太殘忍了,廿年後的真相...

今朝卒之都拆開盒爆龍黎試玩變型,係1990年tvb播既<<忍者戰士飛影>>,爆龍好少會同飛影合體做海魔.超合金魂GX-56有一塊外型重視既假飛影機芯殼嵌入,重現動畫既外觀.

但係嵌番可變型飛影入去,就發覺機芯細咗好多,當堂無咁英偉.......

大家以機械人黎拼吓,其實又啱動畫裡既比例0架喎,以假機芯既SIZE黎計,飛影咪同爆龍差唔多大部??只係當年合體時既比例失實咗,再望番上一張相,可變型飛影既機芯size,同平時見開龍腹一節節白色部份都差唔多.唯有咁樣諗,超合金魂既新海魔造型係較真實啦~

ps:今次爆龍既QC比之前黑獅子同雷鳳鷹差,右邊膊頭銀灰色油花咗,雙肩鐳射炮上色出界,右拳頭手背位亦有"砒"位.....

配件齊,主機壞

今日同台灣女生出旺角星際睇相機袋,係尼龍料既百幾蚊貨色,睇到三百蚊既lowepro品牌,最後都係睇中咗$380呢款仿皮箱型韓國品牌既相機袋.

內籠得兩格,一大一細由一塊活動門版分隔,就算大部既單鏡反光機都放得落,放多支鏡都得.我哋部機細兼得一支變焦鏡,人家話再唔係就放銀包電話去細個格,一個袋孭出街就行得.

另外我哋又搵到HAKUBA日本品牌既相機頸帶(中国制),米白色皮帶配啡色尼龍扣帶($280),比PERCY既韓國品牌相宜~

其實買相機袋間舖買埋個氣泵,又係相機頸帶間舖俾SALES哥仔"誘導"我買埋個filter.人家睇得穿我係因為個filter印住"MADE IN JAPAN"至落搭,真係了解我~

可惜造物弄人,當所有"林岑"嘢都配落部相機,係紅磡火車站等人家大學書友一齊去打邊爐時,發現部相機影唔到相,fous到但硬係個shutter唔work

萬念俱灰,試過拆除filter同再裝嵌鏡頭都唔得,唯有聽日去中原再換過部相機(之前已因為相機芒有光點及活動鉸位唔順而換),我幾時做咗sony既QC特派員?

爺孫樂

今日老豆放假,偷時間上黎屋企探幸男,啱晒我用黎試吓部新相機~之前好幾次幸男都係訓晏覺,今次好在佢醒神四圍望,爺爺當然開心啦~

適逄開餐時間,當然俾爺爺落場玩吓啦,"奶筲箕"當然可以一口氣飲晒~

之後同老豆去佢村口茶餐廳食下午茶,佢踩單車,我就騎羊去會合,因為我要去元朗攞預訂既飛影超合金(爆龍+零影).老豆不時係電話睇孫仔既相,我都有用手機SEND相俾佢老人家.

我叫既都係雞翼薯條,而家難搵地方有兩隻雞全翼嘛~

夜晚CHECK信箱時,見到有信俾阿仔.有啲奇怪,我卅歲人除咗銀行信同其他收費信外都無咩收過私人信,佢兩個月人仔都未有都有信收?原來係台灣女生啲同事寄黎既賀卡,多謝晒~

ps:今日除咗飛影第三彈(爆龍+零影)之外($850),見動畫版舊聖衣紫龍出咗($360),忍唔住買埋佢.............

每年既常餐

由第一年結緍週年開始,我就以接新娘既花球黎做禮物,今年已經係第三年啦,依舊係粉紅色鬱金昋~

過往我都係趁台灣女生未訓醒就出去花店攞貨,但今年人家朝早同陪月一齊帶幸男去母嬰健康院,我要係屋企吉之島送貨,無得偷時間出去.唯有等收埋貨,人家地番黎屋企,自己砌詞話騎羊出去補給日用品,用羊仔seat位下既倉仔黎載貨,好在都無被fing到爛(我叫店主幫我用張薄紙包住)~

今年既週年紀念唔再係純二人世界,因為有幸男既加入,我哋邀請外母大人黎屋企幫手湊幸男,而我地就出去荃灣fat angelo's食晚飯,無咩特別節目.

希望人家同我生活得開心,小朋友實在令大家都好攰,加上我又唔係太有體力同魄力既人,耐性又麻麻....

ps:唔知點解我每次去fat angelo's都係會唔舒服無咩胃口食嘢.......

    無諗過食完飯走去千色搭巴士時,撞到阿笙同wing fung坐係街櫈度閑聊聚舊...

同幸男one on one!

今晚台灣女生去大學同學餐飲,我就留守家中負責照顧幸男.由於一個人食飯,主題以簡單為本:一包凱撒沙律,加一小份三文魚剌身,配一支特價精選紅酒.

無火煮食,方便不時招待幸男,停低開奶餵奶都無問題,阿仔飲法國奶粉,老豆就飲法國紅酒~今次支紅酒都幾好,之前係雜誌都見過佢既介紹,評價唔錯.見吉之島特價賣到二百蚊樓下,所以揀咗佢.

其實人家五點左右出門,我就開始吸塵拖地清廁所兼抺門,其間少主都有好幾次訓醒扭計,要走去"應酬"吓佢(換片,餵奶,愛的抱抱),結果我自己都近八點半至食晚飯.

當然人家番到屋企時,我巳經攰到抱住扭喊既幸男,係梳化打横攤係度一齊訓...........

叉滿電,家中試機

新相機舊電叉滿,係屋企試吓影幸男,操吓機.新機影出黎既相,清楚到連少主額頭上既粒粒都見到~

儍瓜機影既就無咁特出,不過幸男"楝"起隻腳既樣都幾搞鬼,塊面同手腳都係肥嘟嘟咁.希新相機可以快啲上手,有諗過刨吓本說明書,但懶睇說明書既惰性依然纏擾住我...........

NEX-3

經過朋友既討論,係CANON G12,NIKON COOLPIX P7000,SONY NEX-3之間,揀咗佢~

大家價錢差唔多,但NEX-3可以有鏡頭換,我出機時就跟變焦鏡,跟PERCY一樣揀白色(因為佢個隻紅色配銀色鏡頭好怪).係中原試機個陣我同台灣女生係咁問sales哥仔有無得平啲,"有咩卡有優惠?","一次過l碌卡可唔可以平啲?","唔愛贈品可唔可以平啲?"試完機臨結數開單時問我哋關於部機有啲咩想問,我哋都係答"有無得平啲?"結果以$4100,包多一粒代用電池收場(唔愛送既相機袋同腳架).

對上個部DC係CANON既 IXUS 860IS,都係07年尾為咗來年一月去北海道 補渡蜜月而買.今次換機都係想幫幸男影吓相,朋友們有叫話出單反機,但我唔想拎住咁大部機出街,孭住個仔,一個奶粉袋,自己一個背囊,仲邊有力氣照顧部單反機......

多謝percy既親身介紹及示範,多謝朋友們既意見,其實我中學預科係攝影學會副會長(掛名-拎住屋企個部富士儍瓜機).當年買相機真係唔平(菲林年代),學生哥又唔多零用錢,所以個學會都幾凋零.而家啲中學生,部電話分分鐘貴過出黎打工既大人~

小歌仔家訪幸男

晏晝我先係大興既卓爾居商場同小歌仔食個下午茶,再用羊仔兜佢去我屋企黎探幸男.我叫佢唔好好似上次去蝴蝶灣咁"那"實晒個扶手位,影響行車平衡,小歌仔話"人包鐵嘛",我答"你那咁實都係人包鐵架咋".....不過今次既車程,小歌仔係比上次進步~

對上一次探出世無耐既幸男,小歌仔要隔住玻璃黎望,今次係第一次佢可以抱住佢黎近望(因為佢就唔到更期黎滿月宴)

影相時幸男個頭突然向前"鐘",嚇得小歌仔叫咗出黎兼用手扶正.由於小歌仔約咗人食晚飯,所以無留佢一齊食,期望下次啦~

PS:同小歌仔傾咗好多嘢,本人好懷念以往放工一齊去跑步既光景

天天長大

幸男一日重過一日,而家比起初出世時,面仔已經肥咗好多,兼有少少雙下巴.無以前咁多"火車軌"諗嘢樣,多咗鄒眉頭,扭計喊樣...

晚夜同台灣女生帶住少主出去市中心食上海嘢,幸男成程車都訓著覺,於是係卡位度放低佢,我就同人家安心食飯.可惜食到一半時佢就醒咗,要餵奶換片(大換),我同人家要輪住抱住黎食.

番到屋企就邀請樓上張小姐一家黎睇bb,兼多謝佢哋既禮物,可惜少主扭計喊,搞到阿妹唔敢抱上手.

PS:食完飯係ICE FIRE買咗呢款羊皮皮褸,雖然無特價,但人家都堅持叫我買,話個款特別(我無好似個MODEL咁著到個肚仔飛出黎),我著咗兩年既人造膠褸又爛咗..

其實我好唔捨得買,一黎無特價($3990),二黎又唔係咩必需品,三黎小朋友又用唔少錢.....不過當襟著啲囉,著到四年的話,都比兩年換一件膠褸好既.舊年都有諗住等二月冬季尾特價(最平近半價)時執平貨,但一係無款,就係無碼....SALE哥仔話今年啲款番貨唔多,我個碼果件己經係LAST一件,希望佢無呃我啦..................

兄弟家訪-二代目

今日晏晝阿潘同yoki兼展諾小朋友黎咗我屋企探望幸男小朋友,因為佢哋就快會搬出去馬鞍山,到時黎家訪就無咁方便就腳~

見阿潘湊展諾時,充滿愛心,又有耐性.例如見展諾搞垃圾桶,潘爸爸就同佢講"唔啱呀,垃圾桶黎用黎扔垃圾,扔完入去就拜拜(揮手)".示範完之後,就俾舊垃圾俾展諾試一次,見成功就讚許.我見到咁既情況,自問真係未必會咁有愛心,可能只係一句"唔可以架,少主".

當年係宿舍鋤書考試,打氣槍,飲酒傾心事,,邊有諗過十二年後,大家會抱住自己既細路一齊影相丫~

阿潘一家今日要走幾場家訪,之後早餐鐵膽percy都有黎家訪由於臨出門口陳公子-jamie疑似食物敏感,與幸男緣慳一面.希望之後可以俾佢哋兩個小朋友打個招呼,話晒都係世交丫~

ps:今日除咗阿潘同yoki既"心意",仲收到percy既"暖意",多謝晒大家~

幸男滿月

幾經波折,今晚全數五圍既彌月宴,卒之都可以係房內擺.因為之前諗住最多都係四圍,點知反應熱烈,要加到五圍,而本身間房又唔夠擺五圍.由於呢日係好日,兼部長睇漏眼,原來迎喜全場擺酒,所以可以走盞既房又唔多.

因為之前食過Ronnie個餐滿月,覺得都幾好食同多嘢食,所以都揀番呢個餐.

肚痛唔舒服既老豆今晚都偷時間,放工黎食孫仔餐滿月.當年結婚個餐食唔成,所以好想呢餐滿月可以彌補一下.

食到中途,無諗過輝bb同leo會P完之後黎同幸男影相,多謝你哋既心意.輝bb好似好鍾意小朋友,一抱上手就話"好得意呀,佢郁呀",台灣女生個枱啲大學書友都不禁話"好假喎~"

除咗肚餓外少主都無扭計喊,每個賓客黎都有抱住佢黎影相,只係頭段漢爺中咗嘔奶彈.主少艷福無邊,俾多個靚女靚媽媽愛的抱抱過.當送完賓客後,就開始大喊起黎,睇黎少主都係鍾意熱鬧~

美中不足係臨走時落雨,上咗架好衰既的士.由於尾箱有bb車同好幾袋禮物,落車時先攞禮物袋,並向司機講話大多嘢,想先入屋放一放低,再出黎攞埋架bb車同太太一齊走.點知個司機發難渣話唔得,又呢樣又個樣,我火滾一次過攞埋架bb車,再好大聲咁直斥佢只係好近啫,又落雨,個女人又要抱住個bb.司機見我會出聲,至話"唔同你講,費事同你嘈"

ps:多謝咁多位賞面黎食餐飯~