外遊準備

今日係朗豪酒店上完堂,走去CAM 2買已預留既MANFROTTO BEFREE碳纖腳架.之前兩次旅行都有帶住BENO鋁架,感覺都係較重同唔夠靚仔.同樣係1米4高,BEFREE以反腳作收納,比舊腳架更易於攜帶.

買咗番黎至知原來係MADE IN ITALY,反腳設定配合三角形陣式,醒目又時尚.

黎緊既旅行,比之前兩次既日子更多,兼且要轉酒店,所以想用一個較便既腳架.舊腳架係朋友出讓,當時我未知自己會否對攝影有興趣,故先買一個平腳架試水溫.不經不覺,由初代無反轉用FULL FRAME無反,為幸男記錄成長,及一家人既生活. 

今日仲買埋張64GB容量SD咭,以確保足夠應付FULL FRAME定焦鏡及天涯鏡之照片(上年只係FULL FRAME定焦配APSC天涯鏡),為是次生日旅行記錄作好準備.

PS:唔怕貨比貨,最怕唔識貨~

海綿寶寶電影

今日租咗隻海綿寶寶電影俾幸男睇,因為上次行Hong Kong Record時幸男見到店內播放著,好似有啲興趣.其實我同台灣女生都係第一次睇海綿寶寶,睇落又幾好笑.

故事先以卡通形式演釋海底部份既劇情,皮老闆潛入蟹堡王餐廳,偷取蟹漢堡秘方.海綿寶寶出手阻止,可惜真正既蟹漢堡秘方意外地被海盜鬍鬚巨無霸取得.

幾經波折,海綿寶寶與章魚哥,大派星及蟹老闆,離開比奇堡(水底城市)並追蹤蟹漢堡既香味,揭發海盜巨無霸既奸計.故事後半部以立體動畫配合真人實景呈現,海綿寶寶反以海盜巨無霸既魔法筆記,令團隊變成超級英雄,合力奪回蟹漢堡秘方.

粵語配音非常出色,粗俗得黎又唔太失禮(例如:係咪有錢都唔賺呀?),不少搞笑位亦好地道(例如:團隊精神變成甜隊精神).幸男睇得入神又開心,最鍾意既角色竟然係蟹老闆，因為隻爪（拑）好勁。

PS:呢齣笑片,正好中和沉鬱既心情.

購物日

跑步鞋爛咗,上次係荃灣千色既東京運動店睇唔啱,於是上官網搵咗對MIZUNO Wave Idaten Dyna 2 Wide.番完早更,騎羊去市中心食晏,搭63X出佐敦既恆豐中心睇鞋款.對上一對都係呢間專門店買,點知都係無心儀既款....好在職員哥仔好心,我用手機問佢有無香港官網展示既Wave Idaten Dyna 2 Wide,哥仔用電腦check到最近可以去隔離既永安.

係永安三樓運動部既東京運動店試過心儀跑鞋,雖然無日本官網最新既黃色,但紅白配搭都好合心意.付款後,係隔離背囊區域見到lafuma背囊幾斯文,啱晒平時騎羊長袖恤衫配短褲既休閒風.尖東永安分店都無呢個顏色既新貨,唯有就範買下呢個聲稱只係擺咗一星期既陳列品,只係嘥咗等分店回覆既半個鐘....

搭巴士番市中心,騎羊去友愛買大雞大bb雞當晚餐,見舊百佳位置開咗間偉成,入去望下,見有台灣女生啱飲既紅酒.其他分店都唔再見有,於是一口氣買晒兩支,反正有紅酒櫃,可以存得嘛~

PS:很享受搵到心頭好既今日,可以自私地為自己而及人家而行街購物.

鋸樹

今日番完早更坐德輝車入元朗食晏,跟住行去炮仗坊附近既一間農務店買咗個鋸刀及5米長三節伸縮鋁通,決心解決入侵我花園領空既樹梢.

台灣鋸刀$68,日本貨要$180,我當然揀咗MADE IN JAPAN~

目標樹梢高至樓上既天花板,撐起四米有多既伸縮鋁通,以刀片形既鋸刀逐啲逐啲鋸(拉一下,再舉高,返回原點再拉...),持續抬高個頭黎望,頸背好攰好痛.幾經艱苦,成功將組樹枝鋸下(其中一個落咗係圍牆外).驚險位如下:鋸刀卡住係樹梢上,被切斷之樹枝懸掛於下方樹梢上,以手擋接迎面掉下的樹枝........

周身酸痛,希望花園少啲落葉及雀屎,因為樹梢除咗係雀鳥休憩之處,亦係方便之所.

PS:舉起長伸縮鋸刀組合時,好似斷空我出"斷空光牙剣",可惜無咁有霸氣兼乾脆利落,一劈就可以收工.

麒麟FROZEN BEER

今日番完晏,約Andrew係紅橋附近既hea憩飲麒麟FROZEN BEER.

其實舊年係九州旅行時已見到有酒吧賣呢款啤酒,但當時同台灣女生及幸男食完一風堂拉麵,唔方便帶小朋友入去.今次豹哥話香港食肆引入,上網check過最近既竟然係紅橋呢間戶外露天酒吧有得飲.Andrew揀咗西柚味,我就揀原味,但哥仔上咗杯青瓜味俾我.試咗一啖先知搞錯咗,好似飲綠色生活既蔬菜汁咁,唔似啤酒.

同哥仔講聲,轉番杯原味,其實只係頂泡變咗好似思樂冰咁,啤酒就同平時既麒麟啤無分別.網絡既推廣介紹就話frozen既頂泡有保持啤酒低酒既作用,但於戶外30度飲又唔覺特別凍(加上無一杯普啤酒作對比).頂泡比平時既啤酒維持得耐,唔會飲幾啖就無晒.

叫咗個多春魚食,同open rice所講一樣,嘢食要等好耐.同Andrew邊食邊飲邊,以過來人身份傾湊仔經,新手上路真係好需要支持及開解.

其間阿嫂同世侄兼Andrew之父親經過,我同大家打過招呼,我地坐多咗一陣就散.為兒女付出未必有回報,但一點一滴既回憶是難忘及愛護兒女既原動力.

千值練METAMOR FORCE超獸機神-斷空我(早買遲享受)

七月頭已買入千值練既超獸機神斷空我,但由於象機械人右肩三重關節斷裂,結果八月頭至收到代理既通知,才可以原盒拎上荃灣既代理公司維修.

上星期一去代理公司回收斷空我,當場試過關節運作正常後,番到屋企就一直存於盒內,尋日至拎出黎變成戰隊形態,今日至正式合體成斷空我!

加上飛行器背包及組合槍(機戰模式),原著上月球背部打無限帝國前哨機基地一幕重現.撇除QC問題(象機械人肩關節斷裂,獅及豹機械人上臂卡塞),本人很喜歡千值練既設定,尤其係合體模式.如要提出修正建議,象戰車型態可於腹部增設突出之機關,減少象戰車中空既感覺.另外獅及豹戰車之拳頭,如可以水平橫向配合反起既爪甲,美觀程度將大為提升.鷹機機可以再精細一點,重現機尾噴射器下方之腳掌,纖巧機翼及機底細節.畢竟是次千值練既整體設定較細,未能盡善盡美,但已比十多年BANDAI既設計精緻及突破.

Black Wing係緊隨斷空我既METAFORCE系列之產品,本人反而寄望往後會將超獸戰隊機地戰艦商品化.

動畫裡該基地THX1139可以變成龍型態,並從口發出“ガンドール炮”.

電影版中,斷空光牙劍就是由注滿“ガンドール炮”能量之終極強化斷空劍~

PS:如果鷹戰機出單一玩具,以較大既機體,去呈現複雜及完美既變型,相信會招來不少FANS既支持.

水災

朝早番工後開始落大雨,食早餐時天文台已發出紅雨警號,鄰居們既手機群組,文字及相片信息響過不停.

樓上鄰居實時報導最新情勢,真的很令人憂心...以往都試過上游沖晒啲樹葉同枯枝,冚住地面既去水渠蓋位,導至水浸,我要間住水以硬膠地板擦去清走淤塞物,但今日我要番工,隔離地下既鄰居未能成功清除汙塞物.......

鄰居報危,於是緊急補鐘飛的番屋企聯手抗洪.台灣女生接電話時才發現水浸入客廳,水浸至公家地台,經側門入樓梯口位,再入士多房及客廳.人家出花園攞手拉地拖及水桶,阻止水流經側門灌入.

澗住水黎同四哥(樓上鄰居)及菲爸(隔離地下)一齊清理淤塞物,當第一個去水位清理後,公家地台既水浸開始消退.第二同第三個去水渠位都清理好後,水位高至膝蓋既河道變回普通行人路.

搞完室外,再會合人家清埋室內.我入士多房將浸濕既物件搬出,順便執士多房,用威露仕開水抺好士多房地板.用毛巾抺乾透後,才將抺乾或未曾浸濕之物品放回士多房,幸好士多房水浸唔過地腳線,牆壁未受大影響.

力抗洪水,清理士多房,食埋人家煮過既CP雲吞配即食麵,已經好攰,沖個涼就訓咗一個鐘左右.起身就進行室內大清潔,吸塵拖地洗廁抺門........(反正點都要拖地板)

周身酸痛,夜晚番老家黐餐,幸男入咗房(我以前間房),享用嫲嫲陳設既書枱,試玩爺爺準備既THOMAS玩具.

淸理室內時,幸男扭計話要出客廳玩,忙累透既我忍唔住訓示幸男.幸好外母中午上門照顧幸男既午餐,好讓人家可以配合我一齊工作.

八月好像是一個大交叉,犯太歲兼諸事不順都集合於八月浮現..........

FOUS千騙萬化

自Bad Boys起,就追Will Smith擔正既動作片,Independence Day, Men In Black, I Robort,Hancock.愛情幽默電影就只睇過Hitch,今次呢齣Focus千騙萬化,就集愛情及職業老千於一身. 

男主角Nicky於酒店餐廳遇上女主角Jess,並識破其老公捉姦天仙局,繼而帶Jess入職業老千團隊.二人合作無間兼亙生情素,但Nicky於一宗大交易後決定與Jess分道揚鏕,因為Nicky認為情感勝過理智會讓人丟了性命.

沉寂兩年後既Nicky,受雇於賽車隊班主並將虛假專利燃料燃燒程式賣給勁敵車隊,以便自己車隊以真正皇牌燃燒程式穩操勝劵,一雪前恥.車隊班主身邊出現既Jess,令男主角分神.愛情心理戰之真情假意,穿梭於精心佈署之騙局,輕鬆之餘,帶點緊張鬥智.

劇情發展出其意表,男主角暗中利用女主角成功偷取真正皇牌燃燒程式並賣給各大車隊,撈一大票.Nicky與重修舊好既Jess準備撤走時,雇主識破其計劃,並派打手截停及擄獲二人.

正當女主角受到威脅之際,向Nicky開槍既車隊班主之副手,原來係Nicky之父親兼內應.男女主角於混亂中得以抽身,可是Nicky父親送兒子往醫院後就離去,獨吞騙款.Nicky雖然負傷兼見財化水,但總算贏得美人歸.

Margot Robbie並非花瓶女角,難怪憑<華爾街狼人>獲得帝國奬最佳新人.

PS:好耐都無同台灣女生一齊二人世界,係屋企睇租碟,仲要係一齣唔錯既電影.

老豆生日

今日老豆農曆生日,一如已往,一家人三代同堂係容龍食晚飯.

兩父子合照,老豆廿六歲就睇住我大,咁就望咗36年了.

我同老媽約咗四點半係新墟街市一齊買海鮮,之後老媽上的士番屋企梳洗妝身,我就自行騎羊.我同人家及幸男七點CALL的士接埋老爺奶奶去容龍.

由於大佬健收工塞車,所以老媽話叫廚房起住菜黎等,心水清老媽話啲蝦少咗幾隻.....

砵酒桶蠔,非來料加工既菜色,由於蠔身大隻,所以要點兩桶至夠分.

原本諗住叫燒鵝,但由於幸男唔食,所以轉咗炸乳鴨.

唔知幸男成年之後,會否好似我咁,食乳鴨時勾起兒時三代同堂既回憶?

蟶子啖啖肉,食海鮮既不二之選.

呢條細鱗就出事了,蒸過龍,頭爆皮奀肉靭,老媽仲見到魚鰓都無清好.搵經理前來理論,第一次交涉後,我地原以為會補番一條魚俾我地,點知只係唔收來料加工錢.得知無魚補償後,再搵經理交涉,今次就免茶同95折兼送糖水.

幸好芝士焗龍蝦無出事,但好似芝士唔夠厚.埋單前叫糖水,阿姐話糖水送晒,於是又叫經理過黎,話佢當初送糖水係搵笨(根本就係枱枱都免費送),結果屈咗個椰王燉蛋白,供阿嫂享用.諗諗下都係蠢咗,應該同經理講免兩支自攜紅酒之開瓶費($80 X 2).

今年都係壽包代生日蛋糕,一家人大合照.希望老豆身體健康,笑口常開.

 除咗食飯慶祝,今朝出去荃灣攞番維修好既超獸機神番屋企,再騎羊去新墟凱都會合台灣女生及老豆一齊睇職業特工隊5:叛逆帝國.

劇情都係一向既風格,特工隊對付神秘惡勢力,其間不乏搞笑元素.電單車追逐特技唔錯,靚佬湯唔知仲有無(叫座力同體力)得拍落去呢?

望道號LOGOS HOPE

今日番完夜,但晏晝就同台灣女生帶住幸男去尖沙咀,參觀海上圖書館之稱既望道號.行完HONG KONG RECORD,係海港城港威商場既露台為兩母子影合照,幸男話呢度好靚,好似去咗旅行咁.

泊係麗星郵輪隔離既就係望道號LOGOS HOPE,搵到個有利位置為幸男與海上圖晝館合照~好在有帶閃光,即使係背光都可以避免面燶.

先係上層排隊,落番樓梯以為就係直接上船,點知下層仲係打蛇餅.失望既幸男不禁苦情地說"點解咁既....."結果前前後後排咗成個鐘至上到船,幸男睇中咗呢本小木偶既填色故事書,我同人家都覺得幾特別.正值晚飯前既人流高峰期,除咗人多之外,俾錢都係迫滿人,結果我要叫人家帶幸男出去大堂等,我一人排隊.當到我去俾錢時才發現人家買完入場劵無俾番銀包我....."Sorry, I need to collect my wallet from my wife. I"ll be back in a minute"就擠過人群去大堂搵人家(船內手機收唔到信號).

錯過了下午茶時間,一落船人家就帶隊去食甜品補番個下午茶.

呢個成個熊仔樣既高知県苺氷り,盛惠$78.我同人家掛住影相(就黎熔嘛),幸男好心急要食,最後幸男都望過正面,唔知該士多啤梨甜品原來係熊仔造型.

我同人家點既係EXPRESSO雪糕,感覺似西班牙咖啡,但咖啡香味更為濃郁,正~

行番去一風堂享用晚餐,閒日唔太多人,等咗幾張枱就可以入座.期間限定既龍蝦拉麵,人家同幸男都鍾意食,雖然無西餐既龍蝦湯咁濃味,但配拉麵的話就啱啱好.

今日係辛苦啲,但可以為幸男既暑假帶多一點歡樂,都係心甘情願的.我常同人家講"我一世人無咩投資,咩都擺晒係你同幸男身上",可惜懶散既我未必係一個模範父親及先生.