今晚去西川餐廳食雞煲,因為菠蘿離職後,一直未同佢食番餐飯,趁佢未正式決定出國生活體驗前,大家一齊聚一聚.
無諗過食雞煲呢啲咁麻甩既食市,原來美莎同孫姐都有黎過食.平時怕辣既大昌都照食小辣既煲,不過就不停抺汗同鼻水.
大合照好似好多人,其實IVAN係番完晏晝更過黎,而頌欣係同屋企人食完飯至過黎當食宵夜.時代進步,唔少人都只用手機相機黎相.即興既就話貪方便,如果係一早約好既,始終都係帶番部相機會好啲,起碼室內大合照都唔會影唔清大家個樣.
食完飯,一眾後生仔女去咗隔離既"糖圓圓"食糖水.我就因為要番屋企幫手湊仔,只係叫咗個外賣就先走.
PS:為咗照顧幸男,往往都要留力.晏晝出去食完飯行一陣,傍晚帶幸男番屋企小睡,自己都唔可以話打機或者係做家務.出去食晚飯都唔會好似前咁飲得咁盡興,因為番到屋企都要支援辛苦既人家照顧幸男.
