伊呂波

特意出尖沙咀食飯,因為台灣女生係較早前book定今晚係伊呂波日式燒肉店食燒肉放題.

幸男愛吃日式燒肉,人家見facebook推廣伊呂波短期放題,於是訂定位兼re定假一齊出黎食餐好既.

放題分$298同$398,我地揀咗$398,可以點埋海鮮嘛~

被受推崇既壺浸牛胸外膜,試過真係會再叫多一份,味道及肉質既配搭係金舌及牛角未曾遇過的.

凍崩崩麵麵(冷麵)亦係幸男既喜愛食品,人家試過都話好食但有少少辣,睇黎幸男都開始接受微辣既口感.

放題唔包飲品,但燒肉豈能無凍飲呢?啤酒,蘋果汁,橙汁,乾杯!

限時90分鐘,要照顧小朋友,我地比其家成年食客既時間其實更少.

幸男好鍾意呢碟燒紫菜,結果前後食咗三碟!

芝士年糕非常特別,要叫多一家encore,幸男話要幫年糕掃上醬汁.職員要我地交枱時已比限時遲了十分鐘,我地於限時內已清枱上食材,只係未完成手上第二round飲品.

幸男一心要食甜品,經過一間日式雪糕店時,因要等位,故叫外賣於店外享用.

眼闊肚窄既幸男,未能完成牛奶軟雪糕,由我完成剩餘份量,並告誡幸男下次唔可以做"大嘥鬼".幸男之前病到無胃口,望落清瘦咗,而家胃口回復往昔,我同人家都少一份擔心.

"食完飯有一個任務,就係幫Andrew叔叔去買帽",幸男話"好呀",一家三口就去咗食店附近既帽店,代取Andrew留咗既batman帽.

行番去尖東海傍等巴士,掛住試影夜景,有巴士到都唔知(明明手機app話5分鐘,咁快既?),聽到幸男大叫"爸爸,有車啦",我先至邊收相機邊跑向巴士站.....

沾麵@赤橋

早更過後,晏晝騎羊同台灣女生去紅橋一間被廣泛報導既隱世日式麵店,門外有十多位食客於門外排隊等候.

職員出來點算排隊人數,並係龍尾放下汽水盆黎作截龍.幸好我同人家係尾二既客人,由排隊到入座約廿多分鐘,店舖面積不大,約能容納十個客人.

人家揀咗綠茶可樂,本人就覺得配搭怪怪的,店內並無啤酒出售.

我揀咗黑蒜油湯底,而人家揀咗海老湯.貪心之過,追加叉燒後既份量壓倒胃口一般既我,我同人家分享追加既叉燒,大家都係到好飽.70蚊咗右一碗麵,與市中心築地拉拉麵差不多價錢,雖然選擇較少兼供應有限,但勝在精品之作.下次要試吓拉麵食法,最好當然係帶幸男黎試啦~

PS:我同人家飽滯到同幸男睇完五點半場"功夫熊貓3"都未能回復胃口

MONOPOLY

正當各同事朋友們沉迷於智能電話遊戲韓國大富翁"Game Of Dice",我今日就係大眾書局買咗副80週年既港版大富翁(會員有折$251.1,平過吉之島玩具部).

特意唔揀電子版,因為想幸男學習現鈔找續計算,骰點加數,兼且建立理財概念.時下既大富翁內有分格膠盆,方便安放鈔票及地契.　

幸男揀咗火車外型既棋子(仲以為會揀貓貓),台灣女生就揀咗浴缸,我就揀選騎士,玩到中途就暫停,因為夠鐘去嫲嫲家食飯.幸男好投入咁玩呢個棋盤遊戲,一心要成為大富翁.

食完飯,番到屋企輪流沖涼,再一次搏奕.幸男努力地數手指以計出骰子點數總和,畫面有點惹笑.點數太大,無耐性數手指既時候,幸男會哭著臉話"計唔到呀.....嗚".當行經幸運抽奬時,幸男會佻皮地說"機~會~"或"大.眾.寶.藏".

每次行動棋子時,幸男都好用力地一格格咁踏前.好在棋盤係硬紙皮,應該襟玩啲.太耐無玩,每人開始有幾多資金,入獄既解決方案及起樓規則都要睇番說明書.

臨訓前,幸男買下最貴既街道,並已經開始起樓,我同人家都無同色系既地段,未能起樓,睇黎我地都好危險.

PS:繼保齡球體驗,再一次與幸男分享父母既兒時玩意或經歷~

A/N收紅酒

今日早班後,騎羊兜去卓爾居買KFC下午茶外賣就番屋企,四點左右就安在家中收到早幾日訂既紅酒.第一次接觸呢個酒莊出品係早幾年係元朗相熟紅酒舖既巧遇,亦都係我同台灣女生第一次享用Grand Cru Classe既法國紅酒,仲好記得初嘗after tase既新奇.

之後一直都無緣再品嘗呢款紅酒,直至早前係手機既紅酒app搵另一款酒既資料及評價,再link到呢個訂紅酒既網站,才意外發現.相比之前訂過既紅酒網,呢間公司唔需要一整箱訂購,每款可以逐支選購,滿$1200就可以免費送貨.

呢款紅酒就係原本search既目標,因為係吉之島超市買過呢款副牌酒,一試難忘,事後一次過買咗三四支,自己享用外,更用黎賀朋友升職及新居入伙.今次可以一支用作大佬生日賀禮,一支自己閒情細味.

HDMI ARC

最近個藍光SOUND BAR開始唔係隻隻藍光碟都讀到,於是開始做定功課搵後備方案.

方案一:買番PHILIPS既藍光SOUND BAR,但個SPEC好似差過我用緊既型號.

方案二:買個齋藍光PLAYER,再經現有sound bar出番5.1聲效.

為咗試驗方案二之可行性,於是望真啲sound bar背部既輸入輸出位,兼上網爬文,終於俾我開發咗sound bar呢個隱藏多年既HDMI ARC(Audio Return Channel)功能版面.

由購入至今(4年多),只係以光纖線將機頂盒錄影機及電子遊戲機傳上電視之聲效,轉經sound bar演繹.上門安裝既師傅或門市salesman都無提及過呢個功能,只係話用光纖線勾番聲效,說明書更係無記載.

HDMI ARC比光纖方式較大聲及方便(少咁條光纖線),慨歎原廠customer service及門市售貨員對產品性能不大了解,只懂catalog上既重點.最記得當年打去philips cs問師傅如何設定ambisound既左右介體之軟硬設定,師傅只係答"你試到邊個啱咪set果個囉",結果我要係網上睇到一個台灣網站既開箱文,只知窗簾布及空曠空間係軟性,牆身及玻璃窗為硬性...

PS:現只欠可以DECODE 5.1聲效之藍光碟機作方案二之終極測試.

幸男的星期六

星期六,幸男都要番幼稚園,因為幸男要為開放日幫手.課室內有主題遊戲,幸男就負責為參加者既遊戲劵蓋上印章,感覺有啲似圖書管理員.

幸男既班主任係K1班既老師,特意叫幸男與老師合照.

臨近開放日結束時間,幸男趕去自己上堂既課室玩音樂主題遊戲.

睇過校園短片,得知K3下半年會係為小學模式作準備.當初為幸男揀呢間幼稚園,一黎貪近外母家,二黎功課唔多.我同台灣女生都唔想小朋友太大壓力,可以盡情享受快樂童年,學校確實切合我們既期望.

名正言順係學校影相,最難得既人家影得似模似樣.

幸男帶我地去幼稚園附近平台既公園玩,呢款有啲似健身器材既SKY WALK.幸男對腳未夠長,尚未可以左右交替前後擺動,只能企定定影相.

一家三口去卓爾居既Pacific Coffee坐吓,幸男享受babycinno既香滑時刻,我亦樂得咖啡凍飲既閒情與思緒冷却.

番到屋企,誠邀幸男一齊為愛羊貼上新一年既行車證,以見證愛羊十年之辛勞服務.我仲記得初搬入黎住時,一歲多既幸男隔著玻璃窗,示意我要泊係簷篷下既位置(平日停泊愛羊既位置).

順道為幸男影咗好幾張電單車照,睇番呢張相時,幸男話記得爸爸有張結婚相係咁影,唔知幸男係特意模仿定係咁啱記起呢?

家楠家

傍晚上外母家接過幸男,坐家楠既順風車,與大隊一齊入元朗八麵棧攞外賣雞煲,上家楠屋企參觀.

廚房既大窗(日式單位格局)可以望通客廳,呢角度顯得幸男好享受呢個悠閒空間.

玩完"潛烏龜"啤牌(我同幸男各輸一次),鋪好張枱就正式開飯.起初都擔心幸男會唔啱食,點知幸男接受到呢個唔太辣既辣度.

純男人既聚會,當然要影番張大合照.Ivan叔叔,楠哥,豹哥,都睇住幸男大,每次出黎食飯或家訪,幸男都與一眾長輩哄堂大笑.

家楠以小部份既日式火鍋湯底煮咗個烏冬俾幸男食,其餘既就加落雞煲剩餘既湯汁,用黎落餸打邊爐.大家一齊飲香檳,幸男就飲橙汁,大人傾得開懷,小朋友食得開心,一樂也!

好滿意幸男今日既表現,無扭計,無搗蛋.以前細個跟老豆老媽去親友家食飯時,大人傾談時,小朋友只得呆坐等食兼等走.希望幸男升小學之後,我仲可以同幸男有共同話題,一齊出街食飯都唔會只係等食同等走,而係有講有笑.

PS:多謝家楠既邀請,我倆父子今晚真的好開心~今晚仲要係我第一次成功以"飛的"app黎call的士!

$55一家三口打保齡球

今日晏晝一家三口搭輕鐵去美樂打保齡球,咁啱有一批中學生,好有以前讀預科放學去仁愛堂(現已執笠)打保齡既感覺.

特意帶相機影相,咁啱有個矮櫃,可以放相機為自己一家三口合照.呢個時間一家三口黎邊玩邊影相,中學生們可能覺得我地怪怪的.但相信他日佢地大過咗一家人黎打保齡時,一定會有Deja Vu既感覺.

職員建議我地用有欄既球道,初心者都唔會落坑(保齡球好似波子機咁,左右兩邊反彈),幸男當然玩得開心.預科時代既我打保齡純粹趁熱鬧兼聯誼,以"慢速球"兼"落坑人"作自嘲綽號.

幸男既保齡球係最輕既6磅,櫃台職員話小朋友就用呢個,玩完要還番去櫃台.

幸男每次都好期待發球既機會,不時望住打分既屏幕,留意戰況.10round結數都唔過100分,但可以重拾昔日學生時代既活動,感覺清新.幸男天真既投入,亦令是次親子活動增添歡笑.

一個鐘好快就過,$55就可以三個人嘆住冷氣打波,真係好抵.保齡球場隔離有桌球枱,以及懷舊足球機($5一局又幾抵).

一心搵地方食下午茶,係附近一間叫"糖樓"既甜品店點落腳.我叫咗份下午茶餐-咖喱魚蛋配烤酥油餅,加錢轉珍珠奶茶;人家散叫一客凍椰皇燉鮮奶.

幸男享用既係士多啤梨刨冰,從笑容就知有幾好食.人仔細細,食得晒一人份量既甜品~埋單一百蚊多啲,都算合理~

今日輕輕鬆鬆渡過一個下晝,親自與幸男嘗試父母感興趣既活動,讓小朋友了解多一點父母,又可發掘其興趣方向.相向既了解,總比緊密既興趣班溫暖得多.

PS:多謝碧權既探路消息

老媽60大壽

今晚幸男著得靚靚去出席嫲嫲60大壽宴,原本只係新斗記訂一圍枱,但今日酒樓通知有一間獨立房俾我地.

親姊妹都到來高興吓,好耐都無一次過見少媽,鑽媽及雪姨(婆)~

特意點了個招牌鵝腸助酒,好讓一眾姊妹共聚(細個已見大人們飲啤酒)~

原本叫職員幫忙影大合照,但效果唔太好,都係自己影既較啱心水,老豆同老媽就經常唔望鏡頭.

大佬預訂咗個2磅蛋糕,幸男一如已往,爭住吹蠟燭,嫲嫲當然唔介意.

"樹欲靜而風不息,子欲養而親不在",兒時老媽經常以呢句說話黎訓示我(每當認為我做錯或不服氣).繼老豆後,老媽亦踏入花甲之年,希望兩老既生活係健康愉快.老媽好似上次老豆六十大壽酒樓飯局時,送我同大佬每人一個吊牌,好像父母放心兒子往後既生活.平時不自覺既心跳,變得較沉重及慢板.

以前唔明點解長者既固執,長大了就體會到長者既心情-很想用自己喜歡既形式去享用比年青人更珍貴既時間~