番襯老家食飯,老豆都係開黑啤飲,見市中心開咗OUTBACK, 於是約一齊出黎鋸扒兼飲黑啤.晏晝行去舖頭話約八點枱,點知話無八點,一係六點,再唔係就八點九個字,唯有揀後者.
好似其他西式餐廳咁,有俾小朋友既顏色筆同畫紙,吸引一家大細黎幫襯嘛~
幸男用私家乳酸飲品同大家飲杯,台灣女生個杯都係非酒精特飲,男家成員就飲啤酒.
人客太多,點咗菜都要等成半個鐘至有得食,塊扒都幾大份,焗薯好味但易飽肚,加埋之前個餐湯,結果係飽到上心口,食剩一兩舊.
今晚係用新鏡頭黎出街影相,如果用舊KIT鏡一定影唔到咁清,大光圈新鏡係燈光暗暖既環境下發揮,本人都幾鍾意呢張相-主題為"健力仕爺爺".
老媽每次見到個孫都係咁望住佢,明知影相都係唔望鏡,好難至搵到張係似樣少少既"爺孫嫲"合照.平時每個禮拜都番老家黐餐,偶而都要出黎食吓飯等倆老唔洗又煮又洗.
其實今日我係屋企都好忙,先吸塵拖地洗廁所,再執拾士多房,清埋舊鞋,因為要騰出空位黎擺放爺爺送俾幸男既玩具跑車.
搵到張之前買落既海報,順便用黎粉飾士多房,反正都無地方貼......
拖埋個花園,就俾幸男玩具跑車.幸男始終怕跑車被遙控,要大人推動至心安,不時練習自己一人上落車,搞笑.天氣熱,半個鐘未夠,幸男同婆婆都身水身汗.幸男起初都有喊扭計要繼續玩,但經說教之後都肯同跑車講"拜拜".
