小球迷的崩潰

心愛美斯既幸男，今晚當然力捧阿根廷隊。13 分鐘，法國隊基斯文射入12碼。由於愛隊先落後，幸男有點擔心同焦急…

阿根廷於40分鐘，以30碼外勁射追平。下半場48分鐘，由愛星美斯射中隊友而改變方向直入龍門。豈料57分鐘，法國隊柏華於禁區頂入追平。6分鐘後，安巴比扭過後衞，射破龍門十指，法國隊再次領先～呢一刻，幸男忍唔住喊出黎“嗚…又俾人入多球喇～”

68分鐘，安巴比接應基奧特傳球兼射入，擴大比數至4：2。幸男頓時抱頭痛哭，即使補時階段(93分鐘)，愛將美斯妙傳俾阿古路射入，阿根廷仍以1球之差落敗。

為咗安慰幸男，台灣女生於落後時段倒戈支持阿根廷之餘，亦於賽後讚賞呢場係好精彩既賽事。

PS: 幸男既喊聲，洋溢著童真～

暫别特選星期六

相熟油站每隔2星期既禮拜六就會有特價優惠(每公升減$2.2)，照計數呢缸油可以行到去交車當日。

見油站無其他車，於是為愛羊補影生活照。仲有2星期時間，要好好珍惜每一次啟動引擎既聲音，以及扭動油門時之阻力。

數碼放羊

朝早十一點騎羊入到元朗,見至愛老闆未到,於是為愛羊影吓相。尋日至發現其中一盞頭燈燒咗,臨急臨忙約師傅今日檔期。

一黎為咗行車安全,二黎今晚約咗人睇車,當然要換對新既頭燈,免得被壓價或嫌棄。

尋日下晝四點幾放post係易發車網,3個鐘內已有個人打黎查詢。

第一個人未約睇車,已經回價$7000.我覆佢同一網站有另一架年份及款式相若既車放$12000,點知佢答"果架擺咗好耐啦"。之後再一輪柴台説話,例如"400CC就一萬啫".雖然踩到無市場,但佢又心急約睇車(擺明有興趣,但一心壓價),結果我約佢下星期中睇車,兼回敬"我都係啱啱放啫,可能一星期後我減價呢?"。

第二位查詢人仕比較正路,直接問我心中可讓步既價位,而佢既留牌紙即將到期,所以亦心急約睇車.佢想搵個中間地點,所以約我週日係深井附近睇車.

第三位詢問既人仕,只係電話問少少車輛保養既問題,就爽快約咗今晚睇車。放工騎羊趕往兆康西鐵站見面,原來佢由市區騎住初代HONDA FORZA入黎。見師兄係鍚車之人(車身企理),而且佢架車仲舊過我,直覺認為機會率高。望過車身兼車底,睇過原廠維修紀錄,試騎一圈,咁就回價兼簽寫買賣恊議(對方已準備好)及落訂。

傾談後得知師兄係老車手,已揸過5部綿羊,暫定兩星期後交收過戶。十二年前我係打去車行問收唔收愛羊之型號,再揸去車行俾老闆檢視及試車.今時今日,網上放賣更容易為座駕覓得知音~

PS:除咗直接電話查詢,原來而家仲興以whatsapp問價~~

克服選擇困難症

拍拖時代，經常食pepper lunch做晚餐，今晚因為約咗Kelvin 出旺角裝修街揀木櫃板面色樣，所以貪近行一個街口黎食。我等埋台灣女生放工，搭巴士趕18：00到埗。

咁又十年有多，food court 好多食店都轉咗，慶幸pepper lunch仍然屹立，但已經無咗當初既霜降牛扒(大眾化兼保本要緊)。

上次經過，人家已話想食呢間i CREMERiA出品既士多啤梨蛋糕。 適逢晚餐唔太飽，一於每人一甜品。

$140件蛋糕，人家話佢點都要食，以請我食為名，衝去櫃枱。

一人一cake set，我揀既芝士蛋糕細細件都要$48。人家話好好食，我試咗一口，甜味唔重得黎又好食既。

行去巴士站時，經過傳説中既力威健身學院，克服心中“掙扎”，舉機拍照～

PS: 成功用一個鐘多啲揀好晒廚廁櫃既色板及台面石款，鋅盆及拉籃，浴屏落訂。始終現場睇磚款黎拼揀色樣係最好，因為手機照既色調不能作準(大機影都要好好心機才做到近似肉眼所見)～

英格蘭大勝巴拿馬

今晚八係木點,約晒睇波腳一齊去貝爾特睇英格蘭對巴拿馬。晚飯後,台灣女生同幸男意猶未盡,叫咗客咖喱豬皮魚蛋蘿蔔。

泰兄泰嫂飛的黎趁高興,碧權原本話一齊睇,結果要英格蘭射入四球至到埗(角球頂入，12碼，禁區頂勁射，死球開出既門前混戰)。今晚已算係多客人睇波既晚上,可能係港人對英格蘭既情義結，英軍既入球量足以令球迷喝采。有部份球迷半場就離開，可能嫌賽事太一面倒(上半場5比0,下半場再入多球，臨尾巴拿馬破蛋)。

PS: 晏晝幸男係孜孜屋企打機(超音鼠)，傍晚師傅車埋幸男到V city。我同台灣女生係牛角攞定位～

貝爾特人

放假日，下雨天，中午係V city食過晏，係巴倫紐米隔離既惠康補給檸檬茶，番歸就上網邊聽歌邊補打日記。

近六點就落去餐廳會合台灣女生及傢具設計師，一齊傾尺吋及色料,兼一齊食餐飯。

食完飯,人家繼續傾埋啲細節,我就跳去隔離既世界杯直播區，坐定等人齊睇巴西對哥斯達黎加。大投射布幕，加大喇叭，環境配套無得輸！

入場人仕至少消費$55(細支裝啤酒),幸男未夠歲數,唯有叫杯橙汁兼爆谷。多得婆婆帶幸男過黎餐廳,我同人家唔洗兩頭走。

人家趕得切下半場加入,正好睇足全場既2棝入球~中學同窗聚首，合照當然唔少得。

PS: 雖然無得播收費既賽事，但點都好過坐商場地下，或酒吧食二手煙，黎緊應該會約多幾次睇波團。

特選星期四

夜班收工,騎羊番排骨位,見到愛羊既上一代前輩,計落都有16年歷史。

從外觀黎睇,風擋已變磨沙色,爛布冚兼封塵,呢架應該係棄車。記得曾經以初代愛羊Burgman150出大角咀安定,護送師兄騎住呢款既400cc二手羊番入屯門。

訓醒覺,行去食龍拉麵,依舊係黑龍,但就無追加叉燒~晏晝係中心一個人閒逛舖頭睇衫,兼裝修用既家電(浴室寶,洗碗機及電視)。

夜晚約咗台灣女生係西川食雞煲,由於唔再有生啤,唯有叫支獅威~

電話留枱兼有相熟聲音,預先留定海鮮配料,食食吓仲見到瑋霖同女友入座。

是日特選星期四,幸男係外母家留宿,兩口子可以輕輕鬆鬆開大聲個電視黎睇明珠劇集(短期租約期間已落後好多)。

貝爾特幸男

平板電腦喇叭聲薄，酒店電視又唔夠聲，所以買咗個JBL Charge 3 speaker黎方便用平板電腦上網睇波，兼駁SWITCH打機。

Set好個陣俾幸男玩Mario Kart 8,聲效雖然唔及舊sound bar,但已經比電視好好多.其實我仲有少少私心,就係番屋企時,可以駁電腦用,播位you tube歌黎打blog。

晏晝一家三口同外母一齊去利小館飲茶,我就騎羊番工。雖然搭輕鐵都方便,但我始終愛騎羊,享受迎風跌宕~

工作太忙,打消補鐘念頭,收工趕去外母家接幸男番歸,成功趕切中場休息時間衝番上房,兩父子一齊睇波等媽媽門。

幸男一心追美斯(體育新聞睇過巴塞?),所以今屆世界杯支持阿根廷,結果1:1完場,出線前景未卜。

PS:兩口子特意薰陶幸男鍾情實體玩具及投入體育活動,電玩消閒亦以家庭及派對向為主。

遲了一整年既聚會

上年阿潘第三個小朋友出世，所以年度聚會順延至重陽，但大家都係各有各忙，結果相隔2年才聚首。

柴灣集合，我同瀟洒及Percy上山探阿强，瀟洒因為要陪屋企人,所以無一齊落觀塘.我同Percy先到觀塘既Moreish & Malt,攞住位黎等各位。

潘要夜晚要上當,阿禮又要黎交版,所以促使咗前後腳聚會。

華B暫放家庭擔子,合大隊一齊聚舊~

平時去鈴木整車時一定會經過,但今次就第一次幫襯.環境唔差,食物味道有驚喜,有機會的話,都會再惠顧。

阿禮煩公司嘢,遲咗落番香港,所以未能同大家一齊食晚。餐廳要我哋8點前交枱，我哋同阿禮係附近既熟食市場大排檔邊食邊飲邊睇世界杯分組賽 。

PS: 難得可以聚舊，一整晚既時間夜，都覺得唔夠…

"Yes, I do!"的十一年後

朝早落雨，唔方便騎羊，唯有搭輕鐵番工。以往屋企附近既車站上車,車卡載滿前往西鐵站既乘客,而家我可以輕鬆上車~
收工去咗卓爾居既Pacific Coffee,食件餅就當係晏晝果餐,順便刨吓本Moderrn Home,睇吓裝修樣板圖。

搭輕鐵番工地視察，廁所既地磚及牆磚已被轟碎…

廚房地上舖滿被拆爛既牆磚,用黎襯托支Jack Daniel's,頓添一份滄桑感~

由於落大雨,我地call的士去丁蘭居既ANCHOR食自助晚餐。

註冊週年日,雖然只係食自助晚餐,但可以二人同步放空,已經好難得~三百幾蚊一位，食物選擇唔太多，但味道比黃金海岸好。

番歸前係V City買咗對番工皮鞋,因為已換了兩次爽健Gel Active鞋墊(每對成舊水)，倒不如買過對新兼鞋底厚一點。人家睇中咗對羊皮鞋，順利成章變成實用禮物。

PS: 11年前係海外酒店食飯再搭車番留宿既酒店，今日都係一樣模式，只係無開香檳～

開工大吉

朝早起身熨衫,食過早餐騎羊去屋企繼續收拾剩餘物品,以及同師傅溝通工程時間表。

見師傅未到,將雪櫃裡既湯力水拎出黎,即席撞杯HIGHBALL黎消暑。

其實廚房仲有好多雜物未清,唯有趁少少空檔,盡量清番間吉屋俾師傅。

交收過開工利是,師傅先係客廳地板上舖膠板，再拆走天花燈，廚廁掛牆架以及窗簾架。中午過後，師傅就撤走，我騎羊兜去相熟茶餐廳食晏。下午番工地，清潔多包裝剛拆下家品，咁就一日了…

人生第一次搞舊屋翻新，比新樓有齊廚廁設備(齋添家俱)，確實要考慮更多～