屯宿聚餐歡送

今晚同一眾屯宿兄弟約好係三聖食海鮮,限聚令之下,方案係分2張枱坐。

阿Jay最早到,仲要踩單車黎,繼游水後又一健康活動。

另一張枱既兄弟望一望過黎丫～阿潘帶咗支烈酒黎助興,可惜華B明日要早起,所以大家齋飲藍妹!

海鮮就由阿彪同Jay去海鮮街買,交俾興記代工,再嗌多一兩味餸。分兩枱食,咁點落單好呢？答案係每枱半份!

縱使大家各有各忙,但大家都對Bill既移居非常關心,所以約今日一齊食飯兼相聚。由於阿禮人在國內,所以用wechat黎視像對話。

雖然有限聚令,但店內都坐滿客人,四個人一枱。

扇貝同瀨尿蝦一樣,段每枱人頭黎上碟。

一條蒸魚分半黎兩枱上,骨就當然係分唔到一半喇~

芝士焗開邊龍蝦伊麵底,好食過酒樓既波士頓龍蝦得多。

辣酒煮花螺,啱晒用啤酒解辣。

最出奇既係砵酒焗蠔竟然係用碟上..............

點可唔獨佔預科同學兼Training同房黎合照呢?祝你事事順景,生活愉快~散席後同Bill一齊行去兆麟政府綜合大樓下既巴士站等巴士,傾多一陣,希望係佢一月出發前可以再食個下午茶。無諗過當年預科班每天操場集隊前方既班長,會陪我渡過大大小小既人生階段,往後我哋要Long D了。

屯宿之男大合照@2020,"Gentlemen, all the best~"

PS:你知道當年BIO測驗見你次次都舉手加紙時,我內心不時妒忌"有無咁多嘢寫丫,論文組?"

大閘蟹的季節

今晚一家三口搭西鐵出尖沙咀食滬江大閘蟹餐,因為性價比係最高~

無論食幾多次,蟹粉翅點都係無得輸~

之前幸男只係齋食一籠小籠包加少少我哋既餸,今次幸男就自己食一份大閘蟹餐。人家不忍幸男得一粒蟹粉小籠包,故割愛讓出自己果份。

幸男已由食蟹棒轉食火鍋松葉蟹,蒸蟹以及炒蟹,再到嫲嫲蒸既大閘蟹。

食過番尋味,今次幸男跟隨大隊一齊食大閘蟹。幸男只懂用長窄羮去刮蟹身既肉,爪同鉗就由父母負責拆肉。

最後幸男都成功食晒蟹粉,只係菜同粢飯各剩一半,睇黎每逢10月食大閘蟹餐既傳統可以延續落去～

兩母子感情唔差既,只係對功課及溫書時氣氛欠佳。

FINAL DANCOUGA升上神位,舊千値練機體尚未處理。心血來潮,將BANDAI超合金魂－超獣戦隊合體黎比拼,都係變番載具好睇啲。

PS: 明知今晚早食大閘蟹餐,放工兜咗去置樂間KALEiDO咖啡店填肚。 Espresso 加奶既凍飲Dirty味道啱晒重口味既我,可惜小食無乜選擇(得雞肉蘑菇批同鬆餅)。

補鐘拎外賣

捉緊6天日作既尾巴,趕急完成工作上既打點,補鐘騎愛駒去貝爾特拎台灣女生訂好既外賣。

每次經過工廠區,都會諗起2年前裝修時既時光,因為當時我哋一家三口住係貝爾特兼望到迷你倉所在既工廈,以及幸男最留意既巴士廠。

唔好以為外賣就要將就吓,我今晚都有扒食0架(配雪櫃既黑啤)~台灣女生食炭燒西班牙豬扒,幸男依舊食肉醬意粉配雜果賓治。原本兩母子為咗溫習考試,一心安在家中頹食。突如其來既補鐘,為艱辛溫習帶來一點美食惠勞。

飯後拎出新入手既千值練FINAL DANCOUGA,新機體塗色走金屬風,大腿同上臂既線條比舊啞色顯得更加立體。肩關節換上金屬部件,各機之駕駛倉亦換上透明部件,更配上電影版既背翼及斷空光劍,以及機戰Z裡夢幻機FINAL DANCOUGA之黑鷹作飛行背包。雖然之前出既黑鷹已可以與斷空我合體,但色調就無今次FINAL DANCOUGA套裝既塗色咁一致。

PS:舊機體已出現關節勞損,左手指公已經斷裂~

第二次各奔前程

趁Oscar尚未出埠,會考班書友一齊係元朗正記食大排檔,Oscar用佢部新i phone黎自拍~

中四至今,難得大家都係住同區,好方便相聚。即使大個咗兼各有家室,大家都可以輕鬆即興約食飯或暢飲。50年不變已走樣,結集古中國及傳統英倫風既香港,無疑未能消化新中國既辛辣及綑綁式。因此,港人繼97後,再一次面對去留,尤如60年代國内既逃港潮。

飯後再去酒吧,諗番都好耐無去酒吧,尤其係2020年武肺橫行。後生時常去酒吧,成家立室後都少咗好多。呢一兩年常去既聚腳點,莫過於貝爾特,仲一齊睇世界盃添。慶幸當年入讀崇真,可以與各位結緣。

香港係一個節奏急促既城市,大家都依靠消遣黎減壓。防疫措施之下,抗疫疲勞係必然的。

當年我同教練不時留連李白吧,而家間吧都變咗星巴克,我倆亦己為人父。Oscar回港後,就會短時間內舉家赴新加坡定居,希望到時會再有機會出黎聚下。

PS:放假執士多房,將小朋友大型填色畫紙饋贈俾泰GG。由於太長身,所以今朝好似孭住結他或巨劍咁騎愛駒番工。

本地珍珠養殖場

一家三口搭GOGO VAN入西貢白沙灣,落車就去台灣女生訂好枱既Padstow食晏。由於附近得一兩間食店,所以都無咩吉枱,好在人家book定位,話晒都係星期日嘛~望住遊艇會兼海景,當然要嘆杯凍生啤,配合休閒風。

Blue Mussels with Wheat Beer,啱晒鍾意食青口類既人家。

人仔細細,幸男都有份8安士牛扒,無諗過佢又真係食得晒~

12安士阿根廷AZUL肉眼扒,雖然係貴少少,但味道絶對配得上個價錢。

食飽飽就同大隊一齊行去碼頭,小朋友小隊先黎張合照。

遠赴小島,搭既係小渡輪,好似巴士咁,逐個島黎上落客。

Judy一個人帶三個女出黎,細女不時要媽媽抱~

船內已滿座,所以我哋都要坐係舺板上。

一去到魚排,先上一堂珍珠養殖既歷史課及環保課,再睇職員即場示範開蚌~

幾經掙扎,大家都成功採珠!

下一個步驟,就係揀選心儀既飾物,再將珍珠融入其中。

人家開到雙珠,所以補錢買咗其中一粒作留念。

雖然中途去拉肚子,但上完堂都知道珍珠其實係異物入侵貝類體內,被分泌既物質所包裹既產物。至於異物佔珍珠幾多比例,需要用儀器黎測量。養珠技術係用貝殼打成既顆粒,所以都算係天然材質~

人家揀咗方框吊飾及手鐲黎安放珍珠,幸男開果粒珍係呈粉紅色。

最後係釣魚時間,幸男孖住彤彤一齊釣。

零收穫,兩位似餵魚多過釣魚......彈盡糧絶之下,彤彤成功賣萌,令漁具充足既叔叔送出魚餌,可惜都係無漁獲。

臨搭尾班船前,大家一齊影張合照。上岸後,我哋搭番GO GO VAN番屯門,係V CITY買鼎泰豐外賣回家(因為要等好多張枱)。

PS:幸男不時有小動作,嗡口嗡鼻反白眼,今次仲唔俾我捉到正?