今日晏晝騎羊去元朗喜利商場間傑成錶行,買咗我人生第一隻機械錶.原價$9600,八折後$7680.平時買嘢會睇完番屋企諗清諗楚至買,今次買得咁順手係因為度度都唔見有呢款賣,打去代理行話最近我住元朗傑成錶行有呢款賣,打電話去問價同折頭,SALE姐姐用WHATSAPP俾張實物照過我確認款式.雖然係貴啲,但都真係好啱我心水,較硬朗型.日本SEIKO機械錶都要三四千,俾多少少買隻啱心水既瑞士機械錶好似仲抵啲.
其實五月個陣己係報紙雜誌上見到有ENICAR用呢款錶做廣告,覺得幾靚.問過老豆意見,話最好買TUDOR或ROLEX,較保值喎,我邊有咁多錢丫....行開街就去時間廊同其他錶行睇吓賣幾銀兼現貨,可惜唔見.即使最近係時間廊見有呢個牌子賣,都無呢款,得啲較老成既款式.上星期係市中心既時間廊見到有ENICAR既斯文款,88折近六千有找.用手機影落既相問SALE姐姐,SALE都係叫我打去行問下個MODEL,再睇吓佢可唔可以幫我問價同攞貨.
可能受老豆影響,總覺得男人點都係要有隻機械錶.由細到大,老豆都係戴鋼帶機械錶番工出街,覺得好神奇,點解隻錶唔洗入電池都可以自己行.雖然時下大家都慣用手機黎睇時間,手錶變成非必需品,但有時湊小朋友或影相時唔太方便用手攞電話出黎望,而且好似養成無時無刻都拿住個手機既習慣咁(平時CHECK未接來電同短訊已成日望手提電話).有人話手錶好似行頭咁,要俾人睇,但我覺得邊有人咁特恴望你隻錶丫?件衫靚啲反而人哋仲易睇得出啦.最緊要都係自己鐘意個款同啱自己要求啫.
PS:無諗過元朗間傑成錶行有四十年歷史,唔係SALE姐姐講我都唔知......
