轉另一品牌

今日同台灣女生去市中心間KIEHL'S買洗面產品,因為之前用開LOREAL既HYDRA ENERGETIC系列既洗面同保濕,但近一兩年覺得唔多夾(可能年紀大咗),兼且LOREAL亦愈賣愈貴.

見價錢唔係話貴過LOREAL好多,即席有得試用,我當然係搞到成個清手盆邊都係水,始終俾人望住你洗面好似好怪咁.原本諗住簡簡單單咁買兩支黎用就算,但SALE姐姐話無得賴,一定要三支,做齊清洗,爽膚同保濕,結果係人家既勸勉下就範.

由於之前用既係GEL FORM,有少少陰影,所以今次全部都無揀GEL FORM.起初SALE姐姐叫我試用ALCOHOL BASE既爽膚水,但我用過含酒精既AFTER SUN GEL感覺唔太好,皮膚會好乾,所以揀咗支不今酒精既草本爽膚水.SALE姐姐話支草本味道有啲中藥,但我又唔太覺.埋單六百幾,話夠用兩個月,又睇吓到時咩效果至決定去留~

PS:呢次係我人生第一次好似女人咁姿整洗面

BATMAN-THE DARK KNIGHT RISES

今日放假,晏晝同台灣女生去新墟凱都睇"蝙蝠俠之夜神起義" .本來見落雨,一片心係市中心UA睇,但見細院兼無咩位,所以我先去凱都買飛.故事講雙面人死後八年,蝙蝠俠背負所有污名並絶跡於葛咸市,男主角BRUCE WAYNE亦隠居大宅.同樣是出身於影武者聯盟的班恩繼承忍者大師既遺志-清洗葛咸市.,先以襲擊金融交易所黎引蝙蝠復出現身,同時以商業手法令BRUCE破產,無力立足於董事會.

被男主角之商作業對手及班恩利用既貓女郎,誘騙報蝙蝠俠經地下通道直搗班思之巢穴.蝙蝠俠被打至重傷,並被帶往"再生池"監獄,經電視目睹葛咸市落入一片核爆恐慌.最後當然係男主角經奇人治理好傷勢,成功逃離監獄,並返回葛咸市,聯同GORDON局長及當地警方,與大惡人班恩及忍者大師之私生女作生死戰.

今集蝙蝠俠主力渣飛機THE BAT,只係復出時以BAT POD出鏡追逐戲,最後反而係俾貓女郎黎用.美女配電單車,好似MATRIX 2裡,TRINITY騎DUCATI 998,剎食,尤其係我好鍾意BAT POD!其實貓女郎都好突出,一黎樣靚身手好,二黎佢同男主角既曖昧關係亦非常吸引.本來依附強勢既貓女郎被回歸既蝙蝠俠打動內心深處既正義之心,加入反恐運動,並出手相助蝙蝠俠,剷除班恩.

CATWOMAN副超好型,撥上去個時有啲似貓耳,無以前添布頓系列既CATWOMAN造型咁土氣(時代進步嘛),不過唔太知副超有咩功能.....

三部曲最後一集,感覺上係著重於人物關係描繪,動作為次要.話晒都係講八年後,蝙蝠俠已近中年兼且身負多處偒患,如果仲可以打到飛起,反而有啲唔合理.管家對男主角既情同父子,亦令人感動-最想主人可以離開葛咸市,有一位太太相伴,過著平凡又開心既生活.漫畫裡,羅賓一向係蝙蝠俠既助手,但放係電影裡又會令人感動有點土氣及分薄主角戲份(BATMAN FOREVER就係一個例子),但有賴導演將羅賓化為一個深信蝙蝠俠既年青警察,令呢一位肋手得以重現銀幕.

最可惜男主角係再生池監獄被隱世跌打神醫治埋既劇情有啲兒戲.另外徒手攀爬離開再生池亦有點拖時間及不合理,原本滿身傷患(尤其係因膝蓋問題,而需要科技產品強化活動力),又點可以做得到呢??最括黎講,我都會俾呢齣戲90分~他日出藍光碟三部曲ALL IN ONE,我一定會買黎收藏.

PS:Anne Jacqueline Hathaway絶對會成為新一代女神,我之前有睇過佢做既The Devil Wears Prada,Love and Other Drugs

十號風球-"韋森特"

番完個早更就急急上外母屋企,接幸男同外母一齊搭的士番自己屋企.收戶外太陽傘同雜物架,為行徑飄忽既"韋森特"做好準備.明明話八號球機會唔大,無端端又打得成....

台灣女生放五點,係市中心買啲嘢就番屋企煮飯食,七點幾食食吓飯發現客廳冷氣位又滲水,用廚紙"索"極都係有,表層油漆仲穿埋.....好灰,上次搵鹿仔黎搞完又係咁.無咁心機咁食埋餐飯,跟住入房自閉打機.出番黎個陣見仲有滲水,同人家一齊著住雨褸黎,試用膠袋包住入水位,但都係無改善,於是用花園支伸縮棍頂住塊舊既浴巾黎索.

人家就大覺訓,我就成晚做管理員,個幾兩個鐘就起身換浴巾索水,又用地拖索側門"撇"入既雨水,以免流入士多房同客廳.睡房都有面牆少少滲水,又係用舊浴巾"索"住先.....唔開心新屋都好似危樓咁,好在無跳電...不嬲都唔太鍾意打八號波,因為擔心電單車被吹倒,而家仲要煩滲水,半夜仲上到九號同十號....

PS:晩飯後自閉入房打咗成個幾鐘頭機,卒之都打爆咗隻3DS"忍",齋係跳坑都死咗成個鐘至過到,打大佬又用咗半個鐘黎捉FORMAT同試打法同走位,最後至可以KO有兩次補血既終極BOSS.

兩公婆病住去打邊爐

尋日番早番夜,中間訓醒己好唔舒服,喉嚨勁痛作病,番埋個夜仲謝.本來諗住唔去一早約定既花園酒家火煱,但雄仔話車FOREVER順便載埋我哋一家,於是等埋雄仔同FOREVER家訪,幸男食埋飯仔,先一齊出發去油麻地.

 一家三口坐後排,諗都唔洗諗,等雄仔車我哋出油麻地.泊咗係駿發樓下停車場,行五分鐘左右,會合大隊開餐. 

地點係花園酒家,前身係敦煌,以前細個成日都同屋企人出黎同阿婆阿公飲茶.

主角係傑傑,因為佢離職後,大家都無出黎同佢食番餐,聯誼吓.全場滿坐咁滯,嘈到聽唔到對面講咩~

方姑娘都有黎趁熱鬧,可惜幸男好似唔太認得佢......

百幾蚊任飲任食火煱,你都咪話唔抵,款式多,點都好過係稻香食,起碼肥牛都係任食,啤酒都叫做係嘉仕伯丫.

食到中段,幸男要落地,帶佢落樓下門口位睇鯉魚,幸男開心到唔願走.番到上樓坐低無耐,又話要睇魚魚,結果要人家走一轉,IVAN又走一轉.....我同人家身體不適,提出早走,但傑傑話等多陣,阿嫂攞緊啲禮物俾我哋,結果都係一齊埋單走.回程都係坐雄仔順風車,真係唔該晒,如果我哋自己搭車出黎,一定挨唔住.......

PS:係酒樓樓梯度,我同幸男講"爸爸細個時都係黎呢度飲茶,雖然轉咗老細,但呢條樓梯應該同當年既一樣無更換過",可惜幸男無回應我,只係一心想去睇魚

極小規模之太陽計劃

 呢兩日放假,尋日已WHATSAPP同事們可有興趣晒太陽,結果今日十二點幾再呼籲之下,雄仔同輝BB話OK.本來三個人都算最低成團人數,點知輝仔又話有事做,都係唔黎.一心諗住流局,好在雄仔都話照去,今年既太陽計劃小隊至第一次出擊.

三點半到新墟7仔集合,買啤酒汽水同冰,再上的士去黃金,四點就到埗.我係屋企帶膠桶同沙灘蓆,仲有雪櫃裡既車厘子(多得台灣女生提議). 

以前較易約到主力軍到沙灘,而家各有家室及小朋友,所以難約咗,主要都係依靠新力軍黎入伍成團.其實我每次都好享受去沙灘輕鬆既時間,因為大家少時間一齊坐低交流吓各自既生活同煩惱,以及解決方案及另類見解,最重要係"胡扯"

影咗唔少相SEND俾無黎參加之隊友,以鼓勵大家下次六點左右走人,希望下次會熱鬧啲.

PS:掛住用手機WHATSAPP話輝BB放飛機,唔記得帶銀包出街,重要上埋小巴至知.唯有同司機講話漏咗嘢係屋企要落車,好在只係行咗一個巴士站唔夠,兼司機好人無鬧我運吉.....

十賭九騙

放假係屋企煲DVD,一口氣睇晒賭博默示錄上下集電影,感覺係十賭九騙.男主角(伊藤開司)因為朋友作借貸擔保,而欠下巨債,結果被高利貸老闆(遠藤凜子)帶到帝國集團之地下賭船"希望".

眾人務求翻身,爾虞我詐,因為被淘汰者會淪為地下工人,以償還賭船上既額外賭債.男主角因義氣而淪為地下工人,但又不甘一生為奴不見天日,結果接受"勇者之路"-玩命賭博,以求翻身.經過一輪苦鬥及人性試煉,男主角成功贏出,並獲得巨款,可惜最被拍檔遠藤凜子騙走一大部份.

下集講男主角因賭癮而再淪為地下奴隸,過著不見天日之勞苦生活.因地下骰子賭博欠下債務之45組合力為男主角換得"一日外出券 ",重番地上為組員籌得翻身債項.男主角唯有挑戰帝愛集團既地下巨大彈珠機"沼澤".

本身唔太好賭,所以未能好投入緊張氣氛,反而驚訝於賭博中既騙術.貌似公平靠運氣既彈珠機,釘子既分佈早已令或然率偏差.地台及JACKPOT三連跳台既斜度亦令中奬機會大減.即使係人與人之間既賭博,亦因行騙者既機關及心計而令受騙者落敗.

一次過睇兩套電影,真係幾攰吓,如果劇情可以再緊湊啲就好了~

人人有禮物

今日放假騎羊去觀塘鈴木原廠整車,交低車匙同parts需要,行去apm間百老滙睇吓有無<吸血鬼.林肯>睇,點知無上,於是去paciffic coffee坐.唔知點解唔見有雜誌睇,唯有睇啱啱買既game next,同埋戴住headphone黎打3DS既<忍>.坐咗一個鐘多啲,就係apm度行商舖,目的係蕩到有車攞為止.偶儞一個人行街買嘢都唔錯.

兩點幾打去車行問搞好未,但師傅行開咗要三點至收到車行報完工既電話.今次除咗常規機油及檢查,主打係換電池同風擋.撕開膠紙就開車番入屯門至食下午茶當晏晝個餐.

前個排病到懵,無準備結婚註冊禮物,於是趁今日出開市區,揀咗呢隻手鈪做禮物.SALE姐姐話男女都啱戴,字樣"GIVE LOVE"令我諗起"獻出愛",切合身為人母既台灣女生,亦好啱幸男大個咗,要做一個"給別人幸福之男". 

其實幸男都有禮物,就係長頸鹿度高咭,方便睇住幸男既成長.我係肚位上既蘋果咭仔寫上"幸男,快高長大".

今次整車都幾貴,因為要換電池同風檔.對上一之換電池已經係兩年半前,如果要挨到十月尾出原廠換機油時至換,就會係近三年,所以都係換咗先.至於風擋就用咗六年多,表面多花痕兼一撻撻COATING窿.可惜番到屋企抺個陣至知膠紙積原來係無咗COATING,應該係係廠度太熱又放得耐,膠紙食埋面個層....如果攞車時問一問,可能可以平番幾舊,因為有次零速跌車換死氣喉隔熱板時試過因為花痕有平.

乾物女電影

今日番完夜更,晏晝等埋台灣女生放工就一齊搭西鐵去ELEMENT買飛睇螢之光電影版(因為屯門無,最近都要元朗百老滙),呢次已經係我同人家第四次入戲院捧綾瀨遙場.趕唔切睇四點幾個場平飛,七點半正價飛計埋渣打信用卡八折,共120蚊.

故事講女主角跟新婚丈夫一齊到意大利工幹兼結婚旅行之趣事,其間其實悶場位唔少,可能係要拖至電影既時間長度,平時電視一集都近一個鐘嘛.內容同電視版既螢之光無咩唔同,只係場境變咗係外國,其實租碟睇都得,但話晒都係FANS嘛.

夜晚去咗千両食,元氣既高級版,但味道真係好啲,兩個人食咗二八百蚊,是日精選既清酒煮蜆都二百蚊,總括黎講都係物有所值既~

PS:因為攰得滯,所以無用手機影相...

第一次去開倉買平衫

 今日同楝哥出咗去紅磡工廠區,因為ICE FIRE開倉大平賣.呢次係我第一次去開倉買平衫,人唔算太多,似禮拜六日既百貨公司咁上下.行行吓見有童裝部,順手揀咗對鞋仔俾兆全,聽佢講過下BOB THE BUILDER嘛.

自己都末揀啱心水嘢,就幫幸男揀咗件衫,原價二百尾,而家一百蚊.特意send張相俾台灣女生問意見同size,智能電話配無限數據,真方便~

最後至買咗條短褲俾自己,好在有職員哥哥幫手搵SIZE,其他攤位都係自助式,阿姐只係答擺晒係車面,SIZE有就有,無就無.雖然係平啲,但真係唔係樣樣啱,SIZE又唔足,兼且無得試.埋單三百幾,都算有少少收獲,楝哥就約一千,但一大袋嘢走. 

PS:去工廠區前,同楝哥係係黃埔間椰林閣食個晏,有少少讀書時既感覺,對話當然唔係中學時代既內容啦.

幸男第一次去沙灘

番完早更,近黃昏同台灣生帶幸男搭的士去黃金海岸沙灘玩.太陽唔太猛,唔怕曬親幸男,幸男怕水,喊住要抱,結果要我抱住佢出去浸水,浸下又凌空至笑番. 

最安心都係玩泥沙,人家同幸男一齊"畢",我就間中用水槍射幸男,又俾佢射番我個身.

雖然好攰,但見人家咁開心,幸男又唔洗屈係屋企度,都係值得既,影番張家庭照留念. 

經媽媽教導後,幸男已可以自己忙住玩沙.人家買既塑膠沙灘蓆好似比傳統竹蓆耐用,以前用開既冰袋兼冰種大派用場,大家都有凍飲享用,就連幸男既橙汁都係入面.

夜晚個餐係沙灘隔離既餐廳食,雖然幸男出發前已係屋企食咗飯仔,但都有黐我吔大人既嘢食,尤其係意粉,係咁叫"麵麵".屯門有樣好,就係多沙灘,我地搭的士去黃金,都係$50,半個鐘包到.

PS:係人家既FACEBOOK放咗啲相,阿潘話我隻手遮埋條泳褲邊的話,就似足鹹書封面;BRENDA就話我似全裸.....

睇通宵波

 成班同事一齊入錦繡去堷爺屋企睇歐國盃決賽,雖然大家可以係自己屋企睇無線,但難得可以成班人睇之餘,又唔怕騷擾到屋企人嘛.

兩點九至開波,大家分三個小隊去培爺屋企,我就係最後既十二點半小隊,唔識打牌既我,唯在幫大家影吓相,兼坐梳化叉家電(話晒今日係SLEEPING)... 

除咗打牌等開波,仲有FIFA足球GAME,真係有預演義大利對西班牙一戰. 

後生既一輩當然有合照啦,無分義大利定係西班牙擁躉.

呢幾位英格蘭既忠心球迷,當初佢哋係一心諗住英格蘭有得踢決賽,而家只係趁高興心態.如果今晚真係英格蘭有份踢,台灣女生應該會加入呢張合照.

雖然係多入球,但本人覺得唔太好睇,可能大家都係打穏陣波,兼且意大利換完人就傷出,十人對十一人.西班牙既FANS當然開心,地上最強,齋搓都搓死義大利,無鋒陣,嚴守走位=現代足球.深受動漫薰陶,足球唔係應該熱血,有創造力,全力進攻的嗎?穏守特擊故然係戰術,但過份著重勝利,會否無咗體育精神?

雖然無加時,但CALL三架的士,最後一架車既我同ANNA,賢仔,雄仔及幗欣都近六點至有的士接我哋走,天都光LU,好耐都無試過玩通頂.