨行俠.無諗過咁多人去睇,好在都買到即場飛.細個住油麻地時,老豆會開住電視睇西部牛仔片,而且時下都少以西部牛仔作主題既電影,所以今次約定老豆一齊入戲院睇.

電視TRAILER好似好緊湊,但原來兩鐘既時間內,動作之間有好多文戲或者係無厘頭笑位.風格亦以灰諳為主,背樂偏向輕鬆路線,感覺有啲似睇成龍賀歲動作片....比較番魔盜王的話,其實風格相約,並非賣弄冷酷或感性英雄既方向.

最後首腦戰既精彩片段,已係電視廣告裡呈現,廣告既背景音樂,比電影中播放既Rossini的 威廉泰爾序曲 (William Tell: Overture)更為緊湊....老豆睇完都話麻麻地,早知睇悍戰太平洋打餐懵好過,可憐既我番完早更兼挨住肚餓黎同老豆睇戲...............

太空館-全天域電影

一家三口係藍地食過晏晝,就搭西鐵出尖沙咀太空館.呢次係幸男第一次入太空館,以前中學時代我就不時同師傅一齊出黎睇全天域電影.

為迎合幸男既喜好,特意剔除"北極熊心",揀咗以海洋為主題既"珊瑚礁".

好在之前上網訂咗飛,如果今日WALK IN至排隊買飛的話,一定無位兼失望而回,俾多$21手續費都係值得及必需的.

片長38分鐘,幸男睇到一半就俾水母陣同催眠背景音樂(身為大人既父母都差啲唔夠定力)送入夢鄉....散場帶幸男行番去海港城LCX食嘢.途經鐘樓停低影吓相.天真既小朋友,表情最為自然,大人反而難做到.

未行到入室內,突然落雨.當眾人都趕住避雨之際,我就用相機影低特別既一幕.可惜相機輸出既像數唔高,未能突顯隨風飄落既細雨.

入到LCX既STRAWBERRY FOREVER坐低時,窗外出現雨後陽光既副產品-彩虹!店內各人都以手機影相,連侍應生都企近窗邊影相,完全無怕羞.

人家幫幸男點咗至愛既士多啤梨忌廉蛋糕,幸男依舊先攻陷士多啤梨,再追擊忌廉同蛋糕,仲有伴碟既士多啤梨醬汁.

我就點咗個芝士煙肉焗薯皮,人家就食士多啤梨吉士千層酥.

人家叫咗杯士多啤梨茶,而我就揀凍焦糖咖啡,因為我唔太好士多啤梨,係店內既異族.

幸男飲既係士多啤梨蘋果汁,成杯飲晒,睇黎應該好啱口味.......我第一次惠顧該店,雖然我唔食士多啤梨,但餐牌都可以照顧到我呢類異族.味道唔錯,下次一家三口出尖沙咀行街,都可以再黎下午茶.

食飽之後,我哋行咗入去"橡實共和國"影相,我忍唔住買咗條$70既天空之城手巾.......

行過FRED PERRY見有特價.有頂帽DISPLAY幾靚,試過又啱SIZE,可惜只得DISPLAY一頂.原價要成千蚊,特價都要七舊水.見舊個頂係ICE FIRE買都要三舊水,唯有當個款同色同料(麻)特別,買俾自己夏天戴.人家都係店內買咗對特價輕便鞋SNEAKER($360),跟住大家就搭西鐵轉輕鐵番老家黐餐.

區內親子日

今日同台灣女生帶幸男去V CITY食晏兼行街,雖然無想像中咁多人,但我哋都好快就揀定食日式咖哩.

食品都偏貴,一個咖哩吉列豬扒奄列飯,唔包飲品都要一舊水....味道又真係唔錯既,奄列又夠滑,份量對我黎講就啱啱好,大食既朋友就可能要再叫小食.

食到中途我去蔡意橋站坐德輝車番屋企抬我書房張梳化床上車,再坐順風車番新墟會合行緊V CITY既人家同幸男.新商號無咩係我心水品牌,反而人家就多心儀店舖進駐屯門.

幸男仲有兩日就開始要番暑期班,因為想俾佢適應上午班既生活.幸男唔鍾意搭校巴,我同台灣女生又唔太放心三歲自己搭校巴,所以辛苦我地要早起身送番學.

              

夜晚一家三口番老家黐餐,嫲嫲整蠱幸男,俾咗條公主裙佢著.起初幸男都不以為然,後來就好著急咁話要除咗佢~

老豆60大壽@明星酒家

 今晚老媽係市中心明星擺咗兩圍,幫老豆搞60大壽宴,幸男當然有早到陪爺爺.

 三代同堂,應該係老豆最合心意既生日禮物.自預科時期,老豆開始受關節炎困擾,加上因病轉工,收入減入,以及老媽既壓力,令心情一直欠佳.孫仔幸男既出現,成為老豆正能量及歡笑既泉源.

老媽亦由板著臉,變成笑逐顏開既嫲嫲.兩老既關係,亦因孫仔而拉近及舒緩.

幸男最近愈黎愈黐媽媽,台灣女生故然開心,但相對亦攰多咗.幸男呢排好鍾意帶帽,要教授入室內除帽係社交禮儀,幸男先至肯除低頂帽.

幸男大個咗,可以自己攞杯飲果汁.明明同老媽講好咗俾老豆坐孫仔隔離,但最終都係自己霸咗個位,老豆要坐老媽隔離........

醒目既老豆當然唔係乖乖就範,借機會帶幸男去同隔離枱敬酒,就抱走幸男.



每年老豆生日,除咗食餐飯同送少少禮物外,最希望既都係老豆身體健康,開開心心.老媽年年都係就我同大佬既方便日子,黎做農曆生日.我就每年都係老豆西曆生日之日子,以手機發送生日賀詞.