不如走番轉車公廟丫?

放大假都只係生日食飯，以及配合幸男番學時間表，真正自己既時間唔多…今日就約咗康楠係燊光食晏，再一齊出車去車公廟兜風(好明顯係頭髮被頭盔壓亂了)。

對上一次去車公廟,都應該係十年前,剛考電單車牌既時代.今次帶埋相機黎影吓相,為求輕便,只係一機配天涯鏡.一入到去就係左手邊既攤檔買最初階既線香,同埋冰凍可樂黎解渴.

是日閒日,唔會人頭湧湧,但都有內地團到來參觀.

人少少至可以獲得分明既構圖,呢位善信獨自到來,從手持既香具黎睇,應該唔至為到此一遊咁簡單.

上完香,就係內堂轉風車,但轉完至諗起方向既問題.用手機上網睇過,去年順景就轉順時針,唔順景就轉逆時針.康楠無問題,我就要補轉~

康楠同嘉耀得知幸男既大黃蜂事件,於是借題幸男生日,送上跑車造型既變形金剛.幸男見到新玩具,當然開心~

咁啱我有一架元祖火棒既復刻版,梗係要拎出黎襯吓.想當年我帶埋隻復刻版落去宿舍自修室溫書,兼發夢畢業後買邊款電單車.新版既火棒比例上比元袓版靚好多,心口亦無好似得前後兩塊板咁單薄.

跑車模式亦變得更流線型,頭部變成既小機械人可以安坐駕駛倉.

其實今日既車程除咗公路之外,燈位路段兜錯好幾次路,要望完google map再行.最後果段路,我索性將電話放係左邊收納格,一到燈位就同康楠一齊參詳(夜神月式)~

GEOSTORM

今日同老豆係市中心UA睇<人造天刧>,其實上次睇BLADE RUNNER時已覺得trailer好吸引,集動作,科幻,懸疑元素於一身.

故事一開始已話溫室氣體令地球出現各種大型天災,人類才驚覺要認真面對問題.集各國既科技,太空站Dutch Boy可以用衞星網絡,監察並更改天災形成之系數.近期接二連三既失誤,令地球各處出現異常天氣及災情.

因行為魯莽而被開除既Dutch Boy設計者(男主角Jake),被緊急徵召,前往太空站查究系統出錯之原因.

男主角係太空站,與各國精英科學家一齊調查,但期間發生不少意外,令Jake懷疑團隊內有人刻意掩飾並造成連串地球天災.

男主角之胞弟Max因為接任Jake之空缺,而導至兄弟決裂.Max收到Jake暗號通知,太空站有內應之消息,遂與特工女友一齊越權調查.原來侯任總統接任人(Max之上司)欲借天災令時任總統意外生亡,並破壞各地經濟國力,讓自己登上最強國家之元首寶座.

劇情雖然唔係有咩哲理,只係單純既動作兼科幻特技片,但可視為商業電影順帶宣傳環保及溫室氣體議提.

細個時(80年代),電視不時播放卡通宣傳片:

從前有一位地球先生,佢好健康仲好快樂.不過,好多人一啲都唔鍚佢,整到好污糟垃蹋,仲逼佢食好多垃圾場添.地球先毛病咗喇,佢會唔會好番呢?

直至而家我既印象都係好深刻,要愛護地球,但而家政府既宣傳短片只係輕輕鬆鬆咁講垃圾分類,少了一份宏觀視野及情感接通.

瑞士開始有收集大氣二氧化碳既工程,雖然只係起步,但如果真係可以令碳循環回復至過往水平,地球先生定當重現笑容~

住家日本大閘蟹

過往都係趁十月生日就出去食大閘蟹餐黎慶祝，但今年因為二噁英問題，一直都未食到大閘蟹………台灣女生不惜工本，訂購日本野生大閘蟹，作為晚餐食材。

每人有兩隻，台灣女生揀隻最鮮紅既大閘蟹黎影相，今次係第一次係屋企食大閘蟹。

日籍大閘蟹結構同華籍無乜分别，但味道就偏淡味，隨盒附上既日式料理黃醋味道亦唔夠香濃。一蟹難求既日子，今餐總算珍貴食材，但真係好期待品質安全既正宗原味大閘蟹～

 

特意雪定支本地手工啤黎飲，味道與酒店餐廳飲既生啤板相若。

幸男對大閘蟹無乜興趣，只係專心食燉蛋同牛肉，同埋刨玩具反斗城既介紹集。

其實尋日已收到“蟹貨”,只係因為我約咗馬sir, Andrew,同Brian 係元朗食飯。撞啱今日打八號波，加埋冰箱既一口牛同雪櫃既雞蛋，湊夠餸開飯～臨落煲蒸時，有一隻蟹開始自行鬆綁，好在成功冚蓋！由於個煲唔夠大，所以分兩次(每次兩隻)黎蒸。

港島購物日

今日係行街購物日,第一站係食晏,台灣女生帶我去蟹家食晏,人揀既係蟹鍋定食.

我就叫咗份蟹扒定食, 眼濶肚窄地以為會唔飽,點知都係啱啱好,白飯當然係只食到一半.

少出港島區,見到唐樓下咁特別既斑馬線,忍唔住影番張相兼後悔無相機係背囊.

行完FRANC FRANC,再去LOG ON逛吓,見到舊手掌咁大既擦膠.之後再去咗hmv旗艦店,可惜無心水日本cd買(以前尖沙咀既Hong Kong Record啱我多啲)........

攰攰哋,搵地方坐低,藍山咖啡配綠茶味甜品tea set,十足濶太.

我就叫咗個芝士蛋糕,比星巴克既份量細啲~

晚餐係無印良品度食,三餸餐,真係夠晒和式,杯Earl Grey奶茶夠晒難飲.......(只能飲到一半)

難得可以抽身二人放空,人家好有心情地話要自拍.食完飯,一齊行ikea,再去誠品買台式飲品,兼買埋letao既芝士蛋糕,就搭車歸家.

番到屋企,將今日既戰利品放晒入洗碗碟機,總算買齊新既dishwasher safe餐具.唔經唔覺,舊餐具已用咗成十年了...........

遲來的生日禮物-RASONIC mini cube

台灣女生既生日禮物,尋日卒之送到家門.今晚特意用新買既餐具(dishwasher safe既餐碟燉蛋盎,鑊鏟),黎試吓真實效果.

喜歡食燉蛋既幸男,心情靚到fing筷子,我就不停咁食清酒煮蛽~

將是晚既餐具放入洗碗碟機內,由於空間有限,擺位都要諗清諗楚兼多番嘗試(新手上路).

開著洗碗碟機,我就入番書房幫幸男熨校服.除咗熨校服之外,接送,跟功課,溫書,準備晚飯......樣樣都花時間.

熨完校服,特意用A7黎試影內部水花動感照.今次用正常模式(90分鐘)黎洗晚餐之餐具,雖然睇落好似好耐,但總叫做唔洗自己洗,專心洗鑊煲及其他入唔到洗碗碟機既用品就可以了.

效果真係唔錯,只係一個燉蛋盎內有少點蛋漬,及小童碟內有一點污漬,可能係擺位問題.受惠於烘乾功能,碗碟已大半乾,用抺布輕抺就可以放入櫃了.

市面既洗碗碟機均需駁水喉,所以背部儲水箱係我揀呢個款式既最大原因.即使唔係沙煲罌罉都可以放入去洗,但正常碗碟兼筷子刀叉羮,至少都慳到20分鐘左右時間及腳瓜手腕肩頸之勞累,仲要乾淨啲添~

追月@小白鷺

今晚一家三口去小白鷺追月BBQ,對上一次黎小白鷺,都十年前拍拖既約會.草坡地上燒烤,有專人開爐同加炭.特意孭埋腳架,為既就係一家人既合照.

三人份量,大小同價,雖然要成$238一位,但總叫做有青口,扇背,蝦同魷魚之海鮮組合.

每人包一罐汽水,幸男就揀咗忌廉~

人家擔當是晚大廚,好讓我安心影相.

草坡上,微風間斷地送爽,亦帶來羊便便味兒,令你更投入鄉郊風味.

點解會山長水遠,先搭小巴,轉東鐵,駁的士黎小白鷺燒烤呢?目的係為咗呢個巨型玉兔燈飾.遊人都排隊,近距離同玉兔合照,但我就叫幸男用身位遮擋遊人,與大玉兔合照.右上方既黃光圓,其實係真月光,只係閃燈之對比下,白月變成偏黃.

食飽就跟據預約既時間,行湖上浮橋出去同大型月亮燈球合照.同時段既遊人,多數借月亮燈球之微光,以造型剪影黎拍照留念.由於幸男高度與大人有落差,於是交託職員以閃燈影下簡單合照.如果無人等候兼可以試set矮腳架,背向鏡頭,大人踎底與小朋友一齊指向月光既剪影照.

行上浮橋前要先著上救生衣,只係影相時可以短暫除下.影完相,都要等埋所有同時段既客人,至一齊行番上岸.

臨走前，幫兩母子補影，但月光已移位，未能再現<真月光·假玉兔>。回程以手機app call 的士，幸男係車上都訓著咗。雖然係攰啲,希望幸男有多一點特別既回憶照。

PS:加錢買既凍飲堅冰凍(藍妹及可樂各一),價錢都唔算搶錢~

幸男,生日快樂!

晏晝同台灣女生一齊係市中心食晏,人家接幸男放學,我就去豐澤買RASONIC洗碗碟機.人家將幸男交俾正在等收據既我,自己就去攞生日蛋糕.一齊搭的士番屋企,攤好個陣就用腳架搭載相機,影番張家庭照(當然要影好幾張至數貨....).

上咗巴士無耐,幸男已經訓著咗,始終都係番咗成日學嘛~幸男上小學後既呢兩年生日,準備工夫都係唔夠時間,畢竟平日照顧兼跟功課同接送都花咗唔少時間.

我哋先去一風堂食晚餐,見餐牌有小童啤酒,於是叫咗支俾幸男,兩父子提早11年一齊飲啤酒~

幸男試過之後,話似蘋果味梳打,我都試過一啖,評價相若.

海膽冷麵,係就係好特別同好味,但價錢要成舊水兼且份量比較精巧.

咁啱店內搞緊名古屋名物-手羽先之推廣,大家都想回味一下名古屋旅行之味道.相比之下,都係唔及之前幫襯過既世界の山ちゃん. 

一口炸芝士,味道正常,表面較多油.

幸男食雞翼食得好滋味~

FROZEN BEER買一送一,人家都飲埋一份,不過飲咗一半就搵我接力.由於幸男食唔晒一碗拉麵,所以人家食埋幸男有剩既份兒.

食完飯,行去太空館攞埋3張預訂好既全天域電影既飛,幸男都話好睇同靚.唔知係咪睇得太多日本卡通,幸男話結尾果道歌好似係日文,睇番字幕又真係噃~~

家長帶領下,小朋友排隊玩拋圈遊戲,睇落有啲似嘉年華咁.

夜晚番安定既商場平台,因為幸男既同學約咗一齊玩燈籠.一大班小朋友,你追我逐就少不免.

無腳架輔助,嘗試影月光,效果當然唔太好,但總叫做好過自己部智能電話.

呢張合照有一點童黨既感覺,我亦親耳聽到男孩子們既傻話"邊個點點點(條件如著有公仔既衫),就係光之美少女".

細個時,公園既氹氹轉好大個,而家變咗迷你版(土地問題?).小朋友可以騎坐係上面,轉動時會經歷上下起伏.

幸男今日番學同咗老師講自己生日,午餐時間老師叫全班同學一齊為幸男齊生日歌.放學時,同學們已期待今晚既聚會.雖然今日都有點趕時間,但明日係假期,幸男都可以玩得盡興.

PS:係尖沙咀上巴士後一個站,見到老媽上車,咁啱又係出完街黎.

大眾書局優惠,除咗新出既<你的名字>藍光碟,連<言葉之庭>都買埋.

呢本被喻為香港地道版<深夜食堂>,希望可以觸動我既心靈~