今晚七點半左右就call的士入機場,因為我地夜機去東京再轉機去北海道.兩個中喼,每人一個袋(我相機背囊,幸男玩具背囊,台灣女生手袋),再加一個手攜袋載褸,因為當地得十三度左右.
未夠鐘check in,一家三口去terminal 2既Grappa's食晚飯,因為上次去九洲旅行時,係度食過早餐,覺得嘢食好味,故再度惠顧.
點咗個二人餐,沙律餐湯過後就係main course,牛扒5成熟真係好正~
另外散叫咗個四重芝士薄餅,又香又脆,啱晒鍾意芝士既我.
另一碟main course-肉醬長通粉就由幸男品嚐,雖然食唔晒,但都讚好味,人家食過都話唔錯~
無諗過甜品都咁重料,明明二人餐,但都俾三件甜品俾我地.藍莓芝士蛋糕都唔錯,雖然我主力食朱古力雪糕球.
餐飲方面,我叫咗杯唔識讀既啤酒,手機上網google至知係比利時品牌啤酒,其餘兩杯餐飲由人家同幸男平分.
幸男第一次搭凌晨機,我就試過去關島行禮影結婚相,真係幾辛苦吓,尤其係飛機上訓唔著就最弊...
上機前係page one買咗兩本書,一本係<DARTH VADER and son>漫畫,講黑武士要照顧四歲大既兒子LUKE SKYWALKER(啱晒我呢個壞人角色既爸爸).未上機就已經同幸男講晒本漫畫既故事,幸男最愛LUKE SKYWALKER用激光劍打棒球,一劍就劈開個波.故事有唔少笑料,星戰迷定當會心微笑.
