朝早七點十個字係巴士站侍侯幸男食早餐,因為我地趕巴士觀光團,台灣女生係樓上與導遊姐姐會合,我就邊看管手提行李,一邊與幸男一齊食地下商場買既煙肉蛋飽.
是次巴士團第一個景點-豐平峽,預期係呢度會有漫山紅葉包圍著水塘,可惜紅葉全盛期未到......
遠眺山上,只係見有一小叢紅葉,與宣傳海報全盛期之景像相差很遠....
幸男唔太合作影合照,唔知係咪同我一樣覺得無咩好睇呢?
斜台升降卡箱只送遊客上去展望台,落番去就要自行徒步,沿途有疏落既紅葉.
反而近上車既喫煙所有兩棵通紅既樹木,早知就留多啲時間係呢度影相..........
臨上巴士前趕影相,下一個景點係札幌國際滑雪場.
落咗巴士,一眾巴士團友魚貫行去纜車站上山,賣點係漫山遍野既紅葉,但呢張相已明示"非全盛期".
高山大風,其實上纜車前係遊客中心有外套免費借俾遊客,但我地夠衫故無借到.今日天氣一般,不時落細雨.
午飯時間係小樽落車,團費包午餐,我同人家一人一個海鮮丼定食,分咁啲俾幸男,再另叫一客三文魚子壽司.
個海鮮丼真係幾重料,成個團我最滿意呢個午餐,果兩個景點真係唔去都無所謂,唯有當順路落車望一望.
落巴士時同巴士司機講我地唔跟車回程,領回存放既行李,午飯後就自行離隊.經過咖啡店，見有士多啤梨果肉既雪糕賣，入店内俾錢，但坐係户外位享用(和暖陽光配清涼微風).日本商場商店都係較暖，唔怪得日劇白领常穿大褸，一入室内就除下…
著名和菓子店依舊屹立,記得當年係主打年輪蛋糕.
上過去坂上館,無人應門,唯有抽住手攜行李落番去行住街等屋主番.
望見呢個掛滿情侶心情既願望樹架,勾起當年蜜月旅行既心情.
相熟既木屋內飾,配上色彩奪目既音樂盒商品.
當年買既旋轉木馬音樂盒款式仲未被淘汰,立即話俾幸男知房間既音樂盒就係呢度買.
一家三口,前中後陣式閒逛,幸男睇中咗個螺旋槳飛機型音樂盒(木制).我同人家都掛住上鍊試音樂聲,俾幸男聽同揀,唔記得咗影番張相......
買完音樂盒,夠晒兩點鐘,又行上斜路往坂之上館.見一架私家車停泊於門外,屋主應該在家,結果合乎預期.幸男入到屋,就攞晒啲玩具火車上餐枱玩.之前既酒店房都無咁大地方俾幸男玩,頂多係床上玩,仲要咁大個窗,夠晒光猛,十足渡假屋咁.
房間陳設與以往相若,可以重臨舊地,恍如與七年前既自己重叠.
房子既間格鮮明,床鋪,小客廳,飯廳,要經過玄關至係厠所同浴室.厠所十分寛敞,除了馬桶,洗面盆,仲有空間擺放背椅及坐地毛巾架.
放低沉重既手攜行李,一家人再度上街,見到有水鴨於河道流連.
不少店舖外牆鋪滿蔓藤植物,只剩下店名,陳列櫥窗,門口及玻璃窗,感覺很自然風格.
行到五點幾，幸男扭眼訓唔願行，迴避鏡頭，領隊心軟抱住幸男。
後來幸男話肚餓，見就近有間天婦羅食店，於是提早食晚飯。錯有錯著，領隊話呢間食店都出名，幸男心情未見有好轉，苦等食物。
我叫咗杯highball,味道都唔錯.店内未有其他顧客，所以師傅可以兼顧我地言語上既不足.
我手上既係“極上天丼”,蝦蟹乜都齊.香脆美味,尤其係個蟹,特意叫多客天婦羅蟹,同人家分黎食.
食飽飽,行去小樽運河,雖然人多,但仍可以搵到個位為幸男同人家影相.
無帶腳架,所以只可以手持A7影下傍晚時份既小樽運河,很喜歡小樽既小鎮式平靜.
好在早食晚飯,原來小樽運河附近好多食店都早閂門,或者近JR站會旺一點,.我地行番坂之上館時,原本人來人往既音樂盒店,已經人去樓空.定點時刻,原本充滿特色既氣笛報時聲,變得份外詭異...
見早食晚飯,番坂之上館前係便利店買定嘢食,慎防半夜肚餓.幸男係屋內埋首於玩具群,我就出咗去前園架起腳架,紀錄眼前景色.
第一次影月光,可惜befree腳架唔夠高身,未能避開前園既樹群入鏡,以及右方建築物之射燈.
人家係飯廳搵到當年蜜月旅行既賓客留言簿,我只搵到較新兼現行既一本.
向幸男介紹當年父母既留言,並誠邀幸男寫上芳名,以便我地一家留下新的留言感想.累透既幸男第一個訓著,我就同人家係電視機前,一個邊諗邊寫感想,一個邊食邊睇電視,很有"家"的感覺.
同一個車站月台,感覺截然不同,七年半前黎札幌度蜜月,今次係黎親子旅遊.當年"低調"結婚擺酒,禮金,嫁妝,人和都係未盡完美,難得台灣女生甘苦與共.即使擺酒後,兩個多月既蜜月旅行,預算都係有限(冬至時份發生爆竊),每天由我負責記錄花費(常計錯數及中途訓著),今天用多了,明天就要慳一點.第一次看雪既心情,依據實用旅遊日語書黎溝通(當年未有手機apps),於便利店見字讀字黎叫關東煮,係目的地車站補票(人家入閘後忘了取車票),第一次搭蒸氣火車,-8度下穿得單薄黎去室外溫泉風呂.....
月台跟當年無大變更,常買早餐上火車食既快餐店及無機會惠顧既啤酒小食店仍在,疾走既火車外型及內觀亦很親切.
依舊一切跟隨領隊指示,趕火車及小樽站轉車,幸男以半睡半醒狀態落車.
今早既景點係余市,先去果園摘蘋果,條樓梯已話俾你知呢度多果園.
余市除咗出名蘋果,仲有享譽國際既威士忌,車站有酒桶作陳設.
鐘意蘋果汁既幸男,當然要同蘋果卡通人合照.
出車站後搭的士前往果園,沿途唔少果園,但目的地既規模算係最大既.付過入場花費,放低包包入locker,我地就正式出發去摘蘋果.園內有蘋果區,提子區及梨子區.幸男係行去蘋果區時叫"媽媽,我搵到蘋果啦",跟住就彎腰準備執起地上既蘋果.我同幸男解釋,我地要摘樹上既蘋果,地上面既只係其他人唔少心跌咗.
幸男搵到個心儀既蘋果,而且以佢既高度可以觸及.原本叫幸男手持著該蘋果合照,點影影吓俾幸男"炆"甩咗落黎.....
受牛頓發現地心吸力既插圖影響,一向覺得蘋果樹係好高好粗大,無諗過可以係成年人身高之兩倍.遊客以園主提供既剪刀就可以輕鬆將心水蘋果摘取,每人可攜2kg既果實離開果園,園內就任你食.
過一條馬路就到提子區,一望無際既提子園,傳來提子香味,十足幸男用緊既提子味兒童牙膏,唔係親身感受過都唔會相信.
提子樹較矮，大人要彎腰，幸男就啱啱好高度。天陰夾集細雨，泥地濕滑，領隊要托住遮黎剪提子，我就冒雨影相紀錄。
番室内享用预訂既午餐，無諗過咁多海鮮食.飲品要另買,人家同幸男都揀咗果園出產既蘋果汁,而我就揀咗生啤.
食完晏,正當苦惱緊果園外有無的士之際,送我地上黎既的士司機已係門口位置等候我地.原來司機帶我地入果園,係枱面放低卡片後,車子就一直都泊係果園外.車費同樣係2100円,但目的地由車站變成NIKKA威士忌酒廠.
雖然聽唔明導賞團既日語講解,但我地都跟住大隊,搵到啱心意既地方,就同幸男影相.
導賞團以試酒會作完結(領隊既目的),每人可以揀一款威士忌試飲,非品酒人仕則可選擇果汁.
我揀咗SUPER NIKKA混調威士忌,由於份量太少兼想試原汁原味,所以無加冰.
人家覺得呢度環境優美,當公園漫步都可以.樓下就係商品部,遊客可以選購各式酒品,酒類甜品(朱古力,蛋糕)或紀念品(酒杯及其他配件).由於太多人,故不便以相機拍照,我見唔少人買威士忌.
搭JR番札幌,先番酒店放低生果及手信,歇一歇腳至去食晚飯.幸男試食朝早摘既提子,"好似啫喱哦~".我同人家試食過後,異口同聲講"真係似啫喱喎".酒店房間主調悠閒,即使開盡光源,都不太有利A7,試咗好多次至可以影到提子扮鬍鬚既幸男.
晩飯我地係地下商場兜咗一輪寃枉路,結果要出番地面至去到蟹本家.當年我地度蜜月旅行都有黎過呢間蟹專食店(但好似係另一間分店)食蟹刺身,感覺蠻特別,職員依舊穿著傳統和服,陳設都係懷舊和式為主,好似時空凝滯了般.
除咗鞋,攞過雞牌(認番自己對鞋之用),就搭電梯往樓上,獨立一間房,夠晒私人空間.
當年我同人家叫既蟹刺身,係成隻蟹咁上,但而家就只係一份份咁叫,上既都係蟹腳同拑既部份,唔知係當年果間至有,定係餐牌全線更改.
食飯前去咗行BIG CAMERA,四樓玩具部,有幸男喜愛既THOMAS玩具.一心黎買新出既多機關THOMAS火車玩具當生日禮物,但幸男唔太喜歡,反而睇中呢個新出既車棚兼收納箱,加埋日版GORDON火車.幸男話好想快啲到4號,到時番酒店拆禮物出黎玩~
