暑期足球班

上星期落雨,所以今日至係幸男既第一堂足球班.八點鐘開始,我番完夜班就搭輕鐵去球場等台灣女生同幸男.幸男尚算留心聽教練既指示,但一眾小朋友未能成功分組,1組,2組,3組,4組,結果全部都係排番一條隊出黎.

暑假無俾幸男參加一個又一個既興趣班,只係報咗呢個$50有十堂(每堂一個鐘)既足球班.

幸男好快就同其他小朋友有講有笑,只係偶而回望我同人家,其餘時間都係投入課堂.

 天涯鏡24-240之下,勉強影到幸男既動作,但真係要太陽之下才可以影得清楚,一係陰暗位就出事.
每十分鐘左右就有飲水時間,大人齋坐係看台都覺得熱,更何況小朋友要走動呢?

幸男唔太慣全程用腳控球,每當追波太耐就不自覺用手截停.希望幸男習慣運動,有健康既體魄,有喜愛既興趣.

爆呔

早更放工,騎羊去燊光攞外賣,U-turn臨入村口牌坊時覺得軚盤好重,好像無法轉彎般.停車查看又唔見前轆被異物卡住,慢速勉強番到屋企.細看之下,發現前呔穿咗個窿,而且開始漏氣.

晏都唔食就打電話俾相熟至愛老闆,報過價後,決定拖車兼換呔.食住晏黎等老闆架尾板車,慢車駛出去路口,連人帶車上升降板.駛入尾倉落側架,落車俾老闆用索帶固定車身,明日下午安在家中等收車.

原本諗住齋換前呔,但怕前新後舊會唔太好,反正都行咗兩年,一次換晒求心安~

PS:左邊係舊年係日本九州神社買既平安符,右邊係之前託朋友係日本買既手信符.

第十六代手機-ALCATEL ONE TOUCH IDOL 3

用咗十一個月既中資法國品牌ALCATEL ONETOUCH IDOL X電池開始渣咗,電量一到40%就會跌得好快.好在我之前已睇中後繼機,就係ALCATEL ONETOUCH IDOL 3,同台灣女生食完晏就帶住幸男一齊買新手機(人家番晏).

領域賣$1990,但職員話得24Gb容量,明明5.5吋係32Gb,唔敢搏,去番百老滙以$1999購入5.5吋全高清芒32Gb.幸男都算乖,只係細細聲撒嬌"咁耐0架",無法啦,等黐芒貼嘛.IDOL 3只得深灰色,無IDOL X咁多顏色揀(紅,黃,黑,白).

話就話5.5吋芒,但功能制係touch screen內,唔似IDOL X咁係芒外.相比之下,IDOL 3唔係大好多,拍埋一齊就多咗一條L邊,都可放到褲前袋.同樣都係$2000有找,今次新機由1.5GHz四核升至1.5GHz八核,內置容量由16Gb升至32Gb,唔怕無位周轉引致load唔到相入電腦.相機方面,感應器改用Sony組件,同樣係1300萬像數,但質素有所提升.番屋企之前埋Sun Mobile換過張sim卡,因為IDOL 3支援4G.

新機行Android 5.0配4G網,上網快咗,唔會load死個web page.好滿意呢部第十六代手機,操控順暢(但可能過半年又開始唔夠力行更新咗既apps),上下倒轉都可以接聽電話,性價比高.最正既係前置上下(左右?)JBL音效喇叭,鈴聲最細都好夠聲(因為2個喇叭?),但無咗漸響及唔震唔響模式,要啲時間適應.~

PS:手機Profile更新:
1st   Ericsson PF768                >黃色 sunday
2nd  Boch 909 Dual                 >灰色 people
3rd  Siemens A40                     >藍色 orange
4th   Ericsson T29                    >銀灰色外殼,紫色panel one 2 free
5th   Ericsson T39                    >灰藍色 one 2 free
6th   Sonyericsson T300          >紅色(紅豆) smartone 
7th   Sonyericsson T630          >黑色 smartone
8th   Nokia 6260                       >銀色 smartone
9th   Nokia 6270                       >黑色(深啡色,鋁金屬外殼) smartone
10th Nokia 6500 Slide             >銀色(鋁金屬外殼) smartone
11th Nokia N86 MP                 >白色 smartone
12th Nokia N8                          >橙色(鋁金屬外殼) smartone
13th Sony Xperia P                  >紅色 nwmobile
14th Sharp SH930                   >白色 nwmobile
15th Alcatel One Touch Idol X >黃色 nwmobile
16th Alcatel One Touch Idol 3 >灰色 Sun Mobile

聚舊@GOCHISO

今晚約咗方大姑拉一齊晚飯聚舊,原來方大姑拉之前已與同事幫襯過K11既GOCHICO.

是日星期五,七點幾去到都要等張枱,但都要成半個鐘至有得入座.我地揀咗個套餐,再加散叫,食品份量較少,但味道都唔錯.

其實呢個聚餐已約咗一段時間,只係各有各忙,結果順延到今晚.

點可以少得相熟牌子既生啤?舊朋友耐無見,話題離唔開工作及生活難題,幸男都算乖,無扭計搗計,有賴人家既陪伴.

呢個芝士薄餅都幾好食,芝士味夠晒濃郁.

幸男差唔多食咗大半份法式牛油烤魚,睇黎真係好啱胃口.

炆牛肉唔錯,只係份量少咗啲,以及肥膏較多.

十年多了,以前一齊跑步游水既方大姑拉,成日都話我負能量.....

行去搭巴士時,見i SQUARE外展出b duck情景,於是從背包拎出相機為倆母子增添合照.

Croissant

市中心開咗間叫" Croissant "既麵包咖啡店,尋日台灣女生為喜愛牛角包既夫君選購咗一個芝士牛角包(其實我係隔離一齊揀).

今朝早餐時間享用時,發覺包中晚有條方型芝士,只係涵概唔到頭尾既角位.Size都算大(一隻手掌咁大),一個包加杯餐飲就啱啱好,食兩個的話會好飽滯.雖然要成$15一個,但都值回票價.

快餐與細味

KFC最近既PIZZA雞,試過真係幾好食.今晚單身漢晚餐,我都騎羊去良景買外賣番屋企食.

平時我都唔飲杯汽水,自己開支細啤酒做餐飲,今晚忽發奇想,係紅酒櫃拎支紅酒出黎,斟定落杯,先至騎羊出門口.行埋超市兼買外賣番到屋企己大半個鐘,紅酒己透夠氣.洗乾淨對手,就投入"快餐與細味"之組合.

香港玩具節2015

今日一家三口搭巴士去九龍灣德褔轉的士去E MAX排隊去香港玩節,我地係室外排咗半個鐘有多至入到室內場地(人流管制?).

對幸男黎講,重點當然係TOMICA車仔同PALRAIL,各小朋友都因大型組合而興奮!

憑入場劵附送之遊戲劵,大小朋友可以玩一種攤位遊戲,第一個係推車仔泊位,第二個就係限定時間內搵出紅色車仔.

我地當然俾晒3張攤位遊戲劵俾幸男,最後項目就係夾車仔,限定時間內夾得愈多,禮物愈高級,結果同前兩項一樣-安慰獎.

除咗TAKARATOMY,仲好幾幾個玩具品牌設攤位,但對像係成年人,只有兩三個係店舖名義擺檔,當中一間有幸男既日版THOMAS火車賣.幸男最近睇完"Day of diesels",咁啱又見到有Flynn同Belle,咁就成為幸男既暑假禮物~

夜晚趕番入屯門市中心,因為約咗師傅一家係OUTBACK食飯.幸男尋晚已經提我地"聽晚同孜孜食飯啊",一見面就各自數自己有幾多架玩具車,坐低又一齊有講有笑.

難得大合照兩小朋友都有望鏡頭,職員哥哥又無手震,只係攞得遠少少,要自己切裁番個較親密集中既感覺出來.多謝師傅特意兜我地一家番屋企,黎緊又會一齊游水喇~

PS:今日最開心既就係影到呢張相,飄逸既頭髮表達出電風扇既涼意.

THOMAS火車路軌2015暑期版

放暑假,幸男同我講"爸爸,你放假幫我砌THOMAS路軌丫".心水清既幸男同婆婆講"都第三日啦,爸爸都未砌路軌哦",今日係大假第四日,清晒啲功課,動手為幸男打造一個綜合路軌.

唔好睇少呢個組合,其實包含咗3盒主題路軌玩具,散組件套裝,及嫲嫲既中古陳例組件(朋友倉貨).

外母見我砌得咁苦惱,就話"你砌得幾多次丫, 出年佢都可能唔玩咯".出年幸男升小學,可能會好大轉變.我同台灣女生都係唔想幸男太多壓力,盡量想幸男有一個多點童真既回憶,培育一顆堅強又溫柔既心.

三人游水,二人雞煲

今日晏晝一家三口去咗銀圍既泳池,因為大假至出現呢個難得組合.幸男玩完水,坐定定0歎凍飲.

放低幸男上外母家,我同人家去西川食雞煲,數落都成個幾兩個月無幫襯了.

其實我同人家都鍾意食海鮮,今晚既串蝦又大又新鮮,所以叫多一碟.

食完飯,上外母家接幸男番屋企.幸男入睡後,人家變身做私人秘書,為我處理網上申報及文書事宜.幾經波折,半夜三點先至搞妥,辛苦人家.

A2青山灣

今日晏晝同台灣女生上外母家接幸男,坐的士去青山灣,因為人家既同事約咗BBQ.水質就真係麻麻,但都要同幸男落水玩下當到此一遊.

小朋友玩泥沙,幸男仲鍾意親手搗毀自己砌既沙城堡.黃昏時間帶幸男去沖身,兼上油換衫.由於近燒烤場,所以叫幸男自己走去燒烤場搵媽媽,我就目送佢接觸到媽媽,先至轉身去沖身換衫.

同事們都係一家大細黎玩,幸男同相熟既玩伴一齊玩水槍同玩具,我被小朋友委任為運水專員.

幸男當然無自己燒嘢食,只係人家燒完塊包,交個道具過幸男影相.

大人們為自己及小朋友而努力,大熱天時BBQ都真係一項挑戰,幸好近海,不至於太悶熱.

最後黎張大合照,數落應該有6個家庭.整體表現,幸男都算乖,只係玩水時整濕咗條褲,好在有後備褲.希望呢個大假可以同人家陪幸男多啲,小朋友既暑假應該開開心心嘛.

愛機夢碎.....千值練METAMOR FORCE超獸機神-斷空我

今日應代理公司既建議,將品質有問題既千值練超獸機神,影下照片,並電郵至代理公司,以便向千值練公司反映及跟進.

真金白銀買既斷空我,慘變"斷檸咗".

當初千值練發表作品超獸機神時,我真的很開心.第一,心愛動畫機械人再次商品化,仲要係完全變形合體;第二,新既外型修定,係TV版與電影版之平衡美學;第三,可動性遠超BANDAI十多年前既超合金魂GX-13超獸機神,全手指可動.

正所謂"希望愈大,失望愈大",原本只係失落於鷹戰機未如BANDAI版般精細,以及人型態較簡陋兼雙腳較短;獅戰車及豹戰車之拳頭没有較好既收納設計.無諗過QC咁差,辜負了苦等多年既我.好難得會有以超獸機神作主題既商品,有別於EVA,鐵甲萬能俠及其他熱門動畫機械人,呢間廠唔靚咪等下一間公司出囉....

網上討論區有不少對千值練METAMOR FORCE超獸機神之投訴,除咗象戰車之三重關節出事(我係其中一個案例),其次係獅戰車及豹戰車變形時會手臂關節因卡塞而斷開,鷹頭插位斷開,甚至象戰車大腿斷裂.....

我唔想信prototype已存在以上既問題,千值練公司還會照樣大量生產,相信係大陸廠房生產時出錯或品質監控不足,以引致是次大型事故.謹盼代理跟進回收有望,不然的話,我就真金白銀買爛貨.............

一家三口去黐餐

成枱都係嘢食,皆因我一家三口上韻詩屋企黐餐,有勞主人家親自下廚.

各自發展後,大家都少聚埋,大家都話幸男大個咗好多.

人面依舊,話題亦如昔日般無所不談.釗要番學考試,較難就時間,韻詩就偶而係CANTEEN相遇.對我黎講,呢餐飯好似番P一齊邊食邊胡扯般親切.

幸男問韻詩有無畫紙同顏色筆,結果畫咗個四色長條.由於長條唔係完全直邊,放係魚缸後,變成彩色既海藻.

PS:晚飯後,大家一齊食台灣女生於聖安娜買既蛋糕作甜品.