TETLEY'S新裝

今日行過惠康,見到相熟既tetley's換咗新裝,兼且特價,當然入貨啦,好耐無砌tetley's山嘛~~由於存貨唔多,所以經我選購後,得番五六罐係架上.

新既包裝改動不大,經典既撩草tetley's draught以及曲線排列既SMOOTH FLOW就依舊.

好趕咁黎番夜班

點解台灣女生會捧住盒雞脾?之唔係我怕人家夜晚番工唔夠飽,係七仔買o架囉,得盒糯米飯,好似挨唔到天光.

本人好怕同台灣女生一齊番夜更,因為無人搞夜晚個餐,兼且買宵夜有啲唔方便,但偏偏今日就係同人家一齊番夜................

晏晝係市中心食過晏,跟住就番屋企set埋套system,訓得兩個鐘就要起身.

好趕咁搭小巴去新墟大排檔食晚飯,由於啲餸好遲黎,所以八點八至離座,過天橋走去"X王輝"買宵夜,再飛的士番工.

如果是但一個番夜,而另一個齋番早就好好多,起碼可以訓多少少時間,唔洗為晚飯同night food奔波,可以他他條條咁番夜班.

不過番完夜個日可以一齊食晚飯又係另一種安慰~~

留守新界西

雖然係放假,但今日都只係區內活動,先約阿潘係元朗食嘢同睇吓啲保安嘢.茶餐廳食晏(下午茶)時,阿潘攞出上網搵既資料,感動~~經過討論,睇中其中一個產品,於是用手機上網search番個電話黎問,決定聽日朝番工之前出去買.

跟住我就搭西鐵去屯門西鐵站,望出去既景物都係俾煙霞包圍住,藍天行動真係無可能成功?係相熟髮型店剪完髮,就行去置樂行個轉,無咩平嘢同心水嘢執.....

夜晚同台灣女生及外母一齊係市中心既美心MX打邊爐,外母話怕熱氣,於是叫咗個鹽焗雞飯.美心MX既火煱比大家樂既好食同抵食,起碼啲烏冬唔會好"韌"同"鞋"口....

由於搭輕鐵入元朗時,係車廂見到李龍基先生,於是番到屋企上網search佢既相,點知有條link(http://www.hftcaa.org.hk/gallery/album23?page=2)話佢05年係何福堂書院參加過校友表演,真係無諗過李龍基係我師兄...

從佢講電話時覺得好似邊度聽過呢把聲,望一望就認到佢"遙控模型-李龍基".無再點唱歌既佢,曾經出過本遙控模型書,從佢口中估佢而家應該從事幕後live band既音效,提過黃金海岸呢個地方.

無懼風浪,李先生不斷轉變黎係社會求存,真係不愧為"男子漢"!

ps:多謝阿潘鼎力既技術支援同建議,多謝大家既安慰,我會振作,"男子漢"嘛~

阿森一族

今日租咗隻simpson電影黎同台灣女生一齊睇,失意時睇吓笑片黎調劑吓嘛~

記得細個時都會係world台睇simpson,貪佢夠癲同搞笑,但基於要同屋企人爭電視,所以唔係集集都有睇.

今次既電影係講環保,內容用咗好多真實生活既元素做笑料,好似spider pig,州長做總統.....睇完齣戲,笑多咗,心情好咗啲,尤其係出字幕時一句叫人去死既獨特對白

"我唔相信自殺係一種解脱,但係你想試的話,我會幾開心"

邊有人咁鬼衰o架?

我想哭但是哭不出來

距離上星期五家中被爆竊個晚,巳過了兩天,但我既心情並未平復.每次番到屋企,就諗番起當晚既情況,很糟糕.....

我廿幾三十歲人,無咩特別富裕既日子.打工既歲月,每一分每一毫都係努力得番黎,無橫財命,無投資緣.預科時代已經要邊掙錢番屋企,幫補恙病既老頭子.

入行係搵到隱定既收入,但都對屋企負責,無咩特別揮霍.最近家逢巨變,看清家人既面目,好心傷,搬出黎住.

結婚擺酒事宜,好似要偷偷摸摸咁,為咗迴避老媽既煩擾,實在不是味兒,兼且難為台灣女生(小妻).

本來諗住兩口子,好好的生活,點知俾賊人入屋爆竊,見證我同人家係關島行禮既結婚介子没有了,我送俾人家既seabird手鍊没有了(當我揀呢條鍊,係因為上面有一對海鳥,令我諗起"燕"),原本溫暖既家,變得無安全感,令人家受驚同損失.

門鎖好,窗鎖好,但一旦俾惡人揀上,一切都變得無用.窗被撬開,鋁條被剪斷,窗花被撬破.好人有好報嗎?定係殺人放火金腰帶,收橋鋪路無屍骸?屋企出事時,我仲要係工作崗位照顧客人,受客人無理既對待(粗言穢語,俾人X).

呢幾日我都好想喊,但總係喊唔出,大個仔嘛,無謂要身邊女人難受嘛.自己都唔鎮定,點可以令身邊女人安心?我無同老頭子講呢件事,唔想佢擔心,只要佢以為我身活安好就行了.我無同外母提及,因為唔想佢覺得我呢個女婿無用,令千金食驚風散....

等價交換,真係可能只能係動畫上找到,一分耕耘一分收穫,好可能只能係勵志電影裡搵到.

身邊朋友話"人無事就好了",無錯人係安好,但仍要忍痛面對往後既路.之前我跌車既痛,已經不再係痛,痛既定義已有新既定位.

平時不太溫柔既我,原來係咁著意呢對"小玩意".俾人口花花感覺既我,原來都有多愁善感既一面.

路仍要行,保安要加成點呢?搬屋好嘛?拜神好嗎?(但我覺得要拜神至會有好日子過的話,人生真係好糟糕同無意思)好多好多問號係腦海裡流動著.

好多謝朋友們既慰問,但我確實需要一點時間去調整.對唔住喔,台灣女生,不能好好的給你穏妥既生活.如果可以再來一次的話,希望可以給你童話味多一點的生活~~

中型崇真聖誕聚會

今晚約咗崇真書友黎我屋企搞聖誕大食會,雖然發生咗啲事,但都如期搞聚會.

隻火雞同蒜蓉包係Delifranc訂好,只係四點多啲到市中心攞貨.元氣壽司外賣由楝哥負責,而oscar就去咗pizza hut買焗飯同意粉.我同台灣女生買埋飲品,就一眾人打的士番場地,中途仲係輕鐵站兜埋wing fung添~

今次都算係中型聚會,係因為七子之中有五個出席,合照就當然少不了~今次打機係rabbit party,因為上次仲玩剩好多mini game,大家又玩又笑,唔知多啲陽氣會否令家宅平安啲呢?

食完飯,打多陣機,中途要去女友家食飯既wing fung歸隊,一齊鋤咗陣D.等楝哥訓醒後,就開始麻雀耍樂,唔識玩既我當然係做茶水啦~希望大家都盡而回,聖誕快樂.

心情確實未能平復,精神指數(機械人大戰)仲係見紅,未能使出任何指令..........

ps:多謝人家分火雞,好在隨盒附送切火雞既刀叉,同埋靚靚膠杯~

我的聖誕準備

今晚留夜同台灣女生一齊包禮物,因為趕住聽日番工時開始送俾朋友仔.其實每年我都會揀禮物俾身邊既朋友,一黎大家開心吓,二黎係我好多時都唔記得朋友們既生日(我記數字好弱),所以聖誕會送番份禮物.

以往都係用包裹紙黎包禮物,環保啲嘛,今年就用唔愛既city super食譜黎包.今年仲有樣唔同既就係人家有份揀禮物同一齊包,最後就係所有禮物係送出前被放係屋企既聖誕樹下.

其實想送既朋友仲有,只係諗唔到買啲咩野好,你知啦,唔啱心水,盞屋企多件雜物嘛.最早個份禮物係十月個陣已經買定,好有誠意o架

好希望有一年既聖誕,可以揀齊晒啱朋友心水既禮物,一次送出去俾大家.

上會日

今日同台灣女生係吉之島逛,先去元氣申請元氣咭,跟住人家話要去鴻福堂買涼茶.

點知姐仔話買coupon抵啲,原價錢192coupon(12支涼茶,1$6X12)只賣$160,再送你飲手頭上既涼茶,變相係$160有13支($13@),感覺好似又做member咁..........

跟住我地去delifrance訂火雞,姐仔叫我地坐低慢慢睇個menu.正當我地決定訂一只火雞加一盤芝士蒜蓉包時(咁既組合只可以隻火雞平一舊水),姐仔提出$450有$500coupon既優惠,仲可以即用添.聽落又真係幾抵,於是又買咗叠coupon,變相又係入會.......

隨coupon附送一對咖啡杯,都幾靚既,一下子又多咗兩隻"士啤"杯,客人黎坐都唔怕無杯用~~再有兩張九折咭,滿$25就可使用,張咭都幾醒神~~

唔知係咪各間公司都係趁年尾搞優惠,催谷銷情同營業額呢?

小型崇真聚會

今日好難得係放假,遇著星期日,最好就係搵平時番正常工既崇真書友~~

人腳好唔齊,只係得oscar同楝哥到,+/-既david最終係無到,教練同"常平之友"都係行踪不明......由於約得太急,所以無搵鎮守荃灣既wing fung.

大家一齊打吓機,聚吓傾吓都幾好,有啲彌補番細個無得叫朋友上自己屋企打機既感覺.今日主打既遊戲係MARIO & SONIC奧運,以及RABBIDS PARTY2,當然係一大堆胡鬧同亙相比拼既場面啦~~~

本人比較覺今集既rabbids party比上一集好玩,起碼到明係出trip去世界各地玩各式迷你遊戲,節奏較為明快.

做開gym既楝哥,當然要一顯動感既一面啦,自薦玩Wii SPORT既boxing.呢拳快到我部儍瓜機只可以捕捉到個殘像,勁!!!其實之前一局楝哥已經要我陪佢玩,結果我就做咗人肉沙包..........

夜晚個餐,我地叫kfc外賣,係fan咭既關照下,可享有九折,但無野送.約七點鐘,我地坐底,邊食家鄉雞,邊飲紅酒,傾吓開心事,鬧吓不快事.三條友飲咗兩支紅酒.

其間玩估我幼稚園畢業相裡面,邊個係我,但兩位參賽者都估錯.其實楝哥最初係估中,但見到輸個位要飲芝華仕就打亂陣腳.最後以老虎機黎定最後勝負.經過多個回合,楝哥以"777"jackpot勝出~~~不過oscar都只係罰飲少少啫(10ml).

好開心老朋友可以維繫至今,大家一齊分享開心同失意,崇真七子,永遠都係同氣連枝!

給台灣女生的聖誕禮物(即興之想)

今日同台灣女生出咗去大角咀間安定,一心幫我個頭盔配番塊風鏡.途中經過人家以前讀過既小學,於是影番張相黎懷緬吓.

去到安定,拎出負傷既yamaha YJ-5頭盔,點知姐仔話無晒呢款既風鏡,之前都仲話有,係咁快賣咗呀?跟住姐仔又摷一輪,搵咗塊深荼色既風鏡(夜晚睇野會無咁清,我平時都係用淺茶鏡),結果當然係無要到啦....

為咗解決嚴重受阻既運輸網絡,我地進行plan b,搭2E巴士去土瓜灣既"車迷城"睇SHOEI既頭盔.之前係網上巳經睇中咗款J-STYLE頭盔(polaris拉花),只係覺得價錢較貴(43500円).坐咗半個鐘車左右,就到車迷城.無想像中咁多啱心水既野賣,shoei既open face頭盔都唔太多款同size,只係親眼目睹睇中個款頭盔既拉花,試戴過係要加大碼至啱,但無貨......

事態嚴重,plan C推出,搭小巴去旺角,再行番去相熟花墟既"加利".一樣都係無加大碼,要二三月至番到貨,但係店內見到個同系列既頭盔,但係女性化既拉花Amo,人家見到就係咁望住.店鋪職員話有人家既size,人家試戴過,照埋鏡都話靚,於是就將計就計,人家戴新頭盔,我就繼續用住人家專用既YJ5先,遲啲再黎睇吓等08新拉花定係訂polaris.出鋪頭門口時就同人家講"就當係聖禮物啦,聖誔快樂",不過呢份禮物等唔到boxing day拆,因為聽日就要投入服務.

番入屯門係大戶人家食過九點半後打邊爐,就搭車番屋企,人家好心急咁將盒頭盔,放係客廳既迷你聖誕樹下~~

無幾耐,人家又忍唔住,拎個新頭盔出黎影吓相,後尾枕既蝴蝶拉花合晒人家既口味.睇真啲個盒底同頭盔內既貼紙先知係日本制,唔怪得貴咁多啦.懷疑係老闆娘既老闆娘好好人,計平咗幾十蚊,仲送多咗個頭盔袋俾我地(只因為我提出想將原身淺灰色換個深色既),感動~

之後人家乖乖咁放番個頭盔入箱,再放係聖誕樹下過夜.計埋隻"雲之彼端.約定的地方"DVD,同埋懷疑係香檳杯既FRANCfranc禮品,總共有三份禮物放係聖誕樹下LU~

PS:SHOEI係近代幪面超人主角既頭盔品牌,由BLACK時期至今都係.SHOEI頭盔加SUZUKI電單車,正正係BLACK主角-南 光太郎既配搭~~

http://jp.shoei.com/products/ja/helmet_detail.php?id=18

NEW YORK CAFE

傍晚係金都既幸褔宣言攞咗啲standard相(家俊既作品),跟住就行去旺角既東瀛遊攞機票同參考資料.我同台灣女生都好攰,一個放兩點幾,一個放三點,但時間又半天吊,食飯又太早,唯有搭車番入屯門先.突然醒起之前行過元朗田中附近既一間美式餐廳,於是搭68x去試吓.

七點多啲就入到餐廳,姐仔問我地有無訂枱.雖然我地答無,但都仲有兩張枱俾我地楝.咁細間鋪都要訂位?唔通每日既食物存量唔多?之前我行過時見門口有幾張露天枱,但今次唔見有人坐.餐廳裡有吧枱,令我有一份親切感~

哥仔放底menu時同我地講今日既special有青口,煎鵝肝,阿拉斯加蟹腳(300g),睇黎我真係少看咗呢間餐廳喔.........一個普過既set dinner約七八十蚊,但怕份量唔夠,會食唔飽.望到一個海鮮晚餐($188),餐湯+芝士焗生蠔+老虎蝦+T骨扒/美國帶子/4oz牛柳+飲品.我同人家都好想試芝士焗生蠔同老虎蝦,所以都揀咗呢個一餐,一個要牛柳,一個要帶子.

由於太肚餓,無時間影小食麵包棒條(少係餐廳食,大鄉里...)平時係餐廳飲到既南瓜湯都係呈糊狀,但呢度既南瓜湯就,好滑, 夠味之餘,一啲都唔鹹.平時唔太好南瓜湯既我都舀到刮碗底咁滯~~

期待既芝士焗生蠔,好香口,食落去至發覺熱辣辣既芝士層下,生蠔仲似係生生地咁,唔係想像中會熟晒,保留到生蠔既鮮滑口感~~

主菜上碟擺位精緻,雖然帶子得兩粒,但勝在食唔出雪藏味,口感唔錯~~(配菜有茄子同薯蓉)

4oz六成熟既牛柳,好多肉汁,一啲都唔韌同黐牙,美味~絶非扒王之王同珊瑚堡既貨色!!怕醒怕韌既人家都食得津津有味~~

雖然餐牌無寫,但我同人家每人都有一份甜品,好在無另外叫芝士蛋啫~一上枱,人家就揀咗件new york cheese cake,食落有啲香蕉味,我唔太好,但人家就好受落.

我就食剩低既tiramisu,覺得好過市中心italian tomato既tiramisu,自家制品,夠誠意同水準.

最後cappuccino一冷一熱,我同人家好滿足.侍應生服務態度好好,不時問啲野食有無問題.係食都主菜時,我同哥仔講"好好食",哥仔就笑住咁話"thank you".出到門口至發覺門外既露天枱座,己經坐滿客人,連外國人都幫襯,有啲客人仲帶埋狗仔黎添.

我同人家都一致贊成要再黎光顧~~

ps:中途發生小插曲,話說侍應哥仔接聽電話,跟住對電話另一邊既客人話"我地無外賣o架喎",呢句話令全場既人都望向哥仔.可能大家都好[愕然點會有人打黎叫外賣o架?當呢間係茶餐廳?

"鞋之宝"玩具

細個睇電視時,變形金剛玩具係由"孩之寶"玩具廠代理.較早前TOMY TAKARA出既sport label變形金剛玩具就變波鞋.係香港正貨一直被炒高,所以唔係個個都捨得帶佢番屋企,祖國牌可能係你另一個選擇~

包裝精美,成個鞋盒咁,內附說明書,變形唔洗盲摸摸.就算玩到鬆晒,變番隻鞋仔做擺設都幾盞鬼~多謝晒有心既兄弟~