十分鐘的晩餐

是晩番夜更，好趕之下去咗藍地大街既Three Concept食個快餐。

無諗過餐廳定位係少少fine dinng（價錢）,叫個burger都要20分鐘制作時間。

見到上菜呢一幕，即時覺得值得兼夠晒豐富,$78都係合理收費。

將預先切半既漢堡拎上手，見到蛋黄流出既厚煎蛋，四方芝士，半生熟既漢堡，新鮮厚切既蕃茄，墊底既沙律菜，太感動了（呢啲畫面只可以係電視廣告至會見到）！

好在叫咗杯凍啡,十分鐘快食兼乾哽都幾辛苦。埋單後急上綿羊，去置樂買蛇羹外賣就番夜班。

Forever Spin

原以為可以趕得切聖誕前收貨，點知24號至收到郵件領取通知，結果要拖至公眾假後既今日。

一家三口，每人一粒，台灣女生係Rose Gold,幸男係Aluminium,我就係Cast Iron（似inception果隻色）。

無買到專用轉台，因為只係阻力小啲，陀螺可以運轉耐一點時間。如果佢既gimmick係可以領轉動中既陀螺懸浮兼持續自轉，我就一定會買。

PS:原本嫌貴,係官網入晒資料,臨入付款方法時就停咗.無諗過收到e mail話我購物車有貨未check out,無端端話聖誕前席95折外,再俾discount我,變相係8折,結果乖乖課金...

應用原子學之<既得利益>論

八年前,曾以引力公式以試圖抒發個人對人際關係既埋解或堅持("關係"http://suzukiuh150.blogspot.hk/2008/10/blog-post_18.html),近陣子既人生歷煉令我對自己既天真有所動搖.

原子結構中,電子,質子及中子彼此牽引,以達至暫穩既元素.本人並不介意擔當較多走動既電子,只要質子及中子安心於核心忙就好了,至少最基本既原子可以維繫著及發揮元素特性.原來當核心愈大(質子量及中子量增加),不管電子如何努力包容著,也抵消不了丁點周遭環境之衝擊,一粒外界既中子就可以牽動核分裂.或許正因呢粒外界中子與核心裏的中子分量(工種?)相約,<既得利益>理倫下,爆發分裂變成唯一出路,並釋放大量能量.

或許電子既角色就係無奈,"電子,你太輕了"

Star Wars Rogue One

放工急急交更兼衝去更衣室,騎羊趕去市中心會合老豆,因為昨日已買定飛睇15:05既星球大戰外傳:俠盜一號.由於無時間食晏,唯有係戲院挨貴嘢食,熱狗加杯汽水咁就$69..........快手落晒芥辣,茄汁同酸瓜醬,未熄燈開場就完成午餐.

故事係正傳中第五集同第六集之間,第六集<武士復仇>中提及既Death Star藍圖,正係今集既主題.帝國軍既首席科學家Galen Erso設計Death Star時巧妙地令反應爐成為致命弱點,並派帝國軍之內應將秘密通知反抗聯軍.長大成人既Jyn Erso(Galen Erso之女)得知消息後,與前帝國軍機司Bodhi Rook及幾位視死如歸既戰士,一齊以舊式帝國軍太空船作掩飾,勇闖帝國軍資料庫所在既Scarif星,以盜取Death Star藍圖.

甄子丹飾演既盲俠Chirrut Îmwe,由開場陪大家到結尾.即使雙目失明,Chirrut Îmwe仍堅持以原力感應敵人方向並作出攻擊, 為對抗帝國軍出一分力.無諗過結果係壯烈式,本人覺得故事性唔及後傳-原力覺醒,幸好結局前有黑武士壓場,無双式揮動激光劍.

PS:其實<原力覺醒>上映時,我都想同老豆入戲院睇,只係就唔到日子.今次可以同老豆一齊睇星戰,好似細個同老豆一齊係電視睇既感覺.

冬日騎士恩物-E HEAT手套

台灣女生話攞漏咗幸男既校服領呔,我自薦騎羊上外母家取回,因為可以試吓日本買番黎既TAICHI e HEAT手套.15度兼大風天氣,我以最細火力(綠色)黎上公路,雙手仍感到洋洋暖意.

手套連叉電SET合共$2400左右,雖然係貴咗少少,但真係好值得(一對保溫皮手套都要過千銀嘛)!逆風而行,手套既暖意經靜脈回流入心,即使著既衫差唔多,亦覺得暖過比平時15度騎羊.著光既手套亦非常帥氣兼科幻,期待天氣再凍啲,測試高火力既禦寒能耐~

PS:同台灣女生去置樂既泰味軒食晚飯後,騎羊撻匙時發現錶板既背光燈燒咗，影響油錶及0-60速度區。無法子,畢竟愛羊已服役十年,唯有明天至打去相熟師傅及原廠問吓.

本地一天遊之學校外判旅行團

相隔25年,再一次踏足呢個操場等去旅行,不過今次就係同台灣女生及幸男一齊去,當年點會諗到我會同太座及愛兒一齊企係呢個每天都要集隊既操場?

尖東落旅遊巴,行去第一個景點-廸士尼主題奇幻館,咁啱撞到Harley車隊結集,仲要有一個車手著埋聖誕老人衫添.

幸男好似唔太投入，要媽媽陪至有心情影相。

大多數人都會以鯊魚作主題，但幸男偏偏要同nemo魚合照……………

見到相熟既復仇者聯盟，幸男隨即螎入場景擺post。

幸男見到黑武士，就知道要揸激光劍（但有點敷衍）。

午飯前係樓下既噴水池影相，幸男聲稱剛太眼訓，故無心情影相。

酒樓食過團體午餐後，坐旅遊巴去西九文化區。落車行到去草地見係準備大合照，我地影完至發現唔係幸男所屬既班别，黎緊果張至係。見大會只以手機為大家合照，於是我用A7為幸男影番張像數大一點既合照。

把握到時機，同昔日數學及體育老師合照，鄺sir依舊喜愛運動jacket。

草地範圍唔算好大（可能我去慣元朗公園），不少訪客帶備蓆墊或小帳幕，方便野餐及休憩。

傳聞中有音樂表演,但只見有搭器材但唔見表演者.香港咁熱,有幾多個可以係烈日當空下表演?我諗大會設定黃昏或晚間時段會比較適合,最好附近有埋輕食既攤位,而唔係齋賣汽水雪糕零食(我地係小賣店買咗杯裝雪糕食).

支持本地創作,買咗個新春掛飾,唔見地面有線材,睇黎只可現金交易.

最後既景點係過對海既大潭郊野公園,落車位置可以遠望水壩.

沿途有不少石橋貫穿水塘,郊遊人仕都會駐足影相留念.以智能電話相機影相既遊人抱怨説：“0衣，個様咁黑既？”，呢一刻我安慰地檢視以閃燈補光既照片。雖然與肉眼望既影像仍有少許分别，但總叫唔會煞風景。

小朋友們結伴返回集合地點,雖然一齊合照,但眼神卻好唔一致.

PS:K1.K2,K3,P1,今次應該係最後一次有家長陪同既學校旅行,雖然每次我都想逃避,但慶幸無一次成功.

一人晚餐,二人價錢

本人好著重晚飯,覺得辛苦了一整天,應該好好的善待自己.當自人食晚飯的話,我盡量會買可以外賣的快餐或壽司,因為唔想於店內一個人食,阻住他人聚餐聯誼或卿卿我我之餘,又突顯自身既寂寥.今晚破例,獨個兒騎羊去紅橋既赤橋拉麵,因為好想食好一點.

無諗過要係商場小巷內排隊等位,邊以手機補打blog,好快就消磨了唔夠半個鐘既時間,可以入座.期間限定既辣肉味噌拉麵,味道依舊豐富-芝士粉伴隨既一箸拉麵,辣肉伴隨既另一箸,蔥花伴隨既一箸.結帳時職員示意$1XX,我有一下錯愕,回神後向店員詢問"我嗌咗一碗麵咋喎",原來店員計埋同我一齊搭枱既男仕個一碗.我同搭枱男零交流,唔同店員以為我地係鬧情緒既hehe?

此鹿為羊

今年繼續為愛羊裝上聖誕裝飾,不過就早咗少少,上年都只係聖誕節前一星期至掛上.


泊車或停燈位時,未發現途人對愛羊額前既鹿角有所注視,連直率既小朋友都無,唔通我個樣太惡?

崇真書友Early Bird聖誕聚餐@NEVER TOO LATE

今晚約咗崇真書友一齊係元朗既NEVER TOO LATE預食聖誕聚餐,其實之前都想黎試吓,只係搵唔到機會(陪老豆覆診果次又未開門).

店內既啤酒選擇唔多,生啤都好似只係得呢款,但又幾好飲喎~

會考班畢業後20年,小伙子們都熟成了~

耳背傷患仍困擾我,唯有再戴番隱形眼鏡,始終睇唔慣自己個樣.

忌廉汁煮藍貝,個汁真係好正,流質得黎好夠味同滑,唔會係又稠又滯口.

沒有雜錦麵包籃,只有切片法包.我就無咩所謂,反正我鍾意食法包.

叫咗兩款沙津,呢個蕃茄配水牛芝士既配搭唔錯.

法式海鮮鍋,有龍蝦,虎蝦,鱸魚,蜆,藍貝,真係包羅萬有,可惜David不能享用.

搵職員幫忙影大合照，全auto下，效果未如理想，下次都係自己加埋flash試完setting至交託。

燒春鷄，嫩滑雞肉，為David是日主要肉食。

平時食開既ribs都係較乾身，呢碟燒豬肋骨就唔同嘞，咬落去仲有肉汁，伴碟既橙肉沙律平衡濃味既舌尖。

原本諗住散叫一碟鱸魚俾David,但伴碟既貝殻類食材打亂了如意算盤………

海膽三文魚子意粉，非常啱我口味。埋單每人夾3百幾蚊，價錢合理，味道及選擇都比outback優勝，比Tong's相宜。

意猶未盡，諗住搵個地方飲多一round，貪呢度酒精及非酒精特飲都有，飲點知等咗好耐都無大枱俾我地六位。其實衹要職員肯調動已入座既客人就可以騰出大枱，可惜店員無意安排……

結果大家去咗附近既B仔食糖水兼雜食，繼續男人既交流聚會。平日各有各忙，尤其係身兼父職既大家，好難得可以偷擠出時間出黎見面。對上一次聚餐應該係舊年農暦新年係我屋企食盆菜，希望新年可以bbq。

PS：慶幸大家都住係同區，不論大小聯誼都方便

聖誕樹迎接十二月

晚飯後,台灣女生從士多房攞出聖誕樹及裝飾物,為聖誕月份作準備.幸男話要幫手,於是人家砌好棵聖誕樹就放手俾幸男掛裝飾.

兩母子合力下,聖誕樹大工告成!樹下放咗婆婆送俾幸男既火車玩具,以及群姐好姐送既聖誕老人鐵罐(已取出內裡之零食).人家已準備好聖誕禮物,只係未拎出黎,而我就仲係未有打算......

聖誕樹上既掛飾係我同人家拍拖時買落的,當年我帶住棵較細既聖誕樹兼掛飾上外母家,唔經唔覺掛飾已服務第十個聖誕節.趁兩母子入房訓覺,特意用腳架影低黑暗中閃著不同顏色的聖誕樹.以手動模式黎影,曝光時間長了,反而抓不住變幻既色光.或許本身以白光為主,五顏六色相對短暫,唯有下次試下以高ISO夾短快門呢個組合作titration.