夜更前的老家飯

尋晚係老家黐餐,老媽得知今日阿仔同家嫂一齊番早兼夜班,於是誠邀我地番屋企食.艱辛既夜更前席,可以食到龍蝦,簡真係安慰~

有菜,有排骨,有魚,有乳鴨有龍蝦,比出街食更豐富.我工作既環境,夜更既休息用膳時間不定,忙係上黎都會押後到好晏.

平時自己番夜,大多數食個杯就算.同台灣一齊番的話,就係相熟酒樓或大排檔式食肆用餐.子女長大成人,做父母既經常會叫子女番屋企食.除了想多點見面,準備飯餐亦係照顧心中小朋友既方式.

如期出院

約咗大佬十二點鐘係病房門外集合接老豆出院,先向職員表示謝意,再幫老豆執行李.等攞葯時,老豆醒起無攞病假紙,於是我趕番上病房等職員安排.

搭的士落去交通廣場既New York Cafe食晏,星期六唔洗等位都算好彩.

午餐之選-炭燒4安士牛柳,5成熟,配薯角($88).睇落份量較少,但之前飲咗餐湯,再加埋杯餐飲,足夠裹腹.

暫避食紅肉既老豆揀咗烤雞肉意粉($54),賣相同味道點都好過茶餐廳.

原本老豆想去茶餐廳,但我同大佬怕地方迫,唔方便老豆未復完之膝蓋,所以提意去西餐廳.食完飯都仲係雨勢不穩,又無的士,邊行邊避雨,結果老豆同大佬係恆香附近既樓宇簷下等,我就係上游既巴士站擔住遮黎擮的士,再叫司機係靠左線行前少少黎等老豆大佬上車.

我先係泥圍落的士,過天橋去輕鐵站搭車往屯門醫院既真善美買座廁升高器,避免老豆過度屈膝.尋晚諗位去大馬路分店買,點知無貨,自己打電話去屯門醫院分店確認有貨.

一星期騎羊去博愛9次,搭車去2次,總算一切順利,完成6日5夜精英班.之後老豆就要覆診同做物理治療,期望早日可以踩番單車上班.

3號風球騎羊

尋晚三號風球打到今朝,中午時份話將會轉為一號風球,見有太陽兼無雨,膽粗粗咁照騎羊去老家收餐.元朗公路比平時大風一點,但未至於會影響行車平衡.

平安到埗送餐,收拾枱面後,落canteen買杯熱鴛鴦外賣俾老豆.無飲西茶四日既老豆,當然開心到笑(可以自行,攪肚痛都無咁麻煩).

回程前落咗場大雨,上公路時偶有細雨點,番屋企放低愛羊,行去燊光會合放工既台灣女生食晏(下午茶).經過一間新開既生果店,買咗車厘子同呢款好以red blood cell既西班牙扁桃,今晚俾老豆享用.

天陰有雨,夜晚搭的士入老家載埋老媽大佬一齊去醫院探老豆.如無支節的話,明日中午可以出院.

愛羊陪奔波探病

每次騎羊去睇老豆，係博愛廻旋處都要塞成個幾兩個字時間。開停開停，刹車碟都因過熱而失去原有既制動力，雙臂倍感壓力及酸軟。

依舊送上老媽精心研制既營養餐,有湯,有生果,點都好過醫院餐.

傍晚都係我負責送餐,因為老媽要送貨(有生意).17:30到老家交收,再一次上元朗公路,有勞愛羊~

晚餐好似弱咗少少,老豆見無菜,於是夾埋醫院餐既椰菜.老豆狀態大勇,手上己再無靜脈注液兼止痛葯劑,於是用便椅拉老豆入洗手間大厠格,輕量泡泡洗頭兼抺身再過濕毛巾.老豆個頭唔再黐淋淋,邊傾邊同老豆洗白白,原來我十歲左右就自己沖涼,不用監管.

老豆比我細個時記憶中結實黝黑既手腳清瘦了許多,唯有用嘮叨及笑談來遮掩感觸.

大佬同大嫂都有黎探老豆,收拾好餐具就騎羊去大排檔搵定位開餐.

空地位置俾食環望到實,樓上雅座又真係樓底矮咗啲,食客要低頭彎腰來廻避橫樑及渠管,幸好有冷氣消暑.

問過職員,可以自己買外來生啤入黎飲,於是行番去大坑渠既相熟啤酒小食店.相熟既角位店舖已轉手為入座既小食店,見附近有一間有賣生啤既食店,膽粗粗咁問"可唔可以買完係隔離大排檔飲?".職員姐姐話可以但要俾按金$50,於是乖乖交出按金及$46之啤酒錢(非happy hour$70).

鹵水鵝片,啖啖肉,起初仲怕大佬同大嫂唔啱食,好在大家都有夾落碗.

椒鹽九肚魚,佐酒一流,另外仲有腐乳通菜.食飽騎羊番老家交還餐具,再自行回家.經過村口油站時,向大佬大嫂揮手,無諗過佢地搭輕鐵都唔係耐我好多...

早更後探病

早更跟大隊一齊叫外賣飯,上一個鐘workshop.騎羊番屋企攞頭盔去外母家接台灣女生,再去兜去老家接過老媽為老豆準備既飯盒,往博愛醫院送外賣.

晏晝老媽送飯探望時,老豆胃口已好啲，晚餐都可以食得落，只係仲有少少反胃既不適.

摻扶老豆番床休息,安頓好儲物櫃及枱面,我同人家行去隔離既泰屋食晚飯.

呢個啤酒蝦,真係好大堆泡冚住啲蝦,但味道有啲似中式既辣味炒蝦.

鐵板蠔餅味道一般,份量搭救.

暹羅特飲,仲以為係個椰青載住,原來係一個打得爛既陶瓷器皿.人家話似雜果西米露,當甜品食都得.

我就叫咗杯象啤生啤,趁番泰國菜主題.

初試牛肉沙律,味道麻麻,都係泰式柚子沙律啱食啲.

呢度仲有一個著名景點-新港酒店,雖然唔係幫襯,但都係忍唔住影低懷舊味重既霓虹燈招牌.

番到屋企,仲要洗埋兩機衫,晾好至可以訓,唯有邊飲邊等邊晾.

PS:最近收側架時既聲怪怪地,今晚卒之得知原因-踢腳位金屬疲勞.落布冚時見則架同平日唔同,原來踢腳位有一個接點分離咗.再"禁"多吓就應聲墮下....

日子有功,好似聖鬥士星矢裡紫龍卒之都可以將廬山大瀑布逆流踼上.....

手術日

 

早一晚同老豆有共識,中午才騎羊到醫院探佢老人家,睇下食唔食到嘢同買飯.

由於老豆未出手術室,約屯宿兄弟一齊係canteen食晏,好耐無一齊食晏lu~

十二點半左右上病房,老豆剛過床,帶著氧氣喉管,手上有靜脈注液,更有病患自控式鎮痛藥劑.雖然係半身麻醉加鎮靜劑,但藥力足以令老豆嘔吐不適兼嗜睡.見老豆飲完少少水就嘔一大袋黃膽水,遂吩咐老豆唔好飲水住,好好地訓吓先.將幸男做俾爺爺既紙介指交到手上,手提電話放係手邊,我就騎羊先番屋企休息下兼處理一下家務.

夜晚再騎羊去醫院,今晚大佬,老媽同親友們一齊睇老豆.仲係攰同作嘔,只係飲到湯以及食幾口飯同餸.收好餐,打點完儲物櫃及枱面,我騎羊去雞地既富會合搭的士前往既大隊,一齊食飯.

無咩幾何見到兩老唔嘈交,平日都可以多點包容就好了.

手術前夕

早更過後,同台灣女生一齊係市中心元氣食晏,午後自選之三食.

食完晏就去咗Starbucks坐低飲杯特飲(燒綿花糖朱古力咖啡),睇黎下次都係飲番咖啡會啱我多啲.

怕老豆悶,去咗中央圖書館填完補form,借咗兩本武俠小說俾老豆.好耐無去圖晝館,以前常借翻譯偵探小說,而家都好似無咩新書咁,谷你要係書局買(反而見到金田一既小說版)?

番屋企放低啲嘢,騎羊去博愛醫院探老豆.幾年前,自己都係呢度做過小手術,對上一次黎都係2年前.

陪老豆落LG1既canteen買飯,老豆硬係要揀叉鴨飯.特意黎睇老豆,因為怕佢老人家擔心手術.多年前已排到動手術,但老豆想挨到臨退休時才做手術(免得十年後要再做多次),想趁番到工既時間賺多個錢.曾經託師傅去相熟私家骨科打價,要成20萬,故打消念頭(老豆亦唔想後生既花呢筆錢).

希望明日手術順利,康復後老豆行路時可以輕盈一點.

幸男的週末

今日幸男有伴去球場踢波,首先係負責守龍門.

幸男既波友就係孜孜,射門時會不自覺右手護胸,左手垂底(聖鬥士星矢-紫龍得意技"盧山昇龍霸"之弱點?).

唔好睇幸男射球個樣咁起勁,其實幸男較喜歡守龍門,因為唔駛追波.......

孜孜爸爸擔當教練,帶住兩位小球員練習搶波.

黃昏時間以A7自動對焦黎影運動主題有點吃力,S mode高iso就粗粒.自己亦唔夠熟手,可以手動對焦黎追趕主體.

足球果然係可以連接世界,球場內其他小朋友見到足球就話想一齊玩,結果孜孜爸爸好以足球小將情節咁,以一敵四,擺脫欄截.

幸男沖完涼,孜孜抺完身,一齊坐係梳化涼住冷氣黎睇Thomas,仲有冰凍芒果汁消暑.

晏晝我騎羊去紅橋既赤橋拉麵排隊食晏,台灣女生就同幸男搭小巴會合.我揀咗海老湯底,幸男揀咗黑蒜油,人家就試鰹魚湯底.原本只係叫一支蘋果汁俾幸男,但見100%果汁兼店內唔夠冷氣,於是一人一支~

幸男話鍾意市中心築地拉麵多啲，因為個糖心蛋分開上碟，但我同人家就覺得赤橋好食啲。無諗過全日最好食既係呢一餐，夜晚係市中心好日子食母親節飯好唔掂，片皮鴨既皮同麽麽竟然唔熱。選擇唔多，呢樣賣晒，果様又無……………