OUTBACK 鋸扒

番襯老家食飯,老豆都係開黑啤飲,見市中心開咗OUTBACK, 於是約一齊出黎鋸扒兼飲黑啤.晏晝行去舖頭話約八點枱,點知話無八點,一係六點,再唔係就八點九個字,唯有揀後者.

好似其他西式餐廳咁,有俾小朋友既顏色筆同畫紙,吸引一家大細黎幫襯嘛~

幸男用私家乳酸飲品同大家飲杯,台灣女生個杯都係非酒精特飲,男家成員就飲啤酒.

人客太多,點咗菜都要等成半個鐘至有得食,塊扒都幾大份,焗薯好味但易飽肚,加埋之前個餐湯,結果係飽到上心口,食剩一兩舊.

今晚係用新鏡頭黎出街影相,如果用舊KIT鏡一定影唔到咁清,大光圈新鏡係燈光暗暖既環境下發揮,本人都幾鍾意呢張相-主題為"健力仕爺爺".

老媽每次見到個孫都係咁望住佢,明知影相都係唔望鏡,好難至搵到張係似樣少少既"爺孫嫲"合照.平時每個禮拜都番老家黐餐,偶而都要出黎食吓飯等倆老唔洗又煮又洗.

其實今日我係屋企都好忙,先吸塵拖地洗廁所,再執拾士多房,清埋舊鞋,因為要騰出空位黎擺放爺爺送俾幸男既玩具跑車.

搵到張之前買落既海報,順便用黎粉飾士多房,反正都無地方貼......

拖埋個花園,就俾幸男玩具跑車.幸男始終怕跑車被遙控,要大人推動至心安,不時練習自己一人上落車,搞笑.天氣熱,半個鐘未夠,幸男同婆婆都身水身汗.幸男起初都有喊扭計要繼續玩,但經說教之後都肯同跑車講"拜拜".

親子日

今日傍晚近五點同幸男出去街,用埋風扇仔黎消暑,幸男都熱到未行到出路邊截小巴就要除帽. 

第一站屯門市中心爬蟲館,幸男熱到慒,係公園度好嗲咁攬埋黎要你抱,係館外影相都要提示"笑"至唧啲笑容出黎.入到爬蟲館,幸男好似無咩興趣咁,可能啲烏龜同蚚蝪動作太慢,吸引唔到幸男,唔夠半個鐘就拉我出去門口.....

第二站係圖書館,幸男去到隨手就攞書,但有啲係英文書,就算係中文書,都係倒轉黎睇,望兩望又去攞他書.有個小學歲數既妹妹仔,走埋黎叫我去另一邊攞書俾小朋友,呢邊係大啲既小朋友書.我答佢"我咪大哥哥囉,我想睇嘛".其實只係幸男行去邊我就陪佢去啫,我夠知啲書唔啱佢啦,咁幸男係要行去都無法子......見到有跑車筆盒,幸男又走去搞,好在物主行開咗,館內唔少青少年係度傾計,男既一齊打PSV,女既一齊玩手機.... 

見幸男無咩心機,半個鐘又走人,行去市中心行商場,經過AGNIS B DELICES見有Macaroon賣,於是買咗盒日式風味俾台灣女生享用.一心諗住同幸男父子團,點知團友唔太喜歡景點,好似個領隊屈佢去購物景店,焗留半個鐘咁,真係有啲心翳,下次唔會再帶父子團..........

家常便飯

今日教練同阿嫂黎探幸男兼食住家飯,起初幸男都有啲怕陌生,但玩耐咗就無咩抗拒, 仲可以一齊笑添~

今晚由台灣女生主理,人家放工就由我用愛羊接走去新墟食晏,再行去新墟買餸.有魚有菜有蝦有沙白,都係二百蚊鬆啲咋,好過出街食,起碼唔洗同人迫.

好在飯餸都啱食,如果加多個餸就會更好,不過有雲尼拿雪糕泡芺做甜品,都應該啱啱好既.辛苦人家又煮又洗,好耐都無教練坐底傾吓,以前一放工就去李白吧飲嘢,咩都講一餐,飲到中途去百老滙睇戲,再落吧繼續飲,太夜就係教練家投宿.結咗婚都各有各忙,尤其係教練要OT兼我又要湊仔. 

PS:臨訓前至得手將新買既蔡司鏡加落部NEX-3,試影咗一兩張相,同一SETTING下,啲色都係靚啲,大光圈就更加不在話下啦.希望可以幫幸男影多啲靚相,作成長相簿~

跳躍大搜查線3

今日係屋企睇"跳躍大搜查線"電影版3,感覺比第二集電影版好得多.男主角青島俊作已榮升刑事課系長,並負責灣岸警署之搬遷指揮,由槍房失槍開始故事既序幕,繼而收到網上黑客之通訊,以失槍殺害市民來威脅警方釋放男主角捉拿之重犯.不久新警署被黑客入侵保安系統,做成反鎖兼有毒氣彈.男主角為尋回失槍兼營救被困之同僚,四出查探,結果當然係大團圓結局啦.編劇順利成章咁將以往既犯人故事融入是次電影版,整體黎講無咩悶場,,配角們亦擔當不少笑料,比前兩集好.

男主角為人隨和,即使升咗職都没有半點架子,同事們依舊關係融洽,表面看似冒失烏龍,但總會為重要之事情而執著.雖然我無升職既材料,但如果可以做到男主角咁都唔錯丫~

另一個熟悉既面孔-內田有紀都有係電影出現,無諗過佢忡KEEP得幾好,以前我都幾鍾意佢,可能因為寶礦力廣告既關係.記得當年上映個陣,我都有諗過入戲院睇,不過得好少戲院上.有次出開觀塘CHECK車,中間時間諗住去百老滙PALACE睇,,點知係齋有海報,但未上畫....

崇真書友聚會

今日同崇真書友去尖沙咀既興記食飯,對上一次聚會都應該係舊年十二月WING FUNG個餐飲.揀呢度係貪佢多明星幫襯過,成牆都係簽名,兼且好評如潮.

先黎個冷盆-六小福拼盤,有水魷、豬粉腸、海蜇、豬脷、豬肚、菜芯....內臟冷冷都無想像中咁差,多啲魷魚同海蜇就更好了.

油鹽水浸蜆 ,湯底重楜椒味,小辣,幾好飲,奶白色是否魚湯黎呢??怕辣既我都有飲多碗湯,好味~

今晚既餸都係溫生發板,因為佢幫襯過嘛,年中都應該食唔少好嘢..... 

一人一隻蟶子皇,食到呢味感覺有啲似去咗流浮山食海鮮咁. 

加埋呢隻陳皮蒸鮑魚,仲更加似去咗流浮山,味道鮮味,唔會太韌. 

卒之都食到是晚主菜-炒蟹,睇落似避風塘炒蟹,但其實係金沙炒蟹.

呢款黑黑哋既先至係避風塘炒蟹,都有啲辣,兩款蟹都好好食,而且夠大隻,六個人分都夠,當然叫多一隻就更加好啦~

心水清既都知係少咗david,因為佢唔食得辣兼海鮮,所以佢只係join我地之後飲嘢.由於Hyatt既CHIN CHIN BAR燈光昏暗,所以無影相,其實崇真七子係齊人既,不過Oscar就要去接女友走先,我吔坐到點就call的士散水.能夠一齊飲飲食食,胡扯吓當然開心,尤其係大家平時都各有各忙.以前番學個陣日日見,大個咗係大時大節至聚吓,黎緊會有兄弟團聚會,唔洗等到聖誕至搞聚餐.

PS:無諗過酒店收$500支紅酒都無咩SERVICE, 無decanter都算,但連個架都無,,,,,,開咗支酒只係用個金屬碟仔墊住支紅酒放上枱......................

幸男第一套校服

今日騎羊接台灣女生放工,兜去啟思幫幸男攞校服.幸男好鍾意套校服咁,,試著上身後係咁笑~

換上體育衫,人家叫幸男去照鏡,幸男就跑入我哋房去搵鏡,好似好滿意校服款式同尺碼咁.下個月幸男足歲就正式番幼兒班,雖然無俾幸男上PLAYGROUP,但都叫做正正常常丫,會行會走,會講會笑.呢兩年話耐又唔係,話快又唔係,大家都為照顧幸男付出唔少體力,心機同時間.

十月幸男足兩歲就正式番學,到時生活模式又要轉.以我番晏為例,8點餵幸男食奶,跟住訓多陣.十點就要起身換衫,搭輕鐵帶幸男去外母屋企食晏同送番學,自己就搭番輕鐵番屋企做少少家務或多一陣,再係村口食晏,騎羊番工.接幸男放學就會交俾外母或番完早更既台灣女生.起初都諗過校巴接送,但都幾貴吓,近一千蚊個月,每日四十幾蚊,問過齋坐校車番學,但自行接放學都要收八舊水(來回車費之八成) .係平過自己的士來回既,但有時可能幸男放學後,番早更既人家可能會係外母屋企食埋晚飯至番屋企或直接出街,所以最後都係決定自己辛苦啲....

大假第二天

朝早起身餵幸男食早奶,繼續拆窗簾布洗(書房同幸男房),再拖花園.晏晝接台灣女生放工去藍地食茶餐廳.

因為人家再要番夜,所以晚飯近近地去咗藍地間嘉爵食,無諗過原來係地庫酒樓.菜單簡約無彩圖,最攞命係"越食越平",要食到第十二款至會送一款.....

人家話唔太舒服,想食清啲,所以叫咗"蟹肉西蘭花"同"鯪魚球豆腐煲",飯都無叫,齋飲芬達,埋單$137.味道唔差,價錢都算平,碟頭夠大,電單車仲可以泊正係門外行人路,超方便~

特意影咗張菜單,方便諗定下次食咩,相信再幫襯既機會好大,食飽飽就騎羊送人家番工,自己番到屋企就摷衫褲同PATELLA BAND跑步.路線都係藍地至洪水橋來回,約5km,33分鐘完成.年幾無跑,可以跑足已萬幸,希望呢個大假可以多啲運動~

ps:尋日聽jacky講皮褸會發毛,於時摷番件皮褸望吓,真係發咗....對上一次著係三月睇westlife concer,之後一直都係用衣服袋套住兼掛係房門口.先以乾身化粧綿抺走污物,再以ikea買既皮革清洗劑抺,結果用咗成個鐘處理件褸...

大假

 是日O接住係兩個星期既大假,見咁好天動手拆窗簾布黎洗.朝早八點餵幸男早餐奶開始拆客廳既窗簾布洗,前後都要四機至完成.目標係要係大假內將全屋既窗簾布洗乾淨.

大假夾唔到台灣女生一齊放,所以應該好多時係我拍住外母大人黎湊幸男.我己經同幸男講呢兩個星期我會多時間留係屋企,幸男要行為檢點,否則會嚴懲.

呢個大假裡,本人有好幾個目標:清洗全屋窗簾布,全屋常規清潔X2,抺車打腊,飛影超合金小隊變身,整理PRCC筆記,執屋,去沙灘晒太陽,游水或跑步,帶幸男去圖書館同爬蟲館,瘋狂租碟睇,出荃灣買特價衫褲,行HONG KONG RECORD CD舖,家中hea過一整天....但最重要係搞律師行手續同搵銀行做樓按,因為星期五發展商已通知我吔間屋補地價手續完成,要搞上會事宜.

VF-25F ARMORED PARTS

上網見VF-25F已經有得賣,YAHOO拍賣都有得BID,於是打去幫襯開既玩具舖老闆娘問,原來貨番咗,只係未確認我要隊長機定主角機.老闆娘話佢可以收工坐順風車去泥圍交收,結果我就踩單車出村口俾錢兼收貨.

拆開外盒,卒之都見到個包裝啦,恨咗好耐既ARMORED PARTS太空裝番黎啦~早幾年舊versiom個陣,都有係旺角bid at one代購王訂armored parts,但結果街舖賣七舊幾,我訂番黎連運費要九舊幾,所以無要到,攞番訂金走人.自己都無再買,因為近八舊水可以買兩隻聖衣神話超合金,或一隻獨立玩具.一心諗住會跌價,結果愈黎愈少見兼貴.....

前車可鑑,今次既renewal version出armored parts,我都唔等跌價,不再遺憾!

胃食男

幸男一向都係六點頭輪用膳,但幸男都係會黐我同台灣女生二輪用膳既餸菜,尤其係今晚有至愛既麵條.

今晚係大厨推介:白汁鮮蝦意大利粉,幸男見到自己個碗裡面既意粉,話"好多麵麵喔"~

至於凱撒沙律同白汁藍貝就無幸男份,得佢大啲先啦,怕會肚痛嘛~

晩飯過後,我同人家食雲尼拿雪糕泡芺,幸男又好奇要食,但食到入口又怕凍,擰開塊面.我哋"搣"啲邊位佢食,多酥皮少啲雪糕,幸男先至試多幾口.希望幸男唔好揀飲擇食,其實可以健健康康,開心過日就好了.

老豆壽宴@新樂

今晚同台灣女生帶幸男一齊搭西鐵出佐敦間新樂出席老豆既生日飯兼老媽搬舖誌慶.幸男既表舅公係度做厨,質數同份量當然有保證.

大佬健同阿嫂送咗架TOMY車仔俾幸男,款式為TRANSFORMERS電影裡大皇蜂既車款,可能平時幸男番老家食飯時成日玩大佬健架大皇蜂玩具既關係. 

老豆見到孫仔男男當然開心啦,仲帶埋幸男去另外個兩飲杯,幸男好似好投入祝酒既角色,向賓客揮手.

老媽都開心,因為開席前抱住幸男去同賓客打招呼,開席時坐係幸男隔離位,不時餵孫仔食餸.

除咗壽包外,仲有生日蛋糕食,大家一齊圍住老豆唱生日歌,我當然係用相機影短片留念啦.人大咗,對屋企人既睇法都會唔同,即使以往老媽對老豆唔好,但老豆出面話叫番我同人家番屋企食飯兼帶埋幸男相認,老媽對老豆好似好咗啲.年紀大,屋企人都係見一日,就當賺一日,更何況我一向關照老豆呢. 

散席時我提議CALL的士兜埋兩老番屋企,但搵極都無紅的折扣台冧巴,結果老媽係手袋攞咗張卡片CALL.係樓下等車時,老豆抱住幸男睇魚.幸男整晚表現唔錯,表舅父上黎坐個陣,特意叫幸男送上一杯冰凍啤酒,只係後段時間扭計要去睇魚缸.

自戀刑警

今晚同台灣女生係屋企睇埋之前錄落既"自戀刑警"最一集,結局如人家所料,女主角里惠果然係第一集談及既銀行劫案之幕後策劃人,男主角始終逃唔過戀上犯人既宿命.男主角同自戀同伴合力劫走被押送既女主角,係教堂行完禮,才親手將女主角繩之於法,並承諾會於獄中同女角簽結婚表,再等愛人出獄.

男主角"自戀刑警",曾在警視廳工作，據稱是強行犯搜查系王牌，曾因銀行搶劫案和多摩川河女屍案獲得過警視總監獎,但因退休父親寫書揭發警界黑暗而被下放至

世田谷街警署.禍不單行,與女主角里惠訂婚後於琦玉縣所澤購買了公寓準備結緍,但新屋入伙後,女角以外出買餸煮新居晚餐為借口,就一去不返,將男主角拋棄.

男主角仰慕出版戀愛教學的視頻教材之國際女子短大心理學部教授-栗橋誠,並於"I AM I" 酒吧相識,聯同其他3位常客,組成自戀5人組.每集男主角所愛上既女人,最終都係犯人,查案其間笑料百出,尤其是酒吧與自戀5人組商量案情,"HEY,HEY,HEY","WAIT,WAIT,WAIT"之對白.仲有其中一位任職演員既自戀組員,經常係電視劇演繹自戀刑警,以及壓軸戲-男主身穿白色西裝皮鞋,於黑夜碼頭自戀地跳舞,並以拘捕令及結婚申請表,向女犯人表白.

ps:好耐都無睇搞笑既電視劇,好想睇最近錄既銀魂~