TINECO S5 PLUS

早前係HKTVmall落單買貨，今日就收順豐速遞既吸拖機-TINECO S5 PLUS。

其實之前用過TINECO S3，但由於一年左右就死咗舊電。諗住轉用PHILIPS既AquaTrio 7000會襟用啲，點知都係一樣.....TINECO S5 PLUS比當年平咗千幾蚊，而家$2159就可以了，都算快壞都無咁蝕嘛。

繼吸塵機轉用SAMSUNG，而家屋企都無乜家電係Philips。畢竟當家品兼影音賣盤俾中資時，就預咗品牌會沒落......

ALVA自助餐

母親節無同老媽慶祝，特意託台灣女生安排自助餐補數，人家揀咗之前食過lunch buffet 既沙田ALVA。

石門站落車行一陣就到，酒品得罐裝獅威，不過老媽都OK既。

自拍照影完至發覺老媽眨咗眼……

著意大利隊波衫，食意式薄餅。幸男原本要去馬鞍山踢足球比賽，但因雷暴取消。

嘢食都ok，長腳蟹有驚喜，食到蟹鮮味～

大佬撩我加錢Free Flow紅白酒，大家都食得滿意，生蠔係重點，另外有即劏油金魚刺身（一條）。

PS:回程call uber番屯門，尾站前係老媽屋企停一停，等老人家唔洗咁攰。

老家黐餐

今晚番老家黐餐，住得近既好處就係行到只需3個字時間。

照舊我帶酒，大佬出醒酒神器。呢支酒係性價比高之選，有機會真係要再入手。

住家餸都有6味，有勞嫲嫲/奶奶/老媽。

番屋企沖完涼，幸男享用阿Wing請食既散水餅，特意send張相俾阿Wing。

PS:今日係公司我都係食芒果味，味道都唔錯。

絶対無敵(獅人鳳)ライジンオー

係相熟玩具網站，見到Toyrise系列既獅人鳳灰模展示，呢隻會係我今年必入手既收藏之一。外觀比元祖作品多咗唔少現代感細節，但又未至於魔改。

當年中二既我，每日都開定電視機等住睇。神秘生命體，將保衛地球既重任交託俾一班小學生。學校變成機體格納庫，課室變成後勤司令室。由於係小學生為題，順利成章地加入唔少搞笑情節。

PS：膽大黨都有向呢齣動畫作致敬。

Whizzy扭蛋VS實物

早幾日占兄出開旺角，見有款頭盔扭蛋係我2月尾買果個拉花，當手信買俾我。

今日係更衣至交收，放工已忍唔住拎出嚟同實物拼吓。

外型同顏色紋路都跟足原物，拋光爭啲，如果個太陽鏡可以收埋就夠晒完美!

收工直取日式料理

一直有問台灣女生邊日再去置樂，堂食日本料理，回覆係“好難約㗎”。收工一心騎愛駒番屋企之際，人家話放工行咗去望，有位堂食。結果落番布冚，轉搭的士去赴會。

屋企買定咗支香檳，諗住約好日子就帶嚟飲，但今日事出突然，唯有問師傅有無咩清酒介紹。

除咗生蠔做頭盤，其他選項都係揀時令特別既，例如火炙金目鯛，螢光魷魚，以及泰式虎蝦剌身。唯一可惜既係無晒中拖羅，得大拖羅壓場，但都無礙二人既滿足感。

PS:掛住食，唔記得影海膽壽司。

BALL Trainmaster Worldtime(renewal)

第一眼望見隻錶時，不禁同店員姐姐講"真係好新喎"。其實一星期前已到錶舖whatsapp通知可以領取手錶，但礙於夾唔啱放假日子，所以今日至出去交收。錶身重拾反光閃令令，錶面玻璃都好似通透咗，容易啲望到紅字既HONG KONG。

2021年係jomashop網購，咁又戴咗4年幾，陪我去過英，法，日，德(轉機)。抺油($2800)兼外殼翻新($1800)後，希望可以keep多一個四年。

PS:時間同日子都SET啱，唯香港時區無對正實時(扣少少分)~