REON POCKET PRO Plus

網上見到SONY REON POCKET PRO Plus既宣傳短片，以為係出SLIM版，原來係針對2025型號既痛點作優化。第一：掛頸部件與主機接位常脫落；第二：頸帶既屈曲彈性未夠貼服；第三：領位排風口常被衫領遮擋。

今次既升級貼心之處，就係舊用戶只需買新既頸掛模組，配上主機軟體更新就=全新既體驗。新演算法可以提升20％降溫效能，啱晒盛夏中徘徊熱衰竭既TMAX車主。

Michael

又出咗去iSquare睇IMAX電影，今次係我喜歡既Michael Jackson自傳電影。

自傳式電影向來雞肋，因為好多時會被冠上洗白之名-美化人格，淡化陋聞。個人認為觀眾對象對應該係愛Michael既Fans，而唔係懷有敵意既hater。由童年既Jackson 5，到擺脫家族束縛，作個人發展，敘述較為平板。

可以係大銀幕睇到高清版高度還原既MJ表演，已完成心願。鏡頭close up追住Moon Walk既舞動，已經係全齣電影既新鮮元素。

自助洗車客服

早更收工，順路係油站附近泊低愛駒。行去九記買水喉，駁頭同噴槍，因為康楠嚟我度洗車。

一雞兩味，平時洗日式燒肉枱都可以用。唔買一套既喉轆套裝，因為用唔著咁長又怕掗位。砌好裝備就開水，車主好滿意呢枝小水槍，成功為大江豪爵翻新。

26亙助會

番晏之前收到康楠既Signal，委託我去大江豪爵既停泊位望吓，因為收到告票通知。估計係無位泊車既人，見有部鋪晒塵既電單車，就當係霸骨位既棄車咁推出嚟。

雖然已推番入骨位，收工都係唔放心，兜去望吓有無人手多。

PS:穩陣啲，聽朝都係番早前去"笠"番個布冚。

時空鏡像

每日都會以諗今晚食乜嚟決定晏晝揀乜食，因為唔想兩餐都重覆。平日心歸既幸男，就算遲放學都會想番屋企食外賣或媽媽餐。今日係家庭signal群組得知爸爸提議去鋒哥廚房，幸男欣然接受。台灣女生更加滿意，除咗有心愛既火鍋，仲可以順便同幸男揀番學運動鞋同出街鞋。

見到幸男著住校服托頭個樣，諗番幸男小學係PACIFIC COFFEE既洽眼訓樣......

PS:等的士番屋企期間，望見預科母校著燈，唔通而家仲有夜校班？

末日聖母號@IMAX

HKTVmall今日早送貨，食完晏至驚覺可以趕13:35果場，急急換衫衝出村口，飛的直上兆康西鐵站。

13：25已由尖東站急步行到去尖沙咀站R出口，順便係七仔買定相熟飲品。

扶手電梯駁扶手電梯，準時趕得切買飛入場。浩瀚宇宙兼科幻題材大製作，唔係IMAX睇真係嘥料。

上映近2星期，有唔少網評將佢同INTERSTELLAR作比較，我既"戲言"總結-歡樂版既星際啟示錄。

2個同樣為拯救自己星系既個高等物種，於不受噬日菌Astrophage所影響既天倉五Tau Ceti相會。通過互相觀察，接觸，學習，最終建立共同語言(翻譯)，並一齊用科學去解決星際難題-太陽被提早衰亡。

男主角Grace於天倉星e大氣層收集噬日菌Astrophage既天敵，但脫離重力軌道時航體受損。

外星人Rocky為救因撞擊而受傷既Grace，離開其保護衣，以重拾最大既活動能力。一邊力抗對自身有害既倉內大氣，一邊拖Grace往醫療室。當Grace醒來時，發現Rocky已於保護球內絲紋不動，唯有邊完成培植體（以Taumoeba命名），邊寄望Rocky甦醒。

以為Rocky醒番，回歸各自母星就happy ending了事，估唔到出現Taumoeba不受容器所困既劇情。Grace先將保存於新容器內既Taumoeba及其他關鍵資料，以太空膠囊型式送返地球，去相處理人類命運既道德綑綁。Grace用剩下既燃料追救好友，以回報超越物種既真摯友情，免Rocky之太空艦被Taumoeba所毁。

Grace暫留係Rocky母星，生活於科學家為佢打造一個生態圈(曾向Rocky透露自己最喜既地球境色)，可以自由呼吸及有活動空間。最後見到Grace開始視像教書，"Wake up!Who can tell me speed of light?"。學生不再係光年以外既人類，而係活潑既江波星小朋友，頓覺暖心。

PS:散場順便攞埋上次睇高達既補貨海報，再去新港放低機械錶作保養。

鐵板燒@本命

台會灣女生見我放假，收工約我一齊出去SOGO睇下有無鞋買。轉車站見到日落，好耐無閒時沉浸Magic moment。

貎似甜品既前菜-蟹肉最中餅。

食材擺晒上枱，其實係幾枱客既份量。

生啤飲少不了，自拍亦然……

手樣樣都好食，個豚肉薄燒係有薄皮包住，幾特別，最夠味既當然係爆膏瀨尿蝦。

第二round嗌咗杯highball，都夠厚身。

食到尾段已好飽，結果用啱啱買既食物盒裝走個炒飯。

雖然價錢係貴啲啲，但食材，手工同味道都值回票價。

DNF

睇F1見唔少DNF車手，但無諗到今次係我。時間為14：30，位置係屯公小欖前既落斜路段。龍骨位突然傳出雜响，同時車速驟降，好似前方有重力壓住部車……見錶板仲著住，下意識將愛駒擺向右邊既影線，繼而落側架。檢查自己齊件，再望埋部車都係齊件，嘗試重新燵車但不果。

跳上壆位兼打電話去YAMAHA，話剛check車換偈油既TMAX DX係公路死火。原廠應我要求，可以即刻拖番去再搞。“有無相熟拖車師傅？我係公路邊有啲徬徨”，成功聯絡師傅……

師傅收到我既定位，燈柱冧巴(GC0174)同停車位置既相片後，建議我報警，因為於快線邊作業太危險。

15：06打999求助，15分鐘後就見快線有2架鐵馬交通警駛近，於是揚手示意。警察問我係度做乜，我答我報咗警喎。Call上台問，先至得知我係等待援助，原來佢哋只係路過。警察問我爆胎定機件故障，我揀後者。後方既警察幫手截慢後方三條線，我就要趁機推愛駒至左前方慢線既路肩位。出示身份證及駕駛執照作記錄，一片心等拖車救援。

15：31拖車師傅到達，堅係一個鐘就到。車程上同師傅講吓我既經歷。兩點唔夠去番YAMAHA攞車，店員代維修師傅答TMAX無咩問題，雜聲歸咎於伴隨車齡既諧震。上公路前既燈位路段，覺得油門與動力既反應，無平時剛換偈油既爽快。見轉數無咩異樣，唯有繼續上路……

16：05又番到車行，拖車費＄450，好似發咗場夢咁。同職員交待幾句，放低車匙就行番去旺角附近既巴士站。

公路乾煎成個鐘，去七仔買嘢飲補水，呢支藍色樽既法國製青檸味有氣礦泉水，勾起南法既放空。

17：38收到YAMAHA打嚟，話check到係皮帶斷咗。我明明舊年至換過皮帶，但職員話TMAX有2條皮帶，舊年換既係左邊駁後轆果條傳動。今次斷既係右邊近引擎駁住變速器(CVT)果條。店員話平時萬八至兩萬公里就要換，而我新車行到兩萬公里時換過一次。由於2萬2公里時換過錶板，現役錶板顯示萬六，所以師傅無為意皮帶可能提早耗損。

個人唔太滿意解說，師傅確實可以問車主會否提早換皮帶，以排除震動及雜聲來源。差2千公里啫，除非車主三個月內就放賣，畢竟係人包鐵。

PS：報價4千左右，明天中午攞車。職員話匙牌低電，問我自己配定係佢哋度配埋。其實送埋俾個客，我都受得起……

缺席-1

幸男預今日會遲放學，故一心以去唔切為由，缺席練波。為免幸男浪費足球時光，今日我係學校附近既舊居樓下等候，點對點護送。

七個字唔夠就到九龍仔公園足球場，16:19就到埗，幸男依舊不時偷望我個速度錶。

PS:自己細個無得全情投入喜愛既運動，唯有不負下一代