租車

今日放假,同台灣女生係屋企食過微波爐飯盒午餐,一齊出門口.人家去搭輕鐵番工,我就上小巴再轉260x出去紅磡火車站~

事源之前聯絡開個間租車公司無開單,唔洗落訂,方便到得人驚,有啲兒戲.上埋個up dup網睇過架車,真係好似灰得滯.咁啱人家係緍紗雜誌剪咗張銀禧租車公司既$500cuopon,於是決定改用呢間.

係火車站行咗個大圈都唔見間舖,於是問其中一間舖既職員,得知位置.行到埋去,見係一間俾外地遊客租車既公司.半信半疑咁問,原來又真係呢度喎~~

原價$1080三個鐘,其後每個鐘$300,8隻蝴蝶結既裝飾加$50.扣除coupon,四個鐘收$930.見佢咁大間舖,又多外國人幫襯,兼且貼住2006年服務大奬,信心大增~~

搞好手續同俾錢,入番屯門,係新壚師傅既公司俾帖.懶得煮一人前既飯,於是係吉野家食咗個下午茶細牛飯(五點左右).打電話約大姐俾帖,搭西鐵去兆康輕鐵站上615交收.

由於太累,於是係客廳訓咗陣,跟住就繼續邊諗邊打擺酒當日既流程表,為大日子努力~~

賓客禮物

番完夜班,訓醒好趕咁同小星星係市中心惠比壽食晏後(14:05出門,14:30落order,15:00走人),就搭60m巴士出荃灣,再轉235巴士去葵涌工廠區攞送俾賓客既小禮品.

跟據Emily既指引,以及好心路人既提點,好容易就去到工業區個條街(四點鐘左右),但望云都無卡片上店舖既名牌.情急之下,走去一個企係一座商業大厦外既保安員,詢問卡片上既地址,點知哥仔話"呢度咪係囉",搞到我有啲儍仔添.......

攬住個大箱,孭住個細箱,走去路口見有小巴落荃灣,立即追上車(慳番的士錢).係千色落車,原地等68A車入屯門(實在有啲重,唔方便拎住黎行街嘛~)

台灣女生番到屋企門口至知無帶鎖匙(咁都有...),於是搭番小巴出市中心同我會合,一齊搭的士番屋企.

放低兩箱貨係士多房,坐多陣就再截的士去西鐵站,跟住係美孚轉地鐵.係旺角站俾帖Ben弟同Sam妹,傾多陣我地就繼續搭車去油蔴地站,因為要去百老滙電影中心換生日月份既免費戲飛代用劵(vip member之福利)~

每次係油蔴地站,望到地板既色調,就諗起好多以前細個以及屋企既野,因為個陣好多時出黎探阿婆阿公.雖然設備同牆壁都更新咗,唯有地板係咁多年無變.....

夜晚同人家係朗豪坊既元氣食壽司,香滑既燉蛋就當然係必食啦~

時令特色刺身-北海道 帆立貝,口感唔錯,但味道較清淡,加啲檸檬汁會好啲~

又完成多一個項目,擺酒事宜又跨前一步啦,希望一切都會順順利利啦.

PS:今日第一日用新機NOKIA 6500S,雖然功能比6270好,但需要時間適應較細既體積同鍵盤.如果6500S既不锈鋼外殼可以包到機頂同底就更好(6270),因為PLASTIC位會易刮花同撞崩.

突破十二"工"!

晏晝更放工後,騎羊番屋企攞頭盔去市中心會合台灣女生.行咗陣同係吉之島超市買咗啲野,就騎番屋企.

今日係我完成連續返十二日工既大日子,卒之聽日係放假,攰到有啲似星矢打完十二宫咁........(所有小宇宙都燒盡)人地話五天工作週,我就十二天工作週(番埋一次a/n),因為上星期一放假,而今個星期係sunday放假,撞正難得一見既"闊銀幕佈局".....

輪班同工種既問題,實在好難有五天工作週,除非有足夠既manpower,如果唔係就只會削減平日番工既人手,苦了自己人.

係呢段時間,我連朝早起身送人家番工既力氣都無,要人家一個人朝早孤身上路,真係難為晒.....

GHOST SQUAD

今日番完早更之後,搭輕鐵去市中心還碟,再上巴士出旺角,一心去換領信用咭積分禮品(我最愛既油劵).

點知係車上望多次張換領信時,發覺原來打錯咗話我係換百老滙戲院禮劵,當初拆信時無咩點留意添,大過腦定添....... 於是立即打電話去換領中心問可唔可以照換油劵,因為所需積分係一樣,但職員要我先知會card center先.打埋去card cernter問,最後都可以唔洗白行一趙,真係好彩.

今日換領中心無咁多人,可能係閒日兼仲未係放工時間卦..係櫃台搵番謝小姐(card center叫我搵佢搞),變相唔洗排隊,但都要等一陣至攞到貨.今次無晒$100個款,變咗攞四張$50既油劵走人~~

跟住行去好景同信和望吓隻GHOST SQUAD幾錢,最貴$460至最平$420.雖然我玩得唔叻,但都幾鍾意射擊game(好似打war game咁),今次隻game有wii zapper既box set賣,市面無得單買支原廠槍架,所以我都好心咁買.(最後係信和三樓成功以$420購入)

為咗同台灣女生一齊玩,所以要買多支大陸雜廠出既槍架,以$60係好景購入(最貴見過賣$88).經過一輪格價,game set加spare槍架,共慳$68

隻game都幾ok,真係好似玩街機咁既feel.原廠槍架真係正好多,手感一流,完全收納電線,手指制順滑;雜廠槍架就電線外露,兼且二合一設計好易玩玩吓支槍自行解體,手指制好大阻力,回彈動作又慢(令你無法快速再扣制發彈),一個字"雞"!

射擊game都係比較唔太耐玩,但ghost squad引入追加路線,武器同服飾,相信都會好啲既,起碼唔會狂cont打爆一次就掉埋一邊.另外有朋友黎一齊打搞笑party mode都得,有多兩個制仲可以四人同戰添~~

ps:期待十一月份出既biohardzard連wii zapper既box set,到就可以有齊兩支正槍啦~

http://www.sega-ghostsquad.com/wii/home.html

可愛的蕉皮

今晚番完晏晝更,騎羊去市中心,諗住買件蛋糕俾台灣女生聽朝放工食,點知賣晒,於是去超市補吓貨,捧住一大袋野飲同野食走.

行去同羊仔會合時,經過一個精品檔(G2000對開)見到呢個好搞笑既門塞~

之前同人家係CITY SUPER見到賣$168,而家係新界西既吉之島小型檔攤賣$28,真係平好多!!攞上手睇落都真係連個包裝都一模一樣,就算當係A貨都好丫~~反正都係門塞一個啫~~

經過測試後,呢個蕉皮門塞比之前買既掂好多,就算你點又拉又推都chok唔開佢,反而之前買既款式就chok幾chok就會鬆脫.
生活細節上多點情趣,人都會開心啲,留係屋企都會輕鬆啲~

老豆的新手機

尋日放工就去市中心smartone幫老豆攞部0機價既nokia6288,因為之前無現貨,所以落咗訂留貨.

叉爆舊電,今日入番盒交俾老豆.交收地點係老豆覆診既acc,我本來諗住等到陪佢入去見醫生,問吓做OT既細項.由於今日睇得太慢,等到四點九都仲係睇緊三點三既症(老豆既appt係四點正),於是我就走先,免得阻礙工作.

從老豆口中得知佢其實係屋企都係唔開心,俾老媽欺侮,忍氣吞聲...安慰同承諾都俾過老人家,希望佢真係可以想通一點同為自己打算吓,"無人話過人年紀大同有病就要唔開心咁過",點解唔令自己仲有既時間過得開心啲呢?

收過老豆幫我收起既信,見到有張老媽寫既生日咭,我叫老豆掉番係我房枱頭好了,我唔想收.老媽話過生少個o架嘛,要俾咪燒俾我囉.老豆怕打回頭後,老媽更加嘈,於是係我面前幫我打開同撕爛佢了事....老媽對我既難聽說話並無因為我既出走而減少,老媽更剿我房啲野,更將我啲私人野攞出黎歪曲,說三道四,我真的很失望同難過....

六點左右收到老豆既電話,話個OT要排到年半後,代睇既醫生既態度愛理不理咁.明白既,代睇之嘛,趕收工嘛~~
開心:見到老豆,可以開解老人家
擔心:老豆既病程
痛心:老豆既境況

AIDA

今晚同台灣女生行係city super既food court食咗個日式晚餐,行多陣就趕去文化中心大劇院,睇歌劇"阿伊達".

臨近七點半開場,大家都急急腳咁入場搵位坐.呢次係我第二次睇歌劇,之前個次都係中學時期同師傅睇"孤星淚"LIVE既舞台表演,同LIVE既音樂演奏,又真係特別啲既,一TAKE過無得NG嘛.

人家當然有同法老像影番張相先至入場啦~本來諗住趁開場前用相機影吓個台,點知俾職員姐姐阻止......

故事好簡單,講女主角係異國當俘虜時愛上咗一位將軍(男主角),之後女主角既父王為救女主角,帶軍入侵落敗.淪為俘虜既父王,哄女主角引男主角講出軍事秘密黎作反擊,點知東窗事發,男主角為救女主角,阻止捉拿女主角既士兵,並向祭師自首,落得叛國罪名.最後女主角潛入墓穴,陪男主角一齊被關係墓穴,等待死亡,永不分離.....

雖然唱意大利文,但有中英文字幕,唔會睇到烏sir sir.可能係啲歌唔太好聽,所以投入度不大,但有幾幕場面真係幾熱鬧既.佈景無小册子上既咁壯觀,有少少失望......

中場休息時間同人家出去睇有無野飲賣,點知見到有個臨時既bar枱,飲品選擇唔多,除咗橙汁,法國礦泉水,其他都係酒類,我當然係飲番杯紅酒啦($30)~~排完隊,攞得杯野飲黎,就聽到廣播話仲有三分鐘就開場,我同人家都係急急咁飲晒手上既飲品(人家飲橙汁$18)....

睇完晒三個鐘既歌劇,我同人家既評分都係一般,~70分,相信啲歌唔太吸引係一大主因.不過又真係無諗過會有咁多人黎睇,唔通個劇團係好出名??

行番去PARKLANE搭巴士時,見到呢塊巴士站廣告牌覺得好鬼掂,尤其係箱裡有流水同會郁既蟹鉗~~(又諗番係夜上海個餐添...)
PS:晏晝同德輝上咗哥頓新居幫手鑽窿,之前仲係茶餐廳一齊食啲野同去揀吸塵機.男士之間既約會,永會都係咁爽~

hero

今晚返夜班時,望到三色台播hero劇場版,諗番起之前係三色台睇既hero係我yr3時,逢星期六晚播.

個排心情處於低潮,感情同工作都不如意,唯一既寄託就係係quarter睇hero.

主角久利生公平,給人一種懶洋洋同愛理不理既感覺,但其實暗地裡係一個做事認真又樂於助人既男子漢.樂天既性格(船到橋頭自然直),波折又搞鬼既劇情,為我當時枯燥既生活帶來了點支持.

後繼機體

最近自己部電話又開始short short地,突然斷線,出"sim card registration failed"字樣;熄咗機之後個鐘會時間停頓,夜晚熄機,日頭開機時都係出番夜晚臨off時既晚黑時間....保養期又過咗,睇黎係時候搵定部後繼機體~

自從用過而家手頭既6270,就真係愛上咗金屬外殼既手感,以及推蓋式既機身設計~一黎個殼無咁爆裂;二黎我隻手大,大粒制同大screen會合我心意!呢部新機6500s就合晒我既要求,仲要係佢有320萬像數既蔡司鏡頭,第時放上blog啲相會靚啲嘛,哈哈.

真係佢想快啲有得賣,之前睇雜誌話今年第四季推出,nokia個網都只係話即將推出,萬分期待~~~~

ps:希望我部6270可以挨到trade in啦

過大禮

今日我同台灣女生搭的士去外母大人屋企過大禮,臨上門之前係街市買咗兩個果籃.上到人家屋企,就進行大禮交收程序,再攤開晒啲野,set埋個腳架,影番張大合照~~

其實我地都係跟元朗西鐵站間禮品店個事頭婆既指引黎買齊呢個簡易過大禮套餐,仲順便買埋茶壺,紅傘同cushion.價錢都比其他店鋪平,可係網上公司既關係,佢只係幫手合作借地方俾啲客開單同交收,順便吸引客人睇自己店入既貨,以達致win win雙贏~

係市中心飲完茶之後,我地搭巴士出去上環既西區街市三樓既global wedding新舖.因為關島既相真係唔太對路,好多相既colour tone都係較灰暗(無理由一樣係chapel內影既色調會相差咁遠).經過一輪交涉,成功令該店為10張相(全36張)重新調色同更換入相簿..

雖然話事人聲稱係執相既temp job哥仔無交帶,所以導致今次是故,但本人覺得hold唔住有能力既職員,不完善既管理以及愛理不理既待客態度,實在係失敗.只要佢地肯俾多啲誠意,一定可以做得更好,起碼唔洗要個客主動問進度,兼且無了期咁dum時間...

唔睇呢塊牌都唔知呢度係有一百年歷史,而前係賣菜賣肉既街市,而家就係集食店同布店,同精品店於一身.

外觀仲係保存得幾好,每次見到啲具代表性既歷史建築野都會覺得佢地真係香港既重要部份,想佢地可以好好咁被保存,好讓小朋友有多啲地方去同故事聽~

兜完蘇豪區,發覺舊年幫親個間英式餐廳已經轉手,再無機會食英倫生蠔lu....見無咩心水啱食,走番落去幫親間日式食店.

比較特別既係呢客藍芝士雞翼,酥脆既雞翼,醮上流質狀既芝士味道唔錯~

另外呢客軟殼蟹天婦羅,睇落無咩特外,但咬落去發覺好多蟹肉又夠味,有啲意料之外~

省城食飯真係貴啲,未夠飽,於是行去IFC既PACIFIC COFFEE同人家一人一杯咖啡同分件TIRAMISU食.可能之前係上環行去中環再上蘇豪,行得太耐,又上又落,所以都坐咗一陣先至去搭巴士番屋企~

PS:放假真係好....

戰鬪妖精雪風

今晚卒之都睇埋剩低個兩集"戰鬥妖精雪風"(全5集),雖然係較難明,但畫面同機械設定就真係一絶~~~型呀~~~~~~

主角深井 零同戰機"雪風"有著共生既關係,有啲似cyber formula提及既人與機械融合concept.

最難忘既場面有第一集既水平式180度轉向,再以機槍狂掃尾隨既外星導彈,臨爆前掉頭走人.另外一幕就係最後一集,大撤離時,雪風突然遙控裝有核彈既三架無人戰機,主角零控制雪風之餘,再帶住三架無人機(好似打機"沙羅曼蛇",一架機陀住三個細佬黎揪咁),為大軍打出個缺口,最後準確無誤咁引爆三架無人機上面既核彈黎破壞連接外星fairy同地球既空間隧道.

成套動畫既氣氛同配樂都唔錯,不過就真係要細心留意啲對白,因為廖廖數句已交代好幾個重點(我有時都要倒play睇番.....).畫功真係好靚,每一個pause都可以當係睇緊一幅彩畫~~

ps:主角同我都係鍾意飲budweiser0架~

http://www.faf.jp/index.html

黃曾聯婚

今日係德輝既大喜日子,睇到呢張相都知係結婚飯局啦~~

我同台灣女生搭西鐵到元朗站既囍慶,亦即係五月份適巍師兄擺酒既地方.

圍村人愛熱鬧,擺酒都一樣,今晚足有三十張枱,包全場. 全晚最盞鬼既項目(玩新郎),莫過於身穿禮服既新郎哥著住住條紅色孖煙囪,跑到台下搵各寳客幫手,用marker寫上祝福子句,仲要係限定時間內完成,真係刻不緩......

當新郎哥走到我地個枱時,就叫我幫佢寫,係男mc既提議下,我就係"傳說中既1%"地方寫上"甜甜蜜蜜".當我執筆寫字時,新郎哥好肉緊咁同我講"屍油,咪咁大力呀,仲要用o架!"我梗係就住新郎哥啦,平時字形不佳既我,小心奕奕咁寫,驚大家睇唔出我寫咩嘛~~~(後黎有人寫上"年生貴子","一柱擎天","勁"....)

咁啱尋日就係我地pdn3班既開學日,咁又識咗九年,當然要一齊影番張相啦~~

點都要講多句:祝一對新人,甜甜蜜蜜,心心相印~~~

happy birthday to 台灣女生

今日係台灣女生既牛一,我地同伯母係市中心美心皇宫飲茶,跟住就出咗去尖沙咀行香港藝術館,睇吓大英博館藏珍展"世界文明瑰寶".

仲以為大會紀念品酒神磁貼會一早派晒,但點知又仲有得派,仲要係大把貨個隻~一一睇過晒242件展品,最煞風景係有一團人跟住個講解員係度四圍睇展品,成三十人圍埋一齊,好妨礙其他入場人仕.加上個講解員,講野大大聲,又好似榕樹頭講故咁....同藝術館有點格格不入.....人家話佢係館內職員,但我就覺得唔係.因為館內有旁解耳機供入場人仕租用,只要輸入展品號碼,就可以從耳機聽到有關歷史.

 

夜晚我同人家去咗馬可孛羅既夜上海食尚選大閘蟹餐做晚飯,雖然我地早咗到(book八點枱,但六點半就到),但都可以照入座~其實之前我地諗住去中環食奧地利菜,但係飲茶時,人家見到雜誌上介紹大閘蟹既版面,覺得好吸引,於是臨時轉計劃,打電話去留位

~~

前菜拼盤:脆皮素鵝,太雕醉雞,蒜茸脆青瓜,水晶肴肉,海蜇十八鮮.隻碟有啲似美術科用既水彩碟咁.

接住落黎,就係蟹粉釀蟹蓋,見佢上碟個款好掂,食落就仲覺得掂,蟹同蟹粉之間有好似賽磅蟹咁既蛋白,口感同味道唔錯~~

呢道就係重頭戲,蟹粉大生翅~~雜誌介紹話啲散翅足一両二!華麗!太感動了~

主菜大閘蟹出場,據講係有六両重架.佢既腳真係有以拆出蟹棒架,可想而知隻蟹幾咁肥味多肉.其實之前侍仔用盤托出兩隻蟹出黎俾我地過目,再攞入去煮.當送上枱時,哥仔話幫我地拆開先,跟住就係另一張枱,戴住手套用剪刀除去腹蓋同口器,拆開蟹蓋再除去腮,跟住剪開蟹身一半,最後砌番埋一隻蟹黎上碟~~勁~~

食完蟹之後,可能因為人多既關係,突然停咗上菜,只係上咗杯生薑茶俾我地驅寒.望吓錶,嘩,就黎八點,於是同侍仔講我地趕住八點五走人,想催吓厨房,無幾耐呢碟蟹粉蝦仁炒粉皮.望落去好似無咩特別,但係啲蝦仁,細細粒,數量又多,食落真係幾似食炒飯咁,口感特別,又飽肚(唔怪得個餐係無炒飯啦)~

尾段既鮮冬筍豆苗,簡簡單單,純粹清腸胃之作.

壓軸既係蟹粉小籠包,一人一隻,大家都成咁無穿無爛咁夾起黎品嚐~

由於趧時間,我地叫侍仔將甜品高力豆沙香蕉打包,食埋個果盆就埋單走人,趕下一場~

就係去隔離既太空館睇全天域電影"深海奇趣遊"(去藝術館之前就係太空館買定飛),人家最鍾意睇呢啲海洋生物節目,雖然每當要佢親手掂動物時就會大叫......無咩特別既準備同心思既禮物,希望人家唔會見怪啦~~~happy birthday!

cell division 28th anniversary

今日係我由一個合子(zygote)起經歷咗廿八年細胞分裂既日子,起身當然要飲番盒相熟品牌既低脂朱古力奶黎賀吓啦~

食過台灣女生煮既晏晝粉麵餐,動手拆客廳既簾窗,放入洗衣機清洗(半年無洗..),再係屋內同外抺窗.抺乾淨晒就坐係sofa隔門窗望下羊仔~

夜晚同人家去田中食晚飯,出奇地唔洗等好耐.雖然門口有唔少人等緊,但姐仔叫我地劃定想食咩,跟住就帶我地入座,lucky!

我地叫咗帶子,三文魚同甜蝦刺身,美國生蠔,同埋什錦天婦羅(都係惠比壽好食啲),做生日嘛,當然要豐富啲啦~

埋單時,人家帶唔夠錢,要我"典"住先,事後再"禁"番錢過我.....睇黎"你以前都唔係咁對我"呢句說話不再係女生既專利~~

半個鐘左右就食完呢個生日晚餐,跟住我地係元朗既up dump影視店買咗"雪風"一套三隻dvd($39@)同美色饑饉40($59).之前都想買"雪風",見太貴所以無買,今次真係超值~~

今年生日過得好平靜,希望往後既生日都有人家陪住啦.多謝人家送既運動手錶,雖然之前早就估中咗,但都多謝呢份心意.只好怪我直覺太強,令你俾唔到一份驚喜過我,hehehhe~~

ps:楝哥,我同你一人一隻情侣錶丫~~~

望穿秋水

前陣子,市中心既許留山圍晒板,以為唔會再開番.點知今晚行過時,見新鋪裝修好,再度開張,我同人家當然去幫襯吓啦(金撈爽x2)~

望番對面,原來之前關門大吉既元氣壽司都會係舊址,都將會開番間元氣,太好啦~~

你知啦,佢地既燉蛋真係又滑又好味o架嘛~~

以前既牆身鋪名仲係度,唔知會唔會繼續用番呢?當初佢地關門時,話會再開番,卒之都等到啦......

之前傍時份同台灣女生及其他同事去咗屏山食盆菜,又可以一齊坐低食吓嘢兼聚吓,都幾好丫~又一年啦,希望大家都係身體健康,生活愉快~

ps:放工後,雞脾坐我羊尾去我屋企一齊打Wii黎等食盤集合時間,大家玩到又叫又笑~~(有啲諗番起係市中心住時,大力仔同雞脾上黎打ps2鐵拳既胡鬧場面)