夜晚一個人搭巴士去尖沙咀朗廷酒店等台灣女生及幸男,因為佢哋下晝出去將軍澳出席中大中秋節聚會。
職員人家行動不便,帶我哋搭電梯上一層既預留枱號。台灣女生牛一兼第一次食米芝蓮3星中餐,點可以唔影番張相呢?
釀焗鮮蟹蓋,無諗到蟹肉被拆出連同配料釀入蟹蓋,外脆內嫰~
"海味雞煲官燕",雖然官燕代替魚翅,但沒有影響到羮底既香濃味道。
食過蟹蓋,幸男既主食"肉絲炒麵"上枱!
借出WINE SET中既白酒俾壽星女,加埋"黃金焗開邊龍蝦",切合"美酒佳餚"主題~論盡既人家誤將白酒打瀉,幸好侍應生為我哋補添。
搵幸男幫我同人家影合照(假笑),當然只係用Xperia 1 II喇~
"燒汁茭筍日本和牛粒",搭配既日本紅酒味道好特别,充份表演出非列級酒莊之努力~
"鮑汁吉濱鮮鮑炆麵",精緻郁香,蛋白質與澱粉質比例啱晒我心水。
對於輪班既我,我與倆母子既生活有點平行時空感。角色設定係庶務組,與主綫既重叠不多。過度投入平日既支援,不自覺地忘了預先準備特別日子既安排,忘人家見諒~生日快樂!
PS:兩母子話侍酒師個樣有點似"愛回家"裡IT部Ivan,但我又唔太覺,反而覺得佢好熱心為我哋介紹是晚酒品及閒聊酒話。
