SHARP AQUOS R6用後感

用咗SHARP AQUOS R6兩日喇，相比NOKIA 9有咩唔同呢?

芒大咗0.6吋,但由2K變咗WUXG，Dobly Vision要source匹配至可以發揮....雙曲面芒兼包埋個打窿自拍鏡頭,好在衛訊有得配即介既芒貼。

Lag機不再,12GB RAM配驍龍888,的確比NOKIA既6GB配驍龍845順得多。

Speaker由單變雙，睇片時會覺得左右聲量聲效不一(但點都好過單speaker)，因為只有聽筒喇叭向前，而米高風既喇叭向側傍。

屏下指紋解鎖速度快及準繩度高，不再需要為解鎖而忟憎~

叉電一定要有私伙高W數叉機兼配type c輸出，否則叉到你忟....

原廠送既type C to type A轉頭，原來係用黎過ANDROID機資料用，但係好食電吓(建議叉滿電先過機)。

影相方面，一吋感光元既優勢，令相片更細膩。五鏡變單鏡，省却了不少合成時間......即使網上用家話影相唔太快爽，但用開NOKIA 9既我，已經心滿意足!!

室內照片亦算有交侍,不負徠卡之名。半年前新機出道要成萬蚊炒價,而家6折就可以享有日本當地定價!

第20代手提電話 X 徠卡

今晚遲開飯，所以先騎愛駒兜出去洪水橋會合店員交收Sharp Aquos R6。老麥門外坐住等,好快就見到店員拎住"放工啤"前來。店員用密碼激活機體(唔通日本當地出機都係咁?),俾我試過影相及通話功能。閒談幾句後，就完成是次交收。

話就話係5G，但香港只係用到4G，唔兼用唔到"3"台。水貨機要自己設定Assess Point Name，好在店員已幫我set好。原盒無叉機，USB線都無條，得個TYPE C轉A頭既adaptor,夠晒簡約。唔知點解叉電比NOKIA 9慢,因為電池由3320mAh變咗5000mAh?

手機Profile更新:
1st   Ericsson PF768                >黃色 sunday
2nd  Boch 909 Dual                 >灰色 people
3rd  Siemens A40                     >藍色 orange
4th   Ericsson T29                    >銀灰色外殼,紫色panel one 2 free
5th   Ericsson T39                    >灰藍色 one 2 free
6th   Sonyericsson T300          >紅色(紅豆) smartone 
7th   Sonyericsson T630          >黑色 smartone
8th   Nokia 6260                       >銀色 smartone
9th   Nokia 6270                       >黑色(深啡色,鋁金屬外殼) smartone
10th Nokia 6500 Slide             >銀色(鋁金屬外殼) smartone
11th Nokia N86 MP                 >白色 smartone
12th Nokia N8                          >橙色(鋁金屬外殼) smartone
13th Sony Xperia P                  >紅色 nwmobile
14th Sharp SH930                   >白色 nwmobile
15th Alcatel One Touch Idol X >黃色 nwmobile
16th Alcatel One Touch Idol 3 >灰色 Sun Mobile
17th BlackBerry DTEK 60       >鈦灰色(玻璃背面) Sun Mobile
18th Nokia 7 Plus                    >黑色(玫瑰金色金屬邊框) Sun Mobile
19th Nokia 9 PureView           >藍色 (反光夜幕藍)Sun Mobile

20th Sharp Aquos R6              >黑色 Sun Mobile

PS:今晚開咗罐特別版ASAHI，但無網上介紹咁多生啤泡既?望番個罐身，原來要4至12度至會愈黎愈多泡!!!靈機一觸，用熱水坐暖罐身，先至見番綿密細泡~

電影滿載而歸;新機空手而回

朝早同台灣女生去StagE睇梅艷芳，好佩服製作人可以CG及舊物重現老香港既模樣(唔睇都唔記得香港曾經有由木條砌成既垃圾桶)。當年真實低清傳媒短片紀錄穿插高清電影主線，見證住巨星既成長及經歷，只係中段泰國暫避既節奏有點慢板。

本人覺得最感人既場景，莫過於梅艷芳於Leslie既殯禮上講既單方對白-從來合作登台都無rehearsal，點解今次要為佢自己rehearsal?可惜我記唔住每一個字眼，所以我會等出藍光碟作收藏。電影中，感受到女主角對愛既渴望，對歌既熱情，對義既執著~

散場食過壽司郎，就騎愛駒送人家番屋企，自己搭巴士出深水埗。由於Nokia無如傳聞中係11月發表新旗艦機，服役兩年半既NOKIA電池已老化到要一日三餐(叉)，於是早前係PRICE. COM搵到深水埗既WONDER DIGITAL，預留定心儀既後繼機體SHARP AQUOS R6番貨。

由於今日至番貨兼臨時轉黑色(當初留白色)，店員要即場為新機叉電，我唯有於店內苦等。期間見唔少客人查詢安心出手機，當中不乏志在最平價既陳列機。等咗成個鐘都唔見部機叉夠電啟動，熱心店員建議明晚於洪水橋交收。

PS:苦等期間，店員叫我不如坐下，但我怕一坐底就會被客人當成店員，所以婉拒......

收貨,排期,跨區,網購

中午時份收到電話,OKAMURA送貨。唔知係咪想廻避村屋窄路，大車係村公所附近蓆地組裝。

當初揀呢隻色係因為似新幹線既座位，送貨員事後打俾我，叫我影番張相SEND俾佢交差(佢砌完唔記得影)。

晏晝去燊光食晏，再肚兜去老家幫老豆去明心樓排期。嘩,2013年至有得睇，一片心睇私家好過.......

番屋企執下個背囊，就騎愛駒出土瓜灣既MOTOPLEX睇手套,順便俾機會TMAX舒展下。款式唔多,店員仲話陳列既手套已夠香港冬天用,並話我用智能電話呈示既款式係日本落雪至啱用。好懷疑店員有否渣電單車,無保溫夾層既手套絶對不足以應對14度既晨早逆風.........(唔係個個都係十一點鐘至開工)感覺上阿林轉咗MOTOPLEX後,主力賣車多過騎士配備。

夜晚幸男跟人台灣女生去同足球班隊友食飯再去上當,我自己一個人係屋企烚熟啲有剩既火鍋配料,咁就當一餐。

PS:嬲嬲哋上WEBIKE揀電單車冬季手套,總叫做有對相熟品牌兼心儀既款式,順便買埋個頸巾圈~

著迷係一種幸福

今晚係幸男第二日踢U13,台灣女生與同事食飯,所以由我去接幸男。人家話幸男第一堂經驗麻麻,因為導師比U12嚴厲得多。我到場睇咗臨尾10多分鐘,又的確唔再柴娃娃,但唔見幸男被訓斥。

帶咗件電單車雨褸俾幸男作擋風,騎愛駒去V CITY既炙食和牛拉麵。幸男話少咗被鬧,而自己亦較上次融入球隊。其實我好主張幸男去踢波,因為有一種運動去著迷,係人生既動力,目標以及心、技、體既磨鍊。

PS:雖然中三打咗一年櫈腳既三人籃球,但我當年都好開心,每個周未都期待星級同學既邀約。

食到一肚氣-嘉爵

疫情下一度結業既嘉爵,經歷近兩年,上星期以翠湖(嘉爵)之名重新開張。

老豆入院留醫觀察,需日用品補給,於是約咗老媽係嘉爵食晚飯兼交收。幸男踢完波,自己搭輕鐵黎會合我哋(我係出去天橋底接)。六點幾入座,已無咩吉枱,之後開始排隊。裝潢企理, 一洗過往陳舊霉噏既景像,但食品都係一般兼且樓面運作混亂....漏單問極都無人跟進兼有答覆,個個都係"哎吖....咁呀?",結果出去埋單兼要求取消成個鐘都無上枱既BB豬半隻。嫲嫲食到把鬼火,連支藍妹都未飲晒就走人。

愛駒載埋幸男去醫院病房外見爺爺,轉交日用品後,兜去V CITY買小食(碗仔翅,蝦多士)當宵夜。

趕番屋企沖涼,睇八點既李斯特城對車路士(詐糊精彩過正式入球)。幸男臨訓前用XPERIA II聽歌(一秒拳王主題曲-時間的初衷),我就叫幸男試用我個AUDIO TECHNICA既DSR7BT,介紹佢聽多一點細節及厚一點既聲韻。

PS:台灣女生今晚出席同事既囍宴(番到黎幸男已訓著),所以成晚都係父子one on one。

擺酒14週年-扮去日本慶祝

今日係擺酒14週年紀念日，台灣女生係九月份已訂定區內既新店"道"食日式廚師發辦OMAKASE，所以收工後各自到餐廳集合~由於店門太簡約，行過咗都唔覺，結果要係人家既語音導航下兼行慢啲至入到門口。

十足溫泉旅館食晚飯，枱頭有張附有日子既菜單~

呢味前菜令我諗起蟹刺身，唔知再可以去日本時我幾多歲呢?

"魚肝"無想像中咁嚇人，一啖食晒唔覺腥。

北海道生蠔，諗起旅行係魚市場買蠔，即開即食~

愛媛既池魚，人家唔鍾意食有皮既刺身，但都食晒成塊。

醋鯖花魚，味道清新，但大份其實係日本邊忽?

宫城既鰹魚，平時係日式餐廳較少食到，多數只係鰹魚湯底......

(青森大間)大拖羅，師傅係你面前用火槍~

食客可以品嚐原味刺身與火炙口味。

近門口位有一小缸蟹仔，無諗過原來係燒物拼盤食材之一。

細隻殼薄，可以直接咬碎，無試過咁新鮮既佐酒小食。

日本老師傅帶住本地徒弟係客人面前即制每一道菜，上菜速度令我倆有大量時間放空。近門口坐咗一組食客，另一邊有兩位女仕。店員與徒弟為每道菜式作介紹，並為老師傅代翻譯~老師傅有隻私家杯（比客人用既大），不時於工序之間呷一大口，更會與客人敬酒～

日式大眼雞-喜之次，同北海道渡蜜月旅行一樣，唔識食腩位，結果俾師傅問我哋係咪條魚有咩問題?(我哋當然聽唔明，全靠職員翻譯)

昆布醬油汁煮北海道黑鮑，無話有金箔，咁上面果塊係mug?

帶子(北海道)、海帶、青瓜土佐酢漬，好醒胃既涼伴。

天麩羅大集燴有海鰻，花竹蝦，蕃薯，茗荷，青椒，但由於我哋唔食白子(魚睪丸)，所以徒弟改咗紫蘇葉包吞拿魚蓉～

結尾既食事:日本蔥拖羅(長崎)飯只係一人一碗，但老師傅為慶祝結婚週年，特意泡製豪華魚生飯蛋糕~

店員驚訝是晚為14週年紀念，並幫嘗試自拍既我倆合照。

餐飯成兩個鐘，咪以為咁就可以走人，仲有個甜點拼生果(紅豆抹茶脆盒)殿後。

其實放工去咗相熟花店攞花球，雖然係年年如一，但總叫做紀念(其實今年係老闆娘見我未打去訂而主動whatsapp問我)~平日管教小朋友令父母花去不少心力，難得可以腦輕鬆，如果餐飯可以短啲時間，咁就可以多點睇電視時間。

PS:千六一位係貴啲，但絶對值得，好似用時空門去食溫泉旅館御膳。

萎靡不振

一大早就收到老豆whatsapp話去咗睇完急症,個人唔知想點,係7-11對出既櫈(收症處)呆坐,幸好最後有番到屋企。

呢個幾禮拜老頭子已經睇咗三次急症,每次都係心口翳,手腳無力(somatic symptom)。十一月頭話想復出估PART TIME,但臨番工就勁緊張同擔心誇區工作(兼陌生地方),自此就開始話失眠,繼而somtatic symptom。

擔心係anxiety加depression,約好星期五去睇私家精神科醫生,希望安眠藥可以暫緩vicious cycle。

PS:精神,自信既落差;性格,行為既轉向,令身邊既人頓感陌生,傷心及無奈。慶幸兩兄弟仲係香港,可以照應下。為兩老既打點,絶對係去留港既一大考量點。

冬天=蛇羮

天寒地冬,有咩好得過熱焫焫既蛇羮?是晚當夜班,查詢過同事既喜好,我今晚唔買和生既小菜,而係去蛇王輝既蛇羮同臘腸糯米飯。

每年入冬既目標就係要食十次蛇羮,仲記得以前TRAINING時代,蛇羮當宵夜小聚,亦有酒吧後既補身。後生一代好多都話未食過,所以我不時趁冬天向大家推廣漸被淡忘既粵菜,傳承老香港。

辛苦得來至在食

平日番工好忙,唯有寄望食飯既時間可以鬆一鬆或惠勞下自己。今日P更就搵同事一齊嗌外賣,結果搵到DONKI便當。除咗運費,各便當都係DONKI既實價,唔會好似其食店咁,外賣貴過堂食價($5X有個魚生丼,仲要有冰包住保溫)。

PS:之前成日發起嗌外埋既係丹丹,所以SEND咗張相俾丹丹呢位膳食外賣點餐專員~

鐵騎爸爸的區內假日

是日放假,騎愛駒去接幸男放學，貪近去咗敏華食晏。快升中一，所以平時都多逼幸男代嗌嘢食兼其他自理鎖事，始終都要獨立嘛。

店內既選擇唔多,每次黎都好似食港式All Day Breakfast咁。

傍晚騎羊入元朗既再來一煲買雞煲外賣(幫襯開既西川已經結業)，回程時諗住照跟住高德黎迴避塞車路線,點知nokia 9突然hang機，並不停重覆熄機同著機.......番到屋企，立即將Nokia 9插上濕電(怕搾乾電池)，並成功跟隨網上教學將Nokia 9強制reboot。

其實之前見Sharp既Aquos R6由一萬蚊降價至6千，都有心動買黎當後繼機，只因水貨機有點擔心保養問題而却步。事到如今，都要積極上網搵下仲有邊間舖頭有貨。

PS:今日接幸男放學前係藍地既智能櫃領取90cc既Zippo酒壺,方便日後與朋友交流杯中物~