今日一眾舊同事,一齊去荃灣STELLA'S試食法式FUSION餐.店內裝潢帶點工業風,水吧位置不設吧台座位,客人們要乖乖地安在座位邊傾邊飲.
第一次食FUSION法式晚餐,特意帶支相熟既法國紅酒同大家分享.
人齊起菜,先被送上餐枱既係自家制麵包,手掌般大小,方便隨手抓來醮食醋.
頭盆係香煎鴨肝,配碟有麵包薄脆及菠蘿雜果,味覺清新,巧妙地平衡了香濃煎物的油感.
趁張枱未亂,為大家一齊影番張合照留念~(怕閃燈會太騷擾其他食客,故只係大合照才用上......)
訂枱時食客會知道菜單,因應客人口味,前盤可轉為香煎帶子,甚有法國餐之貼心感覺~我就係被關愛既一群,帶子表層香脆,中間軟嫰,我分咗一小份俾幸男試,小朋友都話好食,仲話要食多一口.
餐湯係松露濃湯,忌廉打成既泡圈,增加視覺美感之餘,亦提升香滑味覺.碟邊既調味粉,讓客人可以因應偏好為濃湯添一點辛辣.
蜆肉意粉,以扭動造型上碟,配碟既蜆肉熟滑度剛剛好.濃湯過後茄醬既清爽,配上蜆肉既鮮甜,為大家緩衝一吓味蕾及嗅覺受體.
特意為幸男預訂兒童餐主菜-牛扒薯條,幸男收到媽媽電話時楚楚可憐地說"仲未有牛扒薯條喔...".唔知點解自己係超市買既澳洲和牛扒,都係唔及呢一塊咁好味,調味同爐火真係一個大學問.七成熟小朋友食得開心,本人試過真係好正,熟得黎仲係充滿肉汁及軟腍.
平時食開既西餐廳之魚類主菜係鱸魚,三文魚,鱈魚或龍脷,呢款脆鱗馬頭魚,肉厚鮮味,比較特別.
上次係YOHO MALL食晚飯見唔到光叔叔,今晚等咗成晚,幸男卒之等到光叔叔出黎合照~掛住同光仔影相,都唔記得同甜品panna cotta(意式奶凍)影相.......
平均消費三百幾,菜式比連鎖西餐廳好食及精巧,服務亦比較貼心.荃灣西西鐵站出口行十分鐘就到,鄰近荃灣百老匯戲院,荃灣廣場.食飽飽,搭西鐵番屋企,下次一家三口出黎再食過先~
PS:幸男話十分滿分,今餐有十分,睇黎幸男真係好啱食.
