湊仔花絮

是日放假,晏晝同幸男出市中心食築地拉麵,至愛既糖心蛋當然唔少得.

大個仔,要學吓理財,特意叫幸男數錢埋單.

行陣吉之島玩具部,再去V City買泡芺,搭輕鐵番屋企.太陽太猛,俾咗把遮過幸男用,自己就乾煎.....

幸男玩玩具,我就搏命晾衫,下午三點左右就放下午茶(橙汁配士多啤利泡芺).

成熟男仕之選,Espresso咖啡配吉司泡芺.

清埋埋個花園,將戶外籃球架從廚房對開位置搬出黎.點定蚊香,噴定蚊怕水,兩父子一齊射藍.我教幸男半蹲借企直之力投射得更遠,準備半蹲時好似"便便"咁屈膝兼patpat向後移,幸男笑到咔咔聲.

玩咗唔夠一個鐘就身水身汗,一齊沖涼.幸男又話肚餓,於是食之前買芝士餅乾.

我都有啲肚餓,於是叮番熱雪櫃既開心樂園餐隔夜薯條黎食.夜晚番老家黐餐,行緊過天橋時幸男問我"爸爸你有無報名(whatsapp 家人群組)0架?".我答:"我有俾手機短訊俾嫲嫲0架喎(whatsapp有雙藍剔)!伯伯話報名後,嫲嫲覆OK".當我打電話俾老媽時,老媽話以為個短訊係尋日,因為我尋日都係帶幸男番老家食飯,幸好屋企都仲夠餸招待我同幸男.

PS:今日將尋日家居清潔時搵到既幸男初生BB鞋放入密實袋,兼防濕包,以免重演發黃事故(我尋日用去霉劑黎抺).